Thɩ̃ bi bonɩɛ
2
1 «Ado tibil ƴaal a ji mɛr Thãgba Kɔ̃tɩnna thɩ̃ bi bonɩɛ, gɩ dɔ mɩ̃ phuu, a pɛr niin, a dɛɛnɔ latɩkolo. 2 A jalana bonɩ jidarara, kɛ dɔnɩ Aarɔ̃ɔ bikũusɔ, bonɩ jidaar n kpɩ mɩ̃ bʋɔra, wɩ pɛrnɩ niin na latɩkolola fɛw ɲɔ̃kor hire phi a thii bonɩ ji paar, gɩ do jɩ̃jɩna thɩ̃ɛ. Gɛr dʋɔn thɩ̃ bi bonɩ thiinə, kɛ n hʋnanɩ mɛr Thãgba Kɔ̃tɩn daw. 3 Sɩ thɩ̃ bi bonɩ mɩ̃ gɩrɛ sɛnɩ, Aarɔ̃ na ɔɔ bikũusɔ hɩna. Thɩ̃ khaa gɩ na sobɔr; gɩdonɩ thɩ̃ bi bonɩɛɛkɛ wɩ jini mɛr Thãgba Kɔ̃tɩnna gɩ, a sɩ.4 Ado thɩ̃ bɩnanɛɛkɛ wɩ n hɩnɩ buru khaa fɩ n jinə thɩ̃ bi bonɩɛra, gɩ dɔ gatookɛ wɩ cʋʋnanɩ mɩ̃ phuu; gɩ dɔ gatookɛ tabɩɩr na harna', kɛ wɩ gbʋrnanɩ niin, agɩbo gatookɛ hɔnɩ daƴʋ̃ɔ, kɛ tabɩɩr na harna', kɛ wɩ pɛrnɩ niin. 5 Ado thɩ̃ bɩnanɛɛkɛ wɩ n phonɩ daƴɔ̃ cɩɩra fɩ n jinə, gɩ dɔ mɩ̃ phuu, kɛ wɩ gbʋrnanɩ niin, sɩ tabɩɩr na n hara'. 6 Agɩpɩ fɩ cʋɔr sɩ fɩ pɛr niin ƴũu. Gɛr dʋɔn thɩ̃ bi bonɩɛ.
7 Ado thɩ̃ bɩnanɛɛkɛ wɩ n phonɩ kpɛkpɛ cɩɩra fɩ n jinə, gɩ dɔ mɩ̃ phuu, kɛ wɩ gbʋrnanɩ niin.
8 Ntɛ n gba thɩ̃ bi bonɩɛra a gbɛbɩnanɩ thɩ̃ɛsɔɔlera fɛw a jalana mɛr Thãgba Kɔ̃tɩnɩ pa a hana bonɩ jidaar, a gba a thɩɩn bonɩ ji pa kɩrɔ. 9 Bonɩ jidaar n tero gɩrɛ teananɩ gɩ dɔ jɩ̃jɩna thɩ̃ɛ a thiə bonɩ ji paar. Gɛr dʋɔn thɩ̃ bi bonɩ thiinə, kɛ n hʋnanɩ mɛr Thãgba Kɔ̃tɩn daw. 10 Thɩ̃ bi bonɩ mɩ̃ gɩrɛ sɛnɩ, Aarɔ̃ na ɔɔ bikũusɔ hɩna. Thɩ̃ khaa gɩ na sobɔr; gɩdonɩ thɩ̃ bi bonɩ thiinəəkɛ wɩ jini mɛr Thãgba Kɔ̃tɩnna gɩ, a sɩ.
11 Thɩ̃ bi bonɩɛ wo bonɩɛɛkɛ na jini mɛr Thãgba Kɔ̃tɩnna, tabɩɩr na n hara'. Na n gba tabɩɩr yuurəkɛ dɩ thʋʋr gɩ a gbɛbɩna bonɩɛɛkɛ wɩ n thiini mɛr Thãgba Kɔ̃tɩnna ga. 12 Nɩ punone a 'laa gɩ mɛr Thãgba Kɔ̃tɩnna, mɔ̃ wɩ n 'laanɩ caca thɩ̃ɛ, kɛ dɔnɩ khaardaa. Sɩ na n thii gɩ bonɩ ji paar, bonɩ thiinə khaa ga n hʋna daʋa'. 13 Afɩ thɩ̃ bi bonɩ wo bonɩra, pɩɛr laan. Fa n do afɩ thɩ̃ bi bonɩ bɩɛlakɛ n 'lee laan, kɛ dʋɔnɩ mɛr afɩ Thãgbaa nɔ bɩɛl ʋlfɛ jã'. Afɩ bonɩsɔɔra fɛw, na pɩɛr laan.
14 Ado ntɛ na ji mɛr Thãgba Kɔ̃tɩnna caca thɩ̃ bi bonɩɛ, dɔ gɩ do bile caarsɔɔkɛ wɩ cɩɩnɩ dɔɔra, a nã. Gɛr na dɔ ɔɔ caca thɩ̃ bi bonɩ. 15 Ntɛ n pɩɛr niin a pɩɛr latɩkolo. Gɛr dʋɔn thɩ̃ bi bonɩɛ. 16 Bonɩ jidaar n tero beekɛ wɩ nanɩ gbe, kɛ dɔnɩ jɩ̃jɩna thɩ̃ɛ: bi nananɛ gbe na niin gbe na latɩkolo fɛw a thiə. Gɛr dʋɔn bonɩ thiinə mɛr Thãgba Kɔ̃tɩnna.»