Aarɔ̃ na ɔɔ bikũusɔɔ bonɩ ji thɔ̃ fʋ pa.
9
1 Dɩ wire makõther wirera, Mʋɩjɩ wer Aarɔ̃ na ɔɔ bikũusɔ, a wena Ɩjɩrayɛl kɔ̃tɩna. 2 Dɩ a sor Aarɔna ayɩ: «Fɔ na ɓolʋ, a do so hɛl bonɩdaa na banakɩɩr, a do bonɩ thiinədaa. Wɛr yeɲɔ fɛw na n hana taana', fɩ dana Thãgba Kɔ̃tɩnɩ ƴɔɔ. 3 Sɔ Ɩjɩrayɛl bɩsanana wɩ fɔ bʋkɩɩr a do so hɛl bonɩdaa, a fɔna yɛ bɩɛl na ɓolʋ na yɛ bɩɛl bana ɓolʋ, kɛ na hananɩ taana', wɩ do bonɩ thiinədaa. 4 Wɩ fɔ dakha nakɩɩr na banakɩɩr, wɩ do 'likha bonɩdaa wɩ jinə bonɩɛ Thãgba Kɔ̃tɩnna, na dakha thɩ̃ bi bonɩɛ, kɛ wɩ gbʋrnanɩ niin, gɩdonɩ nĩ Thãgba Kɔ̃tɩn na nɩna nɛr ɔɔbara.»5 Dɩ wɩ pɔnanɛ gɩrɛra Mʋɩjɩ kɔɔ sonɩ Thãgba cãa wa lõfonɔ ƴɛbʋrɔ. Dɩ Ɩjɩrayɛl bɩsana fɛw tɔr dã a jɩɩl ƴũu Thãgba Kɔ̃tɩnɩ ƴɛbʋrɔ. 6 Dɩ Mʋɩjɩ so a yɩ: «Nɩ yɛ gɩrɛ Thãgba Kɔ̃tɩn kɔɔ sonɩ: "Nɩ cʋɛ gɩ otirə, dɩ na yɩrɛ Thãgba Kɔ̃tɩnɩ carbara dɩ ga yɩr nar." 7 Agɩpɩ a sor Aarɔna: "Tɔ dana bonɩ ji paar a je afɩ so hɛl bonɩ na afɩ bonɩ thiinə ɓo a phʋɔlɛ afɩ thɛthɛɛ sopuu, a phʋɔlɛna Ɩjɩrayɛl bɩsana. Agɩpɩ, birə je Ɩjɩrayɛl bɩsanaa bonɩ, a phʋɔlɛ wɩ awɩ sopuu mɔna Thãgba Kɔ̃tɩn kɔɔ sonɩ." »
8 Dɩ Aarɔ̃ tɔr dã bonɩ ji paar a kʋ na ɓolʋla ɔɔ thɛthɛɛ sopuurə ɓo. 9 Dɩ ɔɔ bikũusɔ 'laaraarɛ tɔmɩn dɩ ɓɛna ɲɔ̃bire a pɛr bonɩ ji pa ʋmana, sa deer gɩrɛ sɛnɩ bonɩ ji pa jəədaara. 10 Dɩ a kpaanɛ so hɛl bonɩ nʋmɩnaa nĩ, na tẽbe yeɲɔ fɛw na phəphələəkɛ n thenɩ haara, a thii bonɩ ji paara ƴũu mɔna Thãgba Kɔ̃tɩn kɔɔ mɩɛnɩ Mʋɩjɩ. 11 Sɩ nʋʋn wer na lʋʋ a gba gɛr le jɛw a thena khuirə a thii dɔɔra. 12 Dɩ a kʋrɛ bonɩ thiinə nʋmɩ dɩ ɔɔ bikũusɔ haa tɔmɩn dɩ gba cal bonɩ ji paar gɛlɔ gɛlɔ a finə. 13 Wɩ haarɛ dakha bonɩ thiinə nʋʋnɩkɛ wɩ kuurnɩ yɩra yɩra na yʋʋ dɩ thii bonɩ ji paara ƴũu. 14 Dɩ a cɔcɔɔrɛ bɩ̃daar thɩ̃ɛ na nɛgbalãsɔ a thii bonɩ ji paara, bonɩ thiinə nʋʋnaale ƴũu. 15 Agɩpɩ dɩ ji Ɩjɩrayɛl bɩsanaa bonɩ. A gbaar bʋkɩɩrɩkɛ dɔnɩ Ɩjɩrayɛl bɩsanaa so hɛl bʋke a kʋ a jinə so hɛl bonɩɛ mɔna a kɔɔ cʋʋnanɩ caca so hɛl bonɩ ji nʋmɩ. 16 A jire bonɩ thiinə oti a cʋʋ mɔ̃ ga jɔfʋ hanɩ. 17 Dɩ a gbaar thɩ̃ bi bonɩ thɩ̃ɛ a hi ɲɔ̃korʋ, a thii bonɩ ji paara ƴũu a ɓã duur bonɩ thiinənə. 18 A kʋrɛ nakɩɩra na banakɩɩra a jinə 'likha bonɩɛ a pɛ Ɩjɩrayɛl bɩsanana. Dɩ ɔɔ bikũusɔ haarɛ tɔmɩn dɩ gba cal bonɩ ji paar gɛlɔ gɛlɔ a finə. 19 Dɩ wɩ haarɛ nake niin, na banake niin, na sʋʋsɔ na nĩ phəphələəkɛ n theni bɩ̃daar thɩɛna na tẽbe fɛw na phəphələəkɛ n thenɩ haara. 20 Agɩpɩ dɩ wɩ gba nĩisɔɔra a dɛ̃ɛ kũkunesɔɔra a haa, dɩ Aarɔ̃ thii nĩisɔɔle bonɩ ji paara ƴũu. 21 Dɩ Aarɔ̃ gbaar kũkunesɔɔra na ɲɔ̃bɔ nɔ huurera a jɛna Thãgba Kɔ̃tɩnɩ ƴɛbʋrɔ mɔna Thãgba Kɔ̃tɩn kɔɔ sonɩ Mʋɩjɩra.
22 Ɔbɔɔkɛ Aarɔ̃ jini so hɛl bonɩɛ na bonɩ thiinə na 'likha bonɩɛ a pɩ, a 'laarɛ ɲɛ̃ɛ Ɩjɩrayɛl bɩsanana a bɔna wɩ sa gbũ. 23 Dɩ Mʋɩjɩ na Aarɔ̃ lʋʋn Thãgba cãa wa bɩnɔ. Ɔbɔɔkɛ wɩ thenɩ pɩ, wɩ bɔnanɛ Ɩjɩrayɛl bɩsana. Dɩ le Thãgba Kɔ̃tɩnɩ carbara yɩr Ɩjɩrayɛl bɩsanana fɛw. 24 Dɩ dɔɔ ther Thãgba Kɔ̃tɩnɩ ƴɔɔ a hɩ̃ bonɩ thiinə na niinikɛ hanɩ bonɩ ji paara ƴũu. Dɩ Ɩjɩrayɛl bɩsana ɓibi yɩ gɛr dɩ wa n be da hulẽbe sa gʋɛ ƴɩɛ thɩɩra.