Bonɩ jidaraa jɔfʋsɔ
Bonɩ thiinəə jɔfʋ
6
1 Thãgba Kɔ̃tɩn sor Mʋɩjɩra ayɩ: 2 «Mɩɛnɛ Aarɔ̃ na ɔɔ bikũusɔ wɔɔ: "Bonɩ thiinəə jɔfʋ ha gɩrɛ n kpaanɛnɩ; bonɩ thiinə teenanɛ ga n hana bonɩ ji paara ƴũu, dɩtɩnɔ fɛw, a wɩlana dɩɩ; dɔɔ na n khiir bonɩ ji paara'. 3 Bonɩ jidaar n tɔ ɔɔ gbɔɔlɔ̃ɔkɛ wɩ lenanɩ lɛ̃, a saana khursisɔɔkɛ wɩ lenanɩ lɛ̃, sa khɩa bonɩ thiinəəkɛ hɩnanɩ dɔɔra a do thoo, a dera bonɩ ji pa gɛlɔ. 4 Agɩpɩ a fʋrɛ ga kẽkẽsɔɔle sa tɔ kẽkẽ kpɩɩsɔ, sa khɩa thoora jɛw a thɛna khuirə ka wɩ n deernɩ bonɩ ji thoo, a deere faa. 5 Dɔɔ teenanɛ ga n hana bonɩ ji paara ƴũu, ga n khiirə'. Duuro wo duuro, Bonɩ jidaar n tɔrɔ dɛɛ, a pɩɛr bonɩ thiinə ɓo, agɩpɩ a thii niinikɛ dɔnɩ 'likha bonɩ niin. 6 Dɔɔ na n hana bɔɔ fɛw bonɩ ji paara ƴũu; ga n khiirə'.Thɩ̃ bi bonɩɛɛ jɔfʋ.
7 Thɩ̃ bi bonɩɛɛ jɔfʋ ha gɩrɛ n kpaanɛnɩ: Aarɔ̃ɔ bikũusɔ n gba gɩ a danana mɛr Thãgba Kɔ̃tɩnɩ ƴɔɔ, bonɩ ji pa ƴɛbʋrɔ. 8 Bonɩ jidaar n kpɛ mɩɩna na niin na latɩkolola fɛw, kɛ dɛɛnɛnɩ thɩ̃ bi bonɩɛrara fɛw, ɲɔ̃kor hire phi a thiə gɩ bonɩ ji paara ƴũu, gɩ do jɩ̃jɩna thɩ̃ɛ, kɛ n hʋnanɩ mɛr Thãgba Kɔ̃tɩn daw. 9 Thɩ̃ bi bonɩ mɩ̃ gɩrɛ sɛnɩ, Aarɔ̃ na ɔɔ bikũusɔ hɩna a na kho. Wɩ khɔ, sɩ tabɩɩr na n hara'. Mɛr Thãgbaa pa wa kho gɩ. Kɩrʋ dʋɔn le mɛr Thãgba cãa wa gbasa bɩnɔ. 10 Wa n cʋʋna gɩ tabɩɩra', gɩdonɩ gɩrɛ thɛnɩ ɩ̃ bonɩ thiinəsɔɔra gɩ, dɩ̃ ha wɩ gɩ dɔ awɩda. Thɩ̃ khaa gɩ na sobɔr mɔ̃ so hɛl bonɩdaa na so gbɛbɩ bonɩdaa hanɩ. 11 Aarɔ̃ɔ məlsɔɔra, kuuminə fɛw na khɔ gɩ. Anɩ məlsɔɔ jɔfʋ gɩ khorr mɛr Thãgba Kɔ̃tɩnɩ bonɩ thiinəə thɩmɩɩra. Thɩ̃ khaa gɩ. Tibil khɩɩ wo, tibil khɩɩkɛ na tharɔnɩ, ntɛ na 'liri sor dɩ ga khɩɩr na ka." »
12 Thãgba Kɔ̃tɩn sor Mʋɩjɩra ayɩ: 13 «Gɩrɛ Aarɔ̃ na ɔɔ bikũusɔ na n jinəni bonɩɛ mɛr Thãgba Kɔ̃tɩnna wireekɛ wa pɛ warnɩ niin yʋɔ ha gɩrɛ: wa jinəne mɩ̃ phuu kilə yẽther, dakuru duuro, dakuru dʋɔrɔ. 14 Niin wa gbʋrna gɩ bɔɔbɔɔ a na pho daƴɔ̃ cɩɩra. Agɩpɩ fɩ kuur gɩ, sɩ fɩ gba fɩ dana mɛr Thãgba Kɔ̃tɩnɩ ƴɔɔ, gɩ do thɩ̃ bi bonɩ ji thɩ̃ɛɛkɛ n hʋnanɩ mɛr Thãgba Kɔ̃tɩn daw. 15 Bonɩ jidaarɩkɛ wa pɛnɩ niin yʋɔ, Aarɔ̃ɔ bikũusɔɔ thɩ̃thɩɩn da dee ɩ a na do gbõdaar, a na n je thɩ̃ bi bonɩ caarɩkɛra. Wɩ thiə gɩ biləni gɩ hɩ̃ mɛr Thãgba Kɔ̃tɩnɩ ƴɔɔ. Jɔfʋ gɩ khorr, kɛ thɛnɩ mɛr Thãgba Kɔ̃tɩnɩ pa. 16 Bonɩ jidaarɩ thɩ̃ bi bonɩ wo bonɩ, wɩ thiə gɩ ɓibi; wa n khoa'.»
So hɛl bonɩ jɔfʋ
17 Thãgba Kɔ̃tɩn sor Mʋɩjɩra a yɩ: 18 «Sɔ Aarɔ̃ na ɔɔ bikũusɔɔra a yɛ: "So hɛl bonɩ jɔfʋ ha gɩrɛ n kpaanɛnɩ: Paarɩkɛ wɩ n kʋnɩ bonɩ thiinə nʋma, dapaara wa kʋ so hɛl bonɩ nʋmɩ, mɛr Thãgba Kɔ̃tɩnɩ ƴɔɔ; gɩdonɩ thɩ̃ khaa gɩ na sobɔr. 19 Bonɩ jidaarɩkɛ jenɩ bonɩɛra, punone a kho gɩ. Sɩ mɛr Thãgbaa pa wa kho gɩ, kɩrʋ dʋɔn le mɛr Thãgba cãa wa gbasa bɩnɔ. 20 Dɩ tibil wo tibilikɛ agɩbo thɩ̃ɛ wo thɩ̃ɛɛkɛ na thaanɩ bonɩ nʋʋnaale, mɛr Thãgba hɩnaa. A ga tɔmɩn bã a ma kɩ̃kɩɩn, bonɩ jidaar n cɔcɔɔnɛ dapa gɩ manɩ le mɛr Thãgbaa pa, kẽkẽ wa gbasa bɩnɔ. 21 Ado ja bʋlaala wɩ gbɛbɩ ga bonɩ nʋ̃ʋle, wɩ cʋɔrɛɛ faa; sɩ ado ther bʋlaala gɩ, wɩ khɔkhɔɔnɛɛ bɔɔbɔɔ, a jɩaa ɲʋɔnɔ cacaca. 22 Bonɩ jidaraa cɔ toora, kuuminə fɛʋʋkɛ dɔnɩ bonɩ jidara punone a kho gɩ; gɩdonɩ thɩ̃ khaa gɩ na sobɔr.
23 Sɩ so hɛl bonɩ ʋrɛɛ tɔmɩnɩkɛ nɩ lonanɩ mɛr Thãgba cãa wa bɩnɔ a hɛlna sopuu pa phuurə, na n kho ga nʋ̃a'. Nɩ thiə gɩ dɔɔra." »