THÃGBAA KẼKẼ WA THƖ̃BI CƲƲ THƖMƖƖ
Hɩɩr wire
35
1 Dɩ Mʋɩjɩ kpar Ɩjɩrayɛl bɩsana fɛw a gbɛbɩ sa so war aa: «Nɩ yɛ gɩrɛra Thãgba Kɔ̃tɩn yɩnɩ ga n cʋɛ: 2 "Nɩ dɔ thɔma wire maadõ, wire makoɲɔ wire hɩɩr wire gɩ. Wi sãasɩnanɛ gɩ, kɛ na thɩɩnɩ kpɩɩ gɩ do mɛr Thãgba Kɔ̃tɩnɩda. Tibil wo tibilikɛ na dʋɔnɩ thɔ̃ dɩkha ga wirəəle, wɩ kʋɔ. 3 Anɩ cɔ pasɔ fɛw, kana na hanɩ, na n gbɔɔ dɔɔrakɛ hɩɩr wirə'." »Ɩjɩrayɛl bɩsana 'laarɛ khaardaa wɩ cʋɛna Thãgbaa kẽkẽ wa thɩ̃bisɔ.
4 Dɩ Mʋɩjɩ bir so Ɩjɩrayɛl bɩsanana fɛw ayɩ: «Thãgba Kɔ̃tɩn sɔ thaa ayɩ: 5 "Nɩ te khaardaa thɩ̃ɛ fɛʋraakɛ nɩ hɩnɩ a hana mɛr Thãgba Kɔ̃tɩn. Tibil wo tibilikɛ hananɩ bɩ̃ bʋɔ n pɔna khaardaakɛra a tini a hana mɛr Thãgba Kɔ̃tɩn; gɛr dʋɔn: dɛ na dɛ bulona na ther sɛna; 6 na kẽkẽ gborõbi sɛna khala khala na dasɛ bɔy kpakpakpa na dasɛ birə himə himə na lɛ̃ kẽkẽ wi bɔy na bʋ suune; 7 na banake lʋʋsɔɔkɛ wɩ khini na dasɩɛ na dofɛ̃ lʋʋsɔ na akasɩa thɩra; 8 na niinikɛ wa n pɛrnɩ dɔ caraana na thɩ̃ɛsɔɔkɛ n hʋnanɩ daw, kɛ wa cʋʋnanɩ nĩ sãsɩna na latɩkolookɛ n hʋnanɩ daw, kɛ wa n thiini, 9 na onɩsɩ bokana na boka ɓɔ̃ kpɩɩsɔɔkɛ wa bɛɛrnanɩ efoodɩ na kũkũ tʋʋ. 10 Ɲɛ̃ thɔ̃ jɩna fɛw anɩ thɩ̃thɩɩn n ɩna a cʋɛ gɩrɛra Thãgba Kɔ̃tɩn sonɩ: 11 Thãgbaa kẽkẽ wa na ɔɔ thidaakɛ hɔnɩ balaɲɔ waa dathi na ɔɔ fʋdasɔ na ɔɔ thɩr kpaan pɛna na ɔɔ ɓal gbãsɔ na ɔɔ thɩr gbuunəsɔ na agɩ jəədasɔ; 12 na nɔ bɩɛl ʋlfɛ khɛɛsʋʋ na ɔɔ thɩr ɓalãɓɔsɔ na ʋlfɛ khɛɛsʋ thire kɛ dɔnɩ so hɛl paar na du vaar kɩ̃kɩɩn; 13 na tabalɩ na ɔɔ thɩr ɓalãɓɔsɔ na ɔɔ thɔ̃ do thɩ̃bisɔ fɛw na Thãgba buru; 14 na dɔ carã dɛ̃ɛ paar na ɔɔ thɔ̃ do thɩ̃bisɔ na ɔɔ dɔ carãsɔ na dɔ carã niin; 15 na latɩkolo ii bonɩ ji paar na ɔɔ thɩr ɓalãɓɔsɔ na nĩ sãsɩna na latɩkolookɛ n hʋnanɩ daw na Thãgbaa kẽkẽ wa lõfonɔ kɩ̃kɩɩn; 16 na nʋ̃ thii bonɩ ji paar na ɔɔ ther sɛ aakɛ hɔnɩ tɛmɛ̃ na ɔɔ thɩr ɓalãɓɔsɔ na ɔɔ thɔ̃ do thɩ̃bisɔ fɛw na ther sɛ ɓalãga na ɔɔ jəəda; 17 na Thãgbaa kẽkẽ wa gbasa kẽkẽ gborõbe na agɩ thɩr gbuunəsɔ na agɩ jəədasɔ na gbasa lõfonɔ kɩ̃kɩɩn; 18 na Thãgbaa kẽkẽ wa kpãbii na kẽkẽ wa gbasa kpãbii na agɩ lidasɔ; 19 na kẽkẽ ɓɔna kɛ wa n donanɩ thɔma pa phuurə, na kẽkẽ sãasɩnanɛsɔɔkɛ na dʋɔnɩ Aarɔ̃ bonɩ jidaarɩda, na ɔɔ bikũusɔɔ kẽkẽsɔɔkɛ wa n donanɩ bonɩ jidaar thɔma." » 20 Dɩ Ɩjɩrayɛl bɩsana fɛw faarɛ Mʋɩjɩ sa ɩɩr. 21 Dɩ wɩrɛ fɛʋʋkɛ hananɩ bɩ̃ bʋɔ na kpɩɛr bʋɔ pɔnanɛ awɩ khaardaakɛ wɩ tini a ha Thãgba Kɔ̃tɩn, wɩ puno wɩ cʋʋna thɔmaakɛ dʋɔnɩ Thãgba cãa wa thɔma na thɔma fɛʋʋkɛ teananɩ gɩ cʋɛ na kẽkẽ sãasɩnanɛsɔ. 22 Dɩ kona a gbana khɛra ɓibi pɔr, wɩrɛ fɛw bɩɛlbɩɛlɩkɛ hananɩ bɩ̃ bʋɔ, wɩ pɔnanɛ thɩ̃ caar dɩɩdɩɩkɛ wɩ cʋʋnanɩ dɛ, kɛ dʋɔnɩ: ɓɔ̃ɓɔna na kpɛ̃ɛbii na ɲɛ̃bi tʋʋ na lɛ̃bii, wɩ pɔnanɛ gelela fɛw a jɛna sa ha Thãgba Kɔ̃tɩn. 23 Dɩ wɩrɛ fɛʋʋkɛ hananɩ kẽkẽ wi sɛna khala khala na dasɛ bɔy kpakpakpa na dasɛ birə himə himə na wɩrɛ hananɩ lɛ̃ bɔy na bʋ suune, na banake lʋʋsɔɔkɛ wɩ khini na dasɩɛ na dofɛ̃ lʋʋsɔ, wɩ pɔnanɛ. 24 Dɩ wɩrɛ fɛʋʋkɛ kɔɔ tenɩ khaardaa a thɩɩn: mũsumo na ther sɛna wɩ pɔnanɛ khaardaalera a ha Thãgba Kɔ̃tɩn. Dɩ wɩrɛɛkɛ hananɩ akasɩa thɩra, wɩ pɔnanɛ, gɩ puno gɩ cʋʋ thɔ̃ caar fɛʋʋkɛ teananɩ gɩ cʋɛ. 25 Dɩ khɛra fɛʋʋkɛ jɩɛnɩ jɩ ɲɛ̃ thɔma kparɛ kẽkẽ wi sɛna khala khala na dasɛ bɔy kpakpakpa na dasɛ birə himə himə a pɔnana dakha lɛ̃ kẽkẽ wi bɔy, kɛ wɩ kparnɩ na awɩ thɛthɛɛ ɲɛ̃. 26 Dɩ khɛr wɩrɛ fɛʋʋkɛ jɩɛnɩ jɩ ɲɛ̃ thɔma bɔɔbɔɔ, kɛ hananɩ ƴaalɛ kparɛ bʋ suun kẽkẽ wiir. 27 Dɩ wɩrɛ dʋɔnɩ Ɩjɩrayɛl bɩsanaa kɔ̃tɩ̃sɔ 'laa onɩsɩ bokana na boka ɓɔ̃ kpɩɩsɔɔkɛ wa bɛɛrnanɩ efoodɩ na kũkũ tʋʋ; 28 a 'laana thɩ̃ɛɛkɛ n hʋnanɩ daw kɛ wa gbɛbɩnanɩ niinikɛ wa n pɛrnɩ dɔ caraana na gɩrɛ wa gbɛbɩnanɩ nĩ sãsɩna na latɩkolookɛ n hʋnanɩ daw. 29 Dɩ Ɩjɩrayɛl bɩsana fɛw, kona na khɛra, kɛ dɔnɩ wɩrɛ hananɩ bɩ̃ bʋɔ pɔnanɛ awɩ khaardasɔ a ha Thãgba Kɔ̃tɩn, gɩ puno gɩ bul thɔmaakɛra Thãgba Kɔ̃tɩn kɔɔ sonɩ Mʋɩjɩra a cʋɛ.
Wɩ har Besalɛl na Oholɩabɩ Thãgbaa kẽkẽ wa dʋ thɔma.
30 Dɩ Mʋɩjɩ so Ɩjɩrayɛl bɩsanana ayɩ: «Nɩ yɛ Besalɛl, Uuri bikuun; ɔɔ thɩ̃ kɔ̃tɩ̃ n dʋɔn Huur, kɛ thɛnɩ Judaa mələ, Thãgba Kɔ̃tɩn wɩɛ ire a phiiru. 31 Thãgba hiire na ɔɔ Thu dɩ hana kpɛsɛrɛ na jɩɩr na punone, kɛ a na jɩnanɩ ɲɛ̃ thɔ̃ caar fɛw a na n cʋʋ. 32 A hananɛ thɩ̃ pha cʋʋ jɩwɛ; a na n cʋʋna dɛ thɔma na dɛ bulo thɔma na ther sɛ thɔma. 33 A jɩrɛ mɔ̃ a na thelnɩ boka ɓɔna na mɔ̃ a na bɛɛr gɩnɩ na mɔ̃ a na thelnɩ thɩrʋ; kɩrʋ dʋɔn a jɩrɛ ɲɛ̃ thɔ̃ caara fɛw a na cʋʋ. 34 A haarɛ dakha khaardaa dɩ a na dɩɩr thɩ̃ jɩɩrɩlera ɩkhasɔ; ɔr na Oholɩabɩ, kɛ dʋɔnɩ Ahɩsamakɩɩkɛ thɛnɩ Dãa mələ ɔɔ bikuun. 35 A ha wɛr kpɛsɛrɛ, kɛ wa cʋʋnanɩ thɔ̃ caar fɛw, kɛ dɔnɩ thɩ̃ caar fɛʋʋ thel jɩwɛ na ɲɛ̃bi thɔma fɛw: wɩ ɓol ɓoldaarsɔ kẽkenana, wɩ lena kẽkẽ gborõbi sɛna khala khala na dasɛ bɔy kpakpakpa na dasɛ birə himə himə na lɛ̃ bɔy, wɩ cʋʋna thɔ̃ caar dɩɩdɩɩ fɛw, wɩ hana dakha thɩ̃ pha cʋʋ jɩwɛsɔ.»