Thãgba Kɔ̃tɩnɩ jɔfʋsɔ
12
1 Nɩ yɛkɛ jɔfʋsɔ na dɩɩrɛsɔɔkɛ na nɩrɔnɩ nũu na n cʋʋna bɔɔ fɛʋʋkɛ nɩ hananɩ yire dɩɩraakɛra Thãgba Kɔ̃tɩn anɩ thɩ kɔ̃tɩ̃sɔɔ Thãgba n ha nɩnɩ gɩ do anɩda.Pa bɩɛllɩkɛ teenanɩ Thãgba fʋɔrɛ \ref 2 Fãg 18. 1-6; Dǝt 14. 22-29; Jã 4. 20-24
2 Nɩ bũburone paarsɔɔkɛ caarsɔɔkɛra na weelenɩ n fʋɔrnɩ awɩ thãgbasɔ, kɛ hanɩ gɔ̃gɔ̃ gbanasɔra na gĩgĩisɔɔra na thɩr hu balɔsɔ.
3 Nɩ wɩɛrɛ awɩ bonɩ ji pasɔ, a cʋɔrɛna awɩ bokasɔɔkɛ wɩ gbuuni. Nɩ thiǝ awɩ Asera thɩl gãasɔ, a wɩɛrɛna awɩ thɩl bisɔ, nɩ bũburone awɩ isɔ paarsɔɔraale.
4 Na n phɛl wa casɔɔlee cʋʋ pa Thãgba Kɔ̃tɩn anɩ thãgbaa fʋɔr pa ga. 5 Sɩ nɩ jala na fʋɔrɛ Thãgba Kɔ̃tɩn anɩ Thãgba paaraakɛra a na phiirni anɩ casɔɔ thɩ̃thɩɩn ka wa n wenɩ ɔɔ i gɩ do ɔɔ too pa. 6 Liir dɔ ka na jalanɩ bonɩ thiinǝsɔ na bonɩ kpɩɩsɔ na anɩ bɩɛl yʋɔrsɔ na anɩ khaardasɔ na anɩ nɔ ti thɩ̃sɔ na khaardaasɔɔkɛ nɩ tini kpɩɛrɛ nɩ 'laa, na anɩ nʋ̃ kɔ̃tɩna na nʋ̃ yɩraa caca dabisɔ. 7 Liirǝ na kho gɩ Thãgba Kɔ̃tɩn anɩ Thãgbaa ƴɛra nɛrɛ na anɩ cɔdara nɩ kãkana gɩ the thɩ̃ɛ fɛʋʋraakɛ nɩ 'lɛnɩ anɩ ɲɛ̃ thɔna, kɛ dɔnɩ Thãgba Kɔ̃tɩn anɩ Thãgbaa bɔna.
8 Na n hana cʋʋ paar gɩ hona gɩrɛ sɩ n cʋʋnɩ nɛnɛ̃ gɩrɛ kɩɛr dɩ ntɛ na n cʋʋ mɔ̃ daaraana', 9 gɩdonɩ na dã ka dɔnɩ hɩɩr paar pɩ, na dɩɩraakɛra Thãgba Kɔ̃tɩn anɩ Thãgba n ha nɩna'. 10 Sɩ na iire Jʋrdɛ̃, a na too dɩɩraakɛra Thãgba Kɔ̃tɩn anɩ Thãgba n ha nɩnɩ; a na ha nɛr hɩɩrɛ, a taa nɩ anɩ lãlaardara fɛʋʋkɛ diǝ narnɩ ɲɛna, nɩ toona ha ɩɩr. 11 Paarɩlera Thãgba Kɔ̃tɩn anɩ Thãgba phiirni wa n wero ɔɔ i, le na pɔna Thãgba Kɔ̃tɩnna gɩrɛ mɩ so narnɩ: anɩ bonɩ thiinǝsɔ na anɩ bonɩ kpɩɩsɔ na anɩ bɩɛl yʋɔrsɔ, na anɩ khaardasɔɔkɛ na tini kpɩɛrɛ nɩ 'laa, na thɩ̃ɛsɔɔkɛ na tinəni nʋɔsɔɔkɛ na n sonɩ Thãgba Kɔ̃tɩnna. 12 Dɩ na kãkarɛ Thãgba Kɔ̃tɩn anɩ Thãgbaa ƴɛra nɛrɛ na anɩ bikũusɔ na anɩ bikhɛrsɔ na anɩ thɔ̃daar kũusɔ na anɩ thɔ̃daar khɛrsɔ na Levɩɩ mǝlsɔɔkɛ na hanɩ anɩ pa, gɩdonɩ wa hana thɩa'.
13 Nɩ dɔ bʋrɛ, na n ji anɩ bonɩ thiinǝsɔ sãasɩ paar wo sãasɩ paaraakɛ na yɩna'. 14 Sɩ na n je anɩ bonɩ thiinǝsɔ paarɩkɛ Thãgba Kɔ̃tɩn na phiirni anɩ ca ʋkhaa thɩ̃thɩɩn. Liir dɩbara na n cʋʋ gɩrɛ fɛʋʋkɛ mɩ so narnɩ. 15 Sɩ paar wo paarɩkɛ na hanɩ ado nʋ̃ kho thue fʋ nɩ, nɩ punone kʋ nʋmɩ a kho mɔ̃ Thãgba Kɔ̃tɩn bɔna nɩnɩ dɩɩ ha; tibil wo tibil ado ntɛ phuuri jɔfʋ hʋɛra ado aa phuə', sɩ a punone a kho mɔ̃ wɩ n khonɩ dɛbɩ na nʋ̃ta. 16 Thɩ̃ bɩɛl dɩbara dʋɔn: na n kho tɔmɩna'. Nɩ deere gɩ thɩɩra ɲɔ khaa a faa.
17 Na hana hʋɛ na kho le anɩ cɔ, bɩɛl yʋɔrɩkɛ na tini anɩ bilela na anɩ dɩvɛ̃ phara na anɩ ninə ga, dɩ nʋ̃ kɔ̃tɩnaa caca bisɔɔkɛ na tini gɩ dɩ nʋ̃ yɩraa caca na bisɔɔkɛ na tini ga, dɩ dɩkhaa thɩ̃ gɩɩkɛ dɔnɩ nɔ tidaa dɩ khaardaasɔ gɩɩkɛ nɩ tini kpɩɛrɛ nɩ 'laa na anɩ khaarda kpɩɩsɔɔ ga. 18 Sɩ Thãgba Kɔ̃tɩn anɩ Thãgbaa ƴɛra na kho gɩ paarɩkɛra Thãgba Kɔ̃tɩn anɩ Thãgba na phiirni nɛrɛ na anɩ bikũusɔ na anɩ bikhɛrsɔ na anɩ thɔ̃daar kũusɔ na anɩ thɔ̃daar khɛrsɔ na Levɩɩ mǝlsɔɔkɛ hanɩ anɩ thɩ̃thɩɩn. Dɩ na kãkarɛ Thãgba Kɔ̃tɩn anɩ Thãgbaa ƴɛra gɩ the thɩ̃ɛ fɛʋʋraakɛ nɩ 'lɛnɩ anɩ ɲɛ̃ thɔna. 19 Nɩ jɩɛ dʋ bʋrɛ, bɔɔ fɛʋʋkɛ na hananɩ yire anɩ dʋɔ, na n diinə Levɩɩ mǝlsɔa'.
20 Ɔbɔɔkɛ Thãgba Kɔ̃tɩn anɩ Thãgba na lɛɛnɩ anɩ dɩ pɛlsɔ mɔna a kɔɔ so narnɩ, dɩ a nʋ̃ kho thue fʋ nɩ dɩ nɩ so aa, nɩ n ƴaal nɩ kho nʋʋn, nɩ punone kho mɔ̃ anɩ ƴaal hanɩ. 21 Ado paarɩkɛ Thãgba Kɔ̃tɩn anɩ Thãgba phiirni gɩ dɔ ɔɔ cɔ pa hʋnɔnanɛ ka nɩ hanɩ, nɩ punone kʋ nʋ̃ kɔ̃tɩna agɩbo nʋ̃ yɩra, kɛ Thãgba Kɔ̃tɩn ha nɩnɩ a kho mɔ̃ nɩ n ƴaalnɩ mɔ̃kɛra mɩ sonɩ, ka na hanɩ. 22 Tɩbɩla fɛw punone kho gɩ, a ntɛ phuri jɔfʋ hʋɛra a ntɛ na phə', nɩ punone kho gɩ mɔ̃ wɩ n khonɩ dɛbɩ na nʋ̃taa. 23 Sɩ nɩ jɛna tɔmɩn, na n kho gaa dɛ, gɩdonɩ tɔmɩna yire ha. Dɩ na n gbɛbɩ tɔmɩn kɛ dɔnɩ yire na nʋ̃ʋ a khoa'. 24 Na n kho ga sɩ nɩ deere gɩ thɩɩra ɲɔ khaa a faa.
25 Na n kho tɔmɩn yuurəka', dɩ mɛ̃ na hana daw, nɛrɛ na anɩ mǝlsɔ gɩdonɩ gɩrɛ n danɩ Thãgba Kɔ̃tɩnna nɩ cʋʋ. 26 Sɩ gɩrɛ dɔnɩ anɩ thɩ̃sɔɔkɛ nɩ tini nɩ ha Thãgba, na gɩrɛ dɔnɩ nɔ ti thɩ̃ɛsɔ, nɩ jalana gɩ ka Thãgba Kɔ̃tɩn phiirni da n cɔrɔ. 27 A na ji anɩ bonɩ thiinǝsɔ nɩ jenə nʋ̃ʋ na tɔmɩn Thãgba Kɔ̃tɩn anɩ Thãgbaa bonɩ ji para; sɩ a bonɩ kpɩɩsɔ gɩ, nɩ deere tɔmɩn Thãgba Kɔ̃tɩn anɩ Thãgbaa bonɩ ji para sa khɔ nʋ̃ʋ. 28 Nɩ pɛ thɩmɩaakɛ mɩ n mɩɩ nɩnɩ nũu bɔɔbɔɔ a pɛ gɩ cʋʋrɛra, na hananɛ daw nɛrɛ na anɩ mǝlsɔ bɔɔ khor, gɩdonɩ nɩ cʋʋrɛ gɩrɛ bʋɔnɔnɩ a telena Thãgba Kɔ̃tɩn anɩ Thãgbaa ƴɛra.
29 Thãgba Kɔ̃tɩn anɩ Thãgba na bũburone anɩ ƴɛra caarsɔɔkɛ na weele nɩ sɩ na gba awɩ dɩ na tooro. 30 Ɔbɔɔkɛ Thãgba na bũburõ wɩnɩ anɩ ƴɛra, nɩ jɩɛ dʋ bʋrɛ na n phɛl awɩ cʋʋ pa a lõ pherura ga. Nɩ jɩɛ dʋ bʋrɛ, na n hana bulele awɩ thãgbasɔɔdara aa: « Mɔ̃ wɩ n fʋɔr awɩ thãgbasɔ ya fɛ ? Sɛrɛ dakha sɩ n yaalɛ sɩ cʋʋ awɩ kha.» 31 A na fʋɔr Thãgba Kɔ̃tɩn anɩ Thãgba, na n cʋʋ awɩ kha ga; gɩdonɩ gɩrɛ wɩ n cʋʋnɩ awɩ thãgbasɔɔra, kpɔ̃kpɔrɔ̃ thɩ̃ɛsɔ gɩ Thãgba Kɔ̃tɩnna. Wɩ n gbaarakɛ awɩ bikũusɔ na awɩ bikhɛrsɔ a jinə bonɩɛ awɩ thãgbasɔɔra, a thii wɩ.