Dɩ pa ɩkhaakɛ teananɩ wɩ jero so hɛl bonɩɛ
5
1 «Ɔbɔɔkɛ thɩ̃ɛ danɩ dɩ wɩ bule a na kpãkpaanɔ na phʋʋrɛ dɩ tibil hale a kɔɔ toro yire thɩ̃doora sɩ ntɛ na so gɩrɛ a yɩnɩ, agɩbo gɩrɛ a jɩna', sopuu ntɛ cʋʋ. 2 Dɩ ado tibil thar thɩ̃ɛ wo thɩɛnaakɛ dɔnɩ thɩ̃ bise mɔ̃ jɔfʋ sonɩ sɩ aa ja', a hɔ̃ nʋ̃ khiri gɩ, a cʋɔr nʋ̃ khiri gɩ, kɛ dɔnɩ nʋ̃ bise mɔ̃ jɔfʋ sonɩ, agɩbo thɩ̃ gɩrɛ n haalɛnɩ thɩɩra na bɩnɛ kɛ bisenenɩ mɔ̃ jɔfʋ sonɩ, ntɛ lɩrɛ; a pɛr dɩɩ ɔɔbara. 3 Dɩ agɩbo wo ntɛ na ja', sa thar tibiləəkɛ lɛnɩ, ɔbɔɔkɛ a ɩnɩ a jɩ, ntɛ dakha lɩrɛ; a hananɛ dɩɩ. 4 Dɩ a tibil na kpɩɛra' sa ʋlfɛ ʋlfɛrɛ, a ɔɔda bɔ gɩ, a ɔɔda bɔ ga, mɔnakɛ ʋlfɛ dɔɔle hanɩ, ɔbɔɔkɛ a ɩnɩ a jɩna gɩ, ntɛ dɩrɛ.5 Ado tibil dɩ ga thɩ̃sɔraakɛ bɩɛl, ntɛ n cana sopuu dɔɔra. 6 Agɩpɩ ntɛ na tire nʋ̃ yɩra bɩɛl, kɛ dɔnɩ dakhɛr, a banaa gɩ, a bʋ gɩ, gɩ do dɩɩkɛ a cʋʋnɩ mɛr Thãgba Kɔ̃tɩnna dɔ nɔɔ, wɩ jinə so hɛl bonɩɛ wɩ gbɛbɩna ɔɔ dɩpa. Thale bonɩ jidaar na phʋɔl ntɛ ɔɔ sopuu, dɩ mɛr Thãgba na faarɛ ɔɔ sopuu na haa.
Bɔdaraa so hɛl bonɩ
7 Ado ntɛ na hana thɩ̃ɛ ɲɔ̃kɔɔ a na puno na thenanakɛ nʋ̃ yɩra ga, ntɛ n hanana pubə yeɲɔ, agɩbo kʋlã pubə yeɲɔ a pɔna mɛr Thãgba Kɔ̃tɩnɩ ƴɔɔ, gɩ do sopuukɛ a cʋʋnɩ dɔ nɔɔ. Bɩɛl na dor so hɛl bonɩdaa, sɩ bɩɛl n do bonɩ thiinədaa wɩ gbɛbɩna ɔɔ dɩpa. 8 A jalana bonɩ jidaara, a kɔɔ ti ʋrɛ dɔnɩ so hɛl bonɩdaa ɓo, a khɩɩ ulebire na ɲɔ̃bi khʋrɛ a kʋ, sɩ a na n khe kurə'. 9 Bonɩ jidaar n gba so hɛl tɔmɩna a jɛba bonɩ ji pa horʋra. Sɩ gɩrɛ sɛnɩ a gba a deere bonɩ ji pa jəədaara. Gɛr dʋɔn so hɛl bonɩɛ. 10 Agɩpɩ bonɩ jidaar n gba 'lomĩ ʋrɛ sɛnɩ a jənə nʋ̃ thii bonɩɛ mɔ̃ ga jɔfʋ hanɩ. Thale bonɩ jidaar na phʋɔl ntɛ sopuurəəkɛra a cʋʋnɩ, dɩ mɛr Thãgba na faarɛ ɔɔ sopuu na haa.
11 Ado ntɛ na hananakɛ thɩ̃ɛ, a na yɩ pubə yeɲɔ, agɩbo kʋlã pubə yeɲɔa', ntɛ na tire mɩ̃ phuu, kilə yẽther wɩ jinə so hɛl bonɩɛ ɔɔ sopuurə. Ntɛ na n pɛr niinə', a na n pɛr latɩkoloa', gɩdonɩ so hɛl bonɩɛ gɩ. 12 Ntɛ n jalana bonɩ jidaara, bonɩ jidaar n kpɩ mɩɩna ɲɔ̃kor hire phi a thii bonɩ ji paara ƴũu na gɩ̃ɩ bonɩ thiinəəkɛ n hɩnanɩ le mɛr Thãgba Kɔ̃tɩnɩ ƴɔɔ, gɩ do jɩ̃jɩna thɩ̃ɛ. Gɛr dʋɔn so hɛl bonɩɛ. 13 Thale bonɩ jidaar na phʋɔl ntɛ sopuu dɔɔkɛra a cʋʋnɩ thɩ̃ doorara, dɩ mɛr Thãgba na faarɛ ɔɔ sopuu na haa. Mɩ̃ gɩrɛ sɛnɩ, bonɩ jidaar hɩna mɔ̃ gɩ n hanɩ na thɩ̃ bi bonɩɛ.»
So gbɛbɩ bonɩɛ
14 Thãgba Kɔ̃tɩn sor Mʋɩjɩra wo ayɩ: 15 Ɔbɔɔkɛ tibil na jɩna', sa cʋʋ dɩɩ thɩɛnaakɛ dɔnɩ mɛr Thãgba Kɔ̃tɩnɩda, ntɛ na tire banakɩɩrɩkɛ na hananɩ taana', ɔɔ nʋ̃sɔɔra gɩ do sopuu gbɛbɩdaa. Dɔ banakɩɩra n mɩɛ kha na sikile mũsũ nʋɔɔkɛ wɩ pɛrnɩ le mɛr Thãgba cãa waw, ntɛ n pɔna mɛr Thãgba Kɔ̃tɩnna, wɩ jinə sopuu gbɛbɩ bonɩɛ. 16 Agɩpɩ ntɛ n birsene gɩrɛ a dɩrɔnɩ mɛr Thãgba cãa waarara, sa birə gba gɩrɛra a birseni ɔɔ nɔ a tɩnɛnɛ tɩnɛ paar yemɔy, a gba tɩnɛ pa bɩɛl a dɛbarɔ a hana bonɩ jidaar fɛw. Dɩ bonɩ jidaar na phʋɔlʋʋlɛ na so hɛl banakɩɩra, dɩ mɛr Thãgba na faarɛ ɔɔ sopuu na haa.
17 Ado tibil na ja', sa cʋʋ sopuu, a dɩ mɛr Thãgba Kɔ̃tɩnɩ jɔfʋ ʋkha bɩɛlla, a cʋʋrɛ gɩrɛ jɔfʋ pɩɛrnɩ; ntɛ heene sor ɔɔbara; ɔɔ yʋɔ puure ha. 18 Ntɛ na tire banakɩɩrɩkɛ na hananɩ taana', ɔɔ nʋ̃sɔɔra a mɩɛna nʋɔɔkɛ wɩ pɛrnɩ, gɩ do sopuu gbɛbɩdaa. Dɩ bonɩ jidaar na phʋɔlʋʋlɛ sopuukɛra aa jɩnɩ sa cʋa', dɩ mɛr Thãgba na faarɛ ɔɔ sopuu na haa. 19 Gɛr dʋɔn so gbɛbɩ bonɩɛ; gɩdonɩ ntɛ kɔɔ dɩrɛ mɛr Thãgba Kɔ̃tɩnna waa gel.»
20 Thãgba Kɔ̃tɩn sor Mʋɩjɩra wo ayɩ: 21 «Ɔbɔɔkɛ tibil cʋʋnɩ sopuu, a cʋʋ gɩrɛ na sarana' mɛr Thãgba Kɔ̃tɩnna, a kur sõsor a ha ɔɔ alãkha tibil thɩ̃ dɩkharaakɛ a haanɩ a thɩnɛ, agɩbo a pemʋʋnɩ, agɩbo ntɛ yure, agɩbo fãga bɩɩ a taana ɔɔ alãkha tibilə; 22 agɩbo dɩkha bo dɩ yɩɛ sa bana ayɩ, ɩna yɩ thɩ̃doora bonə', agɩbo sõso ʋlfɛrɛ ntɛ ʋlfɛ a pɛ thɩ̃ bɩɛlla, thɩ̃ɛ dɩɩdɩɩraakɛ tibil punonɩ a dɩrɔ, 23 ntɛɛle cʋʋrɛ sopuu a pɛr ɔɔbara. A na 'laarɛ thɩ̃doora a yuni, agɩbo a taanɩ na fãga bɩɩ, agɩbo gɩrɛra wɩ kɔɔ haanɩ a thɩnɛ, agɩbo thɩ̃doora bonɩ dɩ yɩɛ sa kɔɔ bana, 24 agɩbo thɩ̃doo wo thɩ̃dooraakɛ a kɔɔ ʋlfɛrɔnɩ sõso ʋlfɛrɛra. Ntɛ n birsene thɩ̃doo nɔra biləni sa birə tɩnɛnɛ ɔ nɔra tɩnɛ paar yemɔy a gba tɩnɛ pa bɩɛl a dɛba thɩ̃doo nɔrara a 'laanɛ thɩ̃daara dawiilera a na jini ɔɔ so gbɛbɩ bonɩ. 25 Ntɛ na tire banakɩɩrɩkɛ na hananɩ taana' ɔɔ nʋ̃sɔɔra a na jalna bonɩ jidaara gɩ mɩɛna nʋɔɔkɛ fɩ kpanɩ, gɩ do sopuukɛ a cʋʋnɩ mɛr Thãgba Kɔ̃tɩnna dɔ nɔɔ. 26 Dɩ bonɩ jidaar na phʋɔlʋʋlɛ le mɛr Thãgba Kɔ̃tɩnɩ ƴɔɔ. Dɩ a ntɛɛ sopuukɛ a cʋʋnɩ harakɛ mɔ̃, sɩ ma faarɛ ɔɔ sopuu na haa.»