So gbɛbɩ bonɩɛɛ jɔfʋ
7
1 «So gbɛbɩ bonɩɛ, thɩ̃ khaa gɩ na sobɔr; ga jɔfʋ ha gɩrɛ n kpaanɛnɩ: 2 Paarɩkɛ wɩ n kʋnɩ bonɩ thiinə nʋma, dapara wa kʋ so gbɛbɩ bonɩ nʋmɩ. Wɩ cala tɔmɩn bonɩ ji pa gɛlɔ gɛlɔ a fenə. 3 Niin fɛw, wɩ hana mɛr Thãgba Kɔ̃tɩn, na sʋʋ, na nĩ gɩrɛ n thenɩ bɩ̃daar thɩɛna, 4 na tẽbe yeɲɔ fɛw, na niinikɛ n ma gɩnɩ, kɛ n theni pelela, na phəphələəkɛ n theni haara, kɛ wɩ n hɛlnɩ na tẽbe. 5 Bonɩ jidaar n thiə gɩ bonɩ ji paara ƴũu. Bonɩ thiinə gɩ mɛr Thãgba Kɔ̃tɩnna. Gɛr dʋɔn so gbɛbɩ bonɩɛ. 6 Bonɩ jidaraa cɔ toora, kuuminə fɛʋʋkɛ dɔnɩ bonɩ jidara punone a kho gɩ. Mɛr Thãgbaa pa wa kho gɩ le mɛr Thãgba cãa waw; gɩdonɩ thɩ̃ khaa gɩ na sobɔr.7 Mɔna gɩ n hanɩ so hɛl bonɩɛra, mɛna gɩ n ha so gbɛbɩ bonɩɛra. Jɔfʋ ca bɩɛlla gɛr yeɲɔ fɛw hana. Bonɩ jidaarɩkɛ na jenɩ sopuu faa bonɩɛsɔɔle, ɔr hɩna ga nʋ̃. 8 Ɔbɔɔkɛ bonɩ jidaar jini tibil bonɩ thiinə, ɔr bonɩ jidaar hɩna lʋʋ bonɩ thiinənəəlera a jini. 9 Thɩ̃ bi bonɩɛ fɛʋʋkɛ wɩ gbɛbɩnɩ dɩɩ bɩ̃: a gɩrɛ wɩ hɩnɩ buru khaa gɩ, a gɩrɛ wɩ phonɩ daƴɔ̃ cɩɩra gɩ, a gɩrɛ wɩ phonɩ kpɛkpɛ cɩɩra gɩ, bonɩ jidaarɩkɛ na jen bonɩɛ, ɔr hɩna. 10 Sɩ thɩ̃ bi bonɩɛ fɛw, a gɩrɛ wɩ gbʋrnanɩ niin gɩ, a dakhɩɩ gɩ, Aarɔ̃ɔ bikũusɔ fɛw hɩna, lee paar na hala'.
'Likha bonɩɛɛ jɔfʋ
11 'Likha bonɩɛɛkɛ wa jini mɛr Thãgba Kɔ̃tɩnna, ga jɔfʋ ha gɩrɛ n kpaanɛnɩ. 12 Ado tibil na ji ga bonɩɩkɛ a fʋɔrna mɛr Thãgba Kɔ̃tɩn, a ɓananɔ gatookɛ wɩ gbʋrnanɩ niin sɩ tabɩɩr na hara', kɛ wɩ hɩnɩ buru khaa, na gatookɛ hɔnɩ daƴʋɔ̃ kɛ na hananɩ tabɩɩra' kɛ wɩ jajalalɔnɩ niin, na gatookɛ wɩ cʋʋnɩ na mɩ̃ bʋɔkɛ wɩ gbʋrnanɩ niin. 13 A hanana fɔfʋɔr haar mɛr Thãgbara ɔɔ 'likha bonɩrara a n jini. A ɓananɔ buru yɩraakɛ wɩ cʋʋnanɩ tabɩɩr. 14 Wɩ kɔɔ tero bonɩ caar dɩɩdɩɩraalera fɛw, thɩ̃ bɩɛlbɩɛl a nɛna mɛr Thãgba Kɔ̃tɩn. Agɩpɩ bonɩ jidaarɩkɛ calanɩ 'likha bonɩ tɔmɩn, ɔr hɩna. 15 Dawiilera wa jini 'likha bonɩɛlera na fɔfʋɔr haar mɛr Thãgbara, dawirə ga nʋ̃ na kho, ga n sɩ a wɩl dɩa'.
16 Sɩ ado 'likha bonɩɛ ntɛ ji a hɛlna nʋɔ, agɩbo ntɛɛ ƴaala gɩ the, ga nʋ̃ punone a kho wiirə, sɩ dakuruukɛ na sɛnɩ, wɩ punone a kho gɩ dakha dɩwɩlɔ. 17 Sɩ balãther wirera, bonɩ nʋ̃ gɩrɛ na sɛnɩ, wɩ thiə gɩ dɔɔra. 18 A tibil bo sa kho ɔɔ 'likha bonɩ nʋ̃ balãther wireraale, mɛr Thãgba Kɔ̃tɩn na tee ɔɔ bona'. Ga do ntɛra bɔtaa bonɩa'. Ga dor bonɩɛ kʋɛrɛ. Dɩ ntɛɛkɛ na khɔ gɩnɩ ɔɔ yʋɔ puure ha.
19 A nʋʋn thar thɩɛnaakɛ biseneni jɔfʋ hʋɛra, wa n kho ga, wɩ thiə gɩ dɔɔra. Ʋrɛ dɩbara phonɩ, ɔr teana a kho bonɩ nʋʋn. 20 Sɩ tibilikɛ biseneni jɔfʋ hʋɛra, aa kho mɛr Thãgba Kɔ̃tɩnɩ 'likha bonɩ nʋ̃, nɩ hɛlla ntɛɛle, ɔɔ toora, kɛ dɔnɩ Ɩjɩrayɛl bɩsana a faa. 21 Dɩ ntɛɛkɛ na thaanɩ thɩ̃ dɩkharaakɛ biseneni mɔ̃ jɔfʋ sonɩ: jiineekɛ n thɛnɩ tibilə, agɩbo nʋmɩnakɛ biseneni mɔ̃ jɔfʋ sonɩ, agɩbo na thɩ̃ dooraakɛrakɛ biseneni mɔ̃ jɔfʋ sonɩ, kɛ n kɔnɩ ƴɔ̃ƴʋɔnɛ, sa kho mɛr Thãgba Kɔ̃tɩnɩ 'likha bonɩ nʋ̃, nɩ hɛlla ntɛɛle ɔɔ toora a faa.»
Tɔmɩn na bonɩ nʋ̃ niin n sãasɩrɛ
22 Thãgba Kɔ̃tɩn sor Mʋɩjɩra ayɩ: 23 «Sɔ Ɩjɩrayɛl bɩsanana ayɛ: "Na n kho na nʋ̃ niin, dɩ bana nʋ̃ niin gɩ, dɩ bʋ nʋ̃ niin ga. 24 Nʋmɩɩkɛ khenɩɩ nĩ, na nʋmɩɩkɛ thɩ̃ɛ kʋnɩɩ nĩ, nɩ punone a cʋʋna gɩ thɔ̃ dɩkha sɩ na n kho gɩ yuurəka'. 25 Ntɛɛkɛ na khɔnɩ nʋmaakɛ wɩ n jinəni mɛr Thãgba Kɔ̃tɩnna bonɩ thiinəə nĩ, nɩ hɛla ntɛɛle ɔɔ toora a faa. 26 Na n kho tɔmã'. Paar wo paarɩkɛ na toonɩ, na n kho 'lomĩ tɔmɩn ya, dɩ nʋ̃ tɔmɩn ga. 27 Tibil wo tibilikɛ na khɔnɩ tɔmɩn wo tɔmɩn, nɩ hɛlla ntɛɛle ɔɔ toora a faa." »
Bonɩ ji nʋ̃ gɩrɛ dɔnɩ bonɩ jidaraada.
28 Thãgba Kɔ̃tɩn sor Mʋɩjɩra: 29 «Sɔ Ɩjɩrayɛl bɩsanana ayɛ: "Ado tibil na ji 'likha bonɩɛ mɛr Thãgba Kɔ̃tɩnna, ntɛ n pɔna gɩrɛ a tini ɔɔ bonɩrara a hana mɛr Thãgba Kɔ̃tɩn. 30 Ntɛ n pɔna na ɔɔ thɛthɛɛ ɲɛ̃ mɛr Thãgba Kɔ̃tɩnɩ ƴɔɔ bonɩ thiinədaa. A pɔna niin na kũkune. Kũkune a na pɔna a na jɛna mɛr Thãgba Kɔ̃tɩnɩ ƴɔɔ. 31 Bonɩ jidaar n thiə niinile bonɩ ji paara ƴũu. Sɩ kũkuneele, Aarɔ̃ na ɔɔ bikũusɔ hɩna. 32 Anɩ 'likha bonɩsɔɔraakɛ na jini nɩ kɔɔ tero ɲɔ̃bɔ nɔ huure a hana bonɩ jidaar gɩ do khaardaa. 33 Bonɩ jidaarɩkɛ, Aarɔ̃ɔ bikũusɔɔra na gbaanɩ 'likha bonɩɛɛlee tɔmɩn, na niin a na dana bonɩ ji paara, ɔr na hɩna ɲɔ̃bɔ nɔ huureele. 34 Ɩjɩrayɛl bɩsanaa 'likha bonɩsɔɔraale wɩ n jini, mɩ tirore kũkuneekɛ wɩ n jɛnanɩ mɛr Thãgbaa ƴɔɔ na nɔ huureekɛ wɩ n kɔɔ tini, a ha Aarɔ̃ bonɩ jidaar, na ɔɔ bikũusɔ. Jɔfʋ gɩ khorr Ɩjɩrayɛl bɩsanana." 35 Gɛr dʋɔn Aarɔ̃ na ɔɔ bikũusɔɔda bonɩɛsɔraakɛ wɩ n thiini mɛr Thãgba Kɔ̃tɩnɩ ƴɔɔ, a fʋna wireekɛ wa jɩɩlnɩ wa n do bonɩ ji thɔma mɛr Thãgba Kɔ̃tɩnna.» 36 Gɛr dʋɔn gɩrɛ Thãgba Kɔ̃tɩn sonɩ Ɩjɩrayɛl bɩsanana wa n hana wɩ wireekɛ wa pɛr warnɩ niin yʋɔ. Jɔfʋ gɩ khorr vʋ̃ʋ awɩ məlsɔraakɛ na n kpaanɛnɩ. 37 Gɛr dʋɔn jɔfʋ bonɩ thiinəədara, a gbana thɩ̃ bi bonɩɛ, na so hɛl bonɩɛ, na so gbɛbɩ bonɩɛ, na bonɩ jidaar pɛr bonɩɛsɔ, na 'likha bonɩɛ. 38 Thãgba Kɔ̃tɩn kɔɔ mɩɛnɛ Mʋɩjɩ Sɩnayɩ gɔ̃gɔ̃ yʋɔ. Gɛr dɔ wireekɛ a kɔɔ hanɩ Ɩjɩrayɛl bɩsana hʋɛ dɩ wa ji ɔr Thãgba Kɔ̃tɩnna awɩ bonɩsɔ, le Sɩnayɩ bəənə.