Wɩ cʋʋrɛ nʋ̃ thii bonɩ ji paar na ɔɔ thɔ̃ do thɩ̃bisɔ, na ther sɛ ɓalãga.
38
1 Agɩpɩ Besalɛl cʋʋrɛ nʋ̃ thii bonɩ ji paar na akasɩa thɩrʋ dɩ hana gɛla yenã kpərə̃ kpərə̃. Gbãʋ mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yemɔy, dɩ pɛw mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yemɔy oti; sɩ ɔɔ ƴũu gbã mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yẽther. 2 Dɩ a pɩɛraarɛ ʋmã yenã ɔɔ gãgã yenana. Ɔr na ɔɔ ʋ̃sɔɔra mar kha a do bɩɛl; dɩ calʋʋ ther sɩɛ koo. 3 Dɩ a cʋʋrɛ nʋ̃ thii bonɩ ji pa thɔ̃ do thɩ̃be, kɛ dɔnɩ: tho tɛdaasɔ na pɛlsɔ na ɔɔ gborminə, kɛ dʋɔnɩ tɔmɩn jɛbɩdaa na fursɛtɩsɔ na ɔɔ dɔ ti bilẽsisɔ. Ther sɩɛ a cʋʋna ɔɔ thɔ̃ do thɩ̃bisɔɔle fɛw. 4 Dɩ a cʋʋrɛ aa na ther sɩɛ dɩ ho tɛmɛ̃ dɩ toro tɩɛr na bal ƴɩɛ dɩɩ jʋʋn a dã bonɩ ji pa jɩ̃jɩɩna. 5 Dɩ a phebire ɓɔ̃ɓɔna yenã a pɛ ther sɛ aalee gãgãsɔ yenana oti, kãkɛ ɓalãɓɔna na lonɩ. 6 Dɩ a thele akasɩa thɩr ɓalãbɔna a cal gɩ ther sɩɛ. 7 Dɩ a torore ɓalãɓɔnaale ɓɔ̃ɓɔnanaakɛ hanɩ bonɩ ji pa gãgamãsɔɔra dɩɩ do bonɩ ji pa gbadaa. A cʋʋrɛ bonɩ ji paara na thɩr pɛna dɩ bɩnɔ do kaar.8 Agɩpɩ a cʋʋrɛ ɓalãga na ther sɩɛ; a cʋʋna ɔɔ jəəda dakha na ther sɩɛ oti. A cʋʋ gɛr na khɛraakɛ n gbɛbanɩ kha Thãgba cãa wa lõfonʋɔra awɩ hɩɩnsɔɔkɛ dɔnɩ ther sɩɛ.
Wɩ kure Thãgbaa kẽkẽ wa gbasa
9 Dɩ a pɛrɛ gbasa a dii Thãgbaa kẽkẽ wara na lɛ̃ bɔ kẽkẽ gborõbi lenanɛsɔ. Gbasa bil ʋrɛ eenenɩ ka wire na n jalnɩ dɩ pɛr ɲɔ̃bɩlã, Negɛvɩ bilo, gbãʋ mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ tamaa (100). 10 Gɩ hananɛ agɩ thɩr gbuunəsɔ kpelẽ na agɩ jəədasɔ kpelẽ oti, kɛ a cʋʋnanɩ ther sɩɛ; sɩ thɩr gbuunə gãgamãsɔ na agɩ kẽkẽ ju ɓalsɔ do dɛ bulo. 11 Dɩ gbasa bil ʋrɛ eenenɩ ka wire na n jalnɩ dɩ pɛr ɲɔ̃bɔɔ, gbãʋ mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ tamaa (100); na agɩ lɛ̃ bɔ kẽkẽ gborõbi lenasɔ na agɩ thɩr gbuunə kpelẽ na agɩ jəədasɔ kpelẽ oti, kɛ a cʋʋnanɩ ther sɩɛ. Sɩ thɩr gbuunəə gãgãsɔ na agɩ kẽkẽ ju ɓalsɔ do dɛ bulo. 12 Dɩ gbasa bil ʋrɛ eenenɩ wi lõ paar, pɛw mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ kpalaɲɔ yʋɔr na agɩ lɛ̃ bɔ kẽkẽ gborõbi lenasɔ na agɩ thɩr gbuunə yʋɔr na agɩ jəədasɔ yʋɔr oti. Sɩ thɩr gbuunəə gãgãsɔ na agɩ kẽkẽ ju ɓalsɔ do dɛ bulo. 13 Dɩ gbasa bil ʋrɛ eenenɩ wi phã paar kɩrɔ, pɛw mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ kpalaɲɔ yʋɔr. 14 Lõfonɔ bil bɩɛlɩ pɛw mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ yʋɔr yemɔy; na agɩ thɩr gbuunəsɔ yẽther na agɩ jəədasɔ yẽther oti. 15 Dɩ ʋ̃ʋ bil bɩɛl ha ɔmɛna. Kẽkẽ gborõbi bɩɛlɩ pɛw ʋrɛ hanɩ ʋ̃ʋ lõfonɔ bilo mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ yʋɔr yemɔy; a hana agɩ thɩr gbuunəsɔ yẽther na agɩ jəədasɔ yẽther. 16 Kẽkẽ gborõbe fɛʋʋkɛ diəni Thãgbaa kẽkẽ wa gbasara, lɛ̃ bɔy wɩ lena. 17 Thɩr gbunəə jəədaasɔ dor ther sɩɛ, sɩ thɩr gbunəə gãgãsɔ na agɩ kẽkẽ ju ɓalsɔ do dɛ bulo; sa cal thɩr gbuunəə yʋsɔ dɛ bulo. Kẽkẽ ju ɓala fɛʋʋkɛ coorenɩ thɩr gbuunə dɛ bulo wɩ cʋʋna gɩ. 18 Dɩ kẽkẽ wa gbasa lõfonɔ kɩ̃kɩɩn do kẽkẽ gborõbi lenanɛɛkɛ dɔnɩ lɛ̃ bʋɔ, kɛ ɲaananɩ lɛn kẽkẽ wiikɛ wɩ khini na dasɛ khala khala na dasɛ bɔy kpakpakpa na dasɛ birə himə himə. A gbaanɛ a dã ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ kpelẽ. Dɩ ɔɔ ƴũu gbã mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ yemɔy, a ho mɔ̃kɛ gbasa kẽkẽ gborõbee pɛw hanɩ. 19 A hananɛ thɩr gbuunə yenã na agɩ jəədasɔ yenã, kɛ wɩ cʋʋnanɩ ther sɩɛ; dɩ thɩr gbuunəə gãgãsɔ na agɩ kẽkẽ ju ɓalsɔ do dɛ bulo, sɩ a cal thɩr gbuunəə yʋsɔ na dɛ bulo. 20 Sɩ Thãgbaa kẽkẽ wa kpãbii fɛw na ɔɔ gbasa kpãbi fɛw, ther sɩɛ wɩ cʋʋna gɩ.
Thɩ̃bi nʋɔɔkɛ wɩ gbanɩ a dʋna Thãgbaa kẽkẽ wa
21 Yɛkɛ thɩ̃bi nʋɔ fɛʋʋkɛ wɩ gbanɩ a dʋna Thãgbaa kẽkẽ wa, kãakɛ nɔ bɩɛl ʋlfɛ thɩmɩɩr na toonɩ. Mʋɩjɩ kɔɔ pɩɛr Levɩɩ məlsɔɔra dɩ Ɩtamaarɩkɛ dɔnɩ Aarɔ̃ bonɩ jidaarɩ bikuun thɔɔ wɩ dɩ wɩ ther fɛw. 22 Besalɛl cʋʋrɛ gɩrɛ fɛʋʋkɛra Thãgba Kɔ̃tɩn kɔɔ sonɩ Mʋɩjɩra. Besalɛlɩ thɩ n dʋɔn Uuri, dɩ ɔɔ thɩ kɔ̃tɩ̃ na n do Huur; Judaa məllə a the. 23 Dɩ ʋrɛ kɔɔ buloonɩ n dʋɔn Oholɩabɩ; Ahisamakɩɩkɛ thɛnɩ Dãa mələ ɔɔ bikuun gɩ. Ɔr n thela boka ɓɔna, a hananɛ thɩ̃ pha cʋʋ jiwɛ; ɔr n ɓola ɓoldaarsɔ kẽkẽ sɛ khala khalasɔɔra na kẽkẽ sɛ bɔy kpakpasɔɔra na kẽkẽ sɛ birə himə himəsɔɔra na lɛ̃ kẽkenana. 24 Dɛɛkɛ Ɩjɩrayɛl bɩsana tini, kɛ dɔnɩ khaardaakɛ wɩ 'laanɩ dɩ wɩ dʋna Thãgba cãa waa, ga nɔ fɛw gbɛbɩrɛ a ha: Kilə tamakõther na kpalãther yʋɔr makoɲɔ (877) na gɩram nʋɔ tãather (300) mɔ̃ Thãgba cãa wa sikile gʋʋr ƴɩɛ hanɩ. 25 Dɩ dɛ bulookɛ wɩrɛ fɛʋʋkɛ dananɩ there tini ther bɔɔ, ga nɔ fɛw gbɛbɩrɛ a ha: Kilə gbɩlanɩ yẽther na kilə yʋɔr makoɲɔ (3.017) na gɩram nʋɔ taamakoɲɔ na kpalaɲɔ yʋɔr (750) mɔ̃ Thãgba cãa wa sikile gʋʋr ƴɩɛ hanɩ. 26 Tɩɩ yʋ bɩɛl tire dɛ bulo, dʋbɩ mɩɛdaa beka a nɔ bɩɛl, kɛ mãkhananɩ Thãgba cãa wa sikile bɩɛlɩ dakur. Wɛr fɛʋʋkɛ dananɩ there, a fʋna yɛna kpelẽdara a jʋʋna; wɛr fɛw gbɛbɩrɛ a ha kona gbɩlanɩ der paar taamaadõ na yẽther na tɩbɩla taamɔy na kpalaɲɔ yʋɔr (603.550). 27 Dɩ wɩ gbaar dɛ bulo kilə gbɩlanɩ yẽther (3.000) a hil a cʋʋ Thãgba cãa wa thɩr gbuunəə jəədasɔ tamaa (100) na du vaar kẽkẽ ju thɩr gbuunəə jəədaasɔ. Jəədaa tamaale (100) har dɛ bulo kilə gbɩlanɩ yẽther (3.000); jəəda bɩɛl har kilə kpelẽ yʋɔr (30). 28 Agɩpɩ dɩ wɩ gba kilə yʋɔr makoɲɔ (17) na gɩram taamakoɲɔ na kpalaɲɔ yʋɔrɩle (750) sɛnɩ a hɩl a cʋʋ thɩr gbuunəə gãgãsɔ na agɩ kẽkẽ ju ɓalsɔ, a calna dakha thɩr gbuunəə yʋsɔ. 29 Ther sɛnaakɛ Ɩjɩrayɛl bɩsana kɔɔ tini khaardaa gbɛbɩrɛ fɛw a ha: Kilə gbɩlanɩ yeɲɔ na kilə tamaa na kpelẽ yenã (2.124). 30 Dɩ wɩ gbaar a cʋʋ Thãgba cãa wa lõfonɔ thɩr gbuunəə jəədasɔ, a cʋʋna nʋ̃ thii bonɩ ji paar na ɔɔ aakɛ hɔnɩ tɛmɛ̃, a cʋʋna bonɩ ji pa thɔ̃ do thɩ̃besɔ fɛw; 31 na kẽkẽ wa gbasa thɩr gbuunəə jəədaasɔɔkɛ diəni bilə bilə, na gbasa lõfonɔ thɩr gbuunəə jəədasɔ na Thãgbaa kẽkẽ wa kpãbe fɛw na kẽkẽ wa gbasa kpãbe.