THƖƖRƐ 32

ƖJƖRAYƐL BƖSANA KƲƐRƐ NƆ BƖƐL ƲLFƐRƐƐKƐ THÃGBA KƆ̃TƖN ƲLFƐNA WƖNƖ

Ɩjɩrayɛl bɩsana phebire dɛ na bu thɩl.

1 Mɔ̃ Ɩjɩrayɛl bɩsana yɩɛnɩ dɩɩ do Mʋɩjɩ n pʋɔrɛ, a n gbũ gɔ̃gʋɔna khə̃khə̃ ga, wɩ kpar jɛ a kpala Aarɔna, a sʋʋraa: «Ɩrɛ a cʋɛ thãgbaakɛ na kʋlɛ sɩnɩ ƴɩɛ a hana sɩ, gɩdonɩ Mʋɩjɩ, kuunilera kɔɔ te sɩnɩ Ejipiti dɩɩra a thena, sa jɩ gɩrɛ danaana'.» 2 Dɩ Aarɔ̃ so war: «Nɩ fʋʋrɛ dɛ nũ tʋʋsɔɔkɛ hanɩ anɩ khɛrsɔɔ nunə na a nɩ bikũusɔɔ nunə na anɩ bikhɛrsɔɔ nunə a ɛna hana mɩ.» 3 Dɩ tɩbɩla fɛw Ɩjɩrayɛl bɩsanana fʋʋrɛ awɩ dɛ nũ tosɔɔkɛ kɔɔ hanɩ awɩ nunə a jalna ha Aarɔ̃. 4 Dɩ a tee warɛ dɛra a hɩl a cʋʋ na buu. Dɩ Ɩjɩrayɛl bɩsana na n be hulẽ be aa: «Ɩjɩrayɛl, yɛkɛ afɩ thãgbaakɛra te fɩnɩ Ejipiti dɩɩra a thena yoo!» 5 Dɩ mɔ̃ Aarɔ̃ yɩnɩ gele, a mɩrɛ bonɩ ji paar na bu thɩlɩ ƴɛbʋrɔ sa so na nɔ khɩɩr aa: «Cʋɔ, ɓol kɔ̃tɩ̃ɩ na hakɛ Thãgba Kɔ̃tɩnɩ i dʋbɩra.» 6 Dɩ dɩɩ na wɩl duuro phiphiphi, dɩ wɩ mãa ɩɩrɛ a ji bonɩ thiinəsɔ, a jinə 'likha bonɩɛsɔ, sa too a kho dɩkɔ a yɔna, a na pɩ, a gɔ lõ khaar khaar cʋʋrɛra. 7 Dɩ Thãgba Kɔ̃tɩn so Mʋɩjɩra ayɩ: «Phana a gbunə khə̃khə̃, gɩdonɩ afɩ toora fɩ tini Ejipiti dɩɩra a thena, wɩ cʋʋrɛ sopuu dɩɩ kpal ka. 8 Wɩ lɩ̃ɛ dapaara sa faa hʋɛɛkɛ mɩ kɔɔ nɩ warnɩ. Wɩ cʋʋrɛ na buu na dɛɛkɛ wɩ hɩlnɩ a gburõkhu ɔɔ ƴɛbʋrɔ a fʋɔrʋ. Wɩ jiirəəre bonɩɛsɔ sa so: "Ɩjɩrayɛl, yɛkɛ afɩ thãgbaakɛra te fɩnɩ Ejipiti dɩɩra a thena yoo!" » 9 Dɩ Thãgba Kɔ̃tɩn sor Mʋɩjɩra ayɩ: «Mɩ jɩrɛ dɩɩ do tɩbɩlaale bɔr nũu jɔɔ ka. 10 Nɛnɛ̃, sɛ mar! Ɩ̃ nĩkhi na lɩ warɛ dɔ khaa, ɩ̃ bũburõ wɩ; sɩ ɩ̃ cʋʋ fɩ, fɩ do ca nɩ kɔ̃tɩ̃ɩ.» 11 Dɩ Mʋɩjɩ ƴɛɛrɛ Thãgba Kɔ̃tɩn, ɔɔ Thãgba da n kɛ̃kɛrɛna a jɛ wɩ bʋɔra ayɩ: «Thãgba Kɔ̃tɩn, fɛr kɔɔ te afɩ tookɛra na puno kɔ̃tɩ̃ɩ na afɩ fãga ɲɔ̃ɔ Ejipiti dɩɩra a thena, sɩ aɲe gɩ dɩ fa bir a na gbana wɩ nɩ̃khii thaa ɓoɓo? 12 A fɩ cʋʋ thale Ejipitidara na n so wɩ yɩ: "Puure fɩ ƴaal fɩ cʋʋ wɩ, gɛra fɩ ti wɩ thena; gɔ̃gɔnana fɩ ƴaal fɩ jalna wɩ fɩ kʋʋr, fɩ bũburõ wɩ, wɩ ti thɩɩraakɛ!" Kɔ̃tɩn, faa nĩkhi khɩɩkɛ fɩ gbanɩ, deba kpɩɛrɛ puureraakɛ fɩ ƴaalnɩ fɩ cʋʋ afɩ too. 13 Jɛna Abɩraham na Ɩjakɩ na Jakɔbɩ, afɩ thɔ̃daarsɔɔkɛ fɩ kɔɔ wenɩ afɩ thɛthɛɛ i a ʋlfɛna ayɩ: "Ma cʋʋrɛ anɩ məlsɔ dɩ wa ler a na jɔr mɔ̃kɛ ƴepələ̃be n hanɩ thãgbara ƴũu. Anɩ məlsɔ ma ha dɩɩkɛra mɩ mɩɩnɩ fɛw dɩ wa hɩ̃ bɔɔ fɛw waa khorr vʋ̃ʋ." » 14 Dɩ Thãgba Kɔ̃tɩn debɩ kpɩɛrɛ aa cʋʋ ɔɔ too puureekɛ a kɔɔ sonɩ ɩna cʋʋ wɛr bã. 15 Dɩ Mʋɩjɩ kɛrɛ gɔ̃gʋɔna ƴũu a gbũ na boka thelna phɛlɛ yeɲɔɔkɛ a fʋrɔnɩ ɲɔ̃kɔɔ, kɛ hananɩ ʋlfɛ thɩmɩɩr. Wɩ kɔɔ kherere boka thelnanɛsɔraale ʋ̃ʋ bilo na ʋ̃ʋ bilo; ƴɩɛ yeɲɔra fɛw. 16 Boka thelnanɛsɔɔlera, Thãgbaa ɲɛ̃ thɔ̃ gɩ, dɩ kherere Thãgbaa kherera gɩ, kɛ a cɩnɩ boka thelnanɛsɔraale. 17 Dɩ Jojue nɩɛrɛ Ɩjɩrayɛl bɩsanaa wi mɔ̃ wɩ n benɩ hulẽbe, dɩ so Mʋɩjɩra aa: «Koke hulẽbe n ther lele jɛw.» 18 Dɩ Mʋɩjɩ sʋʋraa: «Ɔ̃'ɔ̃, ga do kəə 'lɛ hulẽbe ha gela', dɩ ga do wo kəə 'lee hulẽbe ga, sɩ ɓoɓol nɩ hulẽbe mɩ n nɩɛ.» 19 Dɩ mɔ̃ Mʋɩjɩ n wɔrɔnɩ jɛw, a yɩrɛ na buurə na mɔ̃ wɩ n sanɩ bɩna. Dɩ nĩkhii thaarɛ dɩ dʋna boka thelnanɛsɔɔra a fʋrɔnɩ ɔɔ ɲɛna gɔ̃gɔ̃ horo a cʋɔr. 20 Dɩ a gbaar na buulera wɩ kɔɔ cʋʋnɩ a to dɔɔra dɩɩ hɩ̃; dɩ gba a nã dɩɩ phu kololo, dɩ pɛr ɲʋɔnɔ, a cʋʋ Ɩjɩrayɛl bɩsana dɩ wɩ ɲɔ. 21 Agɩpɩ dɩ Mʋɩjɩ bule Aarɔ̃ aa: «Aɲe tɩbɩlaakɛra cʋʋ fɩ dɩ fɩ tɔ wɩ pɛ sopuu kɔ̃tɩ̃ caaraakɛ?» 22 Dɩ Aarɔ̃ so Mʋɩjɩra ayɩ: «Mɩ n bɩɛl fɛr ɩ̃ kɔ̃tɩ̃, fa n do nĩkhii n fʋ fa', fɛrɛɛ thɛthɛrakɛ jɩrɛ tɩbɩlaakɛ! Fɩ jɩrɛ dɩ puure da warɛ cʋʋrɛra ka. 23 Wɛr sɔ mar aa: «Cʋɛ thãgbaakɛ na kʋlɛ sɩnɩ ƴɩɛ a hana sɩ, gɩdonɩ Mʋɩjɩ, kuunilera kɔɔ te sɩnɩ Ejipiti dɩɩra a thena, sa jɩ gɩrɛ danaana'.» 24 Gɛr gɩ dɩ̃ so war: «Wɩrɛɛkɛ hananɩ dɛ, wɩ fʋrɛ! Dɩ wɩ fʋʋrɛ a ha mɩ, dɩ̃ dʋna dɔɔ, dɩɩ debi do na buu kɛ.»

Lɩmɩnɛɛkɛ Ɩjɩrayɛl bɩsana 'lɛnɩ awɩ thɩl fʋɔra

25 Mʋɩjɩ yɩrɛ mɔ̃ tɩbɩlaale faanɩ awɩbara, dɩ Aarɔ̃ dakha sɩ war thalera dɩ wa n cʋʋ gɩrɛ dãa warnɩ, dɩ wa do mãa nɔɔ awɩ lãlaardaraa ƴɛra. 26 Dɩ a jaal a jɩɩl jɛw lõfonʋɔra, sa phã aa: «Wɩrɛ naanɩ Thãgba Kɔ̃tɩn wɩ ɩna kɛ mɛrɛra!» Dɩ Levɩɩ məlsɔ fɛw kpar der a kpalalaa. 27 Dɩ Mʋɩjɩ so war: «Thãgba Kɔ̃tɩn, kɛ dʋɔnɩ Ɩjɩrayɛlɩ Thãgba sor a yɩ: "Nɩ saa bajɩna nɛrɛ fɛw bɩɛlbɩɛl kpɩ̃kpaana a fe jɛw ɓibi a cana; a kpaarɛ cɔna cɔna, tibil wo tibil n kɔ ɔɔ omɩ, agɩbo ɔɔ kuun ɔɔ tibil." » 28 Dɩ Levɩɩ məlsɔ cʋʋrɛ mɔna Mʋɩjɩ sonɩ oti; dɩ tɩbɩla gbɩlanɩ yẽthersɔ (3.000) khiire Ɩjɩrayɛl bɩsanaa thɩ̃thɩɩn dawiile. 29 Dɩ Mʋɩjɩ so Levɩɩ məlsɔɔra ayɩ: «A fʋna nĩ, nɩ faarɛ anɩbara, nɛrɛ fɛw bɩɛlbɩɛl Thãgba Kɔ̃tɩnna, gɩdonɩ na kɔɔ boro anɩ bikũusɔ agɩbo anɩ omɩsɔɔa', dɩ mɛ̃ gɩ nĩikɛ a na ha nɛr ɔɔ bɔna.»

Mʋɩjɩ ƴɛɛrɛ Thãgba Kɔ̃tɩn da n pɛ Ɩjɩrayɛl bɩsanana.

30 Ɔ dɩwɩlɔ Mʋɩjɩ sor Ɩjɩrayɛl bɩsanana aa: «Nɩ cʋʋrɛ sopuu kɔ̃tɩ̃ɩ ka. Nɛnɛ̃ ma bire na jʋʋn Thãgba Kɔ̃tɩnna ɩ̃ hɩɩn ado a na ture a na faa anɩ sopuurə.» 31 Dɩ a kɛrɛ bir Thãgba Kɔ̃tɩnna a sʋʋraa: «A! Tɩbɩlala cʋʋrɛ sopuu kɔ̃tɩ̃ɩ ka. Wɩ cʋʋrɛ dɛ thãgba dɛ! 32 Sɩ faa awɩ sopuurə nɛnɛ̃ a hana wɩ! A mɛ̃ ga, mɩ n bɩɛl fɛr, pɩɩnɛ ɩ̃ i afɩ yi sɛbɛraakɛ fɩ kherenɩ a faa.» 33 Dɩ Thãgba Kɔ̃tɩn sʋʋraa: «Ntɛɛkɛ dɩbara cʋɛ marnɩ sopuu, ɔɔ i ma pɩɩn ɩ̃ yi sɛbɛra a na faa. 34 Nɛnɛ̃, jala a thɔɔ tɩbɩlaalera a jalana kãakɛra mɩ so farnɩ. Ɩ̃ thɔ̃thɔ̃ thu na kʋlɛ fɩ ƴɩɛ. Sɩ a ɩ̃ wi dã ma pɛ warɛ sor gɩ do awɩ sopuu dɔ kɩrʋ.» 35 Dɩ Thãgba Kɔ̃tɩn pɛr Ɩjɩrayɛl bɩsanana sor dɩɩ the gɩrɛraakɛra wɩ pɛrnɩ Aarɔ̃ dɩ cʋʋ na bu thɩl.