Bonɩ jidaar kẽkena na efoodɩ lɩɩr
39
1 Agɩpɩ Besalɛl na ɔɔ khukhusɔ ler kẽkẽ ɓɔna na kẽkẽ gborõbi sɛna khala khala na dasɛ bɔy kpakpakpa na dasɛ birə himə himə, kɛ dʋɔnɩ sãasɩ pa thɔ̃ dodaa a lena gbõdaar kẽkenaakɛ dɔnɩ Aarɔ̃ɔda mɔna Thãgba Kɔ̃tɩn kɔɔ sonɩ Mʋɩjɩra.2 Dɩ wɩ ler efoodɩ na lɛ̃ bɔy na lɛn kẽkẽ wi sɛna khala khala na dasɛ bɔy kpakpakpa na dasɛ birəsɔ himə himə a ɓol ɓoldaar na dɛ kẽkẽ wiir a pɛr. 3 Dɩ wɩ cʋʋrɛ dɛ phɛlɛ phɛlɛ a le ɓɩ̃ɩɓɩ̃ɩ a ɲaɲaana lɛn kẽkẽ wi sɛna khala khala na dasɛ bɔy kpakpakpa na dasɛ birə himə himə na lɛ̃ kẽkẽ wiir a le mɔ̃kɛ ɲɛ̃ thɔ̃ jɩna n cʋʋnɩ. 4 Dɩ wɩ ler ɲɛ̃ gbɛgbɛl bãkɩɩnʋsɔ dɩɩ do ɔɔ toda, a fʋ ɔɔ yʋsɔ yeɲɔ dɩɩ cãa yɛ̃gbɛgbɛlala. 5 Dɩ wɩ ler ɔɔ khɩmɩda na thɩ̃ ca bɩɛla, kɛ dʋɔnɩ lɛ̃ bɔy na lɛn kẽkẽ wi sɛna khala khala na dasɛ bɔy kpakpakpa na dasɛ birə himə himə a ɓolʋ na dɛ kẽkẽ wiir. Wɩ lɩɩrɛ a mana efoodɩɩ thɛthɛ dɩɩ do bɩɛl mɔna Thãgba Kɔ̃tɩn kɔɔ sonɩ Mʋɩjɩra. 6 Dɩ wɩ gbaar boka ɓɔnaakɛ wɩ n wenɩ onɩsɩ yeɲɔ, kɛ wɩ thelnɩ a cɩ Ɩjɩrayɛlɩ bikonaa isɔ a pɛr dɩɩ ho mɔ̃ wɩ n cɩnɩ ire jẽ dʋdaara a bɛɛr boka tʋʋraakɛ dʋɔnɩ dɛdaa. 7 Dɩ wɩ gbaar a to efoodɩ bãkɩɩnʋnaakɛ hanɩ ɲɛ̃gbɛgbɛlala dɩɩ do Ɩjɩrayɛl bɩsanaa jɩ̃jɩna bokasɔ mɔ̃kɛ Thãgba Kɔ̃tɩn kɔɔ sonɩ Mʋɩjɩra.
Kũkũ to lɩɩr
8 Dɩ wɩ ler kũkũ tʋʋ mɔ̃kɛ ɲɛ̃ thɔ̃ jɩna n cʋʋnɩ. Thɩ̃ ca bɩɛla wɩ lenaa mɔna efoodɩ hanɩ: Lɛ̃ bɔ kẽkẽ wiir na lɛn kẽkẽ wi sɛna gɩ khala khala na dasɛ bɔy kpakpakpa na dasɛ birə himə himə, a ɓolʋʋ na dɛ kẽkẽ wiir. 9 Wɩ lɩɩrɛ dɩ ha kpərə̃ kpərə̃ gãgamã yenã a gbɛlɛɛ yeɲɔ. Ɔɔ gbã na ɔɔ pɛw mãkhananɛ ɲɔ̃bi kpʋʋ a dana ɲɔ̃bi buukɛ wɩ lɛɛnɩɩ yʋ. 10 Dɩ wɩ bɛɛrɔrɛ boka ɓɔna jɔrɔna yenã. Caca jɔrɔnɛ hananɛ boka ɓɔnaakɛ wɩ n wenɩ: Sardʋan na topaajɩ na emeroodɩ. 11 Dɩ balaɲɔ jɔrɔnɛ hana bokanaakɛ wɩ n wenɩ: ɛsɩkarbuki na Safɩɩr na dɩamã. 12 Dɩ balãther jɔrɔnɛ hana bokanaakɛ wɩ n wenɩ: Opal na agatɩ na ametɩsɩtɩ. 13 Dɩ balanã jɔrɔnɛ hana bokanaakɛ wɩ n wenɩ: Kɩrɩjolɩtɩ na onɩsɩ na jasɩpɩ. Bokanaale fɛw bɩɛlbɩɛl hananɛ agɩ to pasɔɔkɛ wɩ bɛɛrnɩ na dɛ. 14 Bokanaale, Ɩjɩrayɛl bikũusɔ yʋɔr yeɲɔ gɩ n nɩna. Yʋɔr yeɲɔ gɩ ha a mãkhana Ɩjɩrayɛl bɩsanaa casɔɔ nɔ oti, dɩ wɩ cɩ awɩ casɔɔ isɔ a pɛr mɔ̃ jẽ dʋdaa n hanɩ; ca i bɩɛl, boka bɩɛla, wɛr yʋɔr yeɲɔra fɛw. 15 Dɩ wɩ gbaar dɛ kile haar a le jɔrkɔ̃ ɓɩ̃ɩɓɩ̃ɩ dɩɩ ho pɛ̃ɛ, dɩ wɩ to boka tʋʋraale. 16 Dɩ wɩ ler boka tʋʋle na dɛ, a cʋʋna dɛ ɓɔ̃ɓɔna yeɲɔ, a to ɓɔ̃ɓɔna yeɲɔɔle kũkũ tʋʋ khu pasɔ yeɲɔra. 17 Dɩ wɩ gbaar dɛ jɔrkɔ̃ yeɲɔɔle a to ɓɔ̃ɓɔna yeɲɔraale hanɩ kũkũ tʋʋ khu pasɔ yeɲɔra, 18 sɩ dɛ jɔrkɔ̃ yeɲɔɔle sɛnɩ lõ boka tʋʋ yeɲɔraakɛ wɩ kɔɔ pɛrnɩ ɲɛ̃gbɛgbɛl bãkɩɩnʋnaakɛ hanɩ efoodɩra, sɩ dɩ kũkũ tʋʋ ha ƴɛkʋʋlɔ. 19 Dɩ wɩ bire phebi dɛ ɓɔ̃ɓɔna yeɲɔ wo a to kũkũ tʋʋ khu pasɔ yeɲɔra tɩɛr khʋra, kɛ dɛɛnɛnɩ efoodɩra. 20 Dɩ wɩ bire phebɩ dɛ ɓɔ̃ɓɔ̃ kpɩɩsɔ wo yeɲɔ a to efoodɩ ɲɛ̃gbɛgbɛl bãkɩɩnʋna ƴɛkʋʋlɔ tɩɛr dɩɩ khunə efoodɩ khɩmɩdaa yʋɔ. 21 Dɩ wɩ caanɛ kũkũ tʋʋlee ɓɔ̃ɓɔ̃sɔ na efoodɩ ɓɔ̃ɓɔ̃sɔ a li na pɔ̃ sɛ khala khala, gɩ do nɔɔ kũkũ tʋʋ naa n hɛl kpɩɩ sa faa efooda', sɩ dɩ efoodɩ ha tɩɛr, dɩ kũkũ tʋʋ ha ƴũu, mɔ̃kɛra Thãgba Kɔ̃tɩn kɔɔ sonɩ Mʋɩjɩra.
Bonɩ ji kẽkẽ kpɩɩsɔ
22 Dɩ wɩ ler gbɔɔlɔ̃ bir ʋrɛ wa tonɩ efoodɩ a na dɛɛnɔ na kẽkẽ wi sɛ haar khala khala dɩbara. 23 Dɩ wɩ pɛrɛ kaar thɩ̃thɩɩna dɩɩ do yʋ to paar, sa gbɛ a dii kaarara mɔ̃ wɩ n lenɩ lo kẽkẽ fʋɔr, gɩ do nɔɔ gbɔɔlɔ̃ birile na n ɓəərə'. 24 Dɩ wɩ ler thɩ̃ɛ na lɛ̃ bɔ kẽkẽ wiir dɩɩ ho girenadɩ thɩr sɩɩr dɩ wɩ khi gɩ na dasɛ khala khala, na dasɛ bɔy kpakpakpa na dasɛ birə himə himə a thaarɔ gbɔɔlɔ̃ bir nʋɔra a finə. 25 Dɩ wɩ phebire dẽgelẽbe na dɛ kile haar koo a thaar girenadɩ sɩɩrsɔɔlee thɩ̃thɩɩn gbɔɔlɔ̃ bir nʋɔrara fɛw a finə. 26 Dɛ dẽgelẽbi bɩɛl, girenadɩ sɩɩr bɩɛl; dɛ dẽgelẽbi bɩɛl, girenadɩ sɩɩr bɩɛl, dɩɩ do thɔ̃ dodaa. Wɩ thaarɔrɛ a kpala gbɔɔlɔ̃ bir nʋɔra fɛw mɔna Thãgba Kɔ̃tɩn kɔɔ sonɩ Mʋɩjɩra.
27 Dɩ wɩ ler lɛ̃ gbɔɔlɔ̃sɔ dɩɩ do Aarɔ̃ na ɔɔ bikũusɔɔda. 28 Wɩ ler dakha yʋ pardaa na bãfɩlasɔ kɛ n nɛnanɩ awɩ kɔ̃tɩ̃ do na khursisɔ na lɛ̃ kẽkẽ wiir. 29 Wɩ ler dakha pel khɩmɩdaa na lɛ̃ bɔ kẽkẽ wiir a ɲaana lɛn kẽkẽ wiir, kɛ wɩ ɓolnɩ na dasɛ khala khala na dasɛ bɔy kpakpakpa na dasɛ birə himə himə mɔna Thãgba Kɔ̃tɩn kɔɔ sonɩ Mʋɩjɩra. 30 Dɩ wɩ cʋʋrɛ jala khaa na dɛ kile haar koo a cɩ a pɛr mɔ̃ wɩ n cɩnɩ jẽ dʋdaara ayɩ: Ʋrɛ Thãgba Kɔ̃tɩn hɩnɩ. 31 Dɩ wɩ pɩɛraarɛ pɔ̃ sɩɛ khala khala, wɩ fʋna wɩ ma yʋ pardaarara ƴɛbʋrɔ mɔna Thãgba Kɔ̃tɩn kɔɔ sonɩ Mʋɩjɩra.
Wɩ cʋʋrɛ Thãgbaa kẽkẽ wa pɩ na thɩ̃ɛ fɛʋ.
32 Kɩɛr dʋɔn Thãgbaa kẽkẽ wa thɔmaa pɩ pa, kɛ dʋɔnɩ Thãgba cãa waa. Ɩjɩrayɛl bɩsana cʋʋrɛ thɩ̃ɛ fɛw. Mɔ̃kɛra Thãgba Kɔ̃tɩn kɔɔ mɩɛnɩ Mʋɩjɩ, otirə wɩ cʋʋ. 33 Dɩ wɩ pɔnanɛ Thãgbaa kẽkẽ wara na ɔɔ thɩ̃bisɔ fɛw Mʋɩjɩra: Thãgba cãa waa na ɔɔ thɔ̃ do thɩ̃bisɔ fɛw; ɔɔ fʋdasɔ na thɩr pɛna, na ɓal gbana, na thɩr gbuunə na agɩ jəədasɔ; 34 na wa thidaasɔɔkɛ wɩ cʋʋnanɩ banake lʋʋsɔɔkɛ wɩ khini na dasɩɛ na dofɛ̃ lʋʋsɔ na du vaar kɩ̃kɩɩn; 35 na nɔ bɩɛl ʋlfɛ khɛɛsʋʋkɛ hananɩ nɔ bɩɛl ʋlfɛ thɩmɩɩr na ɔɔ thɩr ɓalãɓɔsɔ na ɔɔ dathiikɛ dʋɔnɩ so hɛl paar; 36 na Thãgba buru tabalɩ na ɔɔ thɩ̃bisɔ fɛw na Thãgba buru; 37 na dɔ carã dɛ̃ɛ paarɩkɛ wɩ cʋʋnɩ na dɛ kile haar koo na ɔɔ dɔ carãsɔɔkɛ gbɛbɩrɛnɩ pɩ na ɔɔ thɩ̃bisɔ fɛw na dɔ carã niin; 38 na bonɩ ji paarɩkɛ dʋɔnɩ dɛdaa na nĩ sãasɩna na latɩkolookɛ n hʋnanɩ daw na Thãgba cãa wa lõfonɔ kɩ̃kɩɩn, 39 na bonɩ ji paarɩkɛ wɩ cʋʋnanɩ ther sɩɛ na ɔɔ aakɛ dɔnɩ ther sɩɛ na ɔɔ ɓalãɓɔsɔ na ɔɔ thɔ̃ do thɩ̃bisɔ fɛw, na ther sɛ ɓalãga na ɔɔ jəəda; 40 na kẽkẽ wa gbasa kẽkẽ gborõbe na agɩ thɩr gbuunəsɔ na thɩr gbuunəə jəədaasɔ na kẽkẽ wa gbasa lõfonɔ kɩ̃kɩɩn na ɔɔ pɛ̃sɔ na ɔɔ kpãbisɔ na thɔ̃ do thɩ̃be fɛʋʋkɛ dʋɔnɩ thɔ̃ dodaa le Thãgbaa kẽkẽ waw, kɛ dɔnɩ Thãgba cãa waa; 41 na kẽkẽ ɓɔnaakɛ wa n donanɩ thɔma pa phuurə na kẽkẽ sãasɩnasɔɔkɛ dʋɔnɩ Aarɔ̃ bonɩ jidaarɩda na ɔɔ bikũusɔɔ kẽkẽsɔɔkɛ wa n donanɩ bonɩ jidaar thɔma. 42 Ɩjɩrayɛl bɩsana cʋʋrɛ thɩɛna fɛw oti mɔna Thãgba Kɔ̃tɩn kɔɔ mɩɛnɩ Mʋɩjɩ. 43 Dɩ Mʋɩjɩ hɩɩnɛ thɩ̃ɛ fɛʋʋkɛra Ɩjɩrayɛl bɩsana cʋʋnɩ, dɩɩ do wɩ cʋʋrɛ otirə mɔ̃kɛra Thãgba Kɔ̃tɩn kɔɔ sʋʋraanɩ; dɩ Mʋɩjɩ bɔna wɩ.