17
1 Na n ji bonɩɛ Thãgba Kɔ̃tɩn anɩ Thãgbara na na agɩbo banaakɛ hananɩ taan dɩ kho dɩkha gɩraka', gɩdonɩ kpɔ̃kpɔrɔ̃ thɩ̃ɛ gɩ Thãgba Kɔ̃tɩn anɩ Thãgbara.2 A kuun agɩbo khɛr ʋkha anɩ thɩ̃thɩɩn ɩɩr dikhõo a cʋʋ thɩ̃ɛɛkɛ na n danɩ Thãgba Kɔ̃tɩn anɩ Thãgbara ga dɩ ʋkhara dɩɩraakɛ Thãgba n ha nɩnɩ, a kʋɛ Thãgbaa nɔ bɩɛl ʋlfɛ, 3 aa jal a fʋɔr thãgba kpɩɩsɔ, a gburõkhu war, a gburõkhu wirerǝ na sɩporra agɩbo ƴepǝlǝ̃berǝ fɛw, a gbãga gɩrɛ mɩ sonɩ; 4 ɔbɔɔkɛ na nɩɛnɩ thɩmɩɩrɩle, nɩ 'lɔ thɩmɩɩra gɩ hulono, a bulene: sɩɩ do sobɔ thɩmɩɩr gɩ ger bɛ̃? Sobɔr ntɛ cʋʋ thɔ̃ caarɩle bɛ ? A sobɔr kpɔ̃kpɔrɔ̃ thɔ̃ caarɩle cʋʋ Ɩjɩrayɛl dɩɩra, 5 nɩ kpa kuun dɔɔ agɩbo khɛr dɔɔ a jalana dɩ lõfonɔɔ a dʋrɛɛ na bokana a kɔ. 6 Nɩ kɔ ntɛɛle ado tɩbɩla yeɲɔ agɩbo yẽther torore yire. Na n kʋʋ yi tordaar bɩɛlɩ nɔ thɩmɩɩra ga. 7 Yitodarara n kɔɔ dɔ cacadara a na dʋrɛ ntɛ, tɩbla fɛw n bullo wɩ kʋʋ. Dɩ mɛ̃ na ti puure anɩ thɩ̃thɩɩn.
So gɩrɛ wa jalanɩ kɩɩl paar Thãgba fʋɔr cɔ kɔ̃tɩɩna \ref Mal 2.7; Mat 23.2-3; Rom 13.1-2
8 A thɩmɩɩr hale a do tɩɩ kʋr agɩbo sʋʋ agɩbo tibilǝ wɩ pɛ kho sɩɛ, agɩbo thɩ̃ banaanɛ gɩ, dɩ thɩmɩɩrra khɩɩr ka gʋʋrɛra sogʋʋrdararakɛ hanɩ bə̃ dɔɔra, nɩ gba gɩ a jalana paaraakɛ Thãgba Kɔ̃tɩn anɩ Thãgba phiirni. 9 Nɩ jalla le a yɛ Levɩɩ mǝlsɔɔkɛ dɔnɩ bonɩ jidara na so gʋʋrdaarɩkɛ na hanɩ thɔmana ga bɔɔraale, wa gʋʋr nɛr so dɔɔra. 10 Nɩ cʋɛ mɔ̃kɛra wa so narnɩ le paaraakɛra Thãgba Kɔ̃tɩn phiirni. Nɩ nɛ nũu bɔɔbɔɔ gɩrɛraakɛ wa so narnɩ. 11 Nɩ cʋɛ gɩrɛra wɩ mɩɛ nɩnɩ kɩɩl paar na mɔ̃kɛra wɩ sonɩ narnɩ, na n khokhɩa gara'. 12 Tibiliikɛ na pɩɛrnɩ i ƴaalɛ a bo bonɩ jidaarɩkɛ hanɩ le Thãgba Kɔ̃tɩn anɩ Thãgbaa thɔna nũ pɛrɛ agɩbo a bo so gʋʋrdaar nũ pɛrɛ nɩ kɔ ntɛ. Dɩ mɛ̃ na ti puure Ɩjɩrayɛlɩ bɩsanaa thɩ̃thɩɩn. 13 Dɩ a tɩbɩla fɛw nɩɛ, maar na fʋlɛ wɛr, tibil na bir na cʋʋ gaa i ƴaal thɔ̃ɔle bã.
Jamana do jɔfʋ \ref 1Sam 8-10; 16.1-13; 1 Fãg 10.14-29; 11.1; Khɩ 2.6; Nɩr 19.16
14 Ɔbɔɔkɛ na lonɩ dɩɩraakɛ Thãgba Kɔ̃tɩn anɩ Thãgba na ha nɩnɩ, a na gba dɩɩra na tooro, agaboa na yɩ nɩ n ƴaalɛ nɩ pɛr jamana a na n thɔɔ nɩ mɔ̃ gɩ hanɩ caarsɔkɛ diǝ narnɩ thɩ̃thɩɩn. 15 Nɩ pɩɛr jamanaakɛ Thãgba Kɔ̃tɩn anɩ Thãgba na phiirni. A dɔ Ɩjɩrayɛl bɩsaan. Na n pɛr kpakpalɩɩkɛ na dɔnɩ anɩ ca ga a dɔ jamana ga. 16 Sɩ a na n do tibiliikɛ hananɩ gãgona jɔa' dɩ a na n thɔ̃ tɩbɩla wɩ jalla Ejipiti a tha', gɩdonɩ Thãgba Kɔ̃tɩn so narɛ na n kɛr bir dɩɩraala' 17 A na n hana khɛr jɔjʋɔ gɩ cʋgʋʋ a tɔ a khokhɩa Thãgbara ga, a na n hana mũsumo na dɛ gɩ jɔr gɩ kara'. 18 Dɩ ɔbɔɔkɛ a na gbanɩ jamana dʋʋr, a tea jɔfʋ sɛbɛ bonɩ jidararaakɛ dɔnɩ levɩɩ mǝlsɔɔ a khera pɛ sɛbɛra gɩdo ɔɔ thɛthɛɛda. 19 A teenanɛ a hanana gɩ, a na hɩnɛ dɩwɩlʋ koo ɔɔ yi hanana fɛw gɩ cʋgʋʋ a dɩɩr a na n ma Thãgba Kɔ̃tɩn ɔɔ Thãgba, a na n ɔ thɩmɩa fɛʋʋraakɛ thɛnɩ jɔfʋraakɛ, na dɩɩrɛsɔɔrakɛ fɛw a na n pɛ gɩ cʋʋrɛra, 20 gɩ do nɔɔ a na n khǝi dɩbara ɔɔ omɩsɔɔra ga, a na n tɔ khokhɩa jɔfʋsɔɔraaka'. Dɩ mɛ̃ ɔr na ɔɔ bikũusɔ na pʋɔr jamana dʋʋrra Ɩjɩrayɛl dɩɩra.