Jɔfʋsɔɔkɛ Thãgba 'laanɩ
Bonɩ thiinə
1
1 Le Thãgba cãa waw, Thãgba Kɔ̃tɩn wer Mʋɩjɩ a sʋʋraa: 2 «Sɔ Ɩjɩrayɛl bɩsanana wɔɔ: 'Ɔbɔɔkɛ tibil anɩ thɩ̃thɩɩn ƴaalnɩ a ji bonɩɛ mɛr Thãgba Kɔ̃tɩnna, a punone jinə nʋ̃ kɔ̃tɩ̃ɩ agɩbo nʋ̃ yɩra.3 Ado na ntɛ n jinə bonɩ thiinənə, a 'laanɛ dakʋʋrɩkɛ na hananɩ taana'. A jalana mɛr Thãgba cãa wa lõfonʋɔra gɩ do nɔɔ a 'lɛ mɛr Thãgba Kɔ̃tɩnɩ bɔna. 4 A dɛɛnɛ ɔɔ ɲɔ̃ bonɩ nʋmɩnaa yʋɔ, gɩ do mɛ̃ nʋmɩna gba ɔɔ sopuu, sɩ mɛr Thãgba Kɔ̃tɩn tegʋʋ a faa ɔɔ sopuu a haa dɩɩ do bonɩ ji nʋmɩɩle dɔ nɔɔ. 5 A kurə na ɓolʋla ulebire mɛr Thãgba Kɔ̃tɩnɩ ƴɔɔ, bonɩ jidaraakɛ dɔnɩ Aarɔ̃ɔ bikũusɔ n gba tɔmɩn wɩ nɩna mɛr Thãgba Kɔ̃tɩn sɩ wɩ cal bonɩ ji pa gɛlɔ gɛlɔ wɩ finə, kɛ hanɩ le mɛr Thãgba cãa wa lõfonʋɔra. 6 A tie lʋʋ sa kuree yɩra yɩra. 7 Aarɔ̃ bonɩ jidaarɩ bikũusɔ n pɩɛr dɔɔ bonɩ ji paara ƴũu a pɩɛrɛrɔ dɛɛ. 8 Agɩpɩ wɩ gba nʋ̃ kuurnənə na yʋʋ, na niin, wɩ pɩɛrɔ ƴũu dɛɛraakɛ wɩ kɔɔ pɩɛrnɩ dɔɔra bonɩ ji paara ƴũu. 9 Bonɩdaar n cɔcɔɔnɛ bɩ̃daar thɩ̃ɛ na nɛɛ, bonɩ jidaar n gba a thii fɛw bonɩ ji paara ƴũu. Gɛr dʋɔn bonɩ biləni thiinə, kɛ n hʋnanɩ mɛr Thãgba Kɔ̃tɩn daw.
10 Ado nʋ̃ yɩra ha ntɛɛ bonɩ thiinənə a n jini, a banaa gɩ, a bʋ gɩ, a 'laanɛ dakʋʋrɩkɛ na hananɩ taana'. 11 A kurəə ulebire bonɩ ji pa ɲɔ̃bɔɔra, mɛr Thãgba Kɔ̃tɩnɩ ƴɛbʋrɔ. Agɩpɩ bonɩ jidara, kɛ dɔnɩ Aarɔ̃ɔ bikũusɔ n gba tɔmɩn wɩ cala bonɩ ji pa gɛlɔ gɛlɔ wɩ finə. 12 A kuree yɩra yɩra na yʋʋ na niin, bonɩ jidaar n gba fɛw a pɩɛr dɛɛra ƴũu dɔɔra bonɩ ji paara. 13 Bonɩdaar n cɔcɔɔnɛ bɩ̃daar thɩ̃ɛ na nɛɛ, bonɩ jidaar n gba fɛw a nɩna mɛr Thãgba Kɔ̃tɩn, agɩpɩ a thii bonɩ ji paara ƴũu. Gɛr dʋɔn bonɩ biləni thiinə, kɛ n hʋnanɩ mɛr Thãgba Kɔ̃tɩn daw. 14 Ado 'lomin ntɛ n jinə bonɩ thiinənə mɛr Thãgba Kɔ̃tɩnna, dɔ gɩ do pubi agɩbo kʋlã pubi. 15 Bonɩ jidaar n pɔna 'lominə le bonɩ ji pa ƴɛbʋrɔ, a khɩɛ yʋʋ na ɲɔ̃bi khʋrɛ a kurə, a thiə bonɩ ji paara ƴũu, sa jɛbɩrɛ tɔmɩn bonɩ ji pa horʋra. 16 A te cʋrɛ na ɔɔ sɔ̃sʋ̃ɔ a dɔna le bonɩ ji pa kɩrɔ, wi phã pa billo, kãakɛ wɩ n deernɩ thoo. 17 A pələə na ɲɛ̃ɛ gbɛl thɩ̃thɩɩn, sɩ a na n phʋʋn dɩɩdɩa'. Agɩpɩ a thiəə bonɩ ji paara, dɛɛraakɛ n hɩnanɩ le ƴũu; gɛr dʋɔn bonɩ biləni thiinə, kɛ n hʋnanɩ mɛr Thãgba Kɔ̃tɩn daw.»