Mʋɩjɩ na Aarɔ̃ Ejipiti jamanaa pa. \ref Thɩ 3.18-19; 1.8-14; 6.9-12; 2 Kur 32.13-19; Th t t 14.22
5
1 Agɩpɩ Mʋɩjɩ na Aarɔ̃ gbaar jal Faarɔ̃ɔ pa a sʋʋraa: «Thãgba Kɔ̃tɩn, kɛ dɔnɩ Ɩjɩrayɛlɩ Thãgba sɔ aa fɩ faa ɩnɩɩ too wɩ jal bəənə wɩ cʋʋ fɛtɩ ɩnɩɩ irə.» 2 Dɩ Faarɔ̃ birse wɩ: «Amɛ dʋɔn Thãgba Kɔ̃tɩn dɩ ma nɩɩ nũu, a na faa Ɩjɩrayɛl bɩsana dɩ wa jal? Ma jɩ ntɛ dɔnɩ Thãgba Kɔ̃tɩnna', dɩ ma faa dakha Ɩjɩrayɛl bɩsana dɩ wa jala'.» 3 Dɩ wɩ sʋʋraa: «Sɛr Ebirəsɔɔ Thãgba nɛna sɩ ɔɔbara. Ha sɩ hʋɛ, sɩ ɩɩr sɩ cɔna wire yẽther, sɩ jal bəənə, sɩ ji bonɩɛ Thãgba Kɔ̃tɩn, asɩ Thãgbara, dɩ mɛ̃ a na gba kho mananɛ agɩbo bajɩna na kʋʋrna sa'.» 4 Dɩ Ejipiti jamanaale so war: «Mʋɩjɩ na Aarɔ̃ wei, aɲera nɩ n cʋʋ tɩbɩla wɩ faa thɔma? Nɩ birə anɩ thɔna.5 Nɛnɛ̃, wɩ kanɩ jɔr dɩɩra, gɛra nɩ n pɩɛr wɩ thɔ̃ dʋʋr?»
Faarɔ̃ tɔr Ɩjɩrayɛl bɩsanaa thɔ̃ a dɛɛnɔ̃.
6 Ga wiilera Faarɔ̃ wer Ejipitidaraakɛ dɔnɩ thɔ̃ hɩ̃ɩdara, na Ɩjɩrayɛl bɩsã wɩrɛ wɩ tini pɛr dɩ wɩ do ƴɛkʋla, a ha wɩ jɔfʋ thakɛ ayɩ: 7 «Na n bir na ha tɩbɩlaale hʋ̃ɔ wa n mɩna biriki, mɔ̃ nɩ n kɔɔ ha wɩna'. Wɛr thɛthɛ n jala dɩbara na palanɛ. 8 Sɩ nɩ dɔ wa n mɩ biriki nɔ bɩɛlɩkɛra wɩ n kɔɔ mɩnɩ cacara, na n tiro thɩ̃ɛa'. Wɩ n khaalɛ, gɛr gɩ dɩ wɩ so, wɩ hanɩ hʋɛ ɩnɩ n jal ɩnɩ n ji bonɩɛ ɩnɩɩ Thãgbara. 9 Nɩ jɩɛ tɔ awɩ thɔ̃ a dɛɛnɔ̃, gɩ do nɔɔ wa yɩ ƴɩɛ a na kpɩɛrna awɩ sõso thɩmɩsɔɔla'.»
10 Dɩ Ejipiti thɔ̃ hɩ̃ɩdaraale na Ɩjɩrayɛl bɩsanaa ƴɛ kʋlasɔɔle ther le Faarɔ̃ɔ pa a jal so Ɩjɩrayɛl bɩsanana ayɩ: «Faarɔ̃ sor aa, sa n ha nɩ hʋ̃ɔ bã. 11 Nɩ jala dɩbara ka na yɩɛnɩ na palanɛ, sɩ nɩ jɛ dɩ biriki nʋɔɔkɛra nɩ n kɔɔ mɩnɩ, ɔmɛna na n mɩ. Na mɩ na ɓɔra'.» 12 Dɩ le Ɩjɩrayɛl bɩsana ɩɩr a gba Ejipiti dɩɩra fɛw dɩ wa n ƴaal hʋ̃ɔ. 13 Dɩ thɔ̃ hɩ̃ɩdaraale n tɔ wɛr na fãga dɩ wa n pɛr dɩ wa n sona: «Nɩ dɔ anɩ wi bɩɛl thɔ̃ n pɩ, gɩ ho mɔ̃ wɩ n kɔɔ ha nɩnɩ hʋ̃ɔ.» 14 Dɩ wɩ n bɩɩrɛrakɛ Ɩjɩrayɛl bɩsanaa ƴɛkʋʋldasɔɔkɛ wɛr thɔ̃ hɩ̃ɩdara kɔɔ phiirnɩ, dɩ wa n sona: «Mɔ̃ dɔ kɩrʋ wireraakɛ na mɩ biriki nʋɔɔkɛ nɩ teenanɩ nɩ ma'?»
15 Dɩ Ɩjɩrayɛl bɩsanaa ƴɛkʋʋldasɔɔle jaal dɩ wa n waal Faarɔna ayɩ: «Aɲe dɔ nɔɔ dɩ fa n gaar sɛr afɩ thɔ̃dara thakɛ? 16 Wa n ha sɩ hʋɔna', sɩ dɩ wɩ yɩ sɩ mɛ biriki. Dɩ wɩ bɩɩr sɩ na pɛr, sɩɩ do wɛr dɛ.» 17 Dɩ Faarɔ̃ birse wɩ: «Khãkhalaa kɛ! Nɩ n khaalɛ, gɛr dɔ kɩrʋ nɩ yɩnɩ wɩ ha nɩ hʋɛ nɩ jal nɩ ji bonɩɛ Thãgba Kɔ̃tɩnna. 18 Nɩ thɛ jala anɩ thɔna. Wa ha nɩ hʋɔna', sɩ biriki nɔ bɩɛlɩlera na mɩ.»
19 Dɩ wɩ yɩɛrɛ dɩɩ do nɩwɛra wɩ ha, gɩdonɩ wɩ so warɛ wa n do birki n ɓɔr wi bɩɛlɩ biriki nɔra ga. 20 Dɩ mɔ̃ wɩ thenɩ Faarɔ̃ɔ pa, wɩ caananɛ Mʋɩjɩ na Aarɔ̃, kɛ n kɔɔ pɩɛrɛ wɩnɩ. 21 Dɩ wɩ sor Mʋɩjɩ na Aarɔna: «Thãgba na kɩlɛna nɩ gɩrɛraakɛ nɩ cʋʋnɩ. Nɛr cʋɛ dɩ Faarɔ̃ na ɔɔ thɔ̃dara na n laar sɩ. Bajɩna nɩ gba pɛ awɩ ɲɔ̃kɔɔ wɩ kʋrɛna sɩ.» 22 Dɩ Mʋɩjɩ kɛr ei Thãgba Kɔ̃tɩn sa so: «Kɔ̃tɩn, mɔ̃ dɔ kɩrʋ dɩ fɩ cʋʋ tɩbɩlaakɛ puure? Aɲera fɩ ka thɔ̃ mɩ tɔr? 23 A fʋna bɔɔkɛ mɩ jalnɩ Faarɔ̃ɔ pa a mɩɩ gɩrɛ fɩ sonɩ, puure a n cʋʋ wɩ, sɩ fa n taa wɩ woa'.»