Mʋɩjɩ bire thel boka phɛlɛ yeɲɔ wo balanyɔdaa
34
1 Thãgba Kɔ̃tɩn bire so Mʋɩjɩra aa: «Thela boka phɛlɛ yeɲɔ gɩ ho cacadaasɔ, ɩ̃ cɩrɔ thɩmɩasɔɔkɛ kɔɔ hanɩ cacadaasɔraakɛ fɩ kɔɔ cʋɔrnɩ. 2 Gbɛbɩrɛ a pɛ cʋɔ duuro phiphiphi. Mãa jʋʋnɛ duuro Sɩnayɩ gɔ̃gʋɔna a jɩlɛ le ɩ̃ ƴɛra gɔ̃gɔ̃ yʋɔ. 3 Tibil bɩɛlakɛ na n jʋʋn kha na fɛrɛa', dɩ gɔ̃gʋɔnanakɛ fɛw, wa n yɩ le tibil bɩɛlaka', dɩrakɛ nʋ̃ yɩra, a gbana nʋ̃ kɔ̃tɩna ɓibi na n khʋʋl gɔ̃gʋ̃ɔɔlee nɔra ga.» 4 Dɩ Mʋɩjɩ thele boka phɛlɛ yeɲɔra mɔ̃ cacadaasɔ hanɩ. Dɩ dɩwɩlɔ duuro phiphiphi, a mãa ɩɩrɛ a jʋʋn Sɩnayɩ gɔ̃gʋɔna ƴũu mɔna Thãgba Kɔ̃tɩn kɔɔ sʋʋraanɩ. Dɩ a fʋrɔrɛ boka thelna phɛlɛsɔɔra ɲɔ̃kɔɔ. 5 Dɩ Thãgba Kɔ̃tɩn gbune ndɔlɔ̃paara a jɩɩl Mʋɩjɩɩ kɩrɔ, sa wer ɔɔ i bɔ, kɛ dʋɔnɩ Thãgba Kɔ̃tɩn. 6 Dɩ Thãgba Kɔ̃tɩn kar Mʋɩjɩɩ ƴɛra sa phã: «Mɛr Thãgba Kɔ̃tɩn, mɛr Thãgba Kɔ̃tɩn, mɛr dʋɔn bɔ fʋ Thãgba; mɩ n jɩrɛ bʋɔra, nĩkhi jodaar ha mɩ, ha bulole jɔ marɛ ka na sobɔ cʋʋrɛ. 7 Mɩ n fʋrɔrɛ ɩ̃ ha bulo waa phaphapha dɩ̃ dana məle gbɩlanɩ; mɩ n faarɛ dɩ paar na jɔfʋ kʋɛrɛ na sopuu, sɩ ma n gba jɔfʋ kʋɛdaar dɩ do tɩɩ sarʋa'. Mɩ n pɛr bɩsanana thɛɛ so dɩ̃ pɛna awɩ bɩsãsɔɔ bɩsãsɔɔra wɛr thɛɛ dɩpa phaphapha dɩ̃ dana balãther na balanã məle.» 8 Dɩ Mʋɩjɩ phana dapaara a gburõkhu thɩɩra a fʋɔrʋ. 9 Agɩpɩ dɩ Mʋɩjɩ so: «Pha! Kɔ̃tɩn, ado mɩ 'lɛr afɩ bɔjɩra sobɔr, hana asɩ thɩ̃thɩɩn a jalana sɩ. Tɩbɩla gɩɩkɛ wer bʋɔnɩ nũu na sobɔr, sɩ mɩ n phʋʋr fɛr, faa asɩ dɩpasɔ na asɩ sopuusɔ, sa gba sɩ sɩ do afɩda.»Thãgba bire a gbɛbɩ ɔɔ nɔ bɩɛl ʋlfɛ na Ɩjɩrayɛl
10 Dɩ Thãgba Kɔ̃tɩn so Mʋɩjɩra: «Hɩnɛ, ma ʋlfɛrɛ nɔ bɩɛl ʋlfɛrɛ na nɛrɛ. Ma cʋʋrɛ nɔ kpaa thɩ̃ɛsɔ afɩ too fɛʋkɛɛ ƴɛra; nɔ kpaa thɩ̃ caarsɔɔkɛ, ga ca na kɔɔ cʋʋnɩ kpɩɩrakɛ thɩɩraakɛ fɛw, dɩ ca kpɩɩra gɩrakɛ dɩkhãa pa ga. Caarɩkɛra fɩ harɔnɩ gɩrɛ na yɩrɛ mɛr Thãgba Kɔ̃tɩnɩ thɔ̃; ma kɔ̃tɩ̃ thɔma gɩɩkɛ ma gba fɩnɩ a na cʋʋna. 11 Nɩ jɩɛ dʋ bʋrɛ jɔfʋraakɛ mɩ n ha nɩnɩ gɩrɛ nĩ. Ma weelele anɩ ƴɛra Amɔɔr məlsɔ na Kanãadara na Hɛtɩɩ məlsɔ na Perejɩdara na Hɩvɩtɩsɔ na Jebusɩdara. 12 Nɩ jɩɛ hɩɩn dɛ! Na n ʋlfɛ kha nɔ bɩɛl ʋlfɛrɛ na dɩdara, kana na lonɩ gɩra'. A mɛ̃ ga wa do narɛ pheru. 13 Sɩ nɩ ka wɩɛrɛ awɩ bonɩ ji pasɔ, a cʋɔrɛna awɩ bokasɔɔkɛ wɩ gbuuni, nɩ kuure Aseraa thɩl gãsɔ. 14 Na n gburõkhu thãgba kpɩɩ ƴɛbʋrɔ a fʋɔrʋa', gɩdonɩ mɛr Thãgba Kɔ̃tɩnɩ i n dʋɔn gbugidaar. Thãgba gbugidaar ha mɩ. 15 Na n ʋlfɛ kha nɔ bɩɛl ʋlfɛrɛ na dʋɔdara ga. A mɛ̃ ga, ɔbɔɔkɛ wa n cʋʋnɩ awɩ bɔdɛl cʋʋ awɩ thãgbasɔɔra, wɩ jinə war bonɩɛsɔ, ga hor wa we ner dɩ fa jal a na kho agɩ dɩkosɔ; 16 dɩ ga hor na gbaar awɩ bikhɛrsɔ a na ha anɩ bikũusɔ, dɩ a awɩ bikhɛrsɔ na cʋʋ awɩ bɔdɛl cʋʋ awɩ thãgbasɔɔra, ga hor wa halɛ anɩ bikũusɔ a na to bɔdɛl cʋʋrɛra na awɩ thãgbasɔ.
17 Na n hɩl ther a cʋʋ thãgba ga. 18 Na n cʋɛ buruukɛ wa pɛrnɩ tabɩɩraa' fɛtɩ. A ga bɔ dã, kɛ dɔnɩ bile kha sɩpor, nɩ khɔ buruukɛ wa pɛrnɩ tabɩɩra' a cʋɛna wire makoɲɔ mɔ̃kɛ mɩ kɔɔ ha nɩnɩ jɔfʋ; gɩdonɩ bile kha sɩporra nɩ kɔɔ the Ejipiti dɩɩra. 19 Caca bɩsana fɛw, mɛr hɩna wɩ, a gbana anɩ nʋmaa bisɔɔkɛ wɩ kɔnɩ caca dɩ wɩ do dakona anɩ nʋ̃ kɔ̃tɩ̃sɔɔra na nʋ̃ yɩrasɔɔra. 20 Sɩ nɩ deba kũkə̃ə caca bi na bana biri. Sɩ ado na ƴaal nɩ debʋa', nɩ cʋɔrɛɛ yʋʋ a khi. Nɩ deba anɩ caca bikũusɔ fɛw. Tibil na n ɩ̃ ɩ̃ ƴɛra na ɲɛ̃ biirə'.
21 Nɩ dɔ thɔma a cʋɛna wire maadõ, sɩ wire makoɲɔ wirera nɩ hɩrɛ. Nɩ hanana cʋrɛ hɩɩr wirera adorakɛ kʋʋl bɔɔ gɩ agɩbo kha bɔɔ gɩ.
22 Na n cʋɛ Pãtɩkɔtɩa, kɛ dɔnɩ caca lɛ thɩ̃ gba fɛtɩ na lɛ thɩ̃ gba pɩɩr fɛtɩ yɛ fi bɔɔ.
23 Yɛna fɛw afɩ cara, kona fɛw n dana mɛr Kɔ̃tɩn kpɩɛɛ ƴɔɔ balãther, kɛ dʋɔnɩ Thãgba Kɔ̃tɩn, Ɩjɩrayɛlɩ Thãgba. 24 Ma weelele ca kpɩɩsɔ afɩ ƴɛra, sɩ a na lɛɛ afɩ dɩ pɛl; balãtherɩkɛ fa n danɩ mɛr Thãgba Kɔ̃tɩn afɩ Thãgbaa ƴɔɔ yɛna fɛw, tibiləkɛ na 'la na pɩɛr haar afɩ dɩra ɩnɩ n tea fɩ dɩɩa'. 25 A fa ji mar tɔmɩn bonɩɛ, fa n gbɛbɩna tabɩ buruə'. Fa n do Pakɩ bonɩ nʋʋn n sɩ dʋɔrɔ gɩ wɩl dɩɩa'. 26 Gba afɩ caca thɩ̃ fɛʋʋkɛ thɛnɩ thɩɩra a ɛna mɛr Thãgba Kɔ̃tɩn afɩ Thãgbaa cɔ. Fa n thɩɩ bʋ̃ʋbir na ɔɔ nɩɩ ɩlɩ̃ ɲɔ̃a'.»
27 Dɩ Thãgba Kɔ̃tɩn so Mʋɩjɩra aa: «Kherene thɩmɩaakɛra, gɩdonɩ nɔ bɩɛl ʋlfɛrɛɛkɛ mɩ ʋlfɛna fɩnɩ na Ɩjɩrayɛl bɩsana, gɛra gɩ dɛ̃ɛ.» 28 Dɩ Mʋɩjɩ toore le Sɩnayɩ gɔ̃gʋɔna Thãgba Kɔ̃tɩnɩ ƴɔɔ a cʋʋna dɩwɩlʋ na dɩtɩnɛ kpalaɲɔ, sɩ aa kho dikora; aa ɲɔ ɲʋɔna'. Dɩ Thãgba Kɔ̃tɩn kherere boka thelna phɛlɛsɔɔrara thɩmɩa yʋɔr, kɛ dʋɔnɩ nɔ bɩɛl ʋlfɛ thɩmɩa.
Mʋɩjɩ ther gɔ̃gʋɔna ƴũu a gbũ
29 Dɩ Mʋɩjɩ ther Sɩnayɩ gɔ̃gʋɔna ƴũu a gbũ, a fʋrɔ ɔɔ ɲɔ̃kɔɔ boka thelna phɛlɛ yeɲɔɔkɛ hananɩ nɔ bɩɛl ʋlfɛ thɩmɩɩ. Sɩ mɔ̃ a n gbuni, aa kɔɔ jɩ dɩ mɔ̃ a mɩɩnanɩ Thãgba Kɔ̃tɩn ɔɔ ƴɛ n carbarara'. 30 Dɩ Aarɔ̃ na Ɩjɩrayɛl bɩsana hɩɩnɛ a yɩ Mʋɩjɩɩ ƴɛ dɩ ga n carbara dɩ maar fʋlɛ wɩ, dɩ wa 'la na wɔrɔ̃ɔa'. 31 Dɩ Mʋɩjɩ we wɩ, Aarɔ̃ na Ɩjɩrayɛl bɩsanaa kɔ̃tɩ̃sɔ fɛw, dɩ wɩ pʋɔraa, dɩ mɩɩna wɩ. 32 A gele pɩ, Ɩjɩrayɛl bɩsana fɛw pʋɔraarɛ dɩ gba jɔfʋsɔɔkɛra fɛw Thãgba Kɔ̃tɩn kɔɔ haanɩ Sɩnayɩ gɔ̃gʋɔna a mɩɛ wɩ. 33 Ɔbɔɔkɛ Mʋɩjɩ mɩɩna wɩnɩ a pɩ, a gbaar kẽkẽ hələ a thi ƴɩɛra. 34 Dɩ ga bɔɔle, a Mʋɩjɩ na lõ Thãgba Kɔ̃tɩnɩ ƴɔɔ a mɩɩnaa, a n tire kẽkẽ hələəle dɩɩ dana bɔɔkɛ a na thenɩ. Dɩ aa the a n mɩɛrɛ Ɩjɩrayɛl bɩsana gɩrɛ Thãgba sʋʋraanɩ. 35 Dɩ Ɩjɩrayɛl bɩsana n yɩrɛ Mʋɩjɩɩ ƴɛ mɔ̃ gɩ n carbaranɩ, agɩpɩ Mʋɩjɩ n gbaar kẽkẽ hələla dɩ bir dɩ thi ɔɔ ƴɛra phaphapha dɩɩ dana bɔɔkɛ a na birni na lõ wo a na mɩɩna Thãgba Kɔ̃tɩn.