Thãgba Kɔ̃tɩnɩ thɛthɛ na tu a na thɔɔ Ɩjɩrayɛl bɩsana bã.
33
1 Agɩpɩ Thãgba Kɔ̃tɩn so Mʋɩjɩra aa: «Nɩ jala, fɛrɛ na tɩbɩlaakɛra fɩ tini Ejipiti dɩɩra a thena. Nɩ ɩrɛ kɩɛr a jala dɩɩraakɛra mɩ sonɩ a ʋlfɛna Abɩraham na Ɩjakɩ na Jakɔbɩ ayɩ ma har awɩ məlsɔ. 2 Ma thʋɔn thɔ̃thɔ̃ thui da kʋʋl fɩ ƴɩɛ; ma weelele Kanãadara na Amɔɔr məlsɔ na Hɛtɩɩ məlsɔ na Perejɩdara na Hɩvɩtɩsɔ na Jebusɩdara. 3 Nɩ jala dɩɩraakɛra naƴɩlɛ̃ na thʋʋr n celnɩ. Sɩ me wer, ma ha anɩ thɩ̃thɩɩn a na jal kha na nɛrɛa'; A mɛ̃ ga ma pʋɔr sɩ na bũburõ nɩ hʋɛra a na tə', gɩdonɩ nɩ dor caarɩkɛ thʋnanɩ bɔ nũu ka.» 4 Ɔbɔɔkɛ tɩbɩlaale nɩɛnɩ yilẽbi thɩmɩɩ caarɩle, haar kʋɛ wɛr koo dɩ tibil bɩɛlakɛ na to ɔɔ ɓoldasɔa'. 5 Thãgba Kɔ̃tɩn kɔɔ sɔ Mʋɩjɩra aa: «Sɔ Ɩjɩrayɛl bɩsanana ayɛ: "Nɩ dor caarɩkɛ bʋɔnɩ nũu ka. A mɩ yɩ ɩ̃ hana anɩ thɩ̃thɩɩn gbe fɩɩʋ dɩbara sɩ jal kha ma bũburõ ner a na ti. Nɩ fʋrɛ anɩ ɓoldasɔ nɛnɛ̃, sɩ ɩ̃ jɩ gɩrɛ ma cʋʋ nɩnɩ." » 6 Dɩ Ɩjɩrayɛl bɩsana kɔɔ fʋʋrɛ awɩ ɓoldasɔ a fʋna bɔɔkɛ wɩ theni le Orɛɛbɩ gɔ̃gʋɔna.Thãgba cãa waa
7 Ɔbɔɔkɛ Ɩjɩrayɛl bɩsana na n jɛnɩ paar, Mʋɩjɩ n gbaar kẽkẽ waa jɛw dɩ thena dɩ jalna dɩ dʋ khuirə ƴɔɔ gbe, da n wɩɩ Thãgba cãa waa. Dɩ tibil wo tibilikɛ n ƴaalɛnɩ a jɩ Thãgba Kɔ̃tɩnɩ tuur, ntɛ n thɛ dɩ jal le Thãgba cãa waara, kɛ kɔɔ hanɩ le khuirə. 8 Ɔbɔɔkɛ Mʋɩjɩ n theni da n jal Thãgba cãa waaraale, tɩbɩla ɓibi n ɩɩrɛ a jɩɩl, ntɛ ɔɔ lõfonɔra sɩ na hɩɩn Mʋɩjɩ phaphapha dɩ lona Thãgba cãa waw. 9 A Mʋɩjɩ na lõ kẽkẽ waw, ndɔ̃lɔpaar n gbune dɩ jɩɩl kẽkẽ wa lõfonʋɔra dɩ Thãgba Kɔ̃tɩn na n mɩɩna Mʋɩjɩ. 10 Ɔbɔɔkɛ Ɩjɩrayɛl bɩsana n kɔɔ yɩnɩ ndɔlɔ̃paarɩle dɩ jɩɩl kẽkẽ wa lõfonʋɔra, tɩbɩla fɛw n ɩɩrɛ a gburõkhu, wɛr fɛw bɩɛlbɩɛl ntɛ ɔɔ lõfonɔra. 11 Thãgba Kɔ̃tɩn n kɔɔ mɩɩnanɛ Mʋɩjɩ gbelẽ gbelẽ mɔ̃kɛ tibil na n mɩɩnanɩ ɔɔ kuun. Agɩpɩ dɩ Mʋɩjɩ n kɛr dɩ bir le jɛw, sɩ ɔɔ khukhu Jojue, kɛ dɔnɩ daɓolbir, kɛ dʋɔnɩ Nunɩ bikuun n toore le kẽkẽ waw.
Mʋɩjɩ ƴaalɛ a yɩ Thãgbaa ƴɛbi
12 Dɩ Mʋɩjɩ so Thãgba Kɔ̃tɩnna aa: «Hɩnɛ Kɔ̃tɩn, fɩ so marɛ ayɩ, ɩ̃ kpa tɩbɩlaakɛ a jalana, sɩ fa cʋʋ mɩ dɩ̃ jɩ ntɛɛkɛ fa thɔnɩ da jalna ma'. Sɩrakɛ fɩ so marɛ aa, fɛr wɛ mɩ ire a phiir mɩ, aa wo mɩ 'lɛ farɛ bɔ jɩɩr. 13 Nɛnɛ̃, ado mɩ lɛ farɛ bɔ jɩɩra sobɔr, cʋɛ mɩ ɩ̃ jɩ afɩ kpɩɛrsɔ; thale ma jɩɩ jɩ fɩ bɔɔbɔɔ, gɩ do mɛ̃ mɩ jɩɩ 'lɛ afɩ bɔ jɩra. Jɛna dɩ caarɩkɛra afɩ too wɩ do.»
14 Dɩ Thãgba Kɔ̃tɩn sʋʋraa: «Mɛrɛɛ thɛthɛ na jaal kha na fɛrɛ, gɩ do nɔɔ ɩ̃ ha fɩ hɩɩrɛ.» 15 Dɩ Mʋɩjɩ sʋʋraa: «A ga do fɛrɛɛ thɛthɛ n jala kha na sɛrɛa', sɛ sar kɩɛr sɩ too. 16 Aɲe wa jɩna dɩ mɩ 'lɛ farɛ bɔ jɩɩr, mɛrɛ na afɩ too? Ga do afɩ jalɩkɛra fa jalna sɩnɩ kha, a na cʋʋ mɩ, mɛrɛ na afɩ too, dɩ sa tiro na ha kpɩɩ na gɩ̃ɩ casɔ fɛʋʋkɛ hanɩ thɩɩraakɛ gaa?» 17 Dɩ Thãgba Kɔ̃tɩn bir so Mʋɩjɩra aa: «Gɩrɛ fɩ bɩɛlnɩ nɛnɛ̃ wo, ma cʋʋ gɛr, gɩdonɩ fɩ 'lɛ marɛ bɔ jɩɩr, dɩ̃ we fɩ ire a phiir fɩ.»
18 Dɩ Mʋɩjɩ sʋʋraa: «Dɩ cʋɛ mɩ ɩ̃ yɩ afɩ i dʋbɩ.» 19 Dɩ Thãgba Kɔ̃tɩn birsee aa: «Ma nɩna fɛr ɩ̃ ha bulo fɛw ƴɛbiro a na kana; dɩ ma wer ɩ̃ i bɔ, kɛ dʋɔnɩ "Thãgba Kɔ̃tɩn" afɩ ƴɛbʋrɔ. Ʋrɛ mɩ ƴaalnɩ ɩ̃ jɩ bʋɔra, ɔr mɩ n jɩ bʋɔra; dɩ ʋrɛra mɩ ƴaalnɩ bʋɔ n fɔ mɩ, ɔra bʋɔ n fʋ mɩ.» 20 Agɩpɩ dɩ bir sʋʋraa wo aa: «Fa puno na yɩ ɩ̃ ƴɛbi wera; gɩdonɩ tibil na puno na yɩ ɩ̃ ƴɛbi sɩ na hana yire bã.» 21 Dɩ Thãgba Kɔ̃tɩn bir sʋʋraa: «Yɛkɛ pa ʋkha ɩ̃ kɩrɔ; jɩlɛ le bokaara ƴũu. 22 Ɔbɔɔkɛ ɩ̃ i dʋbɩ na pɔnɩ ga n ka, ma gba fɛr na to bokaarɩlee kor balɔ, a na kɛɛ far ɩ̃ ɲɔ̃, phaphapha ɩ̃ ka ɓo. 23 Agɩpɩ, ma tire ɩ̃ ɲɔ̃ sɩ dɩ fa yɩ mɩ khiru. Sɩ ɩ̃ ƴɛbi wer na puno a na ya'.»