Balamɔɩ thɩlkɩɩr: Natɛbɩ \ref Khɩ 78. 50; Jɔb 9. 4; Mal 3. 18
9
1 Dɩ Thãgba Kɔ̃tɩn so Mʋɩjɩra ayɩ: «Jala Faarɔ̃ɔ pa a sʋɔraa ayɛ: "Thãgba Kɔ̃tɩn, kɛ dɔnɩ Ebirəsɔɔ Thãgba sɔwɔɔ, fɩ faga ɩnɩɩ too wɩ jal wɩ do nar thɔma. 2 A fɩ bo, fa sɩ war dɩ wɩ jala', sa fʋ wɩ 'lo ɩɩrɔ, 3 Thãgba Kɔ̃tɩn na thɔnanɛ natɛbɩ afɩ nʋ̃sɔraakɛ hanɩ hʋɔnɔ; afɩ gãgosɔɔra, na afɩ kũkə̃sɔɔra, na ɲɔɔmɛ̃sɔɔra, wɩrɛ dɔnɩ nʋ̃ kɔ̃tɩna na nʋ̃ yɩra. Dɩ ga puurore na ka. 4 Thãgba Kɔ̃tɩn na pɛrɛ leere Ɩjɩrayɛl bɩsanaa nʋ̃sɔɔra na Ejipitidaraadara. Dɩ nʋ̃ bɩɛlakɛ na khi Ɩjɩrayɛl bɩsanaa nʋ̃sɔɔra ga." » 5 Dɩ Thãgba Kɔ̃tɩn kɔɔ pɛrɛ bɔɔ aa, cʋɔ, ɩnɛr Thãgba Kɔ̃tɩn na cʋʋ gelela kɛ Ejipiti dɩɩra.6 Dɩ mɔ̃ dɩɩ na wɩlnɩ duuro, Thãgba Kɔ̃tɩn cʋʋrɛ mɔna a sonɩ. Dɩ Ejipitidaraa nʋ̃sɔ fɛw khiir, sɩ bɩɛlakɛ na khi Ɩjɩrayɛl bɩsanaa nʋ̃sɔɔra ga. 7 Dɩ Faarɔ̃ thɔ̃ wɩ hɩnɛ Ɩjɩrayɛl bɩsanaa pa; dɩɩ do nʋ̃ bɩɛlakɛ na khi awɩ nʋ̃sɔɔra ga. Sɩ ɔɔ ha bor sa khɩɩr, dɩ aa faa Ɩjɩrayɛl bɩsana dɩ wɩ jala'.
Nyɛ̃be maadõ thɩlkɩɩr: Phɛɛrɛ \ref Khɩ 78.50; Dət 28.27; Nɩr 16.2, Eja 47.13-15
8 Dɩ Thãgba Kɔ̃tɩn so Mʋɩjɩ na Aarɔna ayɩ: «Nɩ kpɛ thoo a he ɲɔ̃korʋ, Mʋɩjɩ n dʋna ƴũu Faarɔ̃ɔ ƴɛra. 9 Thoole na debire na do thɩlãkobe Ejipiti dɩɩra fɛw. Ga dor phɛɛrɛ a na thaar tɩbɩla na nʋma.» 10 Dɩ wɩ kpɩrɛ thoora a jɩɩlna Faarɔ̃ɔ ƴɛra, dɩ Mʋɩjɩ dʋna ƴũu dɩɩ cʋʋ phɛɛrɛ cɔ̃ɔcɔ̃ɔ tɩbɩlala na nʋmana. 11 Dɩ dɔdɔɔdaraale na puno na jɩɩl Mʋɩjɩɩ ƴɛra ga, dɩɩ do phɛɛrɛra dɔ kɩrʋ; gɩdonɩ gɩ thaar wɛr mɔ̃ gɩ thaarnɩ Ejipitidara fɛw. 12 Dɩ Thãgba Kɔ̃tɩn cʋʋ Faarɔ̃ɔ ha dɩɩ khɩɩr, dɩ aa pɛ Mʋɩjɩ na Aarɔ̃ nũuə', mɔna Thãgba Kɔ̃tɩn kɔɔ sonɩ Mʋɩjɩra.
Nyẽbe makoɲɔ thɩlkɩɩr: thãgba bara \ref Khɩ 105. 32-33; Nɩr 8. 7, 16-21
13 Dɩ Thãgba Kɔ̃tɩn so Mʋɩjɩra ayɩ: «Ɩrɛ duuro phiphi a jala jɩlɛ Faarɔ̃ɔ ƴɛra a sʋɔraa ayɛ: "Thãgba Kɔ̃tɩn, kɛ dɔnɩ Ebirəsɔɔ Thãgba sɔ aa, fɩ faga ɩnɩɩ too, wɩ jal wɩ do nar thɔma; 14 gɩdonɩ nɛnɛ̃ wer dɩphã, ɩna thɔna farɛ, fɛrɛra na afɩ thɔ̃darara, na afɩ toora, thɩlke caar dɩɩdɩɩ, dɩ mɛ̃ fa jɩ dɩ thɩɩraakɛ tibil bɩɛlakɛ na hale a ho na'. 15 Ado ɩnɩ kɔɔ gbaar kho kʋnanɛ a bena fɩ, fɛrɛ na afɩ too, na kɔɔ bũburone gɩrɛ thɩɩraakɛ. 16 Sɩ ɩnɩ faa fɛr dɩ fɩ hana yire, gɩ do nɔɔ ɩnɩ n nɩna fɩ ɩnɩɩ fãga, gɩ do nɔɔ dakha ɩnɩɩ i n kpaar thɩɩraakɛ fɛw. 17 Dɩ a fɩ var ɩnɩɩ too, fa sɩ war dɩ wɩ jala', 18 cʋɔ, wɛ̃ɛbɔɔkɛ ɩna jɛr thãgba bara dɩ ga wabɩ na thʋ̃ na kar. Ga dor thɩ̃ɛɛkɛ na kɔɔ dananɩ Ejipiti dɩɩra kpɩɩrakɛ a fʋna bɔɔkɛ dɩɩ donɩ dɩɩ, a dana nĩika'. 19 Dɩ gɛr gɩ pɩɛr wɩ kpa afɩ nʋ̃sɔ wɩ to pa bɔ paar na thɩ̃ gɩrɛ fɛʋʋkɛ dɔnɩ afɩda, kɛ na hanɩ cʋɔrɔa', wɩ jɩɩ thɩɩn gɩ. Thãgba bara na bɩɩrɛ nʋma fɛʋʋkɛ hanɩ hʋɔnɔ, kɛ wa kpanɩ to cʋɔrɔa', na tɩbɩla dɩ wa khiir." » 20 Dɩ Faarɔ̃ɔ thɔ̃dara ɩkhasɔ pəre Thãgba Kɔ̃tɩnɩ thɩmɩɩra a so awɩ thɔ̃darara, kɛ n khɛnɩ awɩ nʋ̃sɔ ayɩ wɩ tɔ nʋma pa bɔ paar sa lona cʋɔrɔ. 21 Sɩ wɩrɛ na pərənɩ Thãgba Kɔ̃tɩnɩ thɩmɩraala', faarɛ awɩ thɔ̃dara na awɩ nʋ̃sɔ le hʋɔnɔ. 22 Dɩ Thãgba Kɔ̃tɩn bir so Mʋɩjɩra: «'Laanɛ ɲɔ̃ɔ thãgbara ƴũu, thãgba bara n jɛ Ejipiti dɩɩra fɛw; gɩ bɩɩr tɩbɩla, nʋma na hʋ̃ɔ.» 23 Dɩ Mʋɩjɩ 'laa ɔɔ gbol thãgbara ƴũu, dɩ Thãgba Kɔ̃tɩn thɔna thãgba phɛɛrɛ na dɔɔ thɩɩra. Agɩpɩ Thãgba Kɔ̃tɩn cʋʋ thãgba bara dɩ ga n jɛ. 24 Dɩ thãgba bara kɔɔ ɲaɲaananɛ dɔɔ dɩ ga n jɛ. Gɩ kɔɔ khɩɩrɛ a ka bɔɔ. Ejipitidara na kɔɔ yɩ thɩ̃ caarɩle kpɩɩrakɛ a fʋna bɔɔkɛ dɩɩ donɩ dɩɩa'. 25 Dɩ Ejipiti dɩɩra fɛw, thãgba bara bɩɩrɛ gɩrɛ fɛʋʋkɛ hanɩ hʋɔnɔ; a fʋna tɩbɩla, a gbana nʋma. Gɩ cɛcɛbɛrɛ thɩra fɛw hʋɔnɔ. 26 Gosɛn bəənə dɩbara, ka Ɩjɩrayɛl bɩsana hanɩ, le thãgba bara na ja'.
27 Dɩ Faarɔ̃ thɔ̃ we Mʋɩjɩ na Aarɔ̃ a so war: «Gɩrɛ wer, mɩ cʋʋrɛ puure. Thãgba Kɔ̃tɩn sarɛ, sɩ mɛrɛ na ɩ̃ too sɛr dɛ. 28 Nɩ bɩɛlɛ Thãgba Kɔ̃tɩn a jɩɩl thãgba phɛɛrɛ na thãgba bara; dɩ ma sɩ narɛ dɩ na jal, ma fʋ nɩ na toona bã.» 29 Dɩ Mʋɩjɩ sʋʋraa: «A mɩ the dɩ khuirə, ma 'laarɛ ɲɛ̃ɛ Thãgba Kɔ̃tɩnna, dɩ thãgba phɛɛrɛ na jɩɩl, dɩ thãgba bara na hale bã. Dɩ mɛ̃ fa jɩ dɩ Thãgba Kɔ̃tɩn hɩna thɩɩ. 30 Sɩ mɩ jɩrɛrakɛ dɩ fɛrɛ na afɩ thɔ̃dara na ma Thãgba Kɔ̃tɩn woa'.» 31 Lɛ̃a na ɔɔjɩ kɔɔ kʋɛrɛ gɩdonɩ ɔɔjɩ n ber sɩ lɛ̃ phe. 32 Sɩ bile na thɩ̃ɛɛkɛ hɔnɩ bile, na kʋɛa', gɩdonɩ ger n pɩɩrɔrɛ. 33 Dɩ Mʋɩjɩ ther le Faarɔ̃ɔ pa a jal dɩ khuirə, a 'laa ɲɛ̃ɛ Thãgba Kɔ̃tɩnna, dɩ thãgba phɛɛrɛ na thãgba bara, jɩɩl; thãgba na n ɩ̃ bã.