Thãgba phiire Mʋɩjɩ a taa ɔɔ too \ref Th t t 7.30-34; Thɩ 2.23-25; Am. 7.14-15; Dət 32.3; Thɩ 4.28-5.4
3
1 Mʋɩjɩ n kɔɔ khɛ ɔɔ thɛɛ Jeturookɛ dɔnɩ Madɩ̃a gbõdaarɩ nʋ̃sɔ. Wi bɩɛl a kpar nʋma a jalna bena bə̃ kparaa, sa jal dã Thãgbaa gɔ̃gɔnaakɛ wɩ n wenɩ Orɛɛbɩ. 2 Dɩ le Thãgba Kɔ̃tɩnɩ thɔ̃thɔ̃ thui nɩnaa ɔɔbara le dɔ lɩnanɛna thɩr bi thɩ̃thɩɩn. Dɩ Mʋɩjɩ yɩrɛ thɩr buurə n lɛnɩ dɔɔ sɩ a n hɩ̃a'. 3 Dɩ so ɔɔ hara: «Ma fire na hɩɩn gaa nɔ kpaa thɩ̃ caakɛ ɩ̃ jɩ gɩrɛ dɔnɩ nɔɔ dɩ thɩr buurə na n hɩ̃a'.» 4 Dɩ mɔ̃ Thãgba Kɔ̃tɩn yɩɩnɩ da n fi sɩ a jɩɩ hɩɩn, a wɩɩrɛ le thɩr bu thɩ̃thɩɩn aa: «Mʋɩjɩ! Mʋɩjɩ!» Dɩ tu: «Mɛr ha ʋ.» 5 Dɩ sʋʋraa: «Fa n wɔrɔ̃ kɩɛra'; fʋʋrɛ nɛfaa nɛɛra, gɩdonɩ paarɩkɛ fɩ hanɩ pa phuu gɩ.» 6 Sa bir so: «Mɛr dɔ afɩ thɩ kɔ̃tɩ̃ Abɩrahamɩ Thãgba, Ɩjakɩɩ Thãgba, na Jakɔbɩɩ Thãgba.» Dɩ Mʋɩjɩ thi ƴɩɛ gɩdonɩ maar fʋʋrɛ Thãgbaa hɩɩna. 7 Dɩ Thãgba Kɔ̃tɩn so: «Mɩ yɩrɛ ɩ̃ too bɔgaarra le Ejipiti dɩɩra. Mɩ nɩrɛ awɩ hulẽbiikɛ thɛnɩ kpooreraakɛ wɩ n kpoo warnɩ. Mɩ jɩrɛ awɩ ha hel. 8 Mɩ gbune ɩ̃ taa wɩ Ejipitidaraa ɲɔ̃kɔɔ, sɩ ɩ̃ cʋʋ wɩ, wɩ the wɩ jal dɩɩraakɛ bʋɔnɔnɩ a pɩɛrna, ka naƴɩlɛ̃ na thʋʋr n celnɩ, bəənəəkɛ Kanãadara, na Hɛtɩɩ məlsɔ, na Amɔɔr məlsɔ, na Perejɩdara, na Hɩvɩtɩsɔ, na Jebusɩdara hanɩ. 9 Ɩjɩrayɛl bɩsanaa hulẽbi jʋʋnɛ a dã mɩ, dɩ mɩ yɩrɛ kpooreekɛ Ejipitidara n kpoo warnɩ, 10 nɛnɛ̃, mɩ n thɔ̃ fɛr Faarɔ̃ɔ pa, jala cʋɛ ɩ̃ too Ɩjɩrayɛl bɩsana wɩ the Ejipiti.» 11 Dɩ Mʋɩjɩ so Thãgbara: «Amɛ mɛrkɛ do a na jal Faarɔ̃ɔ pa, a na cʋʋ Ɩjɩrayɛl bɩsana dɩ wa the Ejipiti?» 12 Dɩ Thãgba birsee: «Ma har kha na fɛrɛ. Dɩ jɩɩnɩkɛ fa jɩnanɩ dɩ mɛr n thɔna fɩ dʋɔn: Ɔbɔɔkɛ fa cʋʋnɩ tɩbɩlaale dɩ wa the Ejipiti, gɔ̃gʋɔnaakɛ na ji mar bonɩɛ.» 13 Dɩ Mʋɩjɩ so Thãgbara: «Ma jaal wer Ɩjɩrayɛl bɩsanaa pa, a na so war nayɩ: "Anɩ thɩsɔɔ Thãgba thɔna mɩ anɩ pa," sɩ a wɩ bule mɩ mɔ̃ afɩ i n do ya, mɔ̃ ma so?» 14 Dɩ Thãgba so Mʋɩjɩra: «Mɛr dʋɔn ʋrɛɛkɛ dʋɔnɩ.» Sa bir so: «Birsene Ɩjɩrayɛl bɩsana thakɛ ayɛ: «Ʋrɛ n dɔnɩ “Mɛr dʋɔn” thɔna mɩ anɩ pa.» 15 Dɩ Thãgba bir so Mʋɩjɩra: «Mɩa Ɩjɩrayɛl bɩsanana thakɛ a yɛwɔɔ: "Thãgba Kɔ̃tɩn anɩ thɩsɔɔ Thãgba, kɛ dɔnɩ Abɩrahamɩ Thãgba, Ɩjakɩɩ Thãgba na Jakɔbɩɩ Thãgba, thɔna mɩ anɩ pa. Aa ɔr dɔ ɩnɩɩ i waa khorr. Aa ɔ iikɛ wa n wena nɩ thɩ kʋɔn wo thɩ kʋɔna fɛw." 16 Nɛnɛ̃, jala a kpa Ɩjɩrayɛl kɔ̃tɩna a gbɛba sa sɔ: "Thãgba Kɔ̃tɩnɩkɛ dɔnɩ anɩ thɩsɔɔ Thãgba, kɛ dɔnɩ Abɩrahamɩ Thãgba na Ɩjakɩɩ Thãgba na Jakɔbɩɩ Thãgba, nɛna mɩ ɔɔbara sa so mar, aa ɩnɩ kpɩɛrna nɛr, ɩnɩ yɩrɛ gɩrɛ fɛʋʋkɛ wɩ n cʋʋ nɩnɩ Ejipiti. 17 Dɩ a yɩ ɩna cʋʋ nɛr dɩ na the kɩɛr, ka nɩ hanɩ gɩrɛ bɔ gaarɛra ɩnɩ n jalna nɩ dɩɩraakɛ dɔnɩ Kanãadara na Hɛtɩɩ məlsɔ, na Amɔɔr məlsɔ, na Perejɩdara, na Hɩvɩtɩsɔ, na Jebusɩdaraa dʋɔ, dɩɩraakɛ naƴɩlɛ̃ na thʋʋr n celnɩ." 18 Dɩ wa pɛ fɛr nũu, dɩ mɛ̃ na jal kha na kɔ̃tɩnaale na yɩ Ejipiti jamana, a na sʋʋraa: "Thãgba Kɔ̃tɩnɩkɛ dɔnɩ sɛr Ebirəsɔɔ Thãgba nɩna sɛr ɔɔbara. Hana sɩ hʋɛ sɩ ɩɩr balãther sɩ jal sɩ jiirəə bonɩɛ le bəənə." 19 Mɩ jɩrɛ dɩ Ejipiti jamana na tu na sɩ nar dɩ na jal, saagado fãga ɲɔ̃ɔ a yɩ dɩɩ thaaraa gaa ga. 20 Dɩ gɛr gɩ ma gar ɩ̃ ɲɔ̃ Ejipitira, a na bɩɩrʋʋ na ma kʋ thɩ̃ɛsɔ dɩɩdɩɩ, agɩpɩ a na faa nɛr dɩ na jal. 21 Ma cʋʋrɛ dakha dɩ Ejipitidara na khɛr nar haar wɩ cʋʋ nɩ bɔɔ, dɩ mɛ̃ na thena ɲɛ̃ biirə'. 22 Ɩjɩrayɛl khɛra fɛw bɩɛlbɩɛl n bɩɛlnɛ awɩ cɔ khuda khɛra, na khɛr ʋrɛraakɛ wɩ hananɩ kha cʋɔrɔ, thɩ̃ɛsɔɔkɛ wɩ cʋʋnanɩ dɛ bulo, na dɛ, na kẽkena a tɔ bɩsana. Dɩ mɛ̃ na phʋʋn Ejipitidara.»