Nyẽbe makõther thɩlkɩɩr: Toosõo \ref Khɩ 105.34-35; Jow 1.2-12; 2.1-11
10
1 Dɩ Thãgba Kɔ̃tɩn so Mʋɩjɩra: «Birə jala Faarɔ̃ɔ pa, gɩdonɩ mɛr cʋɛ ɔɔ ha na ɔɔ thɔ̃daraa ha, dɩɩ khɩɩr, gɩ do nɔɔ ɩ̃ cʋʋ ɩ̃ nɔ kpaa thɩ̃sɔ awɩ thɩ̃thɩɩn. 2 Dɩ mɛ̃ dakha fa gba na mɩɩ afɩ bɩsãsɔ, na afɩ bɩsãsɔɔ bɩsãsɔ, mɔ̃ mɩ cʋʋnɩ Ejipitidara na nɔ kpaa thɩ̃ ca gɩrɛ mɩ cʋʋnɩ awɩ thɩ̃thɩɩn. Dɩ mɛ̃ na jɩ dɩ mɛr dʋɔn Thãgba Kɔ̃tɩn.» 3 Dɩ Mʋɩjɩ na Aarɔ̃ jal Faarɔ̃ɔ pa a sʋʋraa: «Thãgba Kɔ̃tɩn, kɛ dɔnɩ Ebirəsɔɔ Thãgba sɔwɔɔ ʋmɔ̃ bɔɔ ga dã sɩ fa wur na jo nar? Fɩ faga ɩnɩɩ too wɩ jal wɩ do nar thɔma. 4 Aa, a fɩ bo, fa sɩ war dɩ wɩ jala', cʋɔ ɩna thɔnanɛ toosõo afɩ dʋɔ. 5 Wa gbaar thɩɩ koo, fa yɩ pa khɩɩa'. Wa cɛcɛbɛrɛ gɩrɛ sɛnɩ, kɛ thãgba bara na kʋɛna', na thɩra fɛʋʋkɛ n phonɩ hʋɔnɔ. 6 Wa hi fer cɔna, a na hi afɩ thɔ̃daraa cɔsɔ, na Ejipitidara fɛʋʋ cɔsɔ. Ga dor thɩ̃ɛɛkɛ afɩ thɩ kɔ̃tɩ̃sɔ na kɔɔ yɩnɩ kpɩɩrakɛ, a fʋna bɔɔkɛ wɩ thenɩ dɩɩra a dana nɛnɛ̃a'.» Agɩpɩ dɩ Mʋɩjɩ ther le Faarɔ̃ɔ pa. 7 Dɩ Faarɔ̃ɔ thɔ̃dara sʋʋraa: «Ʋmɔ̃ bɔɔ, kuunɩkɛɛ thɩlke pɛra na khu? Dɩ ado mɛ̃ gɩ, faga kona wɩ jal, wɩ do thɔma Thãgba Kɔ̃tɩn awɩ Thãgbarara. Fa jɩ dɩ dɩɩra n jaal ji paaraa?»8 Dɩ wɩ bir we Mʋɩjɩ na Aarɔ̃ dɩ wɩ pɔ Faarɔ̃ɔ pa, dɩ so war: «Nɩ jala dɔ thɔma Thãgba Kɔ̃tɩn anɩ Thãgbara. Sɩ ana na jala?» 9 Dɩ Mʋɩjɩ birsee: «Sa jaal fɛw: daɓola na tɩɩ kpɛɛna, asɩ bikũusɔ na asɩ bikhɛrsɔ. Sa jaal na asɩ nʋ̃sɔ: nʋ̃ yɩra na nʋ̃ kɔ̃tɩna; gɩdonɩ sɩ teenanɛ sɩ cʋʋ fɛtɩ Thãgba Kɔ̃tɩnɩ irə.» 10 Dɩ Faarɔ̃ tu na ɓoɓorore: «Thãgba Kɔ̃tɩn n hana kha na nɛrɛ; ma faa nɛr dɩ na jal nɛrɛ na anɩ bɩsãsɔ! Sɩ mɩ jɩrɛ dɩ puu dɩkha nɩ ƴaal nɩ cʋʋ. 11 Kpei! Mɩ bor, nɛr kuun haar na jala, na do thɔma Thãgba Kɔ̃tɩn, anɩ Thãgbara. A ge wer gɩ, mɩ ture.» Agɩpɩ dɩ wɩ weele wɩ Faarɔ̃ɔ pa.
12 Dɩ Thãgba Kɔ̃tɩn so Mʋɩjɩra: «'Laanɛ ɲɔ̃ɔ Ejipiti dɩɩra, a cʋɛ toosõo wɩ lõ, wɩ gba dɩɩ koo, wɩ cɛcɛbɛ hʋ̃ɔ fɛw thɩɩra, na gɩrɛɛkɛ thãgba bara na kʋɛna'.» 13 Dɩ Mʋɩjɩ 'laa ɔɔ gbol Ejipiti dɩɩra; dɩ Thãgba Kɔ̃tɩn thɔna jɩɛ, kɛ thɛnɩ wi phã paar, dɩɩ phʋ̃ Ejipiti, dɩwɩlʋ na dɩtɩnɛ fɛw. Ɔbɔɔkɛ dɩɩ na wɩlnɩ jɩɛɛle ɩnanɛ toosõo. 14 Dɩ toosõosɔɔle lʋʋn Ejipiti a gba dɩɩ koo. Wɩ thʋnɛ jɔr a və̃vĩə. Wa yɩ toosõo thale dɩɩra kpɩɩa'; dɩrakɛ wa bir na yɩ gɩ thale bã. 15 Dɩ wɩ thire thɩɩra fɛw, dɩ thɩɩ birə. Dɩ toosõosɔɔle cɛcɛbɛrɛ hʋ̃ɔ na thɩr be fɛw thɩɩra, a cɛcɛbɛ gɩrɛɛkɛ thãgba bara na kɔɔ kʋɛna', dɩ fa ƴolo na kɔɔ sɩ, thɩr bɩɛlalakɛ, dɩ hɔ̃ ƴolo gɩ hʋɔnɔ Ejipita'.
16 Dɩ Faarɔ̃ thɔ̃ na phananɛ a we Mʋɩjɩ na Aarɔ̃ sa so: «Mɩ cʋʋrɛ puure Thãgba Kɔ̃tɩnna, kɛ dɔnɩ anɩ Thãgba, na nɛrɛra. 17 Sɩ nɩ faga ɩ̃ dɩpa nɛnɛ̃daa ha mɩ wo, sa bɩɛlɛ Thãgba Kɔ̃tɩn, anɩ Thãgba, a hʋnɔna mɩnakɛ thɩlke puu caarɩkɛ.» 18 Dɩ Mʋɩjɩ ther le Faarɔ̃ɔ pa, a jal bɩɛl Thãgba Kɔ̃tɩn. 19 Dɩ Thãgba Kɔ̃tɩn cʋʋ jɛ kʋkʋʋlʋ, dɩɩ the wi lõ paar, a ɩ̃ khɩɩ toosõosɔɔle a gbʋma laɲɔ̃ sɩɛra. Dɩ toosõ bɩɛlakɛ na sɩ Ejipiti thɩɩra ga. 20 Sɩ Thãgba Kɔ̃tɩn cʋʋrɛ Faarɔ̃ɔ ha dɩɩ khɩɩr, dɩ aa faa Ɩjɩrayɛl bɩsana dɩ wɩ jala'.
Nyẽbe yʋɔr phe bire thɩlkɩɩr: dabirə tĩtĩtĩ \ref Khɩ 105.28; Nɩr 16.10-11, Jɔ 18.18
21 Dɩ Thãgba Kɔ̃tɩn so Mʋɩjɩra ayɩ: «'Laanɛ ɲɔ̃ɔ thãgbara ƴũu dabirə n ha Ejipiti dɩɩra tĩtĩtĩ, gɩ do thɩ̃ɛɛkɛ wa punonɩ na tharɔ.» 22 Dɩ Mʋɩjɩ 'laa ɲɔ̃ɔ thãgbara ƴũu, dɩ dabirə gbɛ̃kɛrɛ̃ɛ thi Ejipiti dɩɩra fɛw, a cʋʋna wire yẽther. 23 Wire yẽtheraale, tɩbɩla na n kɔɔ puno dɩ wɩ yɩ kha ga; dɩ mɛ̃ ntɛ n too ka a kɔɔ hanɩ. Sɩ Ɩjɩrayɛl bɩsana wer kɔɔ hananɛ dahɩrɛ awɩ pa.
24 Dɩ Faarɔ̃ thɔ̃ we Mʋɩjɩ a sʋʋraa: «Nɩ jala dɔ thɔma Thãgba Kɔ̃tɩnna. Nɩ punone jalna anɩ cɔdara, sɩ nɩ faga anɩ nʋ̃ yɩra, na anɩ nʋ̃ kɔ̃tɩ̃sɔ kɛ, sa jala.» 25 Dɩ Mʋɩjɩ birsee: «Dɩ a gɩ ha mɛ̃, fɛrɛ thɛthɛ na dɔ sɩ ɲɔ̃kɔɔ gɩrɛ sa gbanɩ a na jinə bonɩɛsɔ na bonɩ thiinə Thãgba Kɔ̃tɩn, asɩ Thãgbara gaa? 26 Dɩrakɛ, sa jalnanɛ asɩ nʋ̃sɔ, bɩɛlakɛ na sɩ kɩɛra'; gɩdonɩ wɛrara sa fʋ ɩkha na jinə bonɩɛ Thãgba Kɔ̃tɩn, asɩ Thãgbara. Sɩ sa danɩ le pa', sa jɩ gɩrɛ sa gbanɩ na jinə bonɩɛ Thãgba Kɔ̃tɩnna ga.» 27 Dɩ Thãgba Kɔ̃tɩn cʋʋrɛ Faarɔ̃ɔ ha dɩɩ khɩɩr aa tu na faa wɩ wɩ jala'.