4
1 Dɩ Mʋɩjɩ bir so: «Wa pɛ mɩ haara', dɩ wa pɛ mɩ dakha nũuə'. Wa sor a nayɩ fɛr Thãgba Kɔ̃tɩn na kɔɔ nɩna mɩ afɩbara ga.» 2 Dɩ Thãgba Kɔ̃tɩn bulee: «Aɲe fɩ fʋrɔ ɲɔ̃kɔɔ?» Dɩ tu: «Gbʋʋl gɩ.» 3 Dɩ so: «Dɔna thɩɩra.» Dɩ dʋna thɩɩra. Dɩ gbʋʋlɩle debi a do sii. Dɩ Mʋɩjɩ ca. 4 Dɩ Thãgba Kɔ̃tɩn sʋʋraa: «'Laanɛ ɲɔ̃ɔ a fʋɔnɛɛ sʋʋ.» Dɩ 'laa ɲɔ̃ɔ a fʋ. Dɩ siile bir debi a do gbʋʋl ɔɔ ɲɔ̃kɔɔ. 5 Dɩ Thãgba so: «Gɛr dɔ gɩrɛ na nɛna wɩnɩ dɩ wa pɛr haar dɩ mɛr awɩ thɩ Abɩrahamɩ Thãgba, Ɩjakɩɩ Thãgba, na Jakɔbɩɩ Thãgba, kɔɔ nɩna fɛr ɩ̃ɩbara.» 6 Sa bir sʋʋraa: «Gba ɲɔ̃ɔ a tɔ kũkuno.» Dɩ Mʋɩjɩ gbaar ɲɔ̃ɔ a to kũkuno, sɩ na ti, dɩɩ hana pala phɩ̃ɩphɩ̃ɩphɩ̃ɩ a ho mɩlɛ, dɩɩ do gbuule gɩ. 7 Dɩ Thãgba so: «Birə tɔ ɲɔɔna kũkuno.» Dɩ toro sa ti dɩ ɲɔ̃ɔ bir bɔr. 8 Dɩ bir sʋʋraa: «Ado wa pɛ fɩ haara', dɩ wa therna caca jɩɩnɩla' wa pɛrɛ pɩpɩɩdaakɛ haar. 9 Dɩ a wa pɛrakɛ jena yeɲɔɔkɛ haara', a bo afɩ thɩmɩɩ nũu pɛrɛ, cɛ Nɩɩl mɩɩr ɲʋɔn a deere thɩɩra. Dɩ ɲʋɔnɩle fa deernɩ na debire na do tɔmɩn.»10 Dɩ Mʋɩjɩ so Thãgba Kɔ̃tɩnna: «A! Kɔ̃tɩn, ma do tibilikɛ n punonenɩ thɩmɩa dɩ̃ mɩa'; a fʋna mɔ̃ mɩ kɔɔ 'lunɩ a dana nĩ, na bɔɔraakɛ fɩ fʋnɩ dɩ fa n mɩɩna mɩ, thɩ̃ɛ na deba'. Ɩ̃ nɔ n mar. Ma n puno thɩmɩa dɩ̃ mɩa'.» 11 Dɩ Thãgba Kɔ̃tɩn bulee: «Amɛ hana tibil nʋɔ? Dɩ amɛ n cʋɛ tibil dɩ ma nʋɔ agɩbo dɩ nʋʋr, da n yɩ agɩbo dɩ yaar? Ga do mɛr Thãgba Kɔ̃tɩn gaa? 12 Nɛnɛ̃ dɩphã jala. Mɛr na haan kha na fɛrɛ, dɩ ma dɩɩr fɛr gɩrɛ fa sonɩ.»
13 Dɩ Mʋɩjɩ bir so: «A! Kɔ̃tɩn, mɩ n bɩɛl fɛr, thɔna tɩɩ kpɩɩ.» 14 Dɩ le nĩkhii fʋ Thãgba Kɔ̃tɩn Mʋɩjɩra dɩ so: «Afɩ õkuun Aarɔ̃ɔkɛ dɔnɩ Levɩɩ ca, na halaa? Mɩ jɩrɛ, or wer n mɩɩrɛ cabɩ cabɩ. Dɩrakɛ a har hʋɛra da n ɩ̃. Aa yɩ fɩ ga daaraarɛ jɔɔ ka. 15 Dɩ fa mɩɩnaanɛ a na sʋʋraa gɩrɛ a na sonɩ. Sɩ mɛrɛ ma har kha na nɛrɛ fɛw bɩɛlbɩɛl, dɩ ma dɩɩr nɛr gɩrɛ na cʋʋnɩ. 16 Dɩ mɛ̃ a na tee fɩ na mɩɩna tɩbɩla. Ɔr na gbaan afɩ nɔ sɩ fɩ hʋʋraa Thãgba. 17 Sɩ gbʋʋlɩle, gba fɔrɔ, a do far nɔ kpaa thɩ̃ cʋʋdaa.»
Mʋɩjɩ kɛrɛ da n bir Ejipiti \ref Thɩ 2.15-23; Matt 2.20-21; Thɩ 18.1-5
18 Dɩ Mʋɩjɩ gba jal, sɩ ɔbɔɔkɛ a kɛrnɩ pɔ cʋɔrɔ ɔɔ thɛɛ Jeturoo pa, a sʋʋraarɛ: «Ma kɛrɛ na jal na yɩ ɩ̃ omɩsɔ Ejipiti; ɩ̃ jɩ ado wɩ hananɛ yire.» Dɩ birsee: «Jala na ha ɩɩ.»
19 Dɩ Thãgba Kɔ̃tɩn bir so Mʋɩjɩra le Madɩ̃a dɩɩra ayɩ: «Kɛra birə Ejipiti, gɩdonɩ wɩrɛ fɛʋʋkɛ n ƴaalɛnɩ wɩ kʋ fɩ wɩ khiire.» 20 Dɩ le Mʋɩjɩ kpa ɔɔ khɛr na ɔɔ bikũusɔ, a cʋʋ wɩ dɩ wɩ jʋʋn kũkənənə a kɛr dɩ wa n bir Ejipiti. Mʋɩjɩ fʋrɔrɛ gbʋʋlɩkɛ Thãgba kɔɔ sʋʋraanɩ a gba fɔrɔ.
21 Dɩ Thãgba Kɔ̃tɩn sor Mʋɩjɩra: «Mɩ ha fɛr punone dɩ fa cʋʋna nɔ kpaa thɩ̃ caar dɩɩ dɩɩ ɔbɔɔkɛ fa birni Ejipiti, cʋɛ gɩ Faarɔ̃ɔ ƴɛra. Sɩ mɛrɛ ma cʋʋrɛ ɔɔ ha dɩ ga khɩɩr, dɩ a na tu na sɩ nar dɩ na tha'. 22 Dɩ fa sʋʋraarɛ a nayɩ: «Mɛr Thãgba Kɔ̃tɩn sɔ: “Ɩjɩrayɛl bɩsana dʋɔn ɩ̃ bikuun, ɩ̃ caca bi gɩ.” 23 A faga ɩ̃ bikuun a jal a do mar thɔma, a aa fagʋʋa', ma kʋrɛ ɔɔ bikuun, ɔɔ caca bi.»
24 Ɔbɔɔkɛ wɩ hanɩ hʋɛra dɩ wa n cɔ, Thãgba Kɔ̃tɩn kɔɔ pɔr Mʋɩjɩra da n ƴaal a kʋʋ. 25 Dɩ ɔɔ khɛr Sefora gba dapaara bokaarɩkɛ n khɛnɩ a kurnə ɔɔ bikuun khʋ̃ʋ, a gba lorɩle a thʋna ɔɔ ko nɔɔ, sa so: «Tɔmɩn kuun fɩ do mar.» 26 Dɩ Thãgba Kɔ̃tɩn sɩ Mʋɩjɩra. Khʋ̃ kureelera dɔ kɩrʋ Sefora sonɩ: «Tɔmɩn kuun gɩ.»
27 Dɩ Thãgba Kɔ̃tɩn mɩɩna Aarɔ̃ ayɩ: «Jala caanɛ Mʋɩjɩ bəənə.» Dɩ Aarɔ̃ jal a caanʋʋ le Thãgbaa gɔ̃gɔna, a palʋʋ. 28 Dɩ Mʋɩjɩ mɩgʋʋ thɩmɩa fɛʋʋkɛ Thãgba Kɔ̃tɩnɩkɛ thɔnaanɩ kɔɔ sʋʋraanɩ, na nɔ kpaa thɩ̃ɛsɔɔkɛ a sonɩ a cʋɛ. 29 Dɩ wɛr yeɲɔ gba jal a kpa Ɩjɩrayɛl bɩsanaa kɔ̃tɩ̃sɔ fɛw a gbɛbɩ pa bɩɛl. 30 Dɩ Aarɔ̃ gba thɩmɩa fɛʋʋkɛ Thãgba Kɔ̃tɩn kɔɔ sonɩ Mʋɩjɩra a mɩɛ wɩ, sɩ dɩ Mʋɩjɩ cʋʋ nɔ kpaa thɩ̃ɛ awɩ ƴɛra. 31 Dɩ wɩ kɔɔ pɛrɛ haar, a jɩ dɩ Thãgba Kɔ̃tɩn kpɩɛrna wɛr awɩ nɩwɛra, dɩ a na taa wɛr. Dɩ wɩ gburõkhure a fʋɔrʋ.