So hɛl bonɩɛsɔ.
4
1 Thãgba Kɔ̃tɩn sor Mʋɩjɩra ayɩ: 2 «Sɔ Ɩjɩrayɛl bɩsanana gɩrɛ wa cʋʋnɩ ɔbɔɔkɛ tibil na jɩnɩ sa cʋʋ sopuə', ɔbɔɔkɛ a dɩnɩ mɛr Thãgba Kɔ̃tɩnɩ jɔfʋ ʋkha bɩɛla, a cʋʋ gɩrɛ jɔfʋ pɩɛrnɩ.Bonɩ jidaarɩkɛ wɩ pɛnɩ niin yʋɔɔ thɛthɛɛ so hɛl bonɩ.
3 Ado bonɩ jidaarɩkɛ wɩ pɛrnɩ niin yʋɔ cʋɛ sopuu a to tɩbɩla puure, a na tire nake ɓolʋʋkɛ na hananɩ taana', kɛ wa jinəni bonɩɛ mɛr Thãgba Kɔ̃tɩnna ɔɔ sopuurəəlera a cʋʋnɩ. 4 A jalana nakɩɩra mɛr Thãgba Kɔ̃tɩnɩ ƴɔɔ, le mɛr Thãgba cãa wa lõfonʋɔra. A dɛɛnɛ ɔɔ ɲɔ̃ nakɩɩraa yʋɔ, sa kurəə ulebire le mɛr Thãgba Kɔ̃tɩnɩ ƴɔɔ. 5 Bonɩ jidaarɩkɛ wɩ pɛrnɩ niin yʋɔ n gba nakɩɩrɩ tɔmɩna a lonana mɛr Thãgba cãa wa bɩnɔ. 6 A ɓɛ tɔmɩna na ɔɔ ɲɔ̃bi a jɛba ɲɛ̃be makoɲɔ mɛr Thãgba Kɔ̃tɩnɩ ƴɔɔ sãasɩ paar, du vaar kẽkẽ ƴɛbʋrɔ. 7 Bonɩ jidaar n pɩɛr tɔmɩna latɩkolo ii bonɩ ji pa ʋmana, kɛ hanɩle mɛr Thãgba Kɔ̃tɩnɩ ƴɔɔ, mɛr Thãgba cãa wa bɩnɔ. Agɩpɩ a deere tɔmɩn gɩrɛ sɛnɩ fɛw nʋ̃ thii bonɩ ji pa jəədaara, kɛ hanɩle mɛr Thãgba cãa wa lõfonʋɔra. 8 A kpaanɛ so hɛl bonɩ nakɩɩrɩ ninə fɛw; niinikɛ n hanɩ pɛɛra, na nĩ gɩrɛ fɛw n theni bɩ̃daar thɩɛna, 9 na tẽbe yeɲɔ fɛw, na niinikɛ n ma gɩnɩ, kɛ n theni pelela, na phəphələəkɛ n theni haara, a hɛlaa na tẽbe, 10 gɩ ho mɔ̃ wɩ n hɛlnɩ 'likha bonɩ nakɩɩrɩda. Bonɩ jidaar n thiə gɩ bonɩ thii bonɩ ji paara ƴũu. 11 Sɩ nakɩɩrɩ lo wer na ɔɔ nʋ̃ fɛw na ɔɔ yʋ, a gbana nɛɛ, na bɩ̃daar thɩ̃ɛ, na pɩba, 12 nakɩɩra biləni, a gba le jɛw a thɛna khuirə, ka wɩ n deernɩ bonɩ ji thoo, a thiəə dokur dɔɔra. Thoora ƴũu, wa thii ɩ.
Ɩjɩrayɛl bɩsanaa so hɛl bonɩ
13 Ado Ɩjɩrayɛl bɩsana fɛw na jɩ̃ɛna' sa cʋʋ sopuu, a dɩ mɛr Thãgba Kɔ̃tɩnɩ jɔfʋ ʋkha bɩɛla, sɩ wa ja', wɩ hananɛ dɩɩ mɔ̃ wɩ cʋʋnɩ gɩrɛ jɔfʋ pɩɛrnɩ. 14 Ado sopuukɛra wɩ cʋʋnɩ ɩ̃ a yɩr war, wa tire nake ɓolʋ, wɛr fɛʋʋ irə, a na jalna mɛr Thãgba cãa wa lõfonʋɔra, wɩ jinə so hɛl bonɩɛ puureraalera wɩ cʋʋnɩ. 15 Ɩjɩrayɛl bɩsanaa kɔ̃tɩ̃sɔ n dɛɛnɛ awɩ ɲɛ̃ nakɩɩraa yʋɔ mɛr Thãgba Kɔ̃tɩnɩ ƴɔɔ sa kurəə ulebire lera mɛr Thãgba Kɔ̃tɩnɩ ƴɔɔ. 16 Agɩpɩ bonɩ jidaarɩkɛ wɩ pɛrnɩ niin yʋɔ n gba tɔmɩna gbe a lonana mɛr Thãgba cãa wa bɩnɔ. 17 Bonɩ jidaar n ɓɛ tɔmɩna na ɔɔ ɲɔ̃bi a jɛba ɲɛ̃be makoɲɔ mɛr Thãgba Kɔ̃tɩnɩ ƴɔɔ sãasɩ paar, du vaar kẽkẽ ƴɛbʋrɔ. 18 A pɩɛr tɔmɩna latɩkolo ii bonɩ ji pa ʋmana, kɛ hanɩ le mɛr Thãgba Kɔ̃tɩnɩ ƴɔɔ, mɛr Thãgba cãa wa bɩnɔ. Agɩpɩ a deere tɔmɩn gɩrɛ sɛnɩ fɛw nʋ̃ thii bonɩ ji pa jəədaara kɛ hanɩle mɛr Thãgba cãa wa lõfonʋɔra. 19 A kpaanɛ so hɛl bonɩ nakɩɩrɩ ninə fɛw a thiə bonɩ ji paara ƴũu. 20 Mɔ̃kɛra bonɩ jidaar cʋʋnanɩ ɔɔ so hɛl bonɩ nake, a cʋɛna nake ʋrɛ ɔmɛna. Thale bonɩ jidaar na phʋɔl wɩ, dɩ mɛr Thãgba na faarɛ awɩ sopuu na ha wɩ. 21 Agɩpɩ a gba nakɩɩra le jɛw a thɛna khuirə a thiə mɔ̃ a thiini ɔɔ thɛthɛɛ so hɛl bonɩ nake cacara. Gɛr dʋɔn so hɛl bonɩɛ Ɩjɩrayɛl bɩsana fɛʋʋ irə.
Kɔ̃tɩnaa so hɛl bonɩ.
22 Ado Ɩjɩrayɛl bɩsanaa kɔ̃tɩn ʋkha gɩ, aa ja' sa cʋʋ sopuu, a dɩ mɛr Thãgba Kɔ̃tɩn, ɔɔ Thãgbaa jɔfʋ ʋkha bɩɛlla, a hananɛ dɩɩ mɔ̃ a cʋʋnɩ gɩrɛ jɔfʋ pɩɛrnɩ. 23 Ado sopuukɛra a cʋʋnɩ ɩ̃ a yɩrraa, a na tire bʋkɩɩr, kɛ na hananɩ taana' wɩ jinə bonɩɛ. 24 A dɛɛnɛ ɔɔ ɲɔ̃ bʋkɩɩraa yʋɔ sa kurəə ulebire Thãgba Kɔ̃tɩnɩ ƴɔɔ dapaakɛ wɩ n kʋʋrnɩ nʋ̃ thii bonɩ ji nʋma. Gɛr dʋɔn so hɛl bonɩɛ. 25 Bonɩ jidaar n ɓɛ so hɛl bonɩ ji tɔmɩna na ɲɔ̃bire a pɩɛr nʋ̃ thii bonɩ ji pa ʋmana sa deere gɩrɛ sɛnɩ bonɩ ji pa jəədaara. 26 A thiə so hɛl bʋkɩɩrɩ ninə fɛw bonɩ ji paara ƴũu mɔ̃ wɩ n thiini 'likha bonɩ ji niin. Thale bonɩ jidaar na phʋɔl Ɩjɩrayɛl bɩsanaa kɔ̃tɩn dɔɔra, ɔɔ sopuu dɩ mɛr Thãgba na faarɛ ɔɔ sopuu na haa.
Tɩɩ khɩɩ so hɛl bonɩ
27 Ado tɩɩ khɩɩ gɩ, aa ja' sa cʋʋ sopuu, a dɩ mɛr Thãgba Kɔ̃tɩnɩ jɔfʋ ʋkha bɩɛlla, a hananɛ dɩɩ mɔ̃ a cʋʋnɩ gɩrɛ jɔfʋ pɩɛrnɩ. 28 Ado sopuukɛra a cʋʋnɩ ɩ̃ a yɩrraa a na tire bʋ khɛr, kɛ na hananɩ taana' wɩ jinə so hɛl bonɩɛ ɔɔ sopuurərə a cʋʋnɩ. 29 A dɛɛnɛ ɔɔ ɲɔ̃ so hɛl bonɩ ji nʋmɩnaa yʋɔ sa kurəə ulebire dapaakɛ wɩ n kʋʋrnɩ nʋ̃ thii bonɩ ji nʋma. 30 Bonɩ jidaar n ɓɛ bonɩ ji tɔmɩna na ɔɔ ɲɔ̃bi a pɩɛr nʋ̃ thii bonɩ ji pa ʋmana, sa deere gɩrɛ sɛnɩ bonɩ ji pa jəədaara. 31 A kpaanɛ niin fɛw mɔ̃ wɩ n kpaanɩ 'likha bonɩ ji nʋ̃ niin a thiə bonɩ ji paara ƴũu ga n hʋ̃ mɛr Thãgba Kɔ̃tɩn daw. Thale bonɩ jidaar na phʋɔl ntɛ ɔɔ sopuu, dɩ mɛr Thãgba na faarɛ ɔɔ sopuu na haa.
32 Ado banaa ntɛ n ti a jinə so hɛl bonɩɛ ɔɔ sopuurəra, a te dakhɛrɩkɛ na hananɩ taana'. 33 A dɛɛnɛ ɔɔ ɲɔ̃ so hɛl bonɩ ji nʋmɩnaa yʋɔ sa kurəə ulebire gɩ do so hɛl bonɩɛ, dapaakɛ wɩ n kʋʋrnɩ nʋ̃ thii bonɩ ji nʋma. 34 Bonɩ jidaar n ɓɛ so hɛl bonɩ tɔmɩna na ɔɔ ɲɔ̃bi a pɩɛr nʋ̃ thii bonɩ ji pa ʋmana sa deere gɩrɛ sɛnɩ bonɩ ji pa jəədaara. 35 A kpaanɛ niin fɛw mɔ̃ wɩ n kpaanɩ 'likha bonɩ bana bi niin. A thiə gɩ bonɩ ji paara ƴũu na gɩ̃ɩ bonɩ thiinəəkɛ wɩ thiini mɛr Thãgba Kɔ̃tɩnɩ ƴɔɔ. Thale bonɩ jidaar na phʋɔl ntɛ ɔɔ sopuu, dɩ mɛr Thãgba na faarɛ ɔɔ sopuu na haa.»