Dɩɩrɛ latɩkolo ii bonɩ ji pa cʋʋrɛra
30
1 «Cʋɛ bonɩ ji paar, kɛ dʋɔnɩ latɩkolo ii paar na akasɩa thɩrʋ. 2 Cʋɛɛ gãgamã yenã a ha kpərə̃kpərə̃; gbãʋ n mãkhanɛna ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl; pɛw n mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl, sɩ ɔɔ ƴũu gbã n mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yeɲɔ. Nɩ cʋɛ ɔɔ ʋ̃sɔ a manaa gɩ do bɩɛl. 3 Calaa dɛ kile haar koo, ɔɔ yʋ na ɔɔ gɛlsɔ bilo bilo na ɔɔ ʋ̃sɔ, a pɩɛr gbẽgber nʋɔra na dɛ a fenə. 4 Dɩ gbẽgberaale tɩɛr, pheba dɛ ɓɔ̃ɓɔna yeɲɔ a pɩɛr bonɩ ji paarɩ gɛlsɔ yeɲɔra bɩɛl ʋ̃ʋ bilo bɩɛl ʋ̃ʋ bilo ka ɓalãɓɔna na lonɩ wɩ puno wa n gbanaa. 5 Thela ɓalãɓɔnaalera akasɩa thɩra, a cala gɩ dɛ. 6 Thɩnɛ bonɩ ji paarɩle du vaar kɩ̃kɩɩnɩ ƴɛbʋrɔ, a telẽ kha na nɔ bɩɛl ʋlfɛ khɛɛsʋʋkɛ hanɩ ʋ̃ʋ bilo, kɛ hananɩ ʋlfɛ thɩmɩɩr, a telẽ kha dakha na dathiikɛ dʋɔnɩ so hɛl paar, kɛ theni ʋlfɛ thɩmɩɩrara ƴũu, kana ma n caana fɩnɩ. 7 Dɩ mɛ̃ Aarɔ̃ na n iiro latɩkolo. Duuro wo duuro a na n iəro latɩkolo, ɔbɔɔkɛ a na n gbɛbɩnɩ dɔ carãasɔ. 8 Dʋɔr birə bɔɔ dakha, a na n iəro latɩkolo ɔbɔɔkɛ a na n pɛnɩ dɔ carãasɔ. A na n iə latɩkolo bɔɔ fɛw mɛr Thãgba Kɔ̃tɩnɩ ƴɛbʋrɔ anɩ məl wo məlsɔraakɛ na n kpaanɛnɩ. 9 Na n ii bonɩ ji paaraale latɩkolo ca kpɩa', na n jiro bonɩ thiinə ga; na n jiro thɩ̃ bi bonɩa', na n jiro dakha dɩvɛ̃ bonɩɛ yuuə'. 10 Babɩɛl yɩɛra, Aarɔ̃ n cʋɛ ga sãasɩ ɔɔ ʋ̃sɔɔra a phʋɔlɛɛ: So hɛl bonɩ ji nʋmɩɩkɛ nɩ kʋnɩɩ tɔmɩn wa n phʋɔlnaa babɩɛl yɩɛr wo yɩɛr anɩ məl wo məlsɔɔra fɛʋʋkɛ na n kpaanɛnɩ. Thɩ̃ khaa gɩ na sobɔr mɛr Thãgba Kɔ̃tɩnɩ ƴɛra.»Tibil there na Thãgba cãa wa lãpho.
11 Thãgba Kɔ̃tɩn bire mɩɩna Mʋɩjɩ a sʋʋraa: 12 «Ɔbɔɔkɛ fa n thernɩ Ɩjɩrayɛl bɩsana fɩ jɩ tɩɩ yʋʋ; wɛr fɛw bɩɛlbɩɛl, ntɛ n 'laanɛ mɛr Thãgba Kɔ̃tɩnna ɔɔ yi birse mũsũ ther bɔɔlera, gɩ do nɔɔ thɩlkɩɩr na lõ anɩ thĩthɩɩna'. 13 Yɛkɛ gɩrɛ wɩrɛ fɛʋʋkɛ na hanɩ thereraale na 'laanɩ: Tɩɩ bɩɛl na 'laarɛ sikilea kuru, kɛ dɔnɩ pa phuu sikile, kɛ n mãkhananɩ gerab kpelẽ. Sikile kuruule wa ti gɩ do mɛr Thãgba Kɔ̃tɩnɩda. 14 Tibil wo tibilikɛ na hanɩ thereraale, a fʋna wɩrɛ hananɩ yɛna kpelẽ a na jʋʋna, wɩ 'laanɛ khaardaakɛ wa tini gɩ do mɛr Thãgba Kɔ̃tɩnɩda. 15 Khaardaalera na 'laanɩ mɛr Thãgba Kɔ̃tɩnna, kɛ dɔnɩ gɩrɛ na birseneni anɩ thɛthɛɛ yi, lẽle na n 'laa gɩ kãasɩ sikile kuruə', bɔdaar dakhaa na n 'laa gɩ ɓɔra'. 16 Tea Ɩjɩrayɛl bɩsanana birse mũsumoolera a pɩɛr mɛr Thãgba cãa wa thɔmana, dɩ mɛ̃ ga do jɩ̃jɩna thɩ̃ɛ mɛr Thãgba Kɔ̃tɩnɩ ƴɛra dɩ Ɩjɩrayɛl bɩsana lɩmɩnɛ awɩ yi birse mũsũ.
Dɩɩrɛ ther sɛ ɓalãga cʋʋrɛra
17 Thãgba Kɔ̃tɩn bire mɩɩna Mʋɩjɩ a so: 18 Cʋɛ ther sɛ ɓalãga, a cʋɛ ɔɔ jəəda na ther sɩɛra oti, gɩ do phɔphʋɔldaa; fɩ thɩɩn mɛr Thãgba cãa waa na bonɩ ji pa thɩ̃thɩɩn, fɩ pɛr ɲʋɔn. 19 Dɩ ga ɲɔ̃ɔlera Aarɔ̃ na ɔɔ bikũusɔ na n cɔcɔɔ ɲɛ̃ɛ na nɛɛ. 20 Ɔbɔɔkɛ wa n lonɩ mɛr Thãgba cãa waw, wɩ cɔcɔɔnɛna gɩ ɲɛ̃ɛ na nɛɛ gɩ do nɔɔ wa khə'. Dɩ mɛna gɩ dakha ɔbɔɔkɛ wa n wɔrɔnɩ bonɩ ji paar wɩ do thɔma, wɩ ji mɛr Thãgba Kɔ̃tɩnna bonɩ thiinə, 21 ga ɲɔ̃ɔlera wa cɔcɔɔna ɲɛ̃ɛ na nɛɛ gɩ do nɔɔ wa khə'. Aarɔ̃ɔ jɔfʋ gɩ khorr vʋ̃ʋ, ɔr na ɔɔ məl wo məlsɔɔra fɛʋʋkɛ na kpaanɛnɩ.
Mɔ̃ wa gbɛbɩnɩ nĩ sãsɩnanɛ na dɔ carã niin
22 Dɩ Thãgba Kɔ̃tɩn bire mɩɩna Mʋɩjɩ wo ayɩ: 23 Gba thɩ̃ɛɛkɛ n hʋnanɩ daw, kɛ bʋɔnɔnɩ a jɔ fɛw, kɛ wɩ n wenɩ mɩɩr*, kɛ wɩ n cʋʋnɩ dɩɩ 'lũ dɩbara kilə yemɔy na thɩ̃ɛɛkɛ n hʋnanɩ daw, kɛ wɩ n wenɩ Sɩnamom*, kilə yeɲɔ na dakuru na thɩ̃ɛɛkɛ n hʋnanɩ daw, kɛ wɩ n wenɩ Kanɛl* kilə yeɲɔ na dakuru, 24 na Thɩ̃ɛɛkɛ n hʋnanɩ daw, kɛ wɩ n wenɩ kasɩ kilə yemɔy, gɩ mãkha na mɩɛ nʋɔɔkɛ wɩ n mɩɛnɩ pa phuurə na olɩvɩ niin litiri maadõ. 25 Gbɛba gɩ a cʋɛ gɩ do nĩ sãsɩna. Cʋɛ gɩ mɔ̃kɛra latɩkolo cʋʋdaraa latɩkolo cʋʋ ƴɛ hanɩ, gɩ do nĩ khaa. 26 Ga nĩilera fa gba a na pɛ mɛr Thãgbaa cãa wara na nɔ bɩɛl ʋlfɛ khɛɛsʋʋraakɛ hananɩ ʋlfɛ thɩmɩɩr, 27 na tabalɩla na ɔɔ thɔ̃ do thɩ̃bisɔɔra fɛw na dɔ carã dɛ̃ɛ paara na ɔɔ thɔ̃ do thɩ̃bisɔɔra na latɩkolo ii bonɩ ji paarra, 28 na bonɩ thiinə bonɩ ji paarra, na ɔɔ thɔ̃ do thɩ̃bisɔɔra fɛw na ther sɛ ɓalãgara na ɔɔ jəədara. 29 Mɛ̃ fa gba thɩ̃beele a na pɛ gɩ mɛr Thãgba ƴɔɔ, dɩ tibil wo tibilikɛ na tha garnɩ ntɛ lɩrɛ. 30 Pɩɛr Aarɔna na ɔɔ bikũusɔɔra niinile, a pɛ wɩ mɛr Thãgba ƴɔɔ, wa n do mar bonɩ jidaar thɔma. 31 Agɩpɩ sɔ Ɩjɩrayɛl bɩsanana ayɛ: Niinikɛ, nĩ sãsɩna gɩ, kɛ dɔnɩ phiphiir niin, nɛrɛ na anɩ məlsɔ wo məlsɔraakɛ na kpaanɛnɩ. 32 Tibil na n gba niinile a thir tomɩra', tibil na n phɛl a ɲaɲaan niin na thɩ̃ ca gɩrɛ wɩ cʋʋnanɩ niinikɛ a cʋʋ ɔ ca ga; nĩ sãsɩna gɩ; nɩ sɛ gar thalera mɔna gɩ hanɩ. 33 Ntɛɛkɛ na phɛlanɩ a na ɲaɲaan niin na thɩ̃ ca gɩrɛ a na cʋʋ, na ntɛɛkɛ na gbaanɩ nĩ caarɩkɛ a na pɛ tɩɩ khɩɩra nɩ hɛllaa ɔɔ too thɩ̃thɩɩn a faa.
Latɩkolo sãsɩnaa cʋʋ
34 Thãgba Kɔ̃tɩn bire so Mʋɩjɩra wo ayɩ: Gba thɩ̃ɛɛkɛ n hʋnanɩ daw a jɔ fɛw, kɛ wɩ n wenɩ sɩtakɩte na onɩsɩ na galbanɔmc, a gbana dakha latɩkolookɛ dɔnɩ dabɔbʋɔ, kɛ dakha n hʋnanɩ daw, gɩ mãkha. 35 Gbɛba gɩ a ɲaɲaanɛ a cʋɛ latɩkolo, mɔ̃kɛ latɩkolo cʋʋdaraa latɩkolo cʋʋ ƴɛ hanɩ. Wɩ pɩɛr laan; thɩ̃ phuu gɩ, kɛ n sãasɩnɛnɩ. 36 Nana ɩkha gbe gɩ do daɓurore fɩ thɩɩn Thãgba cãa waw, nɔ bɩɛl ʋlfɛ khɛɛsʋ ƴɛbʋrɔ, kɛ hananɩ ʋlfɛ thɩmɩɩr, kana ma n caana fɩnɩ. Nɩ gba gɩ, gɩ do nar thɩ̃ sãasɩnanɛ na sobɔr. 37 Latɩkolo caarɩkɛra fa cʋʋnɩ, na n phɛl a ɲaɲaan ga cara a cʋʋ gɩ do anɩ thɛthɛɛda ga. Nɩ gba gɩ, gɩ do nar thɩ̃ sãasɩnanɛ na sobɔr, kɛ dɔnɩ mɛr Thãgba Kɔ̃tɩnɩda. 38 Ntɛɛkɛ na phɛlanɩ a na cʋʋ latɩkolo caarɩkɛ hɔnɩ kha na gɩrɛ, a na n nɩ da hʋnɛ, nɩ hɛlaa ɔɔ too thɩ̃thɩɩn a faa.»