Mʋɩjɩɩ kɔ̃da \ref Thtt 7.20-22. Ebi 11.23; Mat 10.29
2
1 Kuun bɩɛl gɩ a do Levɩɩ ca, a gba khɛr ɔɔ cara a he. 2 Dɩ khɛrɩle hana pɛmɛr, a kɔ̃ kũubir. Dɩ mɔ̃ a yɩɛnɩ dɩɩ do a bɔrɛ ka, a keruure a cʋʋna sɩpora yẽther. 3 Dɩ mɔ̃ aa punonɩ na keruu bã, a gbaar kuunɩkɛ wɩ lenanɩ 'lɔ pɛ̃ɛ, a gba gudɔrɔ̃ na khuul a calɔ. Agɩpɩ a gbaar bi a pɛr a jalna ker khalbii balɔ, Nɩɩl mɩɩr nʋɔra. 4 Dɩ biilee õkhɛr tɔr jɩɩl ƴɔɔ, sɩ da n hɩɩn gɩrɛ na danaanɩ.5 Dɩ mɔ̃ ga toonɩ gbe, Faarɔ̃ɔ bikhɛr gbune poo ɲɔ hʋʋ na ɔɔ alãkha khebisɔ. Dɩ a gbune, sɩ ɔɔ alãkhasɔ fʋ mɩɩr gẽgerẽ nʋɔ a kpaar wa n finə. Dɩ jamanaa bikhɛrɩle na hɩɩn a 'laa yɩ bi kũu le kalbii balɔ, a thɔ̃ ɔɔ thɔ̃daar khɛr a jala gba. 6 Dɩ a phubire a yɩ le bi, dɩɩ do kũubir gɩ da n khɩɩ. Dɩ bʋɔ fʋʋ birəəle dɩ so: «Ebirəsɔɔ bɩsã gɩ.» 7 Dɩ biilee õkhɛr bule Faarɔ̃ɔ bikhɛrɩle ayɩ: «Ɩ̃ jala ƴaalɛ khɛr bɩɛl Ebirə khɛrara a mamɩ birə a ha fɩ ya?» 8 Dɩ tu: «Ɔɔ, jala!» Dɩ khebirile jal we bii nɩ a ɩna. 9 Dɩ jamanaa bikhɛr sʋʋraa: «Gba biikɛ a na mama. Ma lɩmɩ fɛr gaa lɩmɩ.» Dɩ bii nɩra gbaa da n haan.
10 Dɩ bɔɔkɛ a ɩnɩ a kɔ̃tɩ̃, a gbaarɛ a jalna ha jamanaa bikhɛrra. Dɩ gbaa dɩ do ɔɔ bikuun. Dɩ haa ire Mʋɩjɩ gɩdonɩ a sor ayɩ ɲʋɔnɔ ɩnɩ tii.
Mʋɩjɩ car jal Madɩ̃a dɩɩra \ref Th t t 7.23-30; Ebirə 11.24-26; Jn 1.11
11 Dɩ mɔ̃ Mʋɩjɩ khɔnɩ pɩ, wi bɩɛl a jaal ɔɔ omɩ ebirəsɔɔ pa a yɩ awɩ thɔ̃ khera wɩ n donɩ. Dɩ a yɩrɛ Ejipitidaar bɩɛl fʋɔnɩ ɔɔ omɩ ebirə bɩɛl da n bɩɩr. 12 Dɩ a hɩɩnɛ bilo bilo aa yɩ tibilə', dɩ teeraa a bɩɩr Ejipitidaarɩle a kʋ, a gba puu gbalãkothɩna. 13 Dɩ dɩɩ wɩl da ka a yɩ Ebirəsɔ yeɲɔ dɩ wa n ke awɩ ha. Dɩ bule ʋrɛɛkɛ dɛnɩ ayɩ: «Aɲera fɩ n bɩɩr afɩ omɩ?» 14 Dɩ kuunile birsee: «Amɛ pɛ far fɩ dɔ sar kɔ̃tɩn, a na gʋʋrɛ asɩ so? Fɩ n ƴaalɛ fɩ kʋ mɩ mɔ̃ fɩ kʋnɩ Ejipitidaar gaa bɛ?» Dɩ maar fʋ Mʋɩjɩ dɩ so ɔɔ hara aa: «Jaa wɩ nɩɛrɛ thɩmɩɩra koe!» 15 Dɩ Faarɔ̃ nɩɛrɛ gɩrɛ kɔɔ kanɩ, da n ƴaal a kʋ Mʋɩjɩ. Dɩ Mʋɩjɩ ca da n jal Madɩ̃a dɩɩra, a dã bir bɩɛla a too.
16 Dɩ kuun bɩɛl hale a do Madɩ̃a bonɩ jidaar a hana bikhɛna makoɲɔ. Dɩ ɔɔ bikhɛrsɔɔle jal wɩ cɛ ɲʋɔn wɩ pɛ nʋ̃ ɲɔ ɲɔ paar awɩ thɩɩ nʋ̃sɔ n ɲɔ. 17 Sɩ nʋ̃ khɛ pɔr dã a weele wɩ. Dɩ Mʋɩjɩ ɩɩr a teero a cɛ ɲʋɔn a pɛ nʋmanaale dɩ wɩ ɲɔ. 18 Dɩ ɔbɔɔkɛ wɩ birni awɩ thɩ Rewɛlɩ pa, a bule wer: «Mɔ̃ dɔ kɩrʋ dɩ nɩ ɩ̃ nĩ kɔrɔ?» 19 Dɩ wɩ birsee: «Ejipitidaar bɩɛl taa sɩ nʋ̃ khɛɛ ɲɔ̃kɔɔ, sa bul sɩ a cɛ ɲʋɔn pɛ asɩ nʋ̃sɔɔra.» 20 Dɩ bule ɔɔ bikhɛrsɔ: «Ka kuunna ha? Aɲe gɩ na ɩnaa ga? Nɩ jala wɩɛ ɛna a kho dikor.»
21 Dɩ Mʋɩjɩ ture a too kuunilee pa dɩ gba ɔɔ bikhɛr Sefora a haa dɩ he. 22 Dɩ Sefora kɔ̃ kũubir dɩ Mʋɩjɩ haa ire Gɛɛrsɔn, kɩrʋ dʋɔn: «Kpakpal mɩ do kɩɛr;» gɩdonɩ a sor kpakpal ɩnɩ do dɩɩraakɛra ɩnɩ hanɩ.
Thãgba wer Mʋɩjɩ a thʋ̃ɔ