Kheminəǝkɛ hɛnɩ kuunɩ khĩdi thɩ̃ gba jɔfʋ.
36
1 Makɩɩrɩ bikuun Galaadɩɩ məlsɔɔ kɔ̃tɩ̃sɔ jaal yɩ Mʋɩjɩ na Ɩjɩrayɛl bɩsanaa kɔ̃tɩ̃sɔ a mɩɩna wɩ. Makɩɩrɩ thɩ n dʋɔn Manase, dɩ Jojɛfɩ do Manasee thɩ. Wɛr dɔ kɔ̃tɩnaakɛ thɛnɩ Jojɛfɩɩ məlsɔɔra. 2 Wɩ sor: «Asɩ kɔ̃tɩn, Thãgba Kɔ̃tɩn so farɛ fɩ lɛ lɩɩ a tɩnɛnɛna thɩɩ Ɩjɩrayɛl bɩsana. Thãgba Kɔ̃tɩn so farɛ dakha aa fɩ hana asɩ omɩ Selofɩhadɩɩ thɩ ɔɔ bikhɛrsɔ. 3 Dɩ nɛnɛ̃ a kheminǝǝlera jal he kuun Ɩjɩrayɛl ca kpɩɩra wa kure asɩ caa thɩra wɩ ɓã ca dɔɔraakɛ wɩ henɩ awɩ thɩra. Dɩ ga dor nɔɔ asɩ thɩɩkɛ wɩ ha sɩnɩ n tiro. 4 Dɩ a Ɩjɩrayɛl bɩsanaa jibile yɛ dã awɩ thɩra na fire khorr na do ca dɔɔra wɩ henɩɩda, dɩ thɩɩ na tirore asɩ caa thɩra.5 Dɩ Mʋɩjɩ gbaar gɩrɛ Thãgba Kɔ̃tɩn sʋʋraanɩ a mɩɩ Ɩjɩrayɛl bɩsana ayɩ: Jojɛfɩɩ mǝlsɔ hananɛ hʋɛ. 6 Nɩ yɛ gɩrɛ Thãgba Kɔ̃tɩn sonɩ Selofɩhadɩɩ bikhɛrsɔɔdara: Wɩ punone he kuun dɔɔkɛ dãa warnɩ, sɩ gɩ dɔ awɩ thɩɩ cara. 7 Dɩ mɛ̃ Ɩjɩrayɛl bɩsanaa casɔɔra, ʋ̃ caa thɩ na kur na pɛ ʋra ga, sɩ Ɩjɩrayɛl bɩsana fɛw ntɛ n toona ɔɔ thɩsɔɔ thɩsɔ oti. 8 Ɩjɩrayɛl bɩsanaa casɔɔra, khebir wo khebirikɛ na gbaanɩ ɔɔ thɩɩ thɩ, a teenanɛ a hɛ kuun ɔɔ thɩɩ thɩ kɔna, gɩ do nɔɔ wɛr fɛw bɩɛlbɩɛl ntɛ toona ɔɔ thɩɩ thɩsɔ. 9 Na n kur thɩɩ kpɩɩrakɛ ʋ̃ cara a pɛ ʋ̃ cara ga, sɩ Ɩjɩrayɛl bɩsana fɛw bɩɛlbɩɛl, ca dɔɔ n tɔɔna ɔɔ thɩ.
10 Dɩ Selofɩhadɩɩ bikhɛrsɔ nɩrɛ nũu gɩrɛraakɛ Thãgba Kɔ̃tɩn kɔɔ sonɩ Mʋɩjɩra. 11 Dɩ Maala na Tɩɩrsa na Hogɩla na Mɩlka na Noa, kɛ dɔnɩ Selofɩhadɩɩ bikhɛrsɔ, her awɩ thɩɩ õkuuni bikũusɔ, 12 kɛ dɔnɩ konaakɛ thɛnɩ Jojɛfɩɩ bikuun Manasee mǝlsɔɔ thɩ kɔ̃sɔra dɩ awɩ thɩɩkɛ wɩ 'lɛnɩ too le awɩ thɩɩ cara.
13 Gɛr dʋɔn jɔfʋsɔ na dɩɩrɛsɔɔkɛ Thãgba Kɔ̃tɩn hanɩ Mʋɩjɩ dɩ ha Ɩjɩrayɛl bɩsana Moabɩ bǝ̃ fãasɔɔra, Jʋrdɛ̃ mɩɩr nʋɔra, Jeriko ƴɛbʋrɔ.