Jɔfʋ ko kɩɩra \ref Ther 10:8-9; 2 Kur32:6-8; Sog 7:3; Khɩ119:113; 2 Tim2:3-4.
20
1 Ɔbɔɔkɛ na thenɩ nɩ kena anɩ lãlaardara kʋʋr, a nɩ yɩ gãgona, na koke hotorosɔ na tɩbɩlaakɛ jʋɔnɔnɩ a jɔ nɩ, na n ma wa' gɩdonɩ Thãgba Kɔ̃tɩn anɩ Thãgbaakɛra te nɩnɩ dɩ nɩ the Ejipiti har kha na nɛrɛ. 2 A kʋʋr na thɔɔ fʋʋr, bonɩ jidaar n tɔr dana a mɩana tɩbɩla. 3 A sɔ war wɔɔ : «Ɩjɩrayɛl sɔrasɛ nɩ pɛ nũu ! Nɩ tɔr nĩ na n dã anɩ lãlaardara nɩ kena wɩ kʋʋr. Nɩ hanana 'lar na n ma wa', na n do haar n fuu nǝ', na n jẽa', 4 gɩdonɩ Thãgba Kɔ̃tɩn anɩ Thãgba har kha na nɛrɛ a tee anɩ sodarara a pɛ nar, a taa nɩ.»5 Agɩpɩ sɔrasɩ kɔ̃tɩna n mɩana sɔrasɛ a sɔ war: «Tibil ʋkha ha kɛ a the a cɔ phaa sɩ aa 'lɛ tooro paa ya ? Ntɛ n kɛra kɔna gɩ do nɔɔ a na n khi kʋʋrra sɩ ʋkha n gba a tooroa'. 6 Tibil ʋkha ha kɛ a thel dɩvɛ̃ thɩra sɩ aa lɛ khʋ̃ caca be paa ya? A kɛra kɔna ɔɔ cɔ gɩ do nɔɔ a na n khi kʋʋrra sɩ ʋkhaa na n khʋ̃a'. 7 Tibil ʋkha ha kɛ a hana wɛdaar sɩ aa hɩɩ paa ya? Ntɛ n kɛra kɔna gɩ do nɔɔ a na n khi kʋʋrra sɩ ʋkha n gba khɛrɩle a hea'.» 8 Agɩpɩ sɔrasɩ kɔ̃tɩnana n birə sɔ sɔrasɛra wo: «Tibil ʋkha ha kɛ dɩ maar fʋʋ dɩ ɲɛ̃ɛ khiirʋ yaa? Ntɛ n kɛra kɔna gɩ do nɔɔ a na n khiir ɔɔ alãkhasɔ ɲɛ̃a'.» 9 Ɔbɔɔkɛ sɔrasɩ kɔ̃tɩnaale na mɩɩnanɩ sɔrasɛ na pɩ, wɩ phire wɩrɛ na dɔnɩ ƴɛkʋla sɔrasɩ gbulonasɔɔra a pɩɛr.
Dɩ sɔbɩ thɩmɩɩ \ref Ther 31; Dǝt 7:1-4,16; Joj 10 na 11
10 Ɔbɔɔkɛ na jalnɩ nɩ kena dɩ dɔɔ, nɩ bulene dɩdara ado wɩ ture a na 'laa awɩbara yɔɔyɔɔ sɩ ga n do sɔa'. 11 Ado wɩ ture na 'laa awɩbara yɔɔyɔɔ, a khɛr dɩ lõfonʋɔsɔ a ha nɩ, dʋɔdaraale fɛw na wure na do dea, wa n do anɩ thɔ̃. 12 Sɩ ado wɩ bor dɩbara 'laarɛ, sa pɩɛr nɩ, nɩ sɔa dɩɩ. 13 Thãgba Kɔ̃tɩn anɩ Thãgba na gba wɛr na dʋ nɩ ɲɔ̃kɔɔ dɩ na kʋʋr kona fɛw na bajɩna. 14 Sɩ khɛra na bɩsana na nʋma na gɩrɛ fɛʋʋkɛ hanɩ le dɩɩra, awɩ thɩ̃sɔ fɛw, nɩ gba hɩna ; gɩdonɩ Thãgba Kɔ̃tɩn anɩ Thãgba hana nɩ. 15 Nɩ cʋɛ mɛ̃ na dɩɩsɔ fɛʋʋkɛ hʋnɔnɛnɩ jɔɔ, kɛ na dɔnɩ dɩɩsɔɔkɛ nɩ tooronɩ gɩrɛa'. 16 Sɩ dɩ gɩrɛ Thãgba Kɔ̃tɩn anɩ Thãgba na ha nɩnɩ dɩɩraale dɩ na hɩ̃, na n sɩ thɩ̃ bɩɛllakɛ na yirǝ'. 17 Nɩ bũburone Hɛtɩɩ mǝlsɔ cacaca na Amɔɔr məlsɔ, na Kanãadara na Perejɩdara na Hɩvɩtɩsɔ na Jebusɩdara mɔ̃kɛra Thãgba Kɔ̃tɩn anɩ Thãgba so narnɩ. 18 Gɩ do nɔɔ wa n dɩɩr nɩ, nɩ phɛl kpɔ̃kpɔrɔ̃ thɔ̃ ca gɩrɛ wɩ n cʋʋnɩ awɩ thãgbasɔɔra nɩ cʋʋ sopuu Thãgba Kɔ̃tɩn anɩ Thãgbara ga.