Nyɛ̃ thɔ̃ jɩnaakɛ na cʋɛnɩ Thãgbaa kẽkẽ wa
31
1 Dɩ Thãgba Kɔ̃tɩn bir mɩɩna Mʋɩjɩ ayɩ: 2 «Hɩnɛ mɩ phiire Besalɛl, a wɩɩ ire, Uurɩ bikuun gɩ, sɩ ɔɔ thɩ kɔ̃tɩ̃ na n do Huur, kɛ thɛnɩ Judaa mələ. 3 Mɩ hiire na mɛr Thãgbaa Thu, dɩ hana kpɛsɛrɛ na jɩɩr na punone, kɛ a na jɩnanɩ thɔ̃ caar fɛw a na n cʋʋ. 4 A hananɛ thɩ̃ pha cʋʋ jɩwɛ; a na n cʋʋ dɛ thɔma na dɛ bulo thɔma na ther sɛ thɔma. 5 A jɩrɛ mɔ̃ a na thelnɩ boka ɓɔna na mɔ̃ a na bɛɛr gɩnɩ na mɔ̃ a na thelnɩ thɩrʋ, kɩrʋ dʋɔn a jɩrɛ thɔ̃ caara fɛw a na cʋʋ. 6 Ahɩsamakɩɩkɛ thɛnɩ Dãa mələ, ɔɔ bikuun Oholɩabɩ mɩ pɩɛraa dɩ do ɔɔ bubul. Mɩ pɛrɛ dakha kpɛsɛrɛ thɩ̃ jɩna fɛw bɩɛlbɩɛlɩ hara, gɩ do nɔɔ wɩ puno wɩ cʋʋ gɩrɛ fɛʋʋkɛra mɩ so farnɩ fɩ cʋɛ, gɛr dʋɔn: 7 mɛr Thãgba cãa waa na nɔ bɩɛl ʋlfɛ khɛɛsʋʋkɛ hananɩ ʋlfɛ thɩmɩɩr na so hɛl paarɩkɛ dɔnɩ ɔɔ dathi kɛ na dɛɛnɛnɩ ƴũu na mɛr Thãgba cãa wa thɔ̃ do thɩ̃be fɛw; 8 tabalɩ na ɔɔ thɔ̃ do thɩ̃bisɔ na dɔ carã dɛ̃ɛ paarɩkɛ dɔnɩ dɛ kile haar na ɔɔ thɔ̃ do thɩ̃bisɔ na latɩkolo ii bonɩ ji paar; 9 na nʋ̃ thii bonɩ ji paar na ɔɔ thɔ̃ do thɩ̃bisɔ fɛw na ther sɛ ɓalãga na ɔɔ jəəda; 10 na kẽkẽ ɓɔna na bonɩ jidaar kẽkenaakɛ na dʋɔnɩ Aarɔ̃ bonɩ jidaarɩda na ɔɔ bikũusɔɔ kẽkẽsɔɔkɛ wa n donanɩ bonɩ jidaar thɔma, 11 nĩ sãsɩna na pa phuu latɩkolo, kɛ n hʋnanɩ daw. Wɩ cʋɛ thɩ̃ɛ fɛw oti mɔ̃kɛra mɩ kɔɔ so farnɩ.»Hɩɩr wi thɩmɩɩr
12 Thãgba Kɔ̃tɩn bire mɩɩna Mʋɩjɩ wo a sʋʋraa: 13 «Mɩana Ɩjɩrayɛl bɩsana a sɔ war: "Na n hɩnɛ ɩ̃ hɩɩr wisɔ bɔɔbɔɔ, gɩdonɩ gɛr na dʋɔn jɩɩn anɩ thɩ̃thɩɩn na mɛrɛra anɩ məl wo məlsɔraakɛ na kpaanɛnɩ. Gɛr na dʋɔn jɩɩnɩkɛ n nɛnanɩ dɩ mɛr dʋɔn Thãgba Kɔ̃tɩnɩkɛ lea nɩnɩ kpɩɩ dɩ nɩ do ɩ̃da. 14 Nɩ hanana cʋʋr hɩɩr wirera, gɩdonɩ anɩ sãasɩ wi gɩ. Ntɛɛkɛ na ƴɔ̃ƴɔɔnɛnɩ hɩɩr wire wɩ kʋɔ. Dɩ tibil wo tibilikɛ na cʋɛnɩ thɔma wo thɔma hɩɩr wireraale wɩ hɛlaa ɔɔ too thɩ̃thɩɩn a faa. 15 Nɩ dɔ thɔma wire maadõ, sɩ wire makoɲɔ wirera gɛr dʋɔn hɩɩr wire; sãasɩ wire gɩ, kɛ dʋɔnɩ mɛr Thãgba Kɔ̃tɩnɩda. Tibil wo tibilikɛ na cʋɛnɩ thɔma wo thɔma hɩɩr wireraale, wɩ kʋɔ." 16 Ɩjɩrayɛl bɩsana na n cɔ hɩɩr wire. Wɩ fɔrɔ hɩɩr wire a na hɩnɛ, gɩ do war jɔfʋ khorr vʋ̃ʋ, wɛr na awɩ məlsɔ wo məlsɔraakɛ na kpaanɛnɩ. 17 Gɛr na dʋɔn jɩɩnɩkɛ teananɩ gɩ hanale khorr vʋ̃ʋ mɛrɛ na Ɩjɩrayɛl bɩsanaa thɩ̃thɩɩn; gɩdonɩ wire maadõ mɛr Thãgba Kɔ̃tɩn kɔɔ gba a cʋʋna thãgbara ƴũu na thɩɩ sɩ wire makoɲɔ wirera dɩ̃ hɩɩr.»
Kɩɛr Thãgba ha Mʋɩjɩ boka thelnanɛ, kɛ wɩ khereronɩ nɔ bɩɛl ʋlfɛ thɩmɩɩr
18 Ɔbɔɔkɛ Thãgba Kɔ̃tɩn mɩɩnanɩ Mʋɩjɩ Sɩnayɩ gɔ̃gɔ̃ yʋɔ pɩ, a haarɛ boka thelna phɛlɛ yeɲɔ, kɛ hananɩ nɔ bɩɛl ʋlfɛ thɩmɩɩr. Boka thelna phɛlɛ gɩ, kɛ Thãgbaa thɛthɛ khereronɩ na ɔɔ ɲɔ̃bi.