Dɩɩrɛ bonɩ jidaar pɛ thɩmɩɩra
29
1 «Yɛkɛ mɔ̃ fa cʋʋnɩ sɩ fɩ lee Aarɔ̃ na ɔɔ bikũusɔ kpɩɩ, wa n do mar bonɩ jidaar thɔma. Hanana nake ɓolʋ bɩɛl, a hanana banakena yeɲɔ, kɛ na hananɩ taana'. 2 Gba dakha bile mɩ̃ phuu a cʋɛ buruukɛ na hananɩ tabɩɩra', na gatookɛ wɩ gbʋrnanɩ niin sɩ tabɩɩr na hara', na gatookɛ hɔnɩ daƴʋɔ̃ kɛ na hananɩ tabɩɩra' kɛ wɩ jajalalɔnɩ niin. 3 Pɩɛr gɛr fɛw kpɛ̃kpɛrɛ̃ bɩɛlla a ɛna na kpɛ̃kpɛrɛɛna, a 'laana dakha nake ɓolʋʋle na banakena yeɲɔɔle. 4 Kpa Aarɔ̃ na ɔɔ bikũusɔ a danana mɛr Thãgba cãa wa lõfonʋɔra a hɔ wɩ ɲʋɔn. 5 Agɩpɩ fɩ gba kẽkenana fɩ to Aarɔ̃; tʋɔnɛɛ gbɔɔlɔ̃, a tʋɔnɛɛ gbɔɔlɔ̃ bir ʋrɛ wa tonɩ efoodɩ a na dɛɛnɔ̃, a tʋɔnɛɛ efoodɩ, a tʋɔnɛɛ kũkũ tʋʋ, a khɩmanaa efoodɩ khɩmɩdaa. 6 Agɩpɩ fɩ parʋʋ yʋ pardaa yʋɔ, sɩ fɩ gba jala khaa fɩ ma yʋ pardaarara. 7 Agɩpɩ fɩ gba nĩ sãsɩnanɛ fɩ deeraa yʋɔ, fɩ pɩɛ mɛr Thãgba ƴɔɔ. 8 Agɩpɩ fɩ kpa ɔɔ bikũusɔ wɩ pɔ fɩ to wɩ gbɔɔlɔ̃sɔ. 9 Agɩpɩ khɩma Aarɔ̃ na ɔɔ bikũusɔɔra pel khɩmɩdaa, a subə wɩ bãfɩlasɔ. Dɩ mɛ̃ wa hɩ̃ bonɩ jidaar thɔma khorr wa n cʋʋ gɩ the jɔfʋraakɛ hanɩle waa khorr. Thale fa pɛr Aarɔ̃ na ɔɔ bikũusɔra bonɩ jidaar thɔma. 10 Agɩpɩ pɔna nakɩɩrɩle mɛr Thãgba cãa wa lõfonʋɔra, Aarɔ̃ na ɔɔ bikũusɔ n gba awɩ ɲɛ̃ wɩ dɛ̃ɛ nakɩɩrɩlee yʋɔ, 11 sɩ fɩ kʋ nakɩɩrra mɛr Thãgba Kɔ̃tɩnɩ ƴɛbʋrɔ mɛr Thãgba cãa wa lõfonʋɔra. 12 Agɩpɩ fɩ ɓɛ nakɩɩrɩ tɔmɩna na afɩ ɲɔ̃bi fɩ pɛ bonɩ ji pa ʋmana, sɩ fɩ deer tɔmɩn gɩrɛ sɛnɩ fɛw bonɩ ji pa jəədaara; 13 sɩ fɩ gba niinikɛ fɛw n thenɩ bɩ̃daa thɩɛna na phəphələəkɛ n theni haara na tẽbe yeɲɔ fɛw na agɩ nĩikɛ n the garnɩ fɩ thii gɩ bonɩ ji paara ƴũu. 14 Sɩ nakɩɩrɩ nʋ̃ wer na lʋʋ na pɩba; gba gɩ jɛw a thɛna thiə dɔɔra le khuirə. Gɛr dʋɔn so hɛl bonɩɛ. 15 Agɩpɩ fɩ pɔna banake bɩɛl Aarɔ̃ na ɔɔ bikũusɔ n dɛ̃ɛ awɩ ɲɛ̃ banakɩɩrɩlee yʋɔ; 16 Sɩ fɩ kʋ banakɩɩrra; fɩ gba tɔmɩn fɩ deer bonɩ ji pa gɛlɔ gɛlɔ fɩ finə. 17 Agɩpɩ fɩ kuur banakɩɩrra, fɩ cɔcɔɔ bɩ̃daa thɩ̃ɛ na nɛgbalãsɔ fɩ pɛ nʋ̃ kuurnənəəle na yʋʋra; 18 fɩ thii banakɩɩrra fɛw bonɩ ji paara ƴũu. Gɛr dʋɔn bonɩ biləni thiinə mɛr Thãgba Kɔ̃tɩnna; dɔɔra wɩ n thii gɩ dɩ ga n hʋ̃ mɛr Thãgba Kɔ̃tɩn daw. 19 Agɩpɩ fɩ pɔna balaɲɔ banakɩɩrɩle, Aarɔ̃ na ɔɔ bikũusɔ n dɛ̃ɛ awɩ ɲɛ̃ banakɩɩrɩlee yʋɔ, 20 sɩ fɩ kʋ banakɩɩrra, fɩ ɓɛ ɔɔ tɔmɩn fɩ pɛ Aarɔ̃ɔ ɲɔ̃bɔ nũ fara na ɔɔ bikũusɔɔ ɲɔ̃bɔ nũ fasɔɔra na awɩ ɲɔ̃bɔ ɲɛ̃bi kposɔɔra na awɩ ɲɔ̃bɔ nɛbi kposɔɔra, sɩ fɩ deer tɔmɩna bonɩ ji pa gɛlɔ gɛlɔ fɩ finə. 21 Agɩpɩ fɩ gba tɔmɩnɩkɛ hanɩ bonɩ ji paara ƴũu na nĩ sãsɩna fɩ jɛbɩ Aarɔ̃ na ɔɔ kẽkẽsɔɔra, fɩ jɛbɩna ɔɔ bikũusɔɔra na awɩ kẽkẽsɔɔra. Dɩ thale fa pɛr Aarɔ̃ na ɔɔ bikũusɔ na awɩ kẽkẽsɔ fɛw mɛr Thãgba ƴɔɔ. 22 Agɩpɩ fɩ gba banakɩɩrɩkee nĩ na sʋʋ na nĩ gɩrɛ n theni bɩ̃daar thɩɛna na phəphələəkɛ n theni haara, na tẽbe yeɲɔ fɛw na niinikɛ n the garnɩ na ɲɔ̃bɔ nɔ huure; gɛr dʋɔn bonɩ jidaar pɛ banakɩɩr. 23 Te dakha buru bɩɛl kpɛ̃kpɛrɛ̃ birəəkɛ wɩ pɛrnɩ buruukɛ wa pɛrnɩ tabɩɩra', kɛ hanɩ mɛr Thãgba Kɔ̃tɩnɩ ƴɛbʋrɔ na nĩ gato bɩɛl na gatookɛ hɔnɩ daƴʋ̃ɔɔ bɩɛl. 24 Gba gelela fɛw a pɩɛr Aarɔ̃ɔ ɲɔ̃kɔɔ na ɔɔ bikũusɔɔ ɲɔ̃kɔɔ a cʋɛɛ a jɛna mɛr Thãgba Kɔ̃tɩnɩ ƴɛbʋrɔ. 25 Agɩpɩ fɩ tee gɩ awɩ ɲɛna fɩ thii bonɩ ji paara ƴũu, bonɩ thiinənə ƴũu. Gɛr dʋɔn bonɩ thiinə mɛr Thãgba Kɔ̃tɩnɩ ƴɛra; dɩ ga n hʋ̃ mɛr Thãgba Kɔ̃tɩn daw. 26 Agɩpɩ, bonɩ jidaar pɛ banakɩɩrɩle Aarɔ̃ jinəni bonɩɛra, gba kũkune a jɛna mɛr Thãgba Kɔ̃tɩnɩ ƴɛbʋrɔ, agɩpɩ gɩ do afɩda. 27 Gba kũkuneelera wɩ jɛnanɩ na nɔ huureekɛ wɩ kɔɔ tini gɩ do mɛr Thãgba Kɔ̃tɩnɩda, gɩdonɩ Aarɔ̃ na ɔɔ bikũusɔɔ bonɩ jidaar pɛ banakera wɩ kɔɔ ti gɩ. 28 Paarsɔɔle Aarɔ̃ na ɔɔ bikũusɔ hɩna. Jɔfʋ gɩ khorr a hale Ɩjɩrayɛl bɩsanana; Gɛr gɩ Ɩjɩrayɛl bɩsanaa 'likha bonɩsɔraakɛ wa n jini, wa tire paarsɔɔle dɩ ga do mɛr Thãgba Kɔ̃tɩnɩda. 29 Ado Aarɔ̃ na hala', ɔɔ kẽkẽ sãasɩnasɔ, ɔɔ məlsɔ hɩna a na to wireekɛ wa pɛ warnɩ niin dɩ wa lõ bonɩ jidaar thɔmana. 30 Aarɔ̃ɔ məl ʋrɛ na deaanɩ bonɩ jidaar thɔmana, na hɩna ɔɔ kẽkẽsɔ a na to wire makoɲɔ ɔbɔɔkɛ a na lonɩ mɛr Thãgba cãa waw a na n dona thɔma pa phuurə. 31 Banake ʋrɛ wɩ pɛnanɩ bonɩ jidaar ɔɔ thɔna, gba ɔɔ nʋ̃ a thɩa pa phuurə. 32 Aarɔ̃ na ɔɔ bikũusɔ n khɔ banake nʋʋnɩle mɛr Thãgba cãa wa lõfonʋɔra na buruukɛ hanɩ kpɛ̃kpɛrɛ̃ biro. 33 Wɛr dɩbara na khɔ gɩrɛɛkɛra hɛlanɩ awɩ sopuusɔ, ɔbɔɔkɛ wɩ pɛ warnɩ bonɩ jidaar dʋʋra, a thɩɩn wɩ kpɩɩ mɛr Thãgba Kɔ̃tɩnɩ thɩɩn: Tɩɩ khɩɩ bɩɛlakɛ na n kho ga; gɩdonɩ thɩ̃ khaa gɩ. 34 Ado bonɩ jidaar pɛ bonɩ ji nʋʋnɩlera na buruule sɩ a dã duuro, nɩ thiə gɩ dɔɔra; wa n kho gɩ bã, gɩdonɩ thɩ̃ khaa gɩ. 35 Jɔfʋsɔɔkɛ mɩ ha fɩnɩ Aarɔ̃ na ɔɔ bikũusɔɔdara, cʋɛ otirə. Cʋɛ wɩ awɩ bonɩ jidaar pɛ sãasɩ thɔ̃sɔɔle a cʋɛna wire makoɲɔ. 36 Wire wo wire nake bɩɛl fa kʋ a na jinə bonɩɛ sopuurə a na hɛlna sopuu. Dɩ thale fa phʋɔl bonɩ ji paar na so hɛl bonɩɛɛle, sɩ fɩ pɩɛraa niin, fɩ pɩɛ mɛr Thãgba ƴɔɔ. 37 Na cʋɛ phɔphʋɔl thɔmaalera bonɩ ji paara wire wo wire a cʋɛna wire makoɲɔ; a thɩnɛɛ kpɩɩ mɛr Thãgba Kɔ̃tɩnɩ thɩɩn; bonɩ ji paarɩle n jɩɩ phu bɔɔbɔɔbɔɔ; a thɩ̃doo tharɔ, ɔr dakha lɩrɛ.Wire fɛʋʋ bonɩ ji
38 Yɛkɛ gɩrɛ fa n jinənɩ bonɩɛ wire wo wire bɔɔ khorr bonɩ ji paara ƴũu: bana ɓola yeɲɔ, kɛ hananɩ yɛ bɩɛlbɩɛl. 39 Duuro, jenə bana ɓol bɩɛl, dʋɔr birə bɔɔ fɩ jinə bɩɛl. 40 Caca bana ɓolʋʋle, fa jinəne thɩ̃ bi bonɩɛ, mɩ̃ phuu kilə yẽther kɛ wa gbʋrnanɩ olɩvɩ nĩ tɛnanɛ bɔɔbɔɔ litiri bɩɛl na dakuru, na dɩvɛ̃ bonɩɛ, dɩvɛ̃ litiri bɩɛl na dakuru. 41 Balaɲɔ bana ɓolʋʋle dʋɔnɩ dʋɔr birədaa, mɛna fa jinə bonɩ ca bɩɛlla, kɛ dʋɔnɩ thɩ̃ bi bonɩɛ na dɩvɛ̃ bonɩɛ mɔna duurdaa hanɩ. Bonɩɛ gɩɩkɛ fa thiini dɔɔra ga n hʋ̃ mɛr Thãgba Kɔ̃tɩn daw. 42 Bonɩ thiinə gɩ, kɛ na n jini bɔɔ fɛw mɛr Thãgba cãa wa lõfonʋɔra mɛr Thãgba Kɔ̃tɩnɩ ƴɛra, nɛrɛ na anɩ məlsɔɔkɛ na n kpaanɛnɩ khorr vʋ̃ʋ. Liir ma n caana nɩ, ma n mɩɩna fɩ. 43 Liir ma n caana Ɩjɩrayɛl bɩsana, dɩ ɩ̃ i dʋbɩ na cʋʋrɛ paarra dɩ ga phu. 44 Ma cʋʋrɛ mɛr Thãgba cãa waa na bonɩ ji paar dɩ ga phu. Ma leere Aarɔ̃ na ɔɔ bikũusɔ kpɩɩ a na thɩɩn mɛr Thãgba Kɔ̃tɩnɩ thɩɩn wa n do mar bonɩ jidaar thɔma. 45 Ma toore Ɩjɩrayɛl bɩsanaa thɩ̃thɩɩn a na do awɩ Thãgba. 46 Dɩ mɛ̃ wa jɩ mɛr dʋɔn Thãgba Kɔ̃tɩn awɩ Thãgba, kɛ kɔɔ te wɩnɩ Ejipiti dɩɩra, ɩ̃ too awɩ thɩ̃thɩɩn. Mɛr dʋɔn Thãgba Kɔ̃tɩn awɩ Thãgba.»