Wɩ cʋʋrɛ ʋlfɛ khɛɛsʋʋ
37
1 Agɩpɩ Besalɛl cʋʋrɛ ʋlfɛ khɛɛsʋʋ na akasɩa thɩra. Ɔɔ gbã mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yeɲɔ na dakuru, dɩ pɛw mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl na dakuru, dɩ ƴũu gbãʋ mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl na dakuru. 2 Dɩ a calʋʋlɛ dɛ kile haar koo, bɩnɔ na khiru fɛw, sa pɛr gbẽgber na dɛ a finə. 3 Dɩ a phebire dɛ ɓɔ̃ɓɔna yenã a pɛr ɔɔ gãgamã yenana, ɓɔ̃ɓɔna yeɲɔ gɛl bɩɛla, ɓɔ̃ɓɔna yeɲɔ ʋ̃ʋ gɛla. 4 Dɩ a thele dakha akasɩa thɩr ɓalãɓɔnana a cal gɩ dɛ oti. 5 Dɩ a torore ɓalãɓɔnaale ɓɔ̃ɓɔnanaakɛ hanɩ nɔ bɩɛl ʋlfɛ khɛɛsʋ gɛlala dɩɩ do nɔ bɩɛl ʋlfɛ khɛɛsʋ gbadaa. 6 Dɩ a cʋʋrɛ dathire kɛ dɔnɩ so hɛl paar na dɛ kile haar koo. Ɔɔ gbã mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yeɲɔ na dakuru, dɩ ɔɔ pɛw mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl na dakuru. 7 Dɩ a cʋʋrɛ seribɛ̃sɔ yeɲɔ na dɛ a pɛr so hɛl paarɩ khu pasɔ yeɲɔra; a cʋʋ wɩ na dɛɛkɛ wɩ benɩ. 8 Seribɛ̃ bɩɛl har yʋ khu pa bɩɛlla dɩ bɩɛl ha ʋ̃ʋ khu para. A cʋʋrɛ seribɛ̃sɔɔra a mana so hɛl paarɩ yʋ khu pasɔ yeɲɔ, dɩɩ do bɩɛl na so hɛl paara. 9 Seribɛ̃sɔɔle 'laarɛ gbɛla ƴũu a kɛɛ so hɛl paar, sa pɛ kha ƴɩɛ dẽdẽdẽ sɩ awɩ ƴɛsɔ gʋɛ dɩ ga n hɩɩn so hɛl paar.Wɩ cʋʋrɛ Thãgba buru tabalɩ
10 Agɩpɩ Besalɛl cʋʋrɛ Thãgba buru tabalɩ na akasɩa thɩrʋ. Ɔɔ gbã mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yeɲɔ, dɩ ɔɔ pɛw mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl dɩ ɔɔ ƴũu gbã mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl na dakuru. 11 Dɩ a calʋʋlɛ dɛ kile haar koo, sa pɛr gbɩɛr gɛlɔ na dɛ a finə. 12 Dɩ a pɛrɛ gbẽgber nʋɔra na dɛ dɩɩ mãkhana ɲɔ̃pɛl haarɩ pɛw, sa pɛr gbɩɛr nʋɔra na dɛ a finə. 13 Dɩ a phebire dɛ ɓɔ̃ɓɔna yenã a pɛr tabalɩ gãgãsɔ yenana dɩɩ mɩɛ kha na tabalɩɩ nɛsɔ yenã oti. 14 Dɩ ɓɔ̃ɓɔnaale khunəne gbɩɛr dɔdɔdɔ dɩ ɓalãbɔna n lono wɩ puno wa n gbana tabalɩ. 15 Dɩ a thele akasɩa thɩr ɓalãɓɔna a cal gɩ dɛ, dɩɩ do tabalɩ gbadaa. 16 Dɩ a cʋʋrɛ dakha tabalɩ thɩ̃be, kɛ dɔnɩ tasasɔ na thɩ̃ ɲɔdaasɔ na gɩrɛ hɔnɩ bʋla minəsɔ na bilẽsesɔ dɩɩ do dɩvɛ̃ bonɩ jidaa; dɛ kile haar koo a cʋʋna gɩ.
Wɩ cʋʋrɛ dɔ carã dɛ̃ɛ paar na ɔɔ dɔ carãsɔ
17 Agɩpɩ Besalɛl cʋʋrɛ dɔ carã dɛ̃ɛ paar na dɛ kile haar koo; ɲɛ̃ɛ a bena dɔ carã dɛ̃ɛ paara; ɔɔ nɔ na jɩ̃jɩɩn na ɔɔ ɓoldasɔɔkɛ hɔnɩ gborminə na ɓolda gɩrɛ hɔnɩ amãadɩ gbominesɔ gɩ na phɩ̃ɩ. Wɩ cʋʋ gɛr dɩɩ fʋ kha a do bɩɛl. 18 Jɛ̃ɛ maadõ dɔ carã dɛ̃ɛ paara hana, kɛ thɛnɩ ɔɔ jẽjena: Jɛ̃ɛ yẽther cʋrɛ gɛl bɩɛla, dɩ jɛ̃ɛ yẽther cʋr ʋ̃ʋ gɛla. 19 Dɩ jɔ̃ bɩɛl hananɛ ɓoldaar yẽther dɩɩ hona amãadɩ sɩɩr na ɓolda gɩrɛ wɩ cʋʋnɩ dɩɩ ho amãadɩ gbominesɔ gɩ na phɩ̃ɩ. Ɔmɛna wɩ pɛr jɛ̃ɛ maadona fɛʋʋle dɔ carã dɛ̃ɛ paara hananɩ. 20 Dɩ dɔ carã dɛ̃ɛ pa jɩ̃jɩɩn hananɛ ɓoldaarsɔ yenã dɩɩ ho amãadɩ sɩɩr na ɓolda ɩkha dɩɩ ho amãadɩ gbominesɔ gɩ na phɩ̃ɩ. 21 Dɩ wɩ pɛrɛ ɓolda bɩɛl dɩɩ ho amãadɩ gbomine dɔ carã dɛ̃ɛ paarɩ caca jɛ̃ɛ yeɲɔɔ lee para, tɩɛr, jɩ̃jɩɩna; a bir pɛr bɩɛl balaɲɔ jɛ̃ɛ yeɲɔɔ lee para tɩɛr, jɩ̃jɩɩna; a bir pɛr bɩɛl balãther jɛ̃ɛ yeɲɔɔ lee para tɩɛr. Dɩ mɛ̃ wɩ pɛr jɛ̃ɛ maadõo lee para fɛʋʋle dɔ carã dɛ̃ɛ paara hananɩ. 22 Dɩ ɓoldaarsɔɔle hɔnɩ amãadɩ gbominesɔ na jɛ̃ɛ fʋrɛ kha a do bɩɛl. Dɛ kile haar a do koo biləni dɩ wɩ be na ɲɛ̃ɛ. 23 Dɩ a cʋʋrɛ ɔɔ dɔ carã makoɲɔ na agɩ khɩɛrdasɔ na ɔɔ tho tɛdasɔ na dɛ kile haar koo. 24 Dɔ carã dɛ̃ɛ paar na ɔɔ thɩ̃bisɔ fɛw, dɛ kile haar koo a gba kilə kpelẽ yʋɔrsɔ a cʋʋna.
Wɩ cʋʋrɛ latɩkolo ii bonɩ ji paar
25 Dɩ a cʋʋrɛ bonɩ ji paar, kɛ dʋɔnɩ latɩkolo ii paar na akasɩa thɩrʋ. Ɔɔ gbã mãkhananɛ ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl dɩ ɔɔ pɛw mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl; gãgamã yenã a hana, a ha kpərə̃ kpərə̃. Sɩ ɔɔ ƴũu gbã mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yeɲɔ. Ɔr na ɔɔ ʋ̃sɔ mar kha a do bɩɛl. 26 Dɩ a calʋʋlɛ dɛ kile haar koo, ɔɔ yʋ na ɔɔ gɛlsɔ bilə bilə na ɔɔ ʋ̃sɔ a pɛna gbẽgber nʋɔra na dɛ a finə. 27 Dɩ a phebire dɛ ɓɔ̃ɓɔna yeɲɔ a pɛ gbẽgberaale tɩɛr gɛla yeɲɔra ʋ̃ʋ bilo na ʋ̃ʋ bilo, ɓalãɓɔna n puno gɩ lono gɩ do ɔɔ gbada. 28 Dɩ a thele akasɩa thɩr ɓalãɓɔnana a cal gɩ dɛ. 29 Dɩ a cʋʋrɛ nĩ sãasɩna, kɛ dɔnɩ phiphiir niin na latɩkolookɛ n hʋnanɩ daw bɔɔbɔɔ mɔ̃kɛ latɩkolo cʋʋdaraa latɩkolo cʋʋ ƴɛ hanɩ.