6
1 Dɩ Thãgba Kɔ̃tɩn birsee: «Nɛnɛ̃, fa yɩrɛ gɩrɛ ma cʋʋnɩ Faarɔna.Fãga ɲɔ̃ɔ na thaaraa da faa ɩ̃ too wɩ the;
fãga ɲɔ̃ɔlera na cʋɛ da wee wɩrakɛ ɔɔ dʋɔ.»
Thãgba sor Mʋɩjɩra ɩna taarɛ Ɩjɩrayɛl bɩsana \ref Thɩ 3.13-20; Ej 20.5-9; Dət 32.36
2 Dɩ Thãgba bir mɩɩna Mʋɩjɩ wo a sʋʋraa: «Mɛr dʋɔn Thãgba Kɔ̃tɩn. 3 Mɩ kɔɔ nɩnanɛ ɩ̃ɩbara Abɩraham, na Ɩjakɩ, na Jakɔbɩ, mɔ̃kɛ mɩ donɩ Thãgba Punone Fɛw Hɩ̃daar; sɩ wa kɔɔ jɩ dɩ Thãgba Kɔ̃tɩn ɩ̃ I bɔ n dɔa'. 4 Dɩ mɩ kɔɔ ʋlfɛrɛ ayɩ ma ha wɛr Kanãa dɩɩ, ka wɩ kɔɔ toonɩ kpakpal togʋʋ. 5 Mɩ nɩɛrɛ Ɩjɩrayɛl bɩsanaa ɩɩ, kɛ thɛnɩ kpooreraakɛ Ejipitidara n kpoo warnɩ, dɩ mɩ jɩnanɛ ɩ̃ ʋlfɛɛkɛ mɩ ʋlfɛna wɩnɩ. 6 Gɛr gɩ sɔ Ɩjɩrayɛl bɩsanana ayɛ:
"Mɛr dʋɔn Thãgba Kɔ̃tɩn.
Ma taa nɛr thɔ̃ khenanaakɛ Ejipitidara n pɛ narnɩ;
ɩ̃ ti nɩ dee dʋʋraakɛ wɩ pɛ nɩnɩ.
Ɩ̃ fãga ɲɔ̃ na ɩ̃ puno hana na pɛ war so khena sɩ ɩ̃ taa nɩ.
7 Ma cʋʋ nɛr dɩ na do ɩ̃ too, sɩ ɩ̃ do anɩ Thãgba. Dɩ na jɩrɛ dɩ mɛr dʋɔn Thãgba Kɔ̃tɩn, anɩ Thãgbaakɛ taa nɩnɩ thɔ̃ khenanaakɛ Ejipitidara n pɛ narnɩ. 8 Ma cʋʋ nɛr dɩ na lõ dɩɩraakɛ mɩ kɔɔ ʋlfɛnɩ ayɩ ma har Abɩraham, na Ɩjakɩ, na Jakɔbɩ. Ma ha nɛr dɩ na hɩ̃. Mɛr Thãgba Kɔ̃tɩn sɔ." »
9 Dɩ mɛ̃ Mʋɩjɩ gba mɩɛ Ɩjɩrayɛl bɩsana. Sɩ mɔna wɩ n gaarnɩ jɔɔ awɩ dee thɔ̃ khera, ha fʋrɛ ɓɔr wɛr dɩ wa pɩɛ nũuə'.
10 Dɩ Thãgba Kɔ̃tɩn bir mɩɩna Mʋɩjɩ wo a sʋʋraa: 11 «Jala sɔ Faarɔ̃, Ejipiti jamanana, a faga Ɩjɩrayɛl bɩsana wɩ the ɔɔ dʋɔ.»
12 Dɩ Mʋɩjɩ birsee: «Ɩjɩrayɛl bɩsananakɛ na pɛ mɩ nũuə', mɔ̃ Faarɔ̃ wer na pɛ mɩ nũu, mɛrkɛ na n punonenɩ thɩmɩa dɩ̃ mɩa'?»
13 Dɩ Thãgba Kɔ̃tɩn mɩɩna Mʋɩjɩ na Aarɔ̃, a thɔ̃ wɩ Ɩjɩrayɛl bɩsanaa pa na Faarɔ̃ɔ pa, mɔ̃ Ɩjɩrayɛl bɩsana na thenɩ Ejipiti.
Yɛkɛ Mʋɩjɩ na Aarɔ̃ɔ thɩ kɔ̃tɩ̃sɔ \ref Jən 46.8-11; The 26.5-14, 57-62
14 Yɛkɛ Ɩjɩrayɛl bɩsanaa thɩ kɔ̃tɩ̃sɔ: Ribɛ̃ɛkɛ dɔnɩ Ɩjɩrayɛlɩ caca bikuunɩ bikũusɔ ha wɩrɛ: Enɔkɩ, na Palu, na Ɛsɩrɔ̃, na Karamɩ. Wɛr dɔ thɩ kɔ̃tɩna, Ribɛ̃ɛ cara.
15 Simeyɔ̃ɔ bikũusɔ ha wɩrɛ: Yemʋwɛl na Yamɛ̃ na Ohaadɩ na Yakɛ̃ na Sohaar, na Sayulɩkɛ dɔnɩ Kanãa khɛrɩ bikuun. Wɛr dɔ thɩ kɔ̃tɩna, Simeyɔ̃ɔ cara.
16 Yɛkɛ Levɩɩ bikũusɔɔ i na awɩ məlsɔ. Bikona yẽther Levɩ kɔɔ hana: Gɛɛrsɔn, na Kehatɩ, na Merarɩ. Levɩɩ yɛ nɔ fɛʋʋkɛ a cʋʋnɩ har tamaa na kpelẽ yʋɔr makoɲɔ (137). 17 Gɛɛrsɔn bikũusɔ ha wɩrɛ: Libini na Sɩmeyɩ, wɛr dɔ kɔ̃tɩna awɩ cara. 18 Kehatɩɩ bikũusɔ ha wɩrɛ: Amɩrã na Ɩsaar na Ebʋrɔ̃ na Ujɩɛl. Kehatɩɩ yɛ nɔ fɛʋʋkɛ a cʋʋnɩ har tamaa na kpelẽ yʋɔr yẽther (133).
19 Merarɩɩ bikũusɔ ha wɩrɛ: Malɩ na Musi. Wɛr dɔ kɔ̃tɩna Levɩɩ cara mɔ̃ wɩ kpanɩ kha.
20 Dɩ Amɩrã gba ɔɔ thɩɩ õkhɛr bu Jokebɛdɩ a he. A kʋɔnaa Aarɔ̃ na Mʋɩjɩ. Amɩrãa yɛ nɔ fɛʋʋkɛ a cʋʋnɩ har tamaa na kpelẽ yʋɔr makoɲɔ (137). 21 Ɩsaar bikũusɔ ha wɩrɛ: Koore na, Nɛfɛgɩ na Jɩkɩrɩ. 22 Ujɩɛlɩ bikũusɔ ha wɩrɛ: Mɩkayɛl na Elɩsafã na Sɩtɩrɩ.
23 Dɩ Aarɔ̃ her Elɩseba, kɛ dɔnɩ Amɩnadabɩɩ bikhɛr a dona Nasɔ̃ɔ õkhɛr, a kʋɔnaa: Nadabɩ na Abɩhu na Eleajaar na Ɩtamaar.
24 Kooree bikũusɔ ha wɩrɛ: Asɩɩr na Ɛlkana na Abɩasafɩ. Wɛr dɔ kɔ̃tɩna Kooree cara.
25 Aarɔ̃ bikuun Eleajaar her Putɩyɛlɩ bikhɛr bɩɛl, a kʋɔnaa Fɩneyasɩ. Wɛr dɔ Levɩɩ cara, kɔ̃tɩnasɔ.
26 Ɔ Aarɔ̃ na ɔ Mʋɩjɩra Thãgba Kɔ̃tɩn soro wɩ cʋɛ Ɩjɩrayɛl bɩsana wɩ the Ejipiti mʋmʋmʋr, koke jɔ khaa. 27 Wɛr kɔɔ mɩana Faarɔ̃, Ejipiti jamana, a faga Ɩjɩrayɛl bɩsana wɩ the Ejipiti dɩɩra.
Thãgba nɩnanɛ Mʋɩjɩ gɩrɛ a na cʋʋnɩ.