Taa 'lɛ dɩɩsɔ \ref Joj 20; Khɩ 72:14
19
1 Ɔbɔɔkɛ Thãgba Kɔ̃tɩn anɩ Thãgba na bũburonɩ caarsɔɔle sɩ a ha nɩ awɩ dɩ, dɩ ɔbɔɔkɛ na toonɩ awɩ dʋɔsɔ na awɩ cɔnanɔ, 2 nɩ te dɩɩ yẽther dɩɩraakɛra Thãgba Kɔ̃tɩn anɩ Thãgba n ha nɩnɩ nɩ tɔɔrɔ a thɩnɛ kpɩɩ. 3 Nɩ vaarɛ dɩɩkɛra Thãgba Kɔ̃tɩn anɩ Thãgba na ha nɩnɩ vaar paar yẽther, a gbɛbɩrɛ hʋɛsɔ gɩ yɔɔ jaalla. Dɩ mɛ̃ tibil wo tibiliikɛ na kɔnɩ tibil na ca na jal le a na 'lɛ taarɛ. 4 Tibiliikɛ kɔnɩ tibil sɩ ga do a jɩrɛ sa cʋa' dɩ ga do laarɛ a kɔɔ hanaa kɛkɛra ga, ɔr hana hʋɛ a na lõ gaa dɩsɔraale a na 'lɛ yire. 5 Gɩ punone do luu ntɛ jal na ɔɔ alãkha tibil thɩr kuuru, dɩ mɔ̃ a tini kpãkpo a cɩ thɩrʋ, bire kpɩrɛ a 'lɛ ɔɔ alãkha tibiliile dɩ khi, ɔɔ tibiliile hana hʋɛ a ca a lõ dɩ bɩɛla gaa dɩsɔɔraale a taa ɔɔ yi. 6 Dɩ mɛ̃ a hel tiirdaar ɩɩr na nĩkhii a wee ɩ na kpaan a na n 'lii a kʋʋ ado hʋɛ gbaanɛ sɩ ga do a teenanɛ kʋraa ga; gɩdonɩ aa kɔɔ hana ɔɔ alãkha tibiliile laarʋa'. 7 Gɛr dɔ nɔɔ dɩ̃ so nar nɩ te dɩɩ yẽther kɛ na dɔnɩ taa 'lɛ dɩɩ. 8 Ado Thãgba Kɔ̃tɩn anɩ Thãgba lɛɛ anɩ dɩ mɔna a ʋlfɛnanɩ anɩ thɩ kɔ̃tɩ̃sɔ, ado a ha nɩ dɩɩ fɛʋʋkɛ a ʋlfɛna wɩnɩ ɩnɩ n ha wɩ, 9 gɩdonɩ nɩ ɔ jɔfʋ fɛʋraakɛ mɩ ha nɩnɩ nĩ a cʋʋ gɩ bɔɔbɔɔ, a na Thãgba Kɔ̃tɩn anɩ Thãgba dɩ na n ɩɩr dɩwɩlʋ koo ɔɔ hʋsɔɔra, na tire dɩɩ yẽther wo na ɓã caca dɩɩ yẽtheraale. 10 Dɩ a gɩ ha thale, wa kʋ tibilikɛ na hananɩ dɩa' anɩ thɩ̃thɩɩn dɩɩraakɛ Thãgba Kɔ̃tɩn anɩ Thãgba ha nɩna', dɩ mɛ̃ ntɛɛ khi na pɛ nar sora'.11 Sɩ a gɩ dã dɩ tibil hana ɔɔ alãkha tibil laarʋ a nʋɔ a phuurǝǝ a kʋ, aa ca lõ dɩ bɩɛlla ga dɩsɔɔraale, 12 ɔɔ dɩɩ kɔ̃tɩ̃sɔɔ n thɔna tɩbɩla wɩ jal wɩ fʋʋ wɩ ha hel tiirdaar a kʋʋ. 13 A na n kʋ nɩ bʋɔa', dɩ mɛ̃ tɩɩ sar tɔmɩn deere na khu Ɩjɩrayɛl dɩɩra, sɩ nɩ hana daw.
Pɛl thɩmɩ \ref Dǝt 27:17;
14 Ɔbɔɔkɛ na lonɩ dɩɩraakɛ Thãgba Kɔ̃tɩn anɩ Thãgba n ha nɩnɩ gɩ dɔ anɩda, na n gɔ lõ anɩ alãkha tibili pɛlla, kɛ anɩ mama kɔ̃tɩ̃sɔ kɔɔ pɛrna' .
Yi tordaraa thɩmɩ \ref Thɩ 23:1, Khɩ 101:8
15 Yi tordaar bɩɛlɩ thɩmɩ na dã dɩ na pɛ sor tibillǝǝkɛ wɩ yɩnɩ a kʋrɛ tibil, agɩbo dɩpa kɔ̃tɩ̃ dɩkha a cʋʋ agɩbo sopuu dɩkha ga. Dɔ tɩbɩla yeɲɔ agɩbo yẽther n toro yire gɩ nɩna dɩ sobɔr ha thɩ̃doo.
16 A tibil kur sõsor a pɛ tibilǝ aa ɩnɩ tore yire puureraakɛ a cʋʋnɩ sɩ a pɩɛraa sor, 17 tɩbɩla yeɲɔɔlera hanɩ kha sor n jalla Thãgba Kɔ̃tɩnɩ ƴɛra a nɛna so dɔɔ bonɩ jidara na sogʋʋrdaraakɛ n dɔnɩ thɔma ga wiile. 18 So gʋʋrdara n 'lɔ thɩmɩɩra gɩ hulono, a wɩ yɩɛ dɩɩ do sõsor yi tordaara kur a pɛ ɔɔ alãkha tibillə, 19 nɩ cʋɛɛ puureekɛ a kɔɔ ƴaalnɩ wɩ cʋɛ ɔɔ alãkha tibil. Dɩ mɛ̃ na ti puure anɩ thɩ̃thɩɩn. 20 Dɩ wɩrɛ sɛnɩ na nɩɛrɛ wɩ hana gar maar, wa cʋʋ anɩ thɩ̃thɩɩn ga cʋʋ pa puu caale 'lo bã. 21 Na n hana bɔ fʋʋra' : A ntɛ kʋ tibil wɩ kʋɔ, a ntɛ khoro tibil yire, wɩ khoronee yire; a ntɛ kha tibil ɲɩnɛ, wɩ khaa ɲɩnɛ; a ntɛ kha tibil ɲɔ̃ɔ, wɩ khaa ɲɔ̃ɔ; a ntɛ kha tibil nɔɔ, wɩ khaa nɔɔ.