13
1 Gɩrɛ fɛʋʋkɛ mɩ so narnɩ, na n ɔ gar a na cʋɛ mɔ̃ gɩ sonɩ. Na n dɛɛnɔ thɩ̃a', na n tiro thɩ̃a'.Sorɩkɛ wɩrɛ n fʋɔrɛnɩ thãgba kpɩɩsɔ na 'lɛnɩ. \ref Mt 24.24; Jer 23.9; 2 Pɩ 2. 1-3; 1 Jã 4.1-6; Gal 1.8
2 A bobon ʋkha agɩbo thɩ yɩda ʋkha ɩɩr dɩkhõo anɩ thɩ̃thɩɩn a so nar jẽ dɩkha agɩbo nɔ kpaa thɩ̃ dɩkhaakɛ na dananɩ, 3 a jẽ dɔɔlera agɩbo nɔ kpaa thɩ̃doolera dã otirǝ mɔ̃ a sonɩ, dɩ yɩ nɩ kpa thãgba kpɩɩsɔraakɛ dɔnɩ thãgbasɔɔkɛ na kɔɔ jɩna' a na fʋɔrɛ wɩ, 4 na n pɛ bobon dɔɔle agɩbo thɩ̃ yɩda dɔɔlee thɩmɩɩ nũǝ', gɩdonɩ Thãgba Kɔ̃tɩn anɩ Thãgba n bɛ nɩ bɩnɛ a hɩɩn ado nɩ nar ɔr Thãgba Kɔ̃tɩn anɩ Thãgba na anɩ ha fɛw na anɩ bɩ̃ fɛw. 5 Na n kpa Thãgba Kɔ̃tɩn anɩ Thãgbara a na maanɛɛ, a na ɔ ɔɔ jɔfʋsɔɔra, a na nɛ ɔɔ thɩmɩɩsɔ nũu. Ɔr dɩbara na n fʋɔr; nɩ ma ɔrra. 6 Sɩ nɩ kɔ bobon dɔɔle agɩbo thɩ̃ yɩda dɔɔle gɩdonɩ a tɔr nɛr pɛr nɩ lana Thãgba Kɔ̃tɩnnaakɛ te nɩnɩ Ejipiti dɩɩra dee dʋʋra. A ƴaalɛ a cʋʋ nɩ nɩ lɛ̃ hʋɛraakɛ Thãgba Kɔ̃tɩn yɩnɩ na n ɩrɛrɔ. Dɩ mɛ̃ na ti puure anɩ thɩ̃thɩɩn na faa.
7 Adorakɛ afɩ õkuun bɩnɔ, kɛ nɩ donanɩ nɩ bɩɛl, agɩbo afɩ bikuun gɩ, a afɩ bikhɛr gɩ, a afɩ khɛr bɩnɔ gɩ, agɩborakɛ afɩ kuun bɩnɔ gɩ a fɩɩl fɩ wolonena aa nɩ fʋɔrɛ thãgba kpɩɩsɔɔkɛ fa jɩnɩ dɩ afɩ thɩ kɔ̃tɩ̃sɔ wa', 8 kɛ dɔnɩ caarsɔɔkɛ diǝ narnɩ thãgbasɔ agɩbo caarsɔɔkɛ hʋnɔnanɩnɩɩ thãgbasɔ, a the ʋ̃ thɩ khu pa a jal thʋ ʋ̃ thɩ khu pa, 9 Fa n tuǝ', fa n pɩɛ nũǝ', fa n jɩɩr bʋɔra fɩʋraka'. Fa n tee pɩɛraa ga, dɩ fa n thiirəə ga. 10 Sɩ fɩ teenanɛ fɩ kʋɔ. Kɔɔ dɔ cacadaar a dʋɔ, tɩbɩla fɛw n kpaan. 11 Nɩ dʋrɛɛ na bokana a kɔ gɩdonɩ a ƴaalɛ a tɔ tibil a hʋnɔna Thãgba Kɔ̃tɩn anɩ Thãgbaakɛ kɔɔ te nɩnɩ Ejipiti dɩɩra dee dʋʋrra. 12 Dɩ mɛ̃ Ɩjɩrayɛl bɩsana fɛw na nɩɛr dɩ maar na fʋ wɩ, dɩ tibil na bir na cʋʋ thɔ̃ kpal caar thale anɩ thɩ̃thɩɩnna'.
13 Ado nɩ nɩɛ dɩ wɩ yɩ dɩ bɩɛlla, dɩɩsɔɔkɛ Thãgba Kɔ̃tɩn anɩ Thãgba ha nɩnɩ nɩ tɔɔrɔ, 14 tɩɩ puunə ɩɩrɛ le a tɔ dʋɔdara pɛr ɩnɩ n fʋɔrɛ thãgba kpɩɩsɔ, kɛ dɔnɩ thãgbasɔɔkɛ na jɩna', 15 nɩ 'lɔ, nɩ kɛbɩrɛ thɩmɩɩra, nɩ bulene tɩbɩla gɩ phu. Ado sobɔr kpɔ̃kpɔrɔ̃ thɔ̃ caarɩle cʋʋ anɩ thɩ̃thɩɩn, 16 Nɩ kʋrɛ dɩdaraale na nʋma fɛw na bajɩna. Sa thiə dɩɩ na gɩrɛ fɛʋʋkɛ hanɩ le dɩɩra. 17 Nɩ kpalmanɛ awɩ lẽle thɩ̃sɔ fɛw a dera awɩ kpa jɛ pa, a thiə dɩɩlera na lẽle thɩ̃ɛsɔɔlera fɛw Thãgba Kɔ̃tɩnɩ irə, dɩɩle n too gɩ do dɩ kpoloo khor kɛ wa birni na mɩ kpɩɩ bã'. 18 Na n gba dɩkha gɩrɛra Thãgba yɩnɩ nɩ kʋɛa ga, gɩ do nɔɔ Thãgba Kɔ̃tɩnɩ nĩkhi khera n cɩ. Dɩ a na jɩ nɛr bʋɔra a na cʋʋ nɩ nɩ ler mɔna a kɔɔ ʋlfɛnanɩ anɩ thɩ kɔ̃tɩ̃sɔ. 19 Thɩ̃ bɩɛl dʋɔn na n nɛ Thãgba Kɔ̃tɩn anɩ Thãgba nũu a na hɩnɛ ɔɔ jɔfʋsɔɔkɛ mɩ n ha nɩnɩ nĩ a na cʋɛ gɩrɛ telenenɩ Thãgba Kɔ̃tɩn anɩ Thãgbaa ƴɛra.