ƖJƖRAYƐL BƖSANAA THƖƖR EJIPITI
THƖƖRƐ
ƖJƖRAYƐL BƖSANAA THƖƖR EJIPITI DƖƖRA
Ɩjɩrayɛl bɩsana fire do dea Ejipiti dɩɩra. \ref Jən 46.8-27; Th t t 7. 14-19; Dət. 26.5-6; Khɩ 105.24-25; Sokp 28.15
1
1 Nɩ yɛ Jakɔbɩɩkɛ wɩ n wenɩ dakha Ɩjɩrayɛl, ɔɔ bikũusɔɔ isɔ. Wɛr dɔ wɩrɛ jalanɩ kha na awɩ thɩ Ejipiti dɩɩra. Wɛr fɛw bɩɛlbɩɛl jaal, ntɛ na ɔɔ cɔ ka. Awɩ isɔ ha gɩrɛ: 2 Ribɛ̃, Simeyɔ̃, Levɩ, Juda, 3 Ɩsakaar, Jabʋlɔ̃, Bɛ̃jamɛ̃, 4 Dã, Nɛfɩtalɩ, Gadɩ, Ajɛɛr.5 Jakɔbɩɩ cɔdara fɛw gbɛbɩrɛ ha kpalãther yʋɔr (70). Sɩ Jojɛfɩ kɔɔ har Ejipiti ga bɔɔle.
6 Dɩ mɔ̃ ga pʋɔrnɩ gbe, Jojɛfɩ khire na ɔɔ õkũusɔ awɩ alãkha bara fɛw. 7 Dɩ Ɩjɩrayɛl bɩsana kʋɔn bɩsana, dɩ wɩ ler a jɔr a hana punone dɩ wa n pɛr. Dɩ mɛ̃ dɩɩ hi.
8 Dɩ jamana phaa ɩnɛ a gba dɩɩ. Sɩ jamanaalera na kɔɔ jɩ Jojɛfa'. 9 Dɩ a sor ɔɔ toora ayɩ: «Nɩ yɛ Ɩjɩrayɛl bɩsana mɔ̃ wɩ jɔrnɩ a hana punone a jɔ sɩ. 10 Nɩ dɔ sɩ ƴaal fɩlɛ sɩ cʋʋ wɩ wa n ler na pɛra'. A mɛ̃ ga sɩ kʋʋr ɩɩr, wa hɛlɛ na ma asɩ lãlaardara a na kena sɩ, agɩpɩ wɩ thɩɩr dɩɩra.» 11 Dɩ Ejipitidara phiire thɔ̃ hɩ̃ɩdara a pɛ war, wa n pɛ Ɩjɩrayɛl bɩsanana thɔ̃ khena wa n do. Dɩ mɛ̃ wɩ cʋʋ wɩ dɩ wɩ mɩ Pɩtɔ̃ na Aramɩsɛsɩ dɩɩ, dɩɩ do Faarɔ̃ɔ dɩko thɩɩn pa. 12 Sɩ mɔna wɩ n kpoo warnɩ jɔɔ, ɔmɛna wɩ n ler wa n pɛr, dɩ wa n hi dɩɩ. Dɩ Ejipitidara na n laar wɩ; 13 a tɔ wɩ pɛr dee thɔmana ga do kpãkpalã ga. 14 Wɩ pɛ warɛ thɔ̃ khena dɩɩ jul, a cʋʋ dɩɩ khe war ka, gɛr dʋɔn ja dur, na biriki mɩr, na lɛ thɔma fɛw. Thɔma fɛʋʋkɛ wɩ n pɛ warnɩ, thɔ̃ khe haar gɩ.
15 Bi tɛ khɛra yeɲɔ haleekɛ n tɩɛnɩ Ebirə khɛraa bisɔ. Dɩ bɩɛl na n do Sɩfɩra, sɩ bɩɛl na n do Pʋwa. Dɩ Ejipiti jamana mɩɩna wɛr ayɩ: 16 «A na tɛ Ebirə khɛraa bisɔ, nɩ jɩɛ hɩ̃ɩ bi dɔɔ, ado kũubir gɩ, nɩ kʋɔ, sɩ a khebir gɩ, nɩ sɩɛraa.» 17 Sɩ bi tɛ khɛraale n kɔɔ mar Thãgba. Wa tu a cʋʋ gɩrɛ Faarɔ̃ so warna'. Dɩ mɛ̃ wɩ faa kuuminə na yire. 18 Dɩ jamanaale we bi tɛnaale a bule wɩ: «Aɲe dɔ nɔɔ dɩ na n cʋʋ thɩ̃ɛ thaa, dɩ na n faa kuuminə na yire?» 19 Dɩ wɩ birsee: «Ebirə khɛra na ho Ejipiti khɛra ga. Wɩ hananɛ fãga a jɔ Ejipiti khɛra. Dɩ gɛr gɩ, a wa wal, dɩ sa pɔ, dɩɩ do wɩ kʋɔn dɩbara pɩ.» 20 Dɩ Thãgba cʋʋ bitɛna bɔɔ; sɩ Ɩjɩrayɛl bɩsana ler a hana punone a khɩɩrna dɩ wa n pɛr, 21 Gɩdonɩ bitɛnaale kɔɔ mar Thãgba, Thãgba bɔnanɛ awɩ cɔ kasɔ,
22 Dɩ le Faarɔ̃ kpãkpaan ɔɔ toora fɛw aa wɩ dɔna bibɔrɔsɔ fɛʋʋkɛ dɔnɩ kuuminə ɲʋɔnɔ, sa faa kheminə wer.