Gɩrɛ dɔnɩ bonɩ jidaraada \ref Ther 18; Waal 3.24
18
1 Bonɩ jidaraakɛ dɔnɩ Levɩɩ mǝlsɔ na levɩɩ carakɛ bilǝni na 'lɛ thɩɩ Ɩjɩrayɛl ca wɩrɛ sɛnɩɩ kha ga. Thãgba Kɔ̃tɩnɩ bonɩsɔɔkɛ wɩ n thiini dɔɔra na ɔɔ thɩ̃sɔ na n haanɛ wɩ. 2 Wa 'lɛ thɩɩ awɩ omɩsɔɔ thɩ̃thɩɩna'. Thãgba Kɔ̃tɩnɩ thɩ̃ na dɔ awɩda mɔ̃kɛra a so warnɩ. 3 Nɩ yɛ gɩrɛ dɔnɩ bonɩ jidaraada. A Ɩjɩrayɛl bɩsana ji bonɩɛ na na agɩbo banaa, wɩ hana bonɩ jidaar khɩɛrʋ na nɔtɩɛlʋ na bucuu. 4 Na n hana wɩ dakha anɩ caca bile na dɩvɛ̃ phaa na niin na caca suuneekɛ na khabɩnɩ anɩ banasɔɔra. 5 Gɩdonɩ levɩɩ ca dɔ ʋrɛ Thãgba Kɔ̃tɩn anɩ Thãgba phiirni khorr Ɩjɩrayɛl caar fɛʋʋ thɩ̃thɩɩn wa n dɔ thɔma wire fɛw ɔr Thãgba Kɔ̃tɩnna.6 A Levɩɩ mǝl ʋkha ti kpɩɛrɛ a the dɩɩraakɛ a hanɩ le Ɩjɩrayɛl dɩɩra a jal paaraakɛ Thãgba Kɔ̃tɩn phiirni, 7 a punone do le thɔma Thãgba Kɔ̃tɩn ɔɔ Thãgbara mɔ̃ ɔɔ omɩsɔɔkɛ dɔnɩ Levɩɩ mǝlsɔɔkɛ n dɔnɩ le thɔma Thãgba Kɔ̃tɩnɩ ƴɛra hanɩ, 8 a na 'lɛr ɔɔ dɩko gɩ mãkhana weleeda, a bir a ɓã ɔɔ thɩ̃sɔɔraakɛ a na dolonɩ.
Bʋʋr na dɔɔrɛ \ref Lev 20.1-6, 27; 2 Fã 17.15, 17; Efɛ 5.11
9 Ɔbɔɔkɛ na lonɩ dɩɩraakɛ Thãgba Kɔ̃tɩn anɩ Thãgba n ha nɩnɩ, na n phɛl cʋʋ pa kpalaakɛ caarsɔɔle hanana'. 10 Wa n yɩ tibil anɩ pa, a jinǝ ɔɔ bikuun agɩbo ɔɔ bikhɛr bonɩɛ a thii dɔɔra ga. Wa n yɩ tibil a na n bo agɩbo a na n ƴaal jɩ̃ɩsɔ gɩrɛra na ɩnanɩ ƴɛkʋʋlɔ agɩbo a na n cʋʋ dɔdɔɔ thɔma dɩ sidumone ga. 11 Wa n yɩ tibilikɛ n dɔnɩ na sidumone, dɩ tibil gɩɩkɛ n ƴaalɛnɩ bʋraa bʋradarasɔɔra ga. Wa n yɩ tibilikɛ n kpɩɛnɩ khǝ'. 12 Tibilikɛ n dɔnɩ gaa thɔ̃ casɔɔle n kʋrɛ Thãgba Kɔ̃tɩn ƴɔ̃ƴʋɔnɛ. Dɩ ga kpɔ̃kpɔrɔ̃ thɔnaalera Thãgba Kɔ̃tɩn anɩ Thãgba na weero caarsɔɔle anɩ ƴɛ thɩ̃thɩɩn. 13 Nɩ faa anɩbara fɛw Thãgba Kɔ̃tɩn anɩ Thãgbara. 14 Caarsɔɔkɛra na weelenɩ n kpar wɩrɛra n hɩnɛnɩ ƴũu sa sonɩ gɩrɛ na dananɩ na bobonana, sɩ ne wer Thãgba Kɔ̃tɩn anɩ Thãgba pɩɛr nɛr. \ref Ebi 3.1-14; Jer 28; Jã 4.25-29
15 Thãgba Kɔ̃tɩn anɩ Thãgba na tire tibil anɩ omɩsɔɔra a do ɔɔ mɩmɩɩ ɩ̃kha; na n pɩɛ nũu. 16 Gɛr dɔ gɩrɛra nɩ kɔɔ bɩɛlnɩ Thãgba Kɔ̃tɩn anɩ Thãgbara Orɛbɩ gɔ̃gʋɔnnɔ kpa jɛ wire a yɩ aa : «Sa n ƴaal sɩ bir sa n nɩ Thãgba Kɔ̃tɩn asɩ Thãgba wi bã', sa n ƴaal sɩ bir sɩ yɩ dakha dɔ kɔ̃tɩ̃ caaka', a mɛ̃ ga sa khiire.» 17 Dɩ Thãgba Kɔ̃tɩn so marɛ aa : « Gɩrɛ nɩ sonɩ gɩ bɔrɛ, 18 ma tire tibil anɩ thɩ̃thɩɩn a do mɩmɩɩ afɩ kha, dɩ ma thɔnaanɛ ɩ̃ thɩmɩɩsɔ dɩ a na n so narɛ gɩrɛ fɛʋʋkɛ ma n sʋʋraanɩ. 19 Dɩ ado tibil nʋʋr nũu thɩmɩaraakɛ a n mɩɩnɩ ɩ̃ irǝ, mɛr na pɩɛraa sor. 20 Sɩ mɩmɩɩ dɔɔkɛ na kaanɩ ire a na mɩɩ ɩ̃ irǝ thɩmɩaakɛ na thɛnɩ ɩ̃ pa ga, agɩbo a na n mɩɩ gɩrɛ thɛnɩ thãgba kpɩɩsɔɔ pa, wɩ kʋɔ.» 21 Agaboa' na sor anɩ bɩnɔ aa mɔ̃ na jɩ thɩmɩaakɛ na thɛnɩ Thãgba Kɔ̃tɩnɩ pa ga? 22 Ɔbɔɔkɛ thãgbaa mɩmɩɩ mɩɩnɩ Thãgba Kɔ̃tɩnɩ irǝ sɩ ɔɔ thɩmɩɩra na dã a ha ɔmɛ̃a' gɛr n nɛna dɩ Thãgba Kɔ̃tɩn mɩa ga. Ire thãgbaa mɩmɩɩ dɔɔle ka, na n do a kʋ nɩ maara'.