THƖ̃Ɛ FƐƲƲ TƆ̃TƲ̃Ɔ PA
Mɔ̃ Thãgba tini thɩɩ
1
1 Caca fʋ paar ƴũu na thɩɩ Thãgba kɔɔ ti. 2 Thɩ khɩɩ na kɔɔ hala', dakhɩɩ gɩ mɔlɔ. Dabirǝ haar gɩ a thi ɲɔ kɔ̃tɩɩna. Thãgbaa thu hãale da n dɛ ɲɔnana ƴũu.3 Dɩ Thãgba so: «Dɔ dahɩrɛ n hale.» Dɩ dahɩrɛ hale. 4 Thãgba yɩrɛ mɔ̃ dahɩrɛ bɔrnɩ. Dɩ a leere dahɩrɛ na dabirǝ dɩɩdɩɩ. 5 Thãgba we dahɩrɛ dɩwɩlʋ sa we dabirǝ dɩtɩnɛ. Dɩ dɩɩ tɩ̃ a wɩl; gɛr dʋɔn caca wire.
6 Dɩ Thãgba so: «Dɔ pa khɩɩ n hale ɲɔnaa thɩ̃thɩɩn gɩ lee ɲɔna. 7 Thãgba cʋʋ pa khɩɩ dɩɩ lee ɲɔnaakɛ hanɩ pa khɩɩra tɩɛr na ɲɔnaakɛ hanɩ pa khɩɩra ƴũu, dɩɩ ha oti. 8 Thãgba we pa khɩɩ ƴũu. Dɩ dɩɩ tɩ̃ a wɩl; gɛr dʋɔn balaɲɔ wire.
9 Dɩ Thãgba so: «Dɔ ɲɔnaakɛ hanɩ ƴũu tɩɛr n gbɛbɩ pabɩɛl sɩ bǝ̃ khɩɩ n yɩr.» Dɩɩ ha oti. 10 Thãgba we bǝ̃ khɩɩle thɩɩ, sa we ɲɔnaale gbɛbanɩ pa bɩɛl, laɲʋɔn. Dɩ Thãgba yɩ gɛr dɩɩ bɔr. 11 Agɩpɩ Thãgba so: «Dɔ thɩɩ n phu hʋ̃ɔ gɩ hana thɩ̃ phuloleekɛ n hananɩ be na thɩraakɛ n sɛnɩ be mɔ̃kɛra awɩ casɔ hanɩ dɩɩdɩɩ.» Dɩɩ ha oti. 12 Dɩ thɩɩ phu hʋ̃ɔ dɩɩ hana thɩ̃ phuloleekɛ n hananɩ be mɔ̃kɛ awɩ casɔ hanɩ dɩɩdɩɩ, na thɩraakɛ n sɛnɩ be mɔ̃kɛ awɩ casɔ hanɩ dɩɩdɩɩ. Dɩ Thãgba yɩ gɛr dɩɩ bɔr. 13 Dɩ dɩɩ tɩ̃ a wɩl; gɛr dʋɔn balãther wire.
14 Dɩ Thãgba so: «Dɔ dahɩrɛ 'laadara n hale ƴũu gɩ lee dɩwɩlʋ na dɩtɩnɛ. Gɩ dɔ jɩ̃ɩsɔɔkɛ na n leanɩ bɔɔsɔ na wiresɔ na yɛnasɔ dɩɩdɩɩ. 15 Dɔ gɩ do dahɩrɛ 'laadara le ƴũu ga n hɩrɛ thɩɩ.» Dɩɩ ha oti. 16 Dɩ Thãgba cʋʋ dahɩrɛ 'laada kɔ̃tɩna yeɲɔ: wire na sɩpor; dakɔ̃tɩ̃ bʋɔ n kʋʋl dɩwɩlʋ ƴɩɛ sɩ dabuu n kʋʋl dɩtɩnɛ ƴɩɛ, a cʋʋ dakha ƴepǝlǝ̃be. 17 Dɩ Thãgba pɛ wɛr le ƴũu wa n hɩrɛnɛ thɩɩ. 18 Wɩ kʋlɛ dɩwɩlʋ na dɩtɩnɛ ƴɩɛ, a lea dahɩrɛ na dabirǝ dɩɩdɩɩ. Dɩ Thãgba yɩ gɛr dɩɩ bɔr. 19 Dɩ dɩɩ tɩ̃ a wɩl; gɛr dʋɔn balanã wire.
20 Dɩ Thãgba so: «Dɔ ɲɔna n hinǝ thɩ̃ ye, dɔ 'lominǝ n ha kɛ thɩɩra wa n ubi ƴũu.» 21 Dɩ Thãgba ti ɲɔ nʋ̃ kɔ̃tɩ̃ dɩkhasɔ, na thɩ̃ yeekɛ n phɛnɩ ɲʋɔn, kɛ ɲɔna hinǝni awɩ cara dɩɩdɩɩ. Thãgba tire dakha gbɛl thɩ̃ caar dɩɩdɩɩ. Dɩ Thãgba yɩ gɛr dɩɩ bɔr. 22 Dɩ Thãgba bɔna wɩ a so: «Nɩ lerra jʋɔnɔ a he laɲʋ̃ɔsɔ. Dɔ gbɛl thɩ̃ɛsɔ dakha n ler wɩ hi thɩɩ.» 23 Dɩ dɩɩ tɩ̃ a wɩl; gɛr dʋɔn balamɔy wire. 24 Dɩ Thãgba so: «Dɔ thɩɩ n hana nʋma, awɩ cara dɩɩdɩɩ: hɔ̃ nʋma na cɔ nʋma na nʋma fɛʋʋkɛ n haalɛnɩ na bɩ̃bãa.» Dɩɩ ha oti. 25 Dɩ Thãgba ti hɔ̃ nʋ̃ caar dɩɩdɩɩ, na cʋɔ nʋ̃ caar dɩɩdɩɩ, na nʋ̃ gɩrɛ n haalɛnɩ na bɩ̃bãa thɩɩra awɩ cara dɩɩdɩɩ. Dɩ Thãgba yɩ gɛr dɩɩ bɔr.
26 Dɩ Thãgba so: «Sɩ te tibil asɩ kha a ho sɩ, a na n puno thʋma laɲʋɔnna na 'lominǝ ƴũu na cɔ nʋma a na n punona thɩ̃ɛ fɛʋʋkɛ hanɩ thɩɩraakɛ, na nʋ̃ gɩrɛ n haalɛnɩ thɩɩra na bɩ̃bãa.»
27 Mɛ̃ Thãgba ti tibil ɔɔ kha. Kuun na khɛr a ti dɩ wɩ hʋʋ.
28 Dɩ Thãgba bɔna wɩ a so war: «Nɩ lerra jʋɔnɔ a he thɩɩ a cʋgɛɛ a jo nar. Na n punone thʋma laɲʋɔnɔ na 'lominǝ ƴũu na nʋma fɛʋʋkɛ n haalɛnɩ thɩɩra na bɩ̃bãa.» 29 Dɩ Thãgba so war: «Na yɩ gaa, mɩ ha nɛr thɩ̃ phulole fɛʋʋkɛ n hananɩ be, na thɩr senanɛ fɛʋʋkɛ n hananɩ be, kɛ hanɩ thɩɩra fɛw, gɩ dɔ anɩ diko. 30 Hɔ̃ nʋma fɛʋʋkɛ hanɩ thɩɩra na 'lominǝ fɛw ƴũu na nʋma fɛʋʋkɛ n haalɛnɩ thɩɩra na bɩ̃bãa, na nʋma fɛʋʋkɛ hananɩ fesue, mɩ ha wɛr hʋ̃ɔ gɩ do awɩ dikor.» Dɩɩ ha oti.
31 Thãgba yɩrɛ thɩ̃ɛ fɛʋʋkɛ a kɔɔ cʋʋnɩ dɩɩ bɔr ka. Dɩ dɩɩ tɩ̃ a wɩl; gɛr dʋɔn maadõ wire.