BONƖ JI SƐBƐ 11

JƆFƲ GƖRƐRA SÃSƖNƐNƖ NA GƖRƐRA NA N SÃSƖNƐMA'

Nʋ̃ khonanɛ na nʋ̃ sãasɩnanɛ

1 Thãgba Kɔ̃tɩn sor Mʋɩjɩ na Aarɔna ayɩ: 2 «Nɩ sɔ Ɩjɩrayɛl bɩsanana ayɛ: "Nʋmana fɛw thɩɩra, wɩrɛ nɩ hananɩ hʋɛ a na kho ha wɩrɛ: 3 Na n khɔ nʋmɩ wo nʋmɩɩkɛ leesinenɩ nɔkɩɛrʋ, kɛ n birəni dɩ ƴɔɔ da n kho.

4 Sɩ nʋ̃ wɩrɛ n birəni dɩ wɩ ƴɔɔ dɩ wa n kho, agɩbo nʋ̃ wɩrɛ leesinenɩ nɔkɩɛr haar na n kho wa'. Wɛr dʋɔn: ɲɔɔmɛ̃, a n bire dɩ ƴɔɔ da n kho wer, sɩ aa leesi nɔkɩɛrʋa'. Na n theraa nʋ̃ sãasɩnanɛsɔɔra; 5 na gɔ̃gɔ̃ subur; a n bire dɩ ƴɔɔ da n kho wer sɩ aa leesɩ nɔkɩɛrʋa'. Na n theraa nʋ̃ sãasɩnanɛsɔɔra; 6 na subur, a n bire dɩ ƴɔɔ da n kho wer, sɩ aa leesɩ nɔkɩɛrʋa'. Na n theraa nʋ̃ sãasɩnanɛsɔɔra; 7 na sɩtho; a leesire nɔkɩɛrʋ wer sɩ a n bir dɩ ƴɔɔ da n khoa'. Na n theraa nʋ̃ sãasɩnanɛsɔɔra. 8 Na n kho awɩ nʋ̃a', na n thar awɩ dakhirə ga. Na n thera wɩ nʋ̃ sãasɩnanɛsɔɔra.

9 Nɩ yɛ nʋ̃ wɩrɛ na khonɩ ɲɔ nʋmaa thɩ̃thɩɩn: na n khɔ nʋ̃ wɩrɛ fɛʋʋkɛ hananɩ khɛlla, na khʋna sɩ dɩ wɩ ha ɲʋɔnɔ, a laɲɔnana gɩ, a mɩɩrsɔɔra gɩ. 10 Sɩ nʋ̃ yɩrasɔɔra fɛw, ɲɔ thɩɛna, na thɩ̃ yɩraraakɛ hanɩ ɲɔ bɩnɔ; a laɲɔnana gɩ, a mɩɩrsɔɔra gɩ, nʋ̃ wɩrɛ fɛʋʋkɛ na hananɩ khɛla, dɩ khʋna ga, na n ƴʋɔnɛ wɩ. 11 Na n ƴʋɔnɛ wɩ. Na n kho awɩ nʋ̃a'. Na n ƴʋɔnɛ awɩ dakhi. 12 Ɲɔ nʋma fɛʋʋkɛ na hananɩ khɛla, dɩ khʋna ga, na n ƴʋɔnɛ wɩ.

13 'Lominəə thɩ̃thɩɩn, nɩ yɛ wɩrɛ na n ƴʋɔnɩ, kɛ dɔnɩ wɩrɛ na khona': sɩgbʋraa, duun na laɲɔ̃ sɩgbʋraa; 14 na gbɔɔrɛ na siwir nɛsɛ na ɔɔ casɔ dɩɩdɩɩ fɛw, 15 na sɩkpaa na ɔɔ casɔ dɩɩdɩɩ fɛw, 16 na siwilə̃, na thurõphure, na poo yɔlbuu, na siwir na ɔɔ casɔ dɩɩdɩɩ fɛw; 17 na khukhubi, na dɩlãgʋ̃ɔ, na bijɩmɩ, 18 na hɔ̃ khɔkhɔlʋ, na thʋ̃kpɩl kɔ̃tɩ̃ɩ, na ɲɔ sɩkpaa 19 na ɔkpɩlãkpo, na dɩlãgʋ̃ɔ na ɔɔ casɔ dɩɩdɩɩ fɛw, na khĩdi yɔlkʋʋ, na dəən.

20 Na n ƴʋɔnɛ thɩ̃ ubinəsɔɔkɛ hananɩ nɛɛ yenã dɩ wɩ jalna. 21 Sɩ thɩ̃ ubinə nɛɛ yenãdaraa thɩ̃thɩɩn, na n khɔ wɩrɛ hananɩ nɛ gbalãsɔ dɩ wɩ bɩna thɩɩra. 22 Nɩ yɛ wɩrɛra na khonɩ: toosõo awɩ cara fɛw, na ɓãsʋlãa awɩ cara fɛw, na barɓã awɩ cara fɛw, na kpɛɛkpɛɛ awɩ cara fɛw. 23 Sɩ thɩ̃ ubinə wɩrɛ hananɩ nɛɛ yenã, na n ƴʋɔnɛ wɩ. 24 Nʋ̃ wele n cʋʋrɛ tibil dɩ lɩ. Ntɛɛkɛ na thaanɩ awɩ dakhirə na toonanɛ lɩra waa na dana dʋɔrɔ. 25 Dɩ tibil wo tibilikɛ na gbaanɩ awɩ dakhi, ntɛ na cɔcɔɔrɛ ɔɔ kẽkẽsɔ sɩ na toona lɩra waa na dana dʋɔrɔ.

26 Nʋmɩ wo nʋmɩɩkɛ hananɩ nɔkɩɛrʋ, sɩ ga leesa', agɩbo aa n bir dɩ ƴɔɔ da n khoa', ntɛɛkɛ na thaaraanɩ, a lɩrɛ. 27 Nɛɛ yenã nʋmɩ wo nʋmɩɩkɛ n sananɩ nɔpɩɛl, na n theraa nʋ̃ sãasɩnanɛsɔɔra. Tibil wo tibilikɛ na thaanɩ awɩ dakhirə a na lɩrɛ a na dana dʋɔrɔ. 28 Dɩ tibil wo tibilikɛ na gbaanɩ awɩ dakhi, ntɛ na cɔcɔɔrɛ ɔɔ kẽkẽsɔ, sɩ na toona lɩra a na dana dʋɔrɔ. Na n thera wɩ nʋ̃ sãasɩnanɛsɔɔra. 29 Nʋ̃ yɩrasɔɔkɛ n haalɛnɩ na bɩnɛ thɩɩra, nɩ yɛ wɩrɛ na n ƴʋɔnɩ: ɓãɓoi, na tutu na ɓacʋbana na ɔɔ casɔ dɩɩdɩɩ fɛw: 30 ɓaculõ na thʋ̃fee na sɩƴɛbɩ na ɓacʋbana ʋrɛ hɔnɩ faa, na cʋʋlãa. 31 Nʋ̃ yɩrasɔ fɛʋʋ thɩ̃thɩɩn, na n thera wele fɛw nʋ̃ sãasɩnanɛsɔɔra. Tibil wo tibilikɛ na thãa warnɩ ɔbɔɔkɛ wɩ khini, ntɛ lɩrɛ gɩ dana dʋɔrɔ. 32 Thɩ̃ pɛdaa wo thɩ̃ pɛdaakɛ awɩ dakhi na jironi gɩ kʋɛrɛ : a thɩrdaa gɩ, a kɩ̃kɩɩn gɩ, a lʋʋ gɩ, a bɔrɔ gɩ, thɩ̃ pɛdaa fɛʋʋkɛrakɛ dɔnɩ thɔ̃ cʋʋdaa. Wɩ pɩɛr ɲʋɔnɔ gɩ toona kʋɛrɛra gɩ dana dʋɔrɔ. A gɩ karɔ pɩ, gɩ pɩrɛ. 33 A wɩ ji jadaara, gɩrɛ fɛʋʋkɛ harɔnɩ bɩnɔ kʋɛrɛ, sɩ thɩ̃ pɛdaa thɛthɛ wer, nɩ cʋɔrɛɛ faa. 34 Diko wo dikorɩkɛ wɩ n khonɩ, kɛ ɲʋɔnɩle na deeronɩ, dikorɩle kʋɛrɛ; dɩ thɩ̃ ɲɔna wo thɩ̃ ɲɔnanɛɛkɛ wɩ n ɲɔnɩ, na thɩ̃ ɲɔnada dɔɔraakɛra wɩ pɛ gɩnɩ, a ga ɲɔ̃ deero, gɩ kʋɛrɛ. 35 Dɩ thɩ̃ɛ wo thɩɛnaakɛ awɩ dakhi na jini, thɩ̃ doo kʋɛrɛ : a camã gɩ, a khɔtɩƴɩɛ gɩ, dɔ wɩ wɩɛr gɩ wɩ faa; gɩdonɩ gɩ kʋɛrɛ. Na n thera gɩ thɩ̃ sãasɩnanɛsɔɔra. 36 Sɩ ado ɲɔ bunənena agɩbo ɲɔ tɛ korʋra awɩ dakhi ji, ɲʋɔn na kʋɛa', sɩ ntɛɛkɛ na tharɔnɩ a na ti, a lɩrɛ. 37 Ado awɩ dakhi ji thɩ̃ diirnənenaakɛ wa diirni, ga kʋɛa'. 38 Sɩ ado wɩ nɩɩ thɩ̃ diirera na ɲʋɔn sɩ awɩ dakhi jiro, na n thera gɩ thɩ̃ sãasɩnanɛsɔɔra.

39 A nʋ̃ wɩrɛ nɩ n khonɩ gɩrakɛ a khi, ntɛɛkɛ na thaanɩ awɩ dakhirə, a lɩrɛ gɩ dana dʋɔrɔ. 40 Ntɛɛkɛ na khɔnɩ agɩ nʋ̃ na cɔcɔɔrɛ ɔɔ kẽkẽsɔ sɩ na toona lɩra gɩ dana dʋɔrɔ. Dɩ ntɛɛkɛ na gbaanɩ agɩ dakhi na cɔcɔɔrɛ ɔɔ kẽkẽsɔ, sɩ na toona lɩra gɩ dana dʋɔrɔ. 41 Nʋ̃ yɩra fɛʋʋkɛ n haalɛnɩ thɩɩra, na n ƴʋɔnɛ wɩ; na n kho wa'. 42 Nʋ̃ yɩra fɛʋʋkɛ n haalɛnɩ thɩɩra, na wɩrɛ n haalɛnɩ na bɩnɛ, na wɩrɛ n jalanɩ na nɛɛ yenã, agɩbo wɩrɛ hananɩ nɛɛ bərəəm, na n kho wa'. Na n ƴʋɔnɛ wɩ. 43 Na n cʋʋ anɩbara a do ƴɔ̃ƴɔ̃ɔ thɩ̃ɛ gɩ do nʋ̃ yɩrasɔɔkɛ n haalɛnɩ bɩɛl wɛra dɔ nɔa'. Na n tha wara', na n do wɩ thar nar, wɩ cʋʋnɩ nɩ la'. 44 Mɛr dʋɔn Thãgba Kɔ̃tɩn, anɩ Thãgba. Nɩ lea a pho, gɩdonɩ mɩ phure. Gɛr gɩ na n cʋʋ a lɩ gɩ do nʋ̃ yɩrasɔɔkɛ n haalɛnɩ thɩɩra, bɩɛl wɛra dɔ nɔa'.

45 Mɛr dʋɔn Thãgba Kɔ̃tɩnɩkɛ te nɩnɩ Ejipiti dɩɩra a thena, ɩ̃ do anɩ Thãgba. Dɩ nɩ pho gɩdonɩ mɩ phure. 46 Gɛr dʋɔn jɔfʋʋkɛ wɩ pɛrnɩ nʋmaadara, na 'lominənə a gbana thɩ̃ ye fɛʋʋkɛ hanɩ ɲɔnana, na thɩ̃ yɩrasɔɔra fɛʋʋkɛ n haalɛnɩ thɩɩra. 47 Gɩ har mɛ̃, gɩ lee gɩrɛ n sãasɩnɛnɩ kpɩɩ, na gɩrɛ na n sãasɩnɛna', gɩ lee dakha nʋ̃ ʋrɛ wɩ n khonɩ kpɩɩ, na nʋ̃ ʋrɛ na dɔnɩ dakhonana'." »