THƖƖRƐ 36

1 «Besalɛl na Oholɩabɩ na wɩrɛ fɛʋʋkɛ dɔnɩ ɲɛ̃ thɔ̃ jɩna, kɛ dɔnɩ wɩrɛ Thãgba Kɔ̃tɩn kɔɔ hanɩ kpɛsɛrɛ na jɩɩr dɩ wa puno na jɩna thɔ̃ caar fɛw a na cʋʋ le pa phuurə, wɛr na cʋɛ thɩ̃ɛ fɛʋʋkɛ Thãgba Kɔ̃tɩn kɔɔ sonɩ.» 2 Dɩ Mʋɩjɩ wer Besalɛl na Oholɩabɩ na wɩrɛ fɛʋʋkɛ dɔnɩ ɲɛ̃ thɔ̃ jɩna, kɛ dɔnɩ wɩrɛ Thãgba Kɔ̃tɩn kɔɔ pɛrnɩ jɩɩr haara na wɩrɛ fɛʋʋkɛ kɔɔ hananɩ ƴaal bʋɔ a na dona thɔmana, 3 a ha wɩ khaardaasɔɔkɛra Ɩjɩrayɛl bɩsana kɔɔ tini a pɔna wɩ cʋɛna Thãgba fʋɔr paar. Sɩrakɛ duuro wo duuro tɩbɩla n pɔnanɛ bɩ̃ bulo khaardaara 'lo Mʋɩjɩra. 4 Dɩ tɩbɩla fɛʋʋkɛ dɔnɩ ɲɛ̃ thɔ̃ jɩna, kɛ kɔɔ hanɩ thɔmana dɩ wa n cʋʋ Thãgba fʋɔr paar, faarɛ awɩ thɔ̃sɔ, wɛr fɛw bɩɛlbɩɛl, 5 sa jal a so Mʋɩjɩra aa: «Tɩbɩla n ɩnanɛ thɩ̃ɛ dɩɩ thʋ̃ jɔr ka a kãasɩ gɩrɛra teananɩ sɩ gba a cʋɛna thɔmaakɛ Thãgba Kɔ̃tɩn sonɩ gɩ cʋɛ.» 6 Dɩ Mʋɩjɩ so aa, wɩ sɔ jɛw fɛw ayɛ: «Kuun agɩbo khɛr, tibil na n bir vɔɔ a ti khaardaa a pɔna wɩ gbɛbana Thãgba fʋɔr paar 'lo bã. Dɩ tɩbɩla sɩrɔ mɛ̃ wa n pɔna 'lo bã.» 7 Khaardaakɛ wɩ kɔɔ 'laanɩ daan a na cʋʋ thɔma fɛw sa dɛbɩrɔ.

Thãgbaa kẽkẽ wa thɩ̃bi cʋʋrɛ

8 Dɩ wɩrɛ dʋɔnɩ ɲɛ̃ thɔ̃ jɩnaakɛ jɩɛnɩ ga thɔ̃ bɔɔbɔɔ cʋʋrɛ Thãgbaa kẽkẽ wa thida kẽkẽ gborõbe yʋɔr, kɛ wɩ lenanɩ lɛ̃ bɔy, a ɲaɲaana lɛn kẽkẽ wiikɛ wɩ khini na dasɛ khala khalasɔ na dasɛ bɔy kpakpakpa na dasɛ birə himə himə, a bɛbɩ seribɛ̃sɔ mɔ̃ ɲɛ̃ thɔ̃ jɩna n cʋʋnɩ a maarɔ. 9 Kẽkẽ gborõbesɔɔle fɛw mãkharɛ. Gɛr fɛw bɩɛlbɩɛlɩ gbã har ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã kpelẽ makõther. Sɩ agɩ pɛʋsɔ ha ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yenã. 10 Wɩ coore kẽkẽ gborõbe yemɔy ɓo a bɛbɩ sa bir a coor yemɔy gele sɛnɩ a bɛbɩ. 11 Dɩ caca kẽkẽ gborõbe yemɔɩɩkɛ wɩ coornɩ a bɛbɩ, wɩ pɛrɛ pɛ̃ sɛna khala khala pɩpɩɩdaa nɔra; a bir pɛr dakha kẽkẽ gborõbe yemɔy gɩrɛra sɛnɩ pɛ̃ sɛna khala khala cacadaa nɔra oti. 12 Wɩ pɛrɛ pɛ̃ɛ kpalaɲɔ yʋɔr caca kẽkẽ gborõbe yemɔɩlee mɩ̃kasɔɔra, a bir pɛr dakha pɛ̃ɛ kpalaɲɔ yʋɔra kẽkẽ gborõbe yemɔy gele kpaanɛnɩɩ mɩ̃kasɔɔra dɩɩ telẽ kha na ʋ̃ʋ mɩ̃kasɔɔleeda oti dẽdẽdẽ. 13 Dɩ wɩ cʋʋrɛ fʋdaa kpalaɲɔ yʋɔr na dɛ a fʋna kẽkẽ gborõbe yemɔy yemɔɩɩlera wɩ kɔɔ coornɩ, dɩ Thãgbaa kẽkẽ wara coor kha a do bɩɛl. 14 Agɩpɩ wɩ ler kẽkẽ gborõbi kpɩɩsɔ yʋɔr bɩɛl na bʋ suune wɩ thi Thãgbaa kẽkẽ wara ƴũu. 15 Kẽkẽ gborõbi kpɩɩsɔ yʋɔr bɩɛlɩle, fɛw mãkharɛ. Gɛr fɛw bɩɛlbɩɛlɩ gbã har ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã kpelẽ yʋɔr, sɩ a gɩ pɛʋsɔ ha ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yenã. 16 Dɩ wɩ bɛbɩrɛ kẽkẽ gborõbe yemɔy ɓo, sa bir a bɛbɩ kẽkẽ gborõbe maadõole sɛnɩ kpɩɩ. 17 Dɩ caca kẽkẽ gborõbi gɩrɛ wɩ coornɩ a bɛbɩ, wɩ pɛrɛ pɛ̃ɛ kpalaɲɔ yʋɔr pɩpɩɩdaa nɔra; dɩ pɩpɩɩ kẽkẽ gborõbi gele kpaanɛnɩ, wɩ pɛrɛ dakha pɛ̃ɛ kpalaɲɔ yʋɔra cacadaa nɔra oti. 18 Dɩ wɩ cʋʋrɛ fʋda kpɩɩsɔ kpalaɲɔ yʋɔr wo na ther sɩɛ, kɛ wa fʋnanɩ kẽkẽ gborõbesɔɔle gɩ do bɩɛl. 19 Dɩ wɩ cʋʋrɛ banake lʋʋsɔɔkɛ wɩ khini na dasɩɛ dɩɩ do dathii dɩ wɩ thi ʋrɛra thenɩ caca kẽkẽ wa thiirə, sa bir cʋʋ dofɛ̃ lʋʋsɔ a thiro ƴũu. 20 Dɩ wɩ kpaanɛ akasɩa thɩr pɛna dɩɩ do Thãgbaa kẽkẽ wa thɩr gbuunə. 21 Thɩr pɛnaale, bɩɛlɩ gbã mãkhananɛ mɛtɛrɛ yemɔy, sɩ agɩ pɛw mãkhana mɛtɛrɛ kuru na gbe. 22 Dɩ gɛr fɛw bɩɛlbɩɛl kɔɔ hananɛ Ɲɩma yeɲɔ yeɲɔ dɩɩ khu kha. Dɩ ɔmɛna wɩ cʋʋna kẽkẽ wa thɩr pɛnana fɛw. 23 Wɩ kpaanɛ thɩr pɛnana be kpelẽ dɩɩ do gɛl bɩɛlɩda, kɛ hanɩ Negɛvɩ bilo, ka wire na n jalnɩ dɩ pɛr ɲɔ̃bɩlã. 24 Dɩ wɩ phebire dɛ bulo a cʋʋ jəədaa kpalaɲɔ, kɛ dɔnɩ thɩr pɛnaalee jəəda; dɩ jəədaa yeɲɔ do thɩr bɩɛlɩda dɩ ɔɔ ɲɩ̃ yeɲɔɔle n lono. 25 Wɩ kpaanɛ dakha thɩr pɛna kpelẽ dɩɩ do ʋ̃ʋ gɛl bɩɛlɩda, kɛ hanɩ ka wire na n jalnɩ dɩ pɛr ɲɔ̃bɔɔ. 26 Gɩ hananɛ dakha agɩ jəədasɔ kpalaɲɔ, kɛ wɩ cʋʋnanɩ dɛ bulo, dɩ jəədaa yeɲɔ do thɩr bɩɛlɩ jəəda. 27 Dɩ wɩ kpaanɛ thɩr pɛna maadõ dɩɩ do kẽkẽ wa sɩkadaa, ka eenenɩ wi lõ paar. 28 Dɩ wɩ kpaanɛ thɩr pɛna yeɲɔ a pɛr kẽkẽ wa sɩkaara, kɛr paar yeɲɔra. 29 Gɩ mar kha kɩrarɔ a dana ƴũu dɩ ɓɔ̃ɓɔ̃ bɩɛl li gɩ yʋɔ bɔɔbɔɔ. Mɛna wɩ cʋʋ gɛr yeɲɔɔle fɛw hanɩ kɛr paar yeɲɔra. 30 Dɩ gɛr fɛw gbɛbɩrɛ thale a ha thɩr pɛna makõther na agɩ jəədasɔɔkɛ wɩ cʋʋnɩ na dɛ bulo; jəədaa yʋɔr maadõ gɩ; dɩ jəədaa yeɲɔ do thɩr pɛna bɩɛlɩda. 31 Dɩ wɩ thele akasɩa thɩr ɓal gbana yemɔy dɩɩ do kẽkẽ wa gɛl bɩɛlɩda, dɩ wɩ fʋna thɩr pɛnaale, 32 a bir thel ɓal gbana yemɔy wo dɩɩ do kẽkẽ wa, ʋ̃ʋ gɛl bɩɛlɩda; a bir thel ɓal gbana yemɔy kpɩɩ wo dɩɩ do kẽkẽ wa sɩkadaa, ka eenenɩ wi lõ paar. 33 Dɩ wɩ thele ʋrɛ dʋɔnɩ thɩ̃thɩɩn ɓal gbãakɛ na thʋɔnɩ thɩr pɛnaalee bɩnɔ, thɩ̃thɩɩn, a the ʋ̃ʋ khu pa a jal a thʋ ʋ̃ʋ khu pa. 34 Dɩ wɩ calɛ thɩr pɛnaale dɛ a calna ɓal gbanaale dɛ, sa cʋʋ ɓɔ̃ɓɔnaakɛ ɓalãɓɔna na lononɩ na dɛ. 35 Dɩ wɩ ler dakha du vaar kɩ̃kɩɩn na lɛ̃ kẽkẽ wi bɔy, kɛ ɲaananɩ lɛn kẽkẽ wiikɛ wɩ khini na dasɛ khala khala na dasɛ bɔy kpakpakpa na dasɛ birə himə himə, kɛ ɲɛ̃ɛ thɔ̃ jɩna bɛbɩnɩ Seribɛ̃sɔ a maarɔ. 36 Dɩ wɩ thele akasɩa thɩr gbuunə yenã a cal gɩ dɛ, dɩɩ hana dɛ gãgama yenã, kɛ dɔnɩ ka du vaar kɩ̃kɩɩn na junɩ; a cʋʋna thɩr gbuunəsɔɔlee jəədasɔ yenã na dɛ bulo.

37 Dɩ wɩ ler kẽkẽ wa lõfonɔ kɩ̃kɩɩn na lɛ̃ kẽkẽ wi bɔy, kɛ ɲaananɩ lɛn kẽkẽ wiikɛ wɩ khini na dasɛ khala khala na dasɛ bɔy kpakpakpa, na dasɛ birə himə himə a ɓol ɓoldaar a pɛr. 38 Dɩ wɩ thele lõfonɔ kɩ̃kɩɩnɩ thɩr gbuunə yemɔy na agɩ gãgãsɔ; a cal agɩ yʋsɔ dɛ, a calna lõfonɔ kẽkẽ ju ɓala dɛ; sa cʋʋ thɩr gbuunəə jəədaasɔ yemɔy na ther sɩɛ.