Mʋɩjɩ dʋrɛ Thãgbaa kẽkẽ wa, a pɩɛ Thãgbaa ƴɔɔ
40
1 A gele pɩ Thãgba Kɔ̃tɩn sor Mʋɩjɩra ayɩ: 2 «Yɩɛrɩ caca sɩporɩ caca wirə, dɔ mɛr Thãgbaa kẽkẽ wara, kɛ dʋɔnɩ mɛr Thãgba cãa waa. 3 Lonana le nɔ bɩɛl ʋlfɛ khɛɛsʋʋkɛ hananɩ nɔ bɩɛl ʋlfɛ thɩmɩɩr a thɩnɛ, sa jo du vaar kɩ̃kɩɩn a kɛaraa. 4 Gba mɛr Thãgbaa buru tabalɩ a lonana le a thɩnɛ, a dɛɛnɔ gɩrɛ fɛʋʋkɛ teanaanɩ. Gba dɔ carã dɛ̃ɛ paar a lonana le a thɩnɛ, a dɛɛnɔ ɔɔ dɔ carãsɔ. 5 Thɩnɛ dɛ latɩkolo bonɩ ji paar nɔ bɩɛl ʋlfɛ khɛɛsʋʋkɛ hananɩ ʋlfɛ thɩmɩɩrɩ ƴɛbʋrɔ, sa jo lõfonɔ kɩ̃kɩɩn mɛr Thãgbaa kẽkẽ wa lõfonɔra. 6 Thɩnɛ nʋ̃ thii bonɩ ji paar mɛr Thãgbaa kẽkẽ wa ƴɛbʋrɔ, kɛ dʋɔnɩ mɛr Thãgba cãa waa. 7 Thɩnɛ ther sɛ ɓalãga mɛr Thãgba cãa waa na nʋ̃ thii bonɩ ji pa thɩ̃thɩɩn, a pɩɛr ɲʋɔn. 8 Pɩɛr gbasa a fenə, sa jo gbasa lõfonɔ kɩ̃kɩɩn lõfonʋɔra. 9 Gba nĩ sãsɩna a pɩɛr mɛr Thãgbaa kẽkẽ wara na thɩ̃ɛ fɛʋraakɛ hanɩ wa bɩnɔ a pɩɛ mɛr Thãgba ƴɔɔ, ɔr na ɔɔ thɔ̃ do thɩ̃bisɔɔra fɛw. 10 Pɩɛr dakha niin nʋ̃ thii bonɩ ji paara na ɔɔ thɔ̃ do thɩ̃bisɔɔra fɛw, a cʋɛ bonɩ ji paarɩle a na n jɩɩ sãasɩ. 11 Pɩɛr dakha niin ther sɛ ɓalãgara na ɔɔ jəədara a pɛ gɩ mɛr Thãgbaa ƴɔɔ. 12 Agɩpɩ kpa Aarɔ̃ na ɔɔ bikũusɔ a pɔna le mɛr Thãgba cãa wa lõfonʋɔra a hɔ wɩ ɲʋɔn. 13 Agɩpɩ, gba Aarɔ̃ɔ kẽkẽ sãasɩnasɔ a tʋɔnɛɛ a pɩɛraa niin yʋɔ, a pɩɛ mɛr Thãgba ƴɔɔ, a na n do mar bonɩ jidaar thɔma. 14 Kpa dakha Aarɔ̃ɔ bikũusɔ wɩ pɔ, fɩ to wɩ gbɔɔlɔ̃sɔ, 15 sɩ fɩ pɛ war niin yʋɔ mɔ̃kɛra fa pɛnɩ awɩ thɩra, wa n do mar bonɩ jidaar thɔma. Nĩ pɛrɛɛle na cʋɛ wɩ, wɛr na awɩ bɩsãsɔɔkɛ na n kpaanɛnɩ məle wo məlela fɛw dɩ wa do mar bonɩ jidara khorr vʋ̃ʋ.» 16 Dɩ Mʋɩjɩ cʋʋrɛ thɩ̃ɛ fɛw mɔ̃kɛra Thãgba Kɔ̃tɩn kɔɔ sʋʋraanɩ oti.17 Caca sɩporɩ caca wirə, balaɲɔ yɩɛra wɩ thenɩ Ejipiti dɩɩra pɩ, gɛr wɩ dʋrɔ Thãgbaa kẽkẽ wa. 18 Mʋɩjɩ dʋrɛ Thãgbaa kẽkẽ wa: a thɩɩnɛ jəədaasɔ oti, a gbuuro thɩr pɛna, a tʋʋlɛlɔ agɩ ɓal gbãsɔ, a gbuunə thɩr gbuunə. 19 Dɩ a bele kẽkẽ gborõbe a kɛɛ Thãgbaa kẽkẽ wara, sa gba wa thii a thiro ƴũu mɔna Thãgba Kɔ̃tɩn kɔɔ sʋʋraanɩ.
20 Dɩ a gbaar boka thelna phɛlɛ yeɲɔɔkɛ hananɩ nɔ bɩɛl ʋlfɛ thɩmɩɩr a pɛr nɔ bɩɛl ʋlfɛ khɛɛsʋʋra, a gba ɔɔ thɩr ɓalãɓɔsɔ a tʋʋlɛlɔ, sa gba ɔɔ dathi, kɛ dʋɔnɩ so hɛl paar a thiro ƴũu. 21 Dɩ Mʋɩjɩ gbaar nɔ bɩɛl ʋlfɛ khɛɛsʋʋ a lona Thãgbaa kẽkẽ wa bɩnɔ a thɩɩn, sa ju du vaar kɩ̃kɩɩn dɩɩ kɛɛ nɔ bɩɛl ʋlfɛ khɛɛsʋʋraakɛ hananɩ nɔ bɩɛl ʋlfɛ thɩmɩɩr mɔna Thãgba Kɔ̃tɩn kɔɔ sʋʋraanɩ.
22 Dɩ a lonanɛ Thãgba buru tabalɩ Thãgba cãa wa bɩnɔ, a thɩɩnʋ pa phuurə, bil ʋrɛra wire n phanɩ dɩ pɛr ɲɔ̃bɔɔ, du vaar kɩ̃kɩɩnɩkɛ wɩ junɩɩ ƴɛbʋrɔ. 23 Dɩ a cʋrɔrɛ buruukɛ wɩ n hanɩ Thãgba mɔna Thãgba Kɔ̃tɩn kɔɔ sʋʋraanɩ. 24 Dɩ a lonanɛ dɔ carã dɛ̃ɛ paar Thãgba cãa wa bɩnɔ a thɩɩnʋ bil ʋrɛra wire n phanɩ dɩ pɛr ɲɔ̃bɩlã, tabalɩ ƴɛbʋrɔ. 25 Dɩ a dɛɛnɔnɛ dɔ carãasɔ Thãgba Kɔ̃tɩnɩ ƴɛbʋrɔ mɔna Thãgba Kɔ̃tɩn kɔɔ sʋʋraanɩ.
26 Dɩ a lonanɛ bonɩ ji paarɩkɛ dʋɔnɩ dɛdaa Thãgba cãa wa bɩnɔ a thɩɩnʋ du vaar kẽkẽ ƴɛbʋrɔ. 27 Dɩ a iire latɩkolookɛ n hʋnanɩ daw bonɩ ji paaraale ƴũu mɔna Thãgba Kɔ̃tɩn kɔɔ sʋʋraanɩ. 28 Dɩ a gbaar lõfonɔ kɩ̃kɩɩn a ju Thãgbaa kẽkẽ wa lõfonɔra. 29 Dɩ a thɩɩnɛ nʋ̃ thii bonɩ ji paar, Thãgba cãa wa lõfonʋɔra, kɛ dʋɔnɩ Thãgbaa kẽkẽ wa, a jiro bonɩ thiinə na thɩ̃ bi bonɩɛ mɔna Thãgba Kɔ̃tɩn kɔɔ sʋʋraanɩ.
30 Dɩ a thɩɩnɛ ther sɛ ɓalãga nʋ̃ thii bonɩ ji paar na Thãgba cãa waa thɩ̃thɩɩn, a pɛr ɲʋɔn dɩɩ do phʋɔldaa. 31 Dɩ Mʋɩjɩ na Aarɔ̃ na ɔɔ bikũusɔ cɔcɔɔrɛ nɛɛ na ɲɛ̃ɛ ther sɛ ɓalãgaraale. 32 Dɩ bɔɔ fɛw, a wa lõ Thãgba cãa waw na ɔbɔɔkɛ wa n wɔrɔnɩ bonɩ ji paar, thale wɩ n kɔɔ phʋɔl awɩbara mɔna Thãgba Kɔ̃tɩn kɔɔ sonɩ Mʋɩjɩra.
33 Dɩ Mʋɩjɩ pɛrɛ gbasa a dii Thãgbaa kẽkẽ wara na bonɩ ji paara, a ju gbasa lõfonɔ kɩ̃kɩɩn lõfonʋɔra. Thale Mʋɩjɩ pɩɩr thɔma mɛ̃.
Thãgba Kɔ̃tɩnɩ i dʋbɩ hire Thãgba cãa waa
34 Dɩ le ndɔlɔ̃paar gbũ a thi Thãgba cãa waara, dɩ Thãgba Kɔ̃tɩnɩ i dʋbɩ hi Thãgbaa kẽkẽ wa. 35 Dɩ Mʋɩjɩ na puno a na lõ Thãgba cãa waʋa', gɩdonɩ ndɔlɔ̃paar hale a tooro; dɩ Thãgba Kɔ̃tɩnɩ i dʋbɩ hi Thãgbaa kẽkẽ wa. 36 Dɩ a fʋna ɔbɔɔle, ɔbɔɔkɛ ndɔlɔ̃paarɩle n ɩɩrnɩ Thãgbaa kẽkẽ wara ƴũu, Ɩjɩrayɛl bɩsana n ɩɩrɛ a na jal pa kpɩɩ. 37 Sɩ a ndɔlɔ̃paarɩle na ɩɩra', Ɩjɩrayɛl bɩsana na n ɩɩra'. Wɩ n pɩɛrɛ a dana wireekɛ a na ɩɩrnɩ wo. 38 Dɩwɩlʋla Thãgba Kɔ̃tɩnɩ ndɔlɔ̃paale n hale Thãgbaa kẽkẽ wara ƴũu, sɩ dɩtɩnɔ dɩ do dɔɔ. Dɩ Ɩjɩrayɛl bɩsana fɛw torore yire bɔɔ fɛʋʋkɛ wɩ hanɩ kpaarɔ le bəənə.