7
1 Dɩ Thãgba Kɔ̃tɩn sor Mʋɩjɩra: «Hɩnɛ, ma cʋʋ fɛr dɩ fa do Thãgba Faarɔ̃ɔ ƴɛra, sɩ afɩ õkuun Aarɔ̃ n do afɩ mɩmɩɩ. 2 Fɛrɛ, fɛr na mɩa gɩrɛ fɛʋʋkɛ ma so farnɩ, dɩ afɩ õkuun Aarɔ̃ na gba na so Faarɔna, a faa Ɩjɩrayɛl bɩsana wɩ the ɔɔ dʋɔ. 3 Sɩ mɛrɛ, ma cʋʋrɛ dɩ ɔɔ ha na khɩɩr, sɩ ɩ̃ cʋʋ nɔ kpaa thɩ̃ɛsɔ Ejipiti dɩɩra gɩ jɔr gɩ ka. 4 Sɩ Faarɔ̃ na pɛ nɩ nũuə'. Ma thar Ejipitira ɲɔ̃ɔ, na kɩɩl khena, a faa ɩ̃ too Ɩjɩrayɛl bɩsana wɩ the. 5 Ɔbɔɔkɛ ma 'laanɩ ɲɔ̃ɔ na tha Ejipitira, sɩ ɩ̃ cʋʋ Ɩjɩrayɛl bɩsana wɩ the awɩ thɩ̃thɩɩn, gɛra Ejipitidara na jɩ dɩphã waa, dɩ mɛr dʋɔn Thãgba Kɔ̃tɩn.» 6 Dɩ Mʋɩjɩ na Aarɔ̃ cʋʋrɛ mɔ̃kɛra Thãgba Kɔ̃tɩn kpãkpaan warnɩ wɩ cʋɛ. 7 Mʋɩjɩ kɔɔ hananɛ yɛna kpalanã, dɩ Aarɔ̃ hana yɛna kpalanã yẽther, ɔbɔɔkɛ wɩ n kɔɔ mɩɩnanɩ Faarɔ̃.Mʋɩjɩ na Aarɔ̃, Faarɔ̃ɔ cɔ.
8 Dɩ Thãgba Kɔ̃tɩn sor Mʋɩjɩ na Aarɔna ayɩ: 9 «A Faarɔ̃ so nar ayɩ: "Nɩ cʋɛ nɔ kpaa thɩ̃ɛ," sɔ Aarɔna a gba ɔɔ gbol a dɔna thɩɩra Faarɔ̃ɔ ƴɛra. Gbʋʋlɩle na fire na do sii.» 10 Dɩ wɩ jal Faarɔ̃ɔ pa a cʋʋ mɔna Thãgba Kɔ̃tɩn kɔɔ so warnɩ. Dɩ mɛ̃ Aarɔ̃ dʋna ɔɔ gbol Faarɔ̃ na ɔɔ thɔ̃daraa ƴɛra, dɩɩ fi do sii. 11 Dɩ Faarɔ̃ thɔ̃ we te kpɛsɛsɔ na sɩdumodarasɔ, na dɔdɔɔdarasɔ le Ejipiti dɩɩra, dɩ wɩ cʋʋ dakha awɩ dɔdɔɔ thɔ̃. 12 Dɩ wɛr fɛw dʋʋrna dakha awɩ gbolsɔ, dɩɩ fi do siisɔ. Sɩ Aarɔ̃ɔda gbaar awɩdasɔ a dɩɩlɛ. 13 Sɩ Faarɔ̃ɔ ha bor sa khɩɩr, mɔna Thãgba kɔɔ sonɩ, dɩ aa therna gɩrɛ Mʋɩjɩ na Aarɔ̃ sʋʋraana'.
Caca thɩlkɩɩr: Nyʋɔn fire a do tɔmɩn. \ref Khɩ 105.26-29; Nɩr 8.8-9, 16.3-6; Jn 2.7-11
14 Dɩ Thãgba Kɔ̃tɩn so Mʋɩjɩra ayɩ: «Faarɔ̃ bor sa khɩɩr haar, a bor ɩna n faa Ɩjɩrayɛl bɩsana dɩ wa tha'. 15 Jala duuro, ɔbɔɔkɛ a n thenɩ dɩ jal mɩɩr nʋɔra, a pɩɛrɛɛ le Nɩɩl mɩɩr gẽgerena. Fɔrɔ afɩ ɲɔ̃kɔɔ gbʋʋlɩkɛ kɔɔ fieni a do sii, 16 sa sɔ Faarɔna ayɛ: "Thãgba Kɔ̃tɩn, kɛ dɔnɩ Ebirəsɔɔ Thãgba thɔna mɩ ɩ̃ sɔ far, fɩ faa ɩnɩɩ too, wɩ jal bəənə wɩ do nar thɔma, sɩ a dana nɛnɛ̃, fɛrɛ fa pɛ nũuə'. 17 Gɛr gɩ dɩ Thãgba Kɔ̃tɩn so aa, nɛnɛ̃, gɩrɛ fa jɩnanɩ dɩ ɩnɛr dʋɔn Thãgba Kɔ̃tɩn dʋɔn ma ber ɲʋɔn na gbʋʋlɩkɛ mɩ fʋrɔnɩ dɩ ga fi na do tɔmɩn. 18 Dɩ thʋmaakɛ hanɩ mɩɩra na khiire, dɩ ɲʋɔn na phɔbɩ, dɩ mɛ̃ Ejipitidara na puno na ɲɔa'." » 19 Dɩ Thãgba Kɔ̃tɩn bir so Mʋɩjɩra: «Sɔ Aarɔna a gba ɔɔ gbol a 'laanɛ Ejipiti ɲʋɔnsɔɔra fɛw, a 'laanɛ po nɩɩsɔɔra, a 'laanɛ mɩɩrsɔɔra, a 'laanɛ ɲɔ too paarsɔɔra fɛw, ɲʋɔn n debi gɩ do tɔmɩn. Dɩ tɔmɩn na har Ejipiti dɩɩra, ɲɔ pɛ thɩɛna fɛw, thɩ̃ɛsɔɔraakɛ wɩ cʋʋnanɩ thɩrʋ agɩbo gɩrɛ wɩ cʋʋnanɩ bokana.»
20 Dɩ Mʋɩjɩ na Aarɔ̃ cʋʋ mɔna Thãgba Kɔ̃tɩn so warnɩ. Dɩ Aarɔ̃ 'laa gbʋʋl a be Nɩɩl mɩɩr ɲʋɔn, Faarɔ̃ na ɔɔ thɔ̃daraa ƴɛra, dɩ mɩɩr ɲʋɔn fɛw debi a do tɔmɩn. 21 Dɩ thʋma fɛʋʋkɛ hanɩ mɩɩra khiir, dɩ ɲʋɔn phɔbɩ, dɩ Ejipitidara na n puno dɩ wɩ ɲɔ mɩɩr ɲʋɔn bã. Dɩ dɩɩ fɛw dor tɔmɩn haar. 22 Dɩ Ejipiti dɔdɔɔdara cʋʋ oti na awɩ dɔdɔɔ cʋʋ. Sɩ Faarɔ̃ɔ ha bor sa khɩɩr, aa pɛ Mʋɩjɩ na Aarɔ̃ nũuə', mɔna Thãgba Kɔ̃tɩn kɔɔ sonɩ. 23 Dɩ a kɛrɛ a kɔ̃ cʋɔrɔ, sɩ gelela na sʋʋ thɩ̃ɛa'.
24 Dɩ Ejipitidara fɛw kɔɔ kper lirisɔ le mɩɩr nʋɔra, gɩ do nɔɔ wɩ yɩ ɲɔ bʋɔ wa n ɲɔ, gɩdonɩ wa n puno na ɲɔ mɩɩr ɲʋɔna'.
Balaɲɔ thɩlkɩɩr: Sɩbɔna \ref Khɩ 105.30, Nɩr 16.13
25 Wire makoɲɔ ka, Thãgba Kɔ̃tɩn kɔɔ benɩ mɩɩr. 26 Agɩpɩ dɩ Thãgba Kɔ̃tɩn so Mʋɩjɩra: «Jala Faarɔ̃ɔ pa a sʋɔraa ayɛ: «Thãgba Kɔ̃tɩn sɔ: “Faga ɩ̃ too, wɩ jal wɩ do mar thɔma. 27 A fɩ bo, fa sɩ war dɩ wɩ jala', ma thɔnanɛ sɩbɔna dɩ wa hi fɩ dɩɩ koo. 28 Mɩɩr na tire sɩbɔna gbʋma gbʋma, dɩ wa thɩɩr na lõ fɩ cʋɔrɔ, a na lõ afɩ duu, ka fɩ n phɩnɩ, a na jʋʋn phɩ̃ paara. Wa lʋʋn afɩ thɔ̃daraa cɔ, na afɩ toosɔɔ pa, a na lõ buru hɩ paarsɔɔra na buru mɩ̃ dudaasɔɔra. 29 Wa n jʋʋn farɛ, na afɩ thɔ̃darara na afɩ toosɔɔra fɛw.”»