8
1 Dɩ Thãgba Kɔ̃tɩn bir so Mʋɩjɩra: «Sɔ Aarɔna, a 'laanɛ ɲɔ̃ɔ na ɔɔ gbol po nɩɩsɔɔra, a 'laanɛ mɩɩrsɔɔra, a 'laanɛ ɲɔ too paarsɔɔra, a cʋɛ sɩbɔna wɩ the wɩ hi Ejipiti dɩɩ.» 2 Dɩ Aarɔ̃ 'laa ɲɔ̃ɔ na ɔɔ gbol Ejipiti ɲʋɔnsɔɔra fɛw, dɩ sɩbɔna the a gba dɩɩ koo. 3 Dɩ dɔdɔɔdara phɛl ɔmɛ̃ na awɩ dɔdɔɔ thɔ̃, a cʋʋ sɩbɔna dɩ wɩ the a gba thɩɩ.4 Dɩ Faarɔ̃ we Mʋɩjɩ na Aarɔ̃ a so war: «Nɩ bɩɛlɛ Thãgba Kɔ̃tɩn a cʋʋ sɩbɔna wɩ hʋnɔna sɩ, mɛrɛ na ɩ̃ too, sɩ ɩ̃ faa nɩ, nɩ jal nɩ ji bonɩɛ Thãgba Kɔ̃tɩnna.» 5 Dɩ Mʋɩjɩ birsee: «Jamana, afɩ pa gɩ ha. Sɔ mar bɔɔkɛ fɩ n ƴaalnɩ ɩ̃ bɩɛlɛ Thãgba a pɛ far, a pɛ afɩ thɔ̃darara, na afɩ toosɔɔra gɩ do nɔɔ sɩbɔna n hʋnɔna nɩ. Ma bɩɛlɛ dɩ sɩbɔna na the afɩ pa, afɩ cɔsɔɔra, sɩ wɩ sɩ mɩɩra dɩbara.» 6 Dɩ tu: «Cʋɛ gɩ cʋɔ.» Dɩ Mʋɩjɩ sʋʋraa: «Ma cʋʋrɛ mɔna fɩ sonɩ. Dɩ mɛ̃ fa jɩ dɩ tibil na hale a hona Thãgba Kɔ̃tɩn asɩ Thãgba ga. 7 Sɩbɔna na hʋnɔna fɛr, na afɩ cɔsɔ, a na hʋnɔna afɩ thɔ̃dara na afɩ too, sɩ wɩ sɩ mɩɩra dɩbara.»
8 Dɩ Mʋɩjɩ na Aarɔ̃ ther le Faarɔ̃ɔ pa. Agɩpɩ dɩ Mʋɩjɩ bɩɛl Thãgba Kɔ̃tɩn a hʋnɔnɛna sɩbɔnaakɛ a tini pɛ Faarɔna. 9 Dɩ Thãgba Kɔ̃tɩn cʋʋ mɔna Mʋɩjɩ bɩɛlʋnɩ. Dɩ sɩbɔna khiir: wɩrɛ hanɩ cʋɔrɔ, wɩrɛ hanɩ gbasasɔɔra, na wɩrɛ hanɩ lɔɔsɔ. 10 Dɩ wɩ kpar dersɔ, dɩ hʋnɛ gba dɩɩ koo.
11 Dɩ mɔ̃ Faarɔ̃ yɩɛnɩ dɩɩ do gɩ khure, a bor sa khɩɩr haar mɔna Thãgba Kɔ̃tɩn kɔɔ sonɩ. Dɩ aa kpɩɛrna gɩrɛ Mʋɩjɩ na Aarɔ̃ kɔɔ sʋʋraana'.
Balãther thɩlkɩɩr: Jʋbe \ref Khɩ 105.31, 2 Tɩm 3.8-9
12 Dɩ Thãgba Kɔ̃tɩn so Mʋɩjɩra: «Sɔ Aarɔna a 'laanɛ ɔɔ gbol a bɛna thɩlãkobe thɩɩra. Ga debire a na do jʋbe Ejipiti dɩɩra fɛw.» 13 Dɩ wɩ cʋʋ ɔmɛ̃; dɩ Aarɔ̃ 'laa ɲɔ̃ɔ a be thɩlãkobe thɩɩra na ɔɔ gbol. Dɩ Ejipiti dɩɩra fɛw, thɩlãkobe debire a do jʋbe a ha tɩbɩlala na nʋmana. 14 Dɩ dɔdɔɔdara cʋʋ awɩ dɔdɔɔ thɔ̃ sɩ wɩ ti dakha jʋbe, sɩ wa punoə'. Jʋbe bor sa ha tɩbɩlala na nʋmana. 15 Dɩ dɔdɔɔdaraale so Faarɔna: «Thãgbaa pa thɩ̃ɛɛkɛ the dɛ!» Sɩ mɔna Thãgba Kɔ̃tɩn sonɩ, Faarɔ̃ɔ ha bor sa khɩɩr, dɩ aa pɛ Mʋɩjɩ na Aarɔ̃ nũuə'.
Balanã thɩlkɩɩr: Jãgbora. \ref Khɩ 105.31
16 Thãgba Kɔ̃tɩn sor Mʋɩjɩra ayɩ: «Ɩrɛ duuro phiphi a jala Faarɔ̃ɔ pa, ɔbɔɔkɛ a n thenɩ dɩ jal mɩɩr nʋɔra, a sʋɔraa thakɛ ayɛ: "Thãgba Kɔ̃tɩn sɔwɔɔ, fɩ faa ɩnɩɩ too, wɩ jal, wɩ do nar thɔma. 17 Aa, a fa faa wɩ dɩ wɩ jala', ɩna thɔna farɛ jãgbora, na afɩ thɔ̃darasɔɔra, na afɩ toosɔɔra, na afɩ cɔsɔɔra. Dɩ jãgbora na hire Ejipitidaraa cɔsɔ fɛw, a na tee dakha Ejipiti thɩɩ koo. 18 Sɩ ga wiile, ɩna pɛrɛ lee paar dɩ Gosɛn dɩɩra, ka ɩnɩɩ too hanɩ, jãgbora na hala', dɩ mɛ̃ fa jɩ dɩ ɩnɛr Thãgba Kɔ̃tɩn hakɛ afɩ dʋɔ. 19 Ɩna leere ɩnɩɩ too, ɩnɩ n taa wɩ thɩlkɩɩraakɛ na 'lenɩ afɩ too. Cʋɔ gaa jẽsɔɔlera na dã." » 20 Dɩ Thãgba cʋʋ dɩɩ ha oti. Dɩ jãgbora ɩ̃ tə̃tə̃tə̃ a hi Faarɔ̃ɔ cɔ, na ɔɔ thɔ̃daraa cɔ, na Ejipiti dɩɩra fɛw, a kʋɛ dɩɩ. 21 Dɩ Faarɔ̃ we Mʋɩjɩ na Aarɔ̃ a so war: «Nɩ ka kɛ dɩɩra a je bonɩɛsɔɔra anɩ Thãgbara.» 22 Dɩ Mʋɩjɩ birsee: «Ga tee kha dɩ sa cʋʋ thala', gɩdonɩ bonɩɛsɔɔkɛ sa jini Thãgba Kɔ̃tɩn asɩ Thãgbara, ga dor kpɔ̃kpɔrɔ̃ thɩ̃ɛ Ejipitidarara. Dɩ a sɩ ji bonɩɛsɔɔkɛ n kɔnɩ dʋɔdara ƴɔ̃ƴʋɔnɛ, wa dʋʋr sɩ na bokana gaa? 23 Sa ɩɩrɛ na cɔna wire yẽther, a na jal bəənə a na ji bonɩɛsɔ Thãgba Kɔ̃tɩn asɩ Thãgbara, mɔ̃ a na so sarnɩ.» 24 Dɩ Faarɔ̃ tu ayɩ: «Ma faa nɛr dɩ na jal a na ji bonɩɛsɔ bəənə Thãgba Kɔ̃tɩn, anɩ Thãgbara; sɩ na n jal ƴɔɔa' dɛ! Nɩ bɩɛlɛ Thãgba dakha a pɛ mar.» 25 Dɩ Mʋɩjɩ sʋʋraa: «A mɩ the kɩɛr, ma bɩɛlɛ Thãgba a na pɛ far; kɛ na cʋɔ jãgboraakɛ na hʋnɔna fɛr, a na hʋnɔna afɩ thɔ̃dara, na afɩ too. Sɩ fɛr, Faarɔ̃ fa n bo na fɩɩl sɩ, a bir yɩ sa n jal a ji bonɩɛ Thãgba Kɔ̃tɩnna gaa ga.» 26 Dɩ Mʋɩjɩ ther le Faarɔ̃ɔ pa a jal bɩɛl Thãgba. 27 Dɩ Thãgba Kɔ̃tɩn cʋʋ mɔna Mʋɩjɩ bɩɛlʋnɩ. Dɩ jãgbora hʋnɔna Faarɔ̃ na ɔɔ thɔ̃dara na ɔɔ too. Jãgbora jaal fɛw bɩɛlakɛ na sa'. 28 Sɩrakɛ Faarɔ̃ɔ ha bor sa khɩɩr, dɩ aa faa Ɩjɩrayɛl bɩsana dɩ wɩ jala'.