Aarɔ̃ɔ bikona yenyɔɔkɛ Thãgba dɔɔ kʋʋrnɩ na awɩ be cʋʋ thɩmɩɩr.
10
1 Aarɔ̃ɔ bikona yeɲɔ, Nadabɩ na Abɩhu ɩɩrɛ a gba latɩkolo iidaasɔ, wɛr yeɲɔra, a ti dɔɔkɛ Thãgba Kɔ̃tɩn na sona', a pɛr, a pɛr latɩkolo, a lona Thãgba Kɔ̃tɩnɩ ƴɔɔ. 2 Dɩ dapaara dɔɔ ther Thãgba Kɔ̃tɩnɩ ƴɔɔ a hɩ̃ wɩ dɩ wɩ khiir liirə Thãgba Kɔ̃tɩnɩ ƴɛbʋrɔ.3 Dɩ Mʋɩjɩ so Aarɔna ayɩ: «Ga do gɛra Thãgba Kɔ̃tɩn kɔɔ mãa kpãkpaanɔaa? A sor casɩ ayɩ: "Mɩ n ƴaalɛ wɩrɛ n wɔrɔnɛ mɩnɩ na n cɔ ɩ̃ phu, a na dʋba mɩ Ɩjɩrayɛl bɩsana fɛʋʋ ƴɛra." » Dɩ Aarɔ̃ ɩɩ kɩrkɩrkɩr.
4 Dɩ Mʋɩjɩ wer Aarɔ̃ɔ jẽ Ujɩɛlɩ bikũusɔ, Mɩkayɛl, na Elɩsafã a so war: «Nɩ tɔ dana a gba anɩ omɩsɔɔkɛ khireni jɛw a thɛna khuirə a hʋnɔnɛna pa phuu.» 5 Dɩ wɩ pɔr uul wɩ na awɩ gbɔɔlɔ̃sɔɔra a thena khuirə mɔna Mʋɩjɩ kɔɔ sonɩ.
6 Agɩpɩ dɩ so Aarɔna na ɔɔ bikũusɔ Eleajaar na Ɩtamaara, kɛ sɛnɩ ayɩ: «Na n ɲaɲaan anɩ yʋsũusɔaa dɛ! Na n ɓəər anɩ kẽkẽsɔ dakha ga, gɩ do nɔɔ na khiirə', na ca dakha Thãgbaa nĩkhi a na pɛ Ɩjɩrayɛl bɩsanana fɛʋa'. Anɩ õkũusɔɔkɛ Thãgba Kɔ̃tɩnɩ dɔ hɩnɩ, nɩ faa Ɩjɩrayɛl bɩsana fɛw n bɩ wɩ. 7 Nɩ tɔɔ le Thãgba cãa wa lofonʋɔra. A mɛ̃ ga na khiire, gɩdonɩ phiphiir niin ha narɛ.» Dɩ wɩ cʋʋrɛ gɩrɛ Mʋɩjɩ sonɩ.
Jɔfʋ, bonɩ jidaraa dɩvɛ̃ na ta kha ɲɔ thɩmɩɩra.
8 Dɩ Thãgba Kɔ̃tɩn so Aarɔna ayɩ: 9 «Fɛrɛ na afɩ bikũusɔ, na n ɲɔ dɩvɛ̃, dɩ ta kha kpɩɩsɔ gɩ ɔbɔɔkɛ na n lonɩ mɛr Thãgba cãa waʋa', gɩ do nɔɔ na khiirə'. Jɔfʋ gɩ khorr anɩ məlsɔɔra; 10 gɩdonɩ nɩ teenanɛ nɩ jɩ na n lee gɩrɛ n sãasɩnɛnɩ na gɩrɛ na n sãasɩnɛna', na n lee dakha gɩrɛ bisenenɩ kpɩɩ, na gɩrɛ na bisenena' mɔ̃ jɔfʋ sonɩ. 11 Dɩ thale na puno na dɩɩr Ɩjɩrayɛl bɩsana jɔfʋsɔ fɛʋʋkɛ mɛr Thãgba Kɔ̃tɩn hanɩ Mʋɩjɩ dɩ ha wɩ.»
Jɔfʋ, bonɩ ji thɩ̃daara.
12 Dɩ Mʋɩjɩ so Aarɔ̃ na ɔɔ bikũusɔraakɛ sɛnɩ: Eleajaar na Ɩtamaara ayɩ: «Gɩrɛ sɛnɩ thɩ̃ bi bonɩɛraakɛ wɩ thiini Thãgba Kɔ̃tɩnɩ ƴɛbʋrɔ, nɩ gba a khɔ, tabɩɩr na n hara', bonɩ ji pa kɩrɔ, gɩdonɩ thɩ̃ khaa gɩ na sobɔr. 13 Sãasɩ paar na kho gɩ. Jɔfʋ gɩ a pɛr, fɛrɛra, na afɩ bikũusɔɔra bonɩɛsɔraakɛ wɩ n thiini Thãgba Kɔ̃tɩnɩ ƴɔɔ. Gɛr dɔ jɔfʋʋkɛ mɩ 'lɛnɩ. 14 Fɛrɛ na afɩ bikũusɔ na afɩ bikhɛrsɔ dakha, nɩ punone kho kũkuneekɛ wɩ n jɛnanɩ Thãgba Kɔ̃tɩnɩ ƴɔɔ na nɔ huureekɛ wɩ n kɔɔ tini. Nɩ khɔ gɩ pa hɩrɛra jɔfʋ hʋɛra, gɩdonɩ wɩ ha nɛr gele. Jɔfʋ gɩ Ɩjɩrayɛl bɩsanaa 'likha bonɩsɔɔraakɛ wɩ n jini. 15 Ɩjɩrayɛl bɩsana na pɔnanɛ nɔ huureekɛ wɩ n kɔɔ tini na kũkuneekɛ wɩ n jɛnanɩ Thãgba ƴɔɔ a na ɓã niinəəkɛ wɩ n thiini. A wɩ jɛna Thãgba Kɔ̃tɩnɩ ƴɔɔ a pɩ, fɛr hɩna gɩ, fɛrɛ na afɩ bɩsãsɔ. Jɔfʋ gɩ khorr, kɛ Thãgba Kɔ̃tɩn pɛrnɩ.»
16 Agɩpɩ dɩ Mʋɩjɩ bule so hɛl bonɩ bʋkɩɩr, dɩɩ do wɩ thiire. Dɩ nĩkhii fʋʋ Eleajaara na Ɩtamaara, Aarɔ̃ɔ bikona yeɲɔraakɛ sɛnɩ dɩ so war: 17 «Mɔ̃gɩdo dɩ na kho so hɛl bonɩ bʋkɩɩrɩle sãasɩ paara ga? Mee thɩ̃ khaa gɩ na sobɔr dɩ Thãgba Kɔ̃tɩn hanɩ, gɩ hɛl Ɩjɩrayɛl bɩsanaa so, nɩ phʋɔl wɩ Thãgba Kɔ̃tɩnɩ ƴɛbʋrɔ. 18 Ga donɩ wɩ kɔɔ gbaar ga tɔmɩn a lona pa phuurə ga, nɩ kɔɔ teenanɛ nɩ khɔ gɩ sãasɩ paar mɔ̃kɛ Thãgba Kɔ̃tɩn kɔɔ mɩɛ mɩnɩ.» 19 Dɩ Aarɔ̃ sʋʋraa: «Hɩnɛ, ninə wɩ ji so hɛl bonɩɛ, a jinə awɩ bonɩ thiinə Thãgba Kɔ̃tɩnɩ ƴɔɔ, sɩ jɛna gɩrɛ dana mɩnɩ. Dɩ ado mɩ kɔɔ khor so hɛl bonɩ nʋʋna nĩ, ga kɔɔ dar Thãgba Kɔ̃tɩnna ya?» 20 Dɩ Mʋɩjɩ yɩɛrɛ dɩɩ do sobɔr gɩ.