THƖƖRƐ 28

Dɩɩrɛ bonɩ jidaar kẽkẽ lɩɩra

1 «Sɩ fɛr Mʋɩjɩ, kpa afɩ õkuun Aarɔ̃ a pɔna, ɔr na ɔɔ bikũusɔ, Nadabɩ na Abɩhu na Eleajaar na Ɩtamaar Ɩjɩrayɛl bɩsanaa thɩ̃thɩɩn, a lea Aarɔ̃ kpɩɩ a puno a na n do mar bonɩ jidaar thɔma. 2 Lɛ bonɩ jɩdaar kẽkena gɩ do afɩ õkuun Aarɔ̃ɔda, gɩ nɩna ɔɔ kɔ̃tɩ̃ do na cʋʋrɩkɛ teanaanɩ. 3 Mɩana wɩrɛ dɔnɩ ɲɛ̃ thɔ̃ jɩna fɛw, kɛ dɔnɩ wɩrɛ mɩ hanɩ kpɛsɛ thui, wɩ le Aarɔ̃ɔ kẽkẽsɔ, kɛ wa pɛnaanɩ mɛr Thãgba ƴɔɔ, a puno a na n dona mar bonɩ jidaar thɔma. 4 Yɛ gɩrɛ dɔnɩ kẽkẽ caarsɔɔkɛra wa lenɩ; gɛr ha gɩrɛ: kũkũ tʋʋ na efoodɩ na gbɔɔlɔ̃ bir, na gbɔɔlɔ̃, kɛ wa ɓolnɩ ɓoldaar a na pɛr, na yʋ pardaa na pel khɩmɩdaa. Wɩ lɛ bonɩ jidaar kẽkenaale gɩ do afɩ õkuun Aarɔ̃ɔda na ɔɔ bikũusɔɔda, wa n dona mar bonɩ jidaar thɔma.

5 Wɩ lɛna dɛ kẽkẽ wiir na kẽkẽ wi sɛna khala khala na dasɛ bɔy kpakpakpa na dasɛ birə himə himə na lɛ̃ bɔy.

Dɩɩrɛ efoodɩ lɩɩra

6 Ɲɛ̃ thɔ̃ jɩna n lɛ efoodɩ na lɛ̃ kẽkẽ wi sɛna khala khala na dasɛ bɔy kpakpakpa na dasɛ birə himə himə na dɛ kẽkẽ wiir. 7 Wɩ lɛ thɩ̃ɛ yeɲɔ ɲɛ̃gbɛgbɛlala gɩ do efoodɩ todaa, gɩ fʋ ɔɔ yʋ yeɲɔ gɩ cãa. 8 Wɩ lɛ ɔɔ khɩmɩda na thɩ̃ ca bɩɛla, kɛ dʋɔnɩ lɛ̃ bɔy na lɛn kẽkẽ wi sɛna khala khala na dasɛ bɔy kpakpakpa na dasɛ birə himə himə na dɛ kẽkẽ wiir. Wɩ lɩɛnɛɛ a mana efoodɩɩ thɛthɛra gɩ do bɩɛl. 9 Gba boka ɓɔnaakɛ wɩ n wenɩ onɩsɩ yeɲɔ a cɛ Ɩjɩrayɛl bɩsanaa isɔ a pɩɛr. 10 Awɩ isɔ, maadõ n hana boka bɩɛlla, ie maadõokɛ sɛnɩ n ha ʋ̃ʋ bokara mɔ̃kɛra wɩ kpanɩ kha kʋɔna. 11 Cɛ Ɩjɩrayɛl bɩsanaa isɔ bokana yeɲɔraale mɔ̃ boka thela n cʋʋnɩ, gɩ ho mɔ̃ wɩ n cɩnɩ ire jẽ dʋdaara, a gba gɩ a bɛɛrɛ boka tʋʋraakɛ dʋɔnɩ dɛdaa. 12 Gba bokana yeɲɔɔlera a tɔ efoodɩ bãkɩɩnʋna ɲɛ̃gbɛgbɛlala gɩ do Ɩjɩrayɛl bɩsanaa jɩ̃jɩna bokasɔ, dɩ mɛ̃ Aarɔ̃ na n to awɩ isɔ ɔɔ ɲɛ̃gbɛgbɛlsɔra a na n lona mɛr Thãgba Kɔ̃tɩnɩ ƴɛra ma n jɩna wɩ. 13 Cʋɛ boka tʋʋsɔɔra yeɲɔ na dɛ; 14 a cʋɛ dɛ kilə haar a lɛ jɔrkɔ̃ yeɲɔ ɓɩ̃ɩɓɩ̃ɩ gɩ ho pɛ̃ɛ, nɩ fʋna boka tʋʋsɔɔlera.

Dɩɩrɛ mɔ̃ wa lenɩ kũkũ tʋʋ.

15 Lɛ kũkũ tʋʋkɛ wa n jɩnanɩ mɛr Thãgbaa tuur mɔ̃ ɲɛ̃ thɔ̃ jɩna n cʋʋnɩ. Lɩɛnɛɛ na thɩ̃ ca bɩɛlɩkɛra fa lenanɩ efoodɩ na lɛ̃ bɔ kẽkẽ wiir a ɲaana lɛn kẽkẽ wi sɛna khala khala na dasɛ bɔy kpakpakpa na dasɛ birə himə himə na dɛ kẽkẽ wiir efoodɩ khaara. 16 Wɩ gbɛlɛnɛɛ yeɲɔ a ha kpərə̃ kpərə̃ ɔɔ gbã na ɔɔ pɛw n mãkhanɛna ɲɔ̃bi kpo yʋʋ na ɲɔ̃bi buukɛ wɩ lɛɛnɩɩ yʋ. 17 Bɛɛrɛrɔ boka ɓona jɔrɔna yenã. Caca jɔrɔnɛ n hanana boka ɓɔnaakɛ wɩ n wenɩ sardʋan na topaajɩ na emeroodɩ. 18 Bɛɛrɛ balaɲɔ jɔrɔnɛna bokanaakɛ wɩ n wenɩ: ɛsɩkarbukɩ na safɩɩr na dɩamã. 19 Bɛɛrɛ balãther jɔrɔnɛna bokanaakɛ wɩ n wenɩ: opal na agatɩ na ametɩsɩtɩ. 20 Bɛɛrɛ balanã jɔrɔnɛna bokanaakɛ wɩ n wenɩ: Kɩrɩjolɩtɩ na onɩsɩ na jasɩpɩ. Bɛɛrɛ bokanasɔɔle agɩ todara, kɛ dʋɔnɩ dɛdaa. 21 Bokanana n hana yʋɔr yeɲɔ, mɔna Ɩjɩrayɛlɩ bikũusɔ hanɩ. Gɩ hana yʋɔr yeɲɔ a mãkhanɛna awɩ casɔ yʋɔr yeɲɔɔ nɔ. Wɩ cɛ ca i bɩɛl boka bɩɛla mɔ̃ wɩ n cʋʋnɩ jẽ dʋdaara. 22 Lɛ kũkũ tʋʋ jɔrkɔ̃sɔɔra ɓɩ̃ɩɓɩ̃ɩ pɛ̃ khaa na dɛ kile haar. 23 Pheba kũkũ tʋʋ ɓɔ̃ɓɔ̃sɔ yeɲɔ na dɛ; a pɩɛr ɓɔ̃ɓɔna yeɲɔɔle kũkũ tʋʋ khu pa yeɲɔra. 24 Gba dɛ pɛ̃ɛlera a tɔrɔ ɓɔ̃ɓɔna yeɲɔraale hanɩ kũkũ tʋʋ khu pasɔɔra; 25 sɩ a tɔ pɛ̃ mɩ̃ka yeɲɔ gele boka tʋʋ yeɲɔraakɛ hanɩ efoodɩ ɲɛ̃gbɛgbɛl bãkɩɩnʋna na ƴɛkʋʋlɛ. 26 Birə pheba dɛ ɓɔ̃ɓɔna yeɲɔ wo a tɔ kũkũ tʋʋ khu pa yeɲɔra tɩɛr, kɛ dɛɛnɛnɩ efoodɩra. 27 Birə pheba dɛ ɓɔ̃ɓɔ̃ kpɩɩsɔ wo yeɲɔ a tɔ efoodɩ ɲɛ̃gbɛgbɛl bãkɩɩnʋna ƴɛkʋʋlɔ tɩɛr, gɩ khunə cãa paar, efoodɩ khɩmɩdaa yʋɔ. 28 Dɩ mɛ̃ wa fʋ kũkũ tʋʋ ɓɔ̃ɓɔ̃sɔɔle a na linə efoodɩɩ ɓɔ̃ɓɔ̃sɔ na pɔ̃ɔkɛ dɔnɩ dasɩɛ khala khala, dɩ mɛ̃ kũkũ tʋʋle na ha efoodɩ khɩmɩdaa yʋɔ, gɩ do nɔɔ a na n lee kpɩɩ na efooda'. 29 Dɩ thale, ɔbɔɔkɛ Aarɔ̃ na n lonɩ pa phuurə, Ɩjɩrayɛl bɩsanaa isɔɔkɛ wɩ bɛɛrnɩ Thãgbaa tuur jɩ kũkũ tʋʋra a na dɛ̃ɛ ɔɔ hara, mɛr Thãgba Kɔ̃tɩnɩ ƴɛra ma n jɩna wɩ bɔɔ fɛw. 30 Gba thɩ̃ɛɛkɛ wɩ n wenɩ Urɩm na tumɩm a pɩɛr kũkũ tʋʋra, gɩ puno gɩ ha Aarɔ̃ɔ hara ɔbɔɔkɛ a na n lonɩ mɛr Thãgba Kɔ̃tɩnɩ ƴɛra. Dɩ mɛ̃ Aarɔ̃ na gba Ɩjɩrayɛl bɩsanaa so bɔɔ fɛw a pɛr ɔɔ hara, a na n dana mɛr Thãgba Kɔ̃tɩnɩ ƴɔɔ.

Bonɩ jidaraa kẽkẽ kpɩɩsɔ

31 Lɛ gbɔɔlɔ̃ bir ʋrɛ wa tonɩ efoodɩ a na dɛɛnɔ na kẽkẽ wi sɛ haar khala khala dɩbara. 32 Pɩɛr kaar thɩ̃thɩɩna gɩ do yʋ to paar, sa gbɛ a diə kaarara mɔ̃ wɩ n lenɩ lo kẽkẽ fʋɔr, gɩ do nɔɔ gbɔɔlɔ̃ birile na n ɓəərə'. 33 Lɛ thɩ̃ɛ na lɛ̃ bɔ kẽkẽ wiir gɩ ho girenadɩ thɩr sɩɩr, nɩ khi gɩ na dasɛ khala khala na dasɛ bɔy kpakpakpa na dasɛ birə himə himə nɩ thaarɔ gbɔɔlɔ̃ bir nʋɔra nɩ finə, sɩ nɩ toro agɩ thɩ̃thɩɩn dɛ dẽgelẽbe bɩɛlbɩɛl nɩ finə oti; 34 dɛ dẽgelẽbi bɩɛl, girenadɩ sɩɩr bɩɛl; dɛ dẽgelẽbi bɩɛl, girenadɩ sɩɩr bɩɛl a kpalanɛ gbɔɔlɔ̃ bir nʋɔrara fɛw. 35 Dɩ mɛ̃ Aarɔ̃ na to gbɔɔlɔ̃ɔle a na n dona ɔɔ bonɩ ji thɔ̃. Ɔbɔɔkɛ a na n lonɩ pa phuurə mɛr Thãgba Kɔ̃tɩnɩ ƴɛra na ɔbɔɔkɛ a na n theni le, dẽgelẽbeele na n be gɩ do nɔɔ a na khə'.

36 Cʋɛ jala na dɛ kile haar, a cɛ pɩɛr mɔ̃ wɩ n cɩnɩ jẽ dʋdaara ayɛ: Ʋrɛ Thãgba Kɔ̃tɩn hɩnɩ. 37 Gba a ma yʋ pardaara ƴɛbʋrɔ na pɔ̃ sɩɛkɛ hanɩ khala khala. 38 Dɩ thale a na ha Aarɔ̃ɔ kubirə; dɩ mɛ̃ Aarɔ̃ na gba Ɩjɩrayɛl bɩsanaa dɩpasɔɔkɛ wɩ n cʋʋ marnɩ awɩ khaarda bonɩ thɩ̃ ti para, sɩ dɛ jalaale na hale Aarɔ̃ɔ kubirə mɛr Thãgba Kɔ̃tɩnɩ ƴɛra, gɩ do nɔɔ ma n tee wɩ na awɩ khaardasɔ.

39 Lɛ lɛ̃ gbɔɔlɔ̃, a lɛ yʋ pardaa na lɛ̃, a lɛna pel khɩmɩdaa a cʋɛ kẽkẽ lena n ɓol bɔɔbɔɔ wɩ pɛr.

40 Aarɔ̃ɔ bikũusɔ dakha, lɛ awɩ gbɔɔlɔ̃sɔ na awɩ pel khɩmɩdasɔ na awɩ bãfɩlasɔ, gɩ nɩna awɩ kɔ̃tɩ̃ do. 41 Gba kẽkenaalera a tɔ afɩ õkuun Aarɔ̃; ɔr na ɔɔ bikũusɔ; a pɛ war niin yʋɔ a pɛ wɩ bonɩ jidaar dʋʋra, a lea wɩ kpɩɩ wa n do mar bonɩ jidaar thɔma. 42 Lɛ khursisɔ na lɛ̃ kẽkẽ wiir gɩ kɛɛ war sãɓɔlɔna gɩ the isidaara gɩ gbũ gɩ dã nɛ huo. 43 Dɩ mɛ̃ Aarɔ̃ na ɔɔ bikũusɔ na n saa gɩ ɔbɔɔkɛ wa n lonɩ mɛr Thãgba cãa waw, agɩbo ɔbɔɔkɛ wa n wɔrɔnɩ bonɩ ji paar wɩ do awɩ bonɩ ji thɔ̃ pa phuurə. Dɩ thale wa hana dɩɩ a na khiirə. Jɔfʋ gɩ Aarɔna na ɔɔ məlsɔraakɛ na kpaaraanɩ bɔɔ khorr.»