Gɩrɛ na teananɩ cʋʋrɛ a anɩ tibil khiə'
14
1 Mɔ̃ nɩ donɩ Thãgba Kɔ̃tɩnɩ bɩsãsɔ, a anɩ tibil khi, na n lɩɩrɛ tomɩra', na n kpu yʋ suune yɛbʋrɔa'. 2 Tɩɩ phuusɔ nɩ do Thãgba Kɔ̃tɩn anɩ Thãgbara jɔfʋ hʋɛra, dɩ Thãgba Kɔ̃tɩn anɩ Thãgba phiir nɩ tɩbɩla fɛʋʋ thɩ̃thɩɩn thɩɩraakɛ koo nɩ dɔ ɔɔ tookɛ a hɩnɩ kpefɩ.Nʋmaakɛ n sãsɩnɛnɩ na wɩrɛ na n sãsɩnɛna'. \ref Lev 11; Eja 52. 11
3 Na n kho thɩ̃ sãasɩnanɛ yuurǝka'. 4 Nʋmaakɛ na n khonɩ ha wɩrɛ: na, na banaa, na bʋ, 5 na nʋ̃ta, na dɛbɩ, na nʋ̃ ʋrɛ n hɔnɩ dɛbɩ, na hɔ̃ bʋ, na nʋ̃ ʋrɛ n hɔnɩ hɔ̃ bʋ, na hɔ̃ banaa, na fol. 6 Na n khɔ nʋmɩ wo nʋmɩɩkɛ karanɛnɩ nɔ kɩɛrʋ sɩ dɩ bir dɩ ƴɔɔ da n kho. 7 Sɩ nʋ̃ wɩrɛ na teenanɩ nɩ khɔa' dʋɔn nʋ̃ wɩrɛ karanɛnɩ nɔkɩɛr haar sɩ wa n bir ƴɔɔ a na khoa', agɩbo wɩrɛ n ƴɔɔnɩ dɩ wa n kho sɩ wa karã nɔkɩɛrʋa'; wɛ ha wɩrɛ: Yɔɔmɛ̃ na subur, na gɔ̃gɔ̃ subura wɛr, wɩ n ƴɔɔrɛ wer dɩ wa n kho sɩ wa karã nɔ kɩɛrʋa'; Na n sãsɩnɛ wɩ. 8 Na n kho sithoa', a karanɛ nɔ kɩɛrʋ wer sɩ a n bir dɩ ƴɔɔ da n khoa'. Na n sãsɩnɛ wa nʋ̃sɔɔle. Na n kho awɩ nʋ̃a', na n tha awɩ dakhirǝ ga.
9 Nʋ̃ wɩrɛ hanɩ ɲʋɔnnɔ, na n khɔ wɩrɛ hananɩ khɛlla na khʋna. 10 Sɩ wɩrɛ na hananɩ khɛlla na khʋna ga, na n kho wa'; na n sãsɩnɛ wɩ.
11 Na n khɔ 'lomɩ̃ wo lomɩnɩkɛ na n sãasɩnɛna'. 12 Nɩ yɛkɛ wɩrɛ na khona': sɩgbʋraa na duu, na laɲɔ̃ sɩgbʋraa, 13 na sɩgbʋra kpulo bire, na siwir nɛ sɛ, na gbɔɔrɛ awɩ cara fɛw, 14 na sɩkpaa, awɩ cara dɩɩdɩɩ fɛw 15 na siwilǝ̃ na thurõphure, na poo yɔlbuu, na siwir, awɩ cara dɩɩdɩɩ fɛw, 16 na khukhubir, na bɩjɩɛmɩ na hɔ̃ khɔkhɔlʋ 17 na thʋ kpɩl kɔ̃tɩ̃ɩ, na ɲɔ sɩkpaa na khɔkhɔl kperẽ 18 na malãphʋ̃ʋ na kpãkhɛlɛɛ awɩ cara dɩɩdɩɩ fɛw, na khĩdi ɲɔlkʋʋ na dǝǝn. 19 Thɩ̃ yɩra fɛʋʋkɛ hananɩ gbɛla dɩ wɩ ubinǝ na n sãsɩnɛ wɩ na n kho wa'. 20 Na n khɔ 'lomɩn wɩrɛ dɩbara na n sãsɩnɛna'.
21 Na n kho nʋmɩɩkɛ khenǝ'. Nɩ gba hana kpakpalɩɩkɛ hanɩ anɩ dʋɔ a kho, agɩbo nɩ dolone kpakpal hʋ kara. Ne wer Thãgba Kɔ̃tɩn anɩ Thãgbaa tɩɩ phusɔ nɩ do. Na n thɩɩ bũbir na ɔɔ nɩɩ ɩlɛ̃ ɲɔ̃a'.
Jɔfʋ bɩɛl yʋɔr tidaara
22 Yɩɛr wo yɩɛr na n te bɩɛl yʋɔra anɩ lɛ thɩ̃sɔɔra fɛw. 23 Bɩɛl yʋɔrɩɩkɛ na n tini anɩ bilera na dɩvɛ̃ phaara na niinǝ na nʋ̃ yɩra na nʋ̃ kɔ̃tɩnaa caca bisɔɔra, na n khɔ gɩ Thãgba Kɔ̃tɩn anɩ Thãgbaa ƴɛra, paarɩkɛra a na phiirni wa n wero ɔɔ i. Dɩ mɛ̃ na dɩɩr na n cʋ Thãgba Kɔ̃tɩn anɩ Thãgba bɔɔ fɛw. 24 Ado Thãgba Kɔ̃tɩn anɩ Thãgba bɔna nɛr dɩɩ kar dɩ ga do na marɛ na dana anɩ bɩɛl yʋɔra ka Thãgba Kɔ̃tɩn anɩ Thãgba phiirni wa n wɛrɔ ɔɔ iə', gɩdonɩ paar gbaanɛ, 25 nɩ dolone anɩ bɩɛl yʋɔra a fɔrɔ mũsumo a jalana daapaakɛra Thãgba Kɔ̃tɩn anɩ Thãgba phiirni. 26 Dɩ liir na thena mũsumoolera gɩrɛ dãa narnɩ: a na gɩ, a banaa gɩ, a bʋ gɩ, a dɩvɛ̃ gɩ, a ta kpɩɩsɔ gɩ, nɩ kho le Thãgba Kɔ̃tɩn anɩ Thãgbaa ƴɛra nɩ kãkana nɛrɛ na anɩ cɔdara. 27 Sɩ na n diinǝ Levɩɩ mǝlsɔɔkɛ hanɩ anɩ dʋɔa', nɩ tɩnɛnɛ na wɩ, gɩdonɩ wa hana thɩɩ anɩ thɩ̃thɩɩna'.