Hel faarɛ yɛna makoɲɔ makonyɔra
15
1 Yɛna makoɲɔ wo yɛna makoɲɔra, nɩ faa wɩrɛ hana nɩnɩ helʋ a hana wɩ. 2 Dɩ nɩ yɛ mɔ̃ hel faarɛra na hanɩ : ɔbɔɔkɛ wa hulenɩ na yɩ hel faa yɩɛr gɩ Thãgba Kɔ̃tɩnɩ i dʋbɩra, tibil wo tibiliikɛ ɔɔ omɩ hananɩ helu n faa hanaa. A na n khɔɔ ɔɔ omiikɛ hanaanɩ helu a lɩmana'. 3 Fɩ punone khɔɔ kpakpal a lɩma fɩ. Sɩ faga gɩrɛ afɩ omi pemi farnɩ a hanaa. 4 Dɩrakɛ bɔdaa na ha anɩ thɩ̃thɩɩna', gɩdonɩ Thãgba Kɔ̃tɩn na bɔna nɛr jɔɔ dɩɩraakɛ a n ha nɩnɩ nɩ hɩna. 5 Thɩ̃ bɩɛl dɩbara dʋɔn: Na n nɛ Thãgba Kɔ̃tɩn anɩ Thãgba nũu a na cʋɛ ɔɔ jɔfʋsɔɔkɛ mɩ n ha nɩnɩ nĩ. 6 Thãgba Kɔ̃tɩn anɩ Thãgba na bɔna nɛr jɔɔ mɔna a so narnɩ. Dɩ tibil anɩ thɩ̃thɩɩn na hana ƴaalɛ a pema ca kpɩɩra thɩ̃a', nɛr na ka na n pemɩ ca kpɩɩsɔɔra jɔɔ thɩ̃ɛ. Na n kʋmadɩrɛ ca jɔjʋɔ sɩ wa mar na kʋmadɩna'.7 Sɩ ado anɩ omɩ ʋkha hale dɩ ʋkhara a do bɔdaar, dɩɩrakɛra Thãgba Kɔ̃tɩn anɩ Thãgba n ha nɩnɩ, na n puurəə bɩnɛ, aa na ƴaal nar pemɩ paar nɩ tʋɔ̃a'. 8 Sɩ nɩ pemaa na ha bulole thɩ̃doora ɓɔraanɩ. 9 Nɩ dɔ bʋrɛ na n hana kpɩɛr puu anɩ hara a so aa yɛna makoɲɔ yɩɛrɩkɛ dɔnɩ hel faa yɩɛr ha ʋrɛ n dananɩ, a tɔ̃ anɩ omɩ thɩ̃ɛa'. Nɩ dɔ bʋrɛ na n do anɩ omɩ bɔ kʋdaar na kʋ nɩ bʋa' nɩ tʋɔ̃ thɩ̃a'. A na kpisere anɩdara Thãgba Kɔ̃tɩnɩ ƴɛra, dɩ ga pɛ narɛ sor. 10 Nɩ pemaa na haar kpẽgelẽe sɩ ga n sɩ nɩ bɩnɔa' gɩdonɩ gelela na dor nɔɔ dɩ Thãgba Kɔ̃tɩn na pɛ bɔnanɛ anɩ thɔ̃sɔɔra fɛw.
11 Bɔdaar na 'lee anɩ dʋa', gɛr dɔ nɔɔ dɩ̃ ha nɩ jɔfʋʋkɛ ayɩ nɩ hanana ha bulole anɩ omɩnaakɛ dɔnɩ bɔ kʋdaar na ʋrɛra dɔnɩ bɔdaar.
Mɔ̃ fa faanɩ dea wɩ do waya.
12 Ado anɩ omɩɩkɛ dɔnɩ Ebirǝ, a kuun gɩ, a khɛr gɩ a dolõ nar ɔɔbara, a na do ner thɔma yɛna maadõ, sɩ yɛna makoɲɔdaaraale nɩ fagaa a do wayɩ. 13 Dɩ ado na fagʋʋ, na n sɩraa a jal na ɲɛ̃ biirǝ'. 14 Nɩ hanaa khaardaa thɩ̃ɛnaakɛra Thãgba Kɔ̃tɩn anɩ Thãgba bɔna nɩnɩ a ha nɩ: nʋ̃ yɩra na bile na dɩvɛ̃. 15 Nɩ jɛna dɩ dea nɩ kɔɔ do Ejipiti sɩ Thãgba Kɔ̃tɩn anɩ Thãgba ti fn; gɛra dɔ nɔɔ dɩ ma n ha nɩ jɔfʋʋkɛ nĩ. 16 Sɩ a gɩ dã dɩ anɩ dee kuun yɩ ɩna n ƴaal ɩnɩ n the anɩ cɔa', gɩdonɩ ɩnɩ na nɛr na anɩ cɔdara, dɩ gɩ bɔ narɛ ɩnɩ hanɩ anɩ cɔ, 17 nɩ gba sẽbire a gɔnaa nũu, a ɩana lõo a co, sɩ a too a do nar dee khor. Mɛna na cʋʋ na anɩ dee khɛr. 18 Na n do gɩ khe nar mɔ̃ na fagʋʋnɩ da the dee dʋʋra anɩ cɔa', gɩdonɩ a do ner thɔma yɛna maadõ. A dor dɩɩ jɔ baadeedaarɩ thɔ̃ yẽbe balaɲɔ. Nɩ sɩɛraa a the, Thãgba Kɔ̃tɩn anɩ Thãgba na bɔna nɛr anɩ ɲɛ̃ thɔna fɛw.
19 Anɩ caca nʋ̃ keminəəkɛ anɩ nʋ̃ kɔ̃tɩ̃sɔ na anɩ nʋ̃ yɩra na kɔnɩ, nɩ gba wɩ hana Thãgba Kɔ̃tɩn anɩ Thãgba. Na n dona anɩ nasɔɔ caca bi thɔma ga, dɩ na n khabɩ banaa caca bi suunǝ'. 20 Yɩɛr wo yɩɛr na n kho wɩ, nɛrɛ na anɩ cɔdara Thãgba Kɔ̃tɩn anɩ Thãgbaa ƴɛra paarɩkɛra Thãgba Kɔ̃tɩn na phiirni. 21 Sɩ ado nʋ̃ dɔɔ hananɛ tã dɩkha, ado a n sʋʋrɛ agɩbo a yaarɛ, agɩborakɛ tã kpɩɩsɔ haaraarɛ, na n jinǝǝ bonɩɛ Thãgba Kɔ̃tɩn anɩ Thãgbara ga. 22 Nɩ khɔ nʋ̃ dɔɔ anɩ cɔ. Tɩbɩla fɛw punone a kho gɩ, ado ntɛ phuri jɔfʋ hʋɛra a aa phə', wɩ punone kho gɩ mɔ̃ wɩ n khonɩ dɛbɩ na nʋ̃ta. 23 Thɩ̃ bɩɛl dɩbara dʋɔn na n kho awɩ tɔma'; sɩ nɩ deere gɩ thɩɩra ɲɔ khaa a faa.