'Likha bonɩɛ
3
1 «Ado 'likha bonɩɛ ha ntɛɛ bonɩra, ado na a n jinə, a dakʋʋr gɩ, a dakhɛr gɩ, a 'laanɛ ʋrɛ na hananɩ taana' mɛr Thãgba Kɔ̃tɩnɩ ƴɔɔ. 2 Ntɛ n dɛɛnɛ ɔɔ ɲɔ̃ ɔɔ bonɩ ji nʋmɩnaa yʋɔ, sa kɔ mɛr Thãgba cãa wa lõfonʋɔra; bonɩ jidaraakɛ dɔnɩ Aarɔ̃ɔ bikũusɔ n gba tɔmɩn wɩ cala bonɩ ji paar gɛlɔ gɛlɔ wɩ finə. 3 Ga 'likha bonɩraalera, ntɛ n tero mɛr Thãgba Kɔ̃tɩnɩ bonɩ thiinəda: niinikɛ n hanɩ pɛɛra na nĩ gɩrɛ fɛw n theni bɩ̃daar thɩɛna, 4 na tẽbe yeɲɔ fɛw na niinikɛ n ma gɩnɩ, kɛ n theni pelela na phəphələəkɛ n theni haara, a hɛlaa na tẽbe. 5 Aarɔ̃ɔ bikũusɔ n thiə gɩ bonɩ thiinənə ƴũu, kɛ dɛɛnɛnɩ dɛɛraakɛ hanɩ dɔɔra, le bonɩ ji paara ƴũu. Gɛr dʋɔn bonɩ thiinə, kɛ n hʋnanɩ mɛr Thãgba Kɔ̃tɩn daw.6 Ado nʋ̃ yɩra ntɛ n jinə 'likha bonɩɛra a n jini mɛr Thãgba Kɔ̃tɩnna, a dakʋʋr gɩ, a dakhɛr gɩ, a 'laanɛ ʋrɛ na hananɩ taana'. 7 Ado ntɛ na jinə bana ɓolʋ, a jalana mɛr Thãgba Kɔ̃tɩnɩ ƴɔɔ. 8 Ntɛ n dɛɛnɛ ɲɔ̃ɔ ɔɔ bonɩ ji nʋmɩnaa yʋɔ, sa kurəə ulebire mɛr Thãgba cãa wa ƴɛbʋrɔ, Aarɔ̃ɔ bikũusɔ n gba tɔmɩn wɩ cala bonɩ ji pa gɛlɔ gɛlɔ wɩ finə. 9 'Likha bonɩɛraalera, gɩrɛ ntɛ na jinəni mɛr Thãgba Kɔ̃tɩnna bonɩ thiinə dʋɔn: niin na sʋʋ biləni, kɛ a na phenɩ sɩgbogboro kɩrɔ kpɩ̃ɩ, na niinikɛ n hanɩ pɛɛra, na nĩ gɩrɛ fɛw n theni bɩ̃daar thɩɛna, 10 na tẽbe yeɲɔ fɛw, na niinikɛ n ma gɩnɩ, kɛ n theni pelela na phəphələəkɛ n theni haara; a hɛlaa na tẽbe. 11 Bonɩ jidaar n thiə gɩ bonɩ ji paara ƴũu. Gɛr dʋɔn dikor thiinəəkɛ dʋɔnɩ mɛr Thãgba Kɔ̃tɩnɩda.
12 Ado bʋ ntɛ n jinə 'likha bonɩɛra, a jalana mɛr Thãgba Kɔ̃tɩnɩ ƴɔɔ. 13 A dɛɛnɛ ɲɔ̃ɔ ɔɔ bonɩ ji nʋmɩnaa yʋɔ, sa kurəə ulebire mɛr Thãgba cãa wa ƴɛbʋrɔ, Aarɔ̃ɔ bikũusɔ n gba tɔmɩn wɩ jɛbɩ bonɩ ji pa gɛlɔ gɛlɔ wɩ finə. 14 'Likha bonɩɛraalera, gɩrɛ ntɛ na jinəni mɛr Thãgba Kɔ̃tɩnna bonɩ thiinə dʋɔn: niinikɛ n hanɩ pɛɛra na niin fɛʋʋkɛ n theni bɩ̃daar thɩɛna, 15 na tẽbe yeɲɔ fɛw, na niinikɛ n ma gɩnɩ, kɛ n theni pelela na phəphələəkɛ n theni haara; a hɛlaa na tẽbe. 16 Bonɩ jidaar n thiə gɩ bonɩ ji paara ƴũu. Gɛr dʋɔn dɩko thiinəəkɛ n hʋnanɩ mɛr Thãgba Kɔ̃tɩn daw. Niin fɛw, mɛr hɩna.
17 Nɛrɛ na anɩ məlsɔɔ jɔfʋ gɩ khorr vʋ̃ʋ; paar wo paarɩkɛ na toonɩ, na n kho niin, dɩ tɔmɩn ga.»