Mɔ̃ Mʋɩjɩ pɛrnɩ Aarɔ̃ na ɔɔ bikũusɔ Thãgba Kɔ̃tɩnɩ ƴɔɔ
8
1 Thãgba Kɔ̃tɩn sor Mʋɩjɩra ayɩ: 2 «Kpa Aarɔ̃ na ɔɔ bikũusɔ, a gbana kẽkena na nĩ sãsɩna na so hɛl bonɩ nakɩɩr na banakena yeɲɔ na buruukɛ na hananɩ tabɩɩraa kpɛ̃kpɛrɛ̃ bir, 3 a kpana Ɩjɩrayɛl bɩsana fɛw a gbɛba mɛr Thãgba cãa wa lõfonʋɔra.» 4 Dɩ Mʋɩjɩ cʋʋrɛ gɩrɛra Thãgba Kɔ̃tɩn sʋʋraanɩ. Dɩ Ɩjɩrayɛl bɩsana kpar jɛ Thãgba cãa wa lõfonʋɔra.5 Dɩ Mʋɩjɩ sor Ɩjɩrayɛl bɩsanana: Nɩ yɛ gɩrɛra Thãgba Kɔ̃tɩn pɛrnɩ gɩ cʋɛ. 6 Dɩ a cʋʋrɛ Aarɔ̃ na ɔɔ bikũusɔ dɩ wɩ tɔ pɔ dɩ hʋ wɩ ɲʋɔn. 7 Dɩ a tor Aarɔ̃ gbɔɔlɔ̃, a khɩmɩnaa pel khɩmɩdaa, sa gba gbɔɔlɔ̃ bir a dɛbɩraa, a gba efoodɩ a tʋʋ, a khɩmɩnaa dakhɩmɩdaa. 8 Agɩpɩ dɩ gba kũkũ tʋʋ a tʋʋ. Dɩ a torore le kũkũ tʋʋ bɩnɔ Urɩm, na Tumɩma. 9 Dɩ a parʋʋrɛ yʋ pardaa yʋɔ, sa gba dɛ jala khaa a marɔ ƴɛbʋrɔ gɩ nɩna dɩ Thãgbaada a do, mɔna Thãgba Kɔ̃tɩn kɔɔ sʋʋraanɩ.
10 Dɩ Mʋɩjɩ gbaar nĩ sãsɩna a pɛr Thãgbaa kẽkẽ wara na thɩ̃ɛ fɛʋʋkɛ hanɩ le bɩnɔ a pɛ gɩ Thãgba ƴɔɔ. 11 Dɩ a gbaar niinə a jɛbɩ ɲɛ̃be makoɲɔ bonɩ ji paara. A pɛrɛ niin bonɩ ji paara na ɔɔ thɩ̃bisɔɔra fɛw; a pɛr ther sɛ ɓalãgara na ɔɔ jəədara, a pɛ gɩ Thãgba ƴɔɔ. 12 Dɩ a gbaar niinə a deer Aarɔ̃ɔ yʋɔ, gɩ do nɔɔ a pɩɛ Thãgba ƴɔɔ. 13 Agɩpɩ dɩ Mʋɩjɩ cʋʋ Aarɔ̃ɔ bikũusɔ dɩ wɩ tɔ pɔ dɩ to wɩ gbɔɔlɔ̃sɔ, a khɩmɩna wɩ pel khɩmɩdaa, a subi wɩ bãfɩlasɔ oti mɔna Thãgba Kɔ̃tɩn kɔɔ sʋʋraanɩ.
14 Agɩpɩ Mʋɩjɩ tɔr so hɛl nakɩɩr a pɔna. Dɩ Aarɔ̃ na ɔɔ bikũusɔ dɛ̃ɛ awɩ ɲɛ̃ so hɛl nakɩɩraa yʋɔ. 15 Dɩ Mʋɩjɩ kʋrɛ nakɩɩrɩle a gba tɔmɩn, a ɓɛna ɲɔ̃bire a pɛ bonɩ ji pa ʋmanaakɛ hanɩ gɛlɔ gɛlɔ a finə, gɩ do nɔɔ a phʋɔlʋ. Agɩpɩ Mʋɩjɩ gbaar tɔmɩna a deer bonɩ ji pa jəədaara, a phʋɔlʋ, wɩ puno wa n jiro so hɛl bonɩɛ. 16 Agɩpɩ a kpaanɛ nakɩɩraa nĩ fɛw, gɩrɛ n thenɩ bɩ̃daar thɩɛna, a tinə phəphələəkɛ n thenɩ haara na tẽbe yeɲɔ fɛw na agɩ nĩ, a thii bonɩ ji paara ƴũu; 17 sa gba nakɩɩra jɛw, ɔɔ lo, na ɔɔ nʋ̃, na pɩba, a thena khuirə a thii dɔɔra mɔna Thãgba Kɔ̃tɩn kɔɔ sʋʋraanɩ.
18 Dɩ a pɔnanɛ bonɩ thiinə banakɩɩr, dɩ Aarɔ̃ na ɔɔ bikũusɔ dɛ̃ɛ awɩ ɲɛ̃ ɔɔ yʋɔ. 19 Dɩ Mʋɩjɩ kʋrɛ banakɩɩra a cal tɔmɩn bonɩ ji paar gɛlɔ gɛlɔ a finə. 20 Dɩ a kuure banakɩɩra yɩra yɩra a thii. A thiire yʋʋ na nʋ̃ kuurnənə, na niin bonɩ ji paara ƴũu. 21 A cɔcɔɔrɛ bɩ̃daar thɩ̃ɛ na nɛgbalãsɔ; a thii gɩ fɛw bonɩ ji paara ƴũu. Gɛr dʋɔn bonɩ thiinə. Gɛr dʋɔn bonɩɛɛkɛ wɩ n thiini dɔɔra, kɛ n hʋnanɩ Thãgba Kɔ̃tɩn daw mɔna Thãgba Kɔ̃tɩn kɔɔ mɩɛnɩ Mʋɩjɩ.
22 Dɩ a pɔnanɛ balaɲɔ banakɩɩr, kɛ dʋɔnɩ Aarɔ̃ na ɔɔ bikũusɔɔ bonɩ jidaar pɛda, dɩ Aarɔ̃ na ɔɔ bikũusɔ dɛ̃ɛ awɩ ɲɛ̃ ɔɔ yʋɔ. 23 Dɩ Mʋɩjɩ kʋrɛ banakɩɩra a ɓɛ ɔɔ tɔmɩn a pɛ Aarɔ̃ɔ ɲɔ̃bɔ nũ fara na ɔɔ ɲɔ̃bɔ ɲɔ̃bi kpora na ɔɔ ɲɔ̃bɔ nɔbi kpora. 24 Dɩ a cʋʋrɛ Aarɔ̃ɔ bikũusɔ dɩ wɩ tɔ pɔ dɩ ɓɛ tɔmɩn a pɛ war awɩ ɲɔ̃bɔ nũ fasɔɔra na awɩ ɲɔ̃bɔ ɲɔ̃bi kposɔɔra na awɩ ɲɔ̃bɔ nɔbi kposɔɔra, sa cal tɔmɩn gɩrɛ sɛnɩ bonɩ ji pa gɛlɔ gɛlɔ a finə. 25 Agɩpɩ Mʋɩjɩ kpaanɛ niin, a tinə sʋʋ na nĩ gɩrɛ fɛʋʋkɛ n theni bɩ̃daar thɩɛna na phəphələəkɛ n theni haara na tẽbe yeɲɔ fɛw na agɩ nĩ, a tinə ɲɔ̃bɔ nɔ huure. 26 A tire dakha kpɛ̃kpɛrɛ̃ biro, kɛ wɩ n pɛnɩ buruukɛ na hananɩ tabɩɩra', kɛ hanɩ le Thãgba Kɔ̃tɩnɩ ƴɛbʋrɔ, gatookɛ wɩ hɩnɩ buru khaa, na nĩ gato, na gatookɛ hɔnɩ daƴʋ̃ɔ, gɛr fɛw bɩɛlbɩɛl, a dɛ̃ɛ nʋ̃ nĩisɔɔra na ɲɔ̃bɔ nɔ huureraale. 27 Agɩpɩ a gbaar fɛw a dʋ Aarɔ̃ na ɔɔ bikũusɔɔ ɲɔ̃kɔɔ, sa cʋʋ wɩ dɩ wɩ jɛna Thãgba Kɔ̃tɩnɩ ƴɛbʋrɔ mɔ̃kɛ wɩ n jɛnanɩ thɩ̃ bi bonɩɛ. 28 Agɩpɩ dɩ Mʋɩjɩ ti gɩ awɩ ɲɔ̃kɔɔ a thii bonɩ ji paara ƴũu. Gɛr dʋɔn bonɩ jidaar pɛ bonɩɛ. Gɛr dʋɔn bonɩɛɛkɛ wɩ n thiini dɔɔra, kɛ n hʋnanɩ Thãgba Kɔ̃tɩn daw.
29 Dɩ Mʋɩjɩ gbaar bonɩ jidaar pɛ banake kũkune a jɛna Thãgba Kɔ̃tɩnɩ ƴɛbʋrɔ, agɩpɩ dɩɩ do ɔɔda, mɔna Thãgba Kɔ̃tɩn kɔɔ mɩɛɛnɩ.
30 Agɩpɩ a gbaar nĩ sãsɩna na tɔmɩnɩkɛ kɔɔ hanɩle bonɩ ji paara ƴũu a jɛbɩ Aarɔna na ɔɔ kẽkẽsɔɔra, a jɛbɩna Aarɔ̃ɔ bikũusɔɔra na awɩ kẽkẽsɔɔra, a pɛ Aarɔ̃ na ɔɔ kẽkẽsɔ na Aarɔ̃ɔ bikũusɔ na awɩ kẽkẽsɔ Thãgba ƴɔɔ.
31 Agɩpɩ Mʋɩjɩ sor Aarɔ̃ na ɔɔ bikũusɔɔra a yɩ: «Nɩ cʋɛ nʋʋna gɩ bɩ̃ Thãgbaa cãa wa lõfonʋɔra gɩdonɩ lera na kho gɩ, na buruukɛ hanɩ bonɩ jidaar pɛ kpɛ̃kpɛrɛ̃ biro mɔna Thãgba Kɔ̃tɩn kɔɔ mɩɛnɩ ayɩ: "Fɛr Aarɔ̃ na afɩ bikũusɔ na khɔ gɩ." 32 Nʋ̃ gɩrɛ na buru gɩrɛ na sɛnɩ, nɩ thiə gɩ dɔɔra. 33 Nɩ tɔɔ le Thãgba cãa wa lofonʋɔra, gɩ dana wire makoɲɔ, phaphapha anɩ bonɩ jidaar pɛ wi nɔ n cã; gɩdonɩ wire makoɲɔ anɩ bonɩ jidaar pɛ wi nɔ na cã. 34 Gɩrɛ cʋɛnɩ nĩ, Thãgba Kɔ̃tɩn pɩɛr gɩ cʋɛ oti, anɩ sopuu n puno gɩ hɛl. 35 Gɛr gɩ nɩ tɔɔ le Thãgba cãa wa lofonʋɔra wire makoɲɔ, dɩwɩlʋ na dɩtɩnɔ fɛw, a cʋɛ Thãgba Kɔ̃tɩnɩ nɔka fɛw oti; gɩ do nɔɔ na khiirə', gɩdonɩ gɛr dɔ gɩrɛ a mɩɛ mɩnɩ.» 36 Dɩ Aarɔ̃ na ɔɔ bikũusɔ cʋʋrɛ Thãgba Kɔ̃tɩnɩ nɔka fɛw oti mɔna a kɔɔ sonɩ Mʋɩjɩra.