Pakɩ fɛtɩ cʋʋ thɩmɩɩ \ref Thɩ 12. 1-28; Khɩ 105.5; 114.1
16
1 Abɩbɩa sɩpora, na n cʋɛ Pakɩ fɛtɩ Thãgba Kɔ̃tɩn anɩ Thãgbaa irǝ, gɩdonɩ Abɩbɩ sɩporaalera dɩtɩnɔ, Thãgba Kɔ̃tɩn anɩ Thãgba cʋʋ nɩ dɩ nɩ the Ejipiti dɩɩra. 2 Nɩ je Pakɩ bonɩɛ Thãgba Kɔ̃tɩn anɩ Thãgbara na anɩ nʋ̃ yɩra na anɩ nʋ̃ kɔ̃tɩ̃sɔ paaraakɛra Thãgba Kɔ̃tɩn na phiirni wa n wero ɔɔ i. 3 Fɛtɩ bɔɔle na n kho buruukɛ hananɩ tabɩɩra'. Wire makoɲɔɔ bɩnɔ, nɩ khɔ buruukɛ na hananɩ tabɩɩra', kɛ dɔnɩ khar yɩ buru, gɩdonɩ phananɛ nɩ thena Ejipiti dɩɩra; dɩ mɛ̃ na n jɩna anɩ yi hanana khorr wireekɛ nɩ thenɩ Ejipiti dɩɩra. 4 Wire makoɲɔɔlee bɩnɔ, wa n yɩ tabɩɩr anɩ dʋɔa'. Dɩ nʋmaakɛ wɩ jinǝni bonɩɛ caca wiree dʋɔrɔ, agɩ nʋ̃ na n sɩ a wɩl dɩa'. 5 Na hana hʋɛ a na cʋʋ Pakɩ fɛtɩ dɩkhãa pa kpɩɩ dɩɩraakɛ Thãgba Kɔ̃tɩn anɩ Thãgba na ha nɩnɩ nɩ tɔɔrɔa'; 6 sɩ kãakɛ Thãgba Kɔ̃tɩn anɩ Thãgba na phiirni wa n wɛrɔ ɔɔ i, le na ji Pakɩ bonɩɛ dʋɔrɔ wi lõ bɔɔ, ɔbɔɔraakɛra nɩ thenɩ Ejipiti. 7 Nɩ gbɛba bonɩ ji nʋʋnna gɩ bɩ̃ nɩ kho paaraakɛ Thãgba Kɔ̃tɩn anɩ Thãgba na phiirni, sɩ dɩwɩlɔ duuro, nɩ kɛr nɩ kɔ̃. 8 Wire maadõo bɩnɔ, nɩ khɔ buruukɛ na hananɩ tabɩɩra', sɩ wire makoɲɔ wirera nɩ hanana kpa jɛr Thãgba Kɔ̃tɩn anɩ Thãgbaa irǝ. Na n cʋʋ thɔ̃ dɩkharakɛ ga wiila'.Lɛ thɩ̃ gba fɛtɩ cʋʋ thɩmɩɩ. \ref Khɩ 103. 2; 144.13-15
9 A fʋna wireekɛ na lonɩ bile khar, nɩ fɔ a therra jɩmasɩ makoɲɔ, 10 agɩpɩ nɩ cʋʋ lɛ thɩ̃ gba fɛtɩ Thãgba Kɔ̃tɩn anɩ Thãgbaa irǝ. Khaardaasɔɔkɛ na tini kpɩɛrɛ nɩ 'laa n hana mɔna Thãgba Kɔ̃tɩn anɩ Thãgba bɔna nɩnɩ dɩɩ ha. 11 Nɩ kãkanɛ Thãgba Kɔ̃tɩn anɩ Thãgbaa ƴɛra paaraakɛra Thãgba Kɔ̃tɩn anɩ Thãgba na phiirni wa n wɛrɔ ɔɔ i; nɛrɛ na anɩ bikũusɔ na anɩ bikhɛrsɔ na anɩ thɔ̃daar kona na anɩ thɔ̃daar khɛra na Levɩɩ mǝlsɔɔkɛ na hanɩ anɩ dʋɔ na dakha kpakpala na khilǝ̃bii na khikhɛraakɛ na hanɩ anɩ thɩ̃thɩɩn. 12 Nɩ jɛna dɩ nɩ kɔɔ dor dea Ejipiti dɩɩra, sɩ na hɩnɛ jɔfʋsɔɔkɛra a na cʋɛna gɩ.
Wa too fɛtɩ cʋʋ thɩmɩɩ \ref Neh 8.13-18; Khɩ 116.12-14; Jã 4.36
13 Ɔbɔɔkɛ nɩ gbanɩ lɛ thɩ̃ɛ a lona pɩ, a ti dɩvɛ̃ taan a lona pɩ, nɩ cʋɛ wa too fɛtɩ a cʋɛna wire makoɲɔ. 14 Nɩ kãkanɛ wa too fɛtɩraalera, nɛrɛ na anɩ bikũusɔ na anɩ bikhɛrsɔ na anɩ thɔ̃daar kona na anɩ thɔ̃daar khɛra na Levɩɩ mǝlsɔɔ na kpakpala na khilǝ̃bii na khikhɛraakɛ hanɩ anɩ thɩ̃thɩɩn. 15 Nɩ cʋɛ fɛtɩɩlera a cʋɛna wire makoɲɔ Thãgba Kɔ̃tɩn anɩ Thãgbaa irǝ paaraakɛ Thãgba Kɔ̃tɩn na phiirni; gɩdonɩ Thãgba Kɔ̃tɩn anɩ Thãgba na bɔnanɛ anɩ lɛ thɩ̃ fɛw na anɩ ɲɛ̃ thɔ̃ dɩ na hananɛ daw dɩ ga kar.
16 Yɩɛr wo yɩɛr kona fɛw anɩ cara na kpar a na jɛ balãther Thãgba Kɔ̃tɩn anɩ Thãgbaa ƴɛra paarɩkɛra a na phiirni fɛtɩsɔɔraakɛ dɔnɩ: buruukɛ na hananɩ tabɩɩraa fɛtɩra na lɛ thɩ̃ gba fɛtɩra na wa too fɛtɩra. Wa n jɩɩl Thãgba Kɔ̃tɩnɩ ƴɛbʋrɔ na ɲɛ̃ biirə'. 17 Ntɛ n 'laanɛ mɔ̃ ɔɔ puno hanɩ gɩ mɩɛna mɔ̃ Thãgba Kɔ̃tɩn anɩ Thãgba bɔnaanɩ dɩɩ ha.
Mɔ̃ sogʋʋrdara teenanɩ wa n gʋrɛ sɔ. \ref 2 Kur 19. 5-11; Sokp 14.34; Khɩ 82; 101
18 Nɩ pɩɛr sogʋʋrdara na sɛbɛ kheredara anɩ casɔɔra dɩɩsɔɔra fɛʋʋkɛ Thãgba Kɔ̃tɩn anɩ Thãgba na ha nɩnɩ, wa n gʋʋr anɩ too sɔ na fɩl sarʋ. 19 Na n kɩɩl, kɩɩl gõgolõa'. Na n hɩɩn ƴɩɛ sa bo pɛ tibilǝ ga. Na n tee khaardaa ga, gɩdonɩ khaardaa n yaarɛ tɩɩ kpɛsɛsɔ yinǝ, dɩɩ kʋɛ fɩl sardaarɩ thɩmɩɩ. 20 Na n kpa fɩl sarʋra bɔɔbɔɔ gɩ do nɔɔ nɩ hana yire, nɩ hɩ̃ dɩɩkɛra Thãgba Kɔ̃tɩn anɩ Thãgba na ha nɩnɩ. \ref Thɩ 20.4-6; Det 13. 6-18; Gal 1. 8-9