Dɩɩrɛ nʋ̃ thii bonɩ ji pa cʋʋrɛra
27
1 «Cʋɛ nʋ̃ thii bonɩ ji paar na akasɩa thɩrʋ a gbaan a mãkhana mɛtɛrɛ yeɲɔ na dakuru; pɛw n mãkhana mɛtɛrɛ yeɲɔ na dakuru dakha; bonɩ ji paara n hana kpərə̃kpərə̃, bilə fɛw n mãkha, sɩ ɔɔ ƴũu gbã n mãkhana mɛtɛrɛ bɩɛl na dakuru. 2 Cʋɛɛ a hana ʋmã yenã ɔɔ gãgamã yenana. Ɔr na ɔɔ ʋ̃sɔɔra n ma kha na ɔr a dɔ bɩɛl, fɩ calʋʋ ther sɩɛ. 3 Cʋɛ ɔɔ thɔ̃ do thɩ̃bisɔ: Tho tɛdaasɔ na pɛlsɔ na ɔɔ gborbisɔ, kɛ na dʋɔnɩ tɔmɩn jɛbɩdaa na ɔɔ fursɛtɩsɔ na ɔɔ dɔ ti bilẽsisɔ. Cʋɛ ɔɔ thɔ̃ do thɩ̃bisɔɔra fɛw na ther sɩɛ. 4 Cʋɛ aa na ther sɩɛ gɩ ho tɛmɛ̃ fɩ tʋʋraa. Cʋɛ dakha ther sɛ ɓɔ̃ɓɔna yenã a pɩɛr aaraale, ɔɔ gãgã yenana. 5 Tɔrɔ aale tɩɛr na bal ƴɩɛ a jʋʋn a dã bonɩ ji pa jɩ̃jɩɩn. 6 Thela akasɩa thɩr ɓalãɓɔna gɩ do bonɩ ji padaa; fɩ cal gɩ ther sɩɛ. 7 Tɔ ɓalãɓɔnaale ɓɔ̃ɓɔnanaakɛ na hanɩ bonɩ ji pa gɛla yeɲɔra gɩ do gɩrɛ wa n gbanaanɩ. 8 Cʋɛ bonɩ ji paarra na thɩr pɛna; bɩnɔ n do kaar. Cʋɛɛ a ha mɔ̃kɛra mɩ kɔɔ nɩna fɩnɩ gɔ̃gʋɔna ƴũu.Dɩɩrɛ mɔ̃ kẽkẽ wa gbasa na hanɩ.
9 Pɩɛr gbasa a diə mɛr Thãgbaa kẽkẽ warara na lɛ̃ bɔ kẽkẽ gborõbi lenanɛsɔ. Gbasa bil ʋrɛ na eenenɩ ka wire na n jalnɩ dɩ pɛr ɲɔ̃bɩlã, Negɛvɩ billo, gbãʋ n mãkhanɛna mɛtɛrɛ kpalaɲɔ yʋɔr (50). Gɛr dʋɔn caca bil bɩɛlɩda. 10 Gɩ hanana agɩ thɩr gbuunəsɔ kpelẽ na agɩ jəədasɔɔkɛ wa cʋʋnanɩ ther sɩɛ. Sɩ thɩr gbuunəə gãgãsɔ na agɩ kẽkẽ ju ɓalsɔ n dɔ dɛ bulo. 11 Gbasa bil ʋrɛ na eenenɩ ka wire na n jalnɩ dɩ pɛr ɲɔ̃bɔɔ, ɔmɛna gɩ. Gbãʋ n mãkhanɛna mɛtɛrɛ kpalaɲɔ yʋɔr (50), na agɩ lɛ̃ bɔ kẽkẽ gborõbi lenasɔ na agɩ thɩr gbuunəsɔ kpelẽ na agɩ jəədasɔ kpelẽ oti, kɛ wa cʋʋnanɩ ther sɩɛ. Sɩ thɩr gbuunəə gãgãsɔ na agɩ kẽkẽ ju ɓalsɔ n dɔ dɛ bulo. 12 Sɩ kẽkẽ wa gbasaa pɛw, bil ʋrɛ na eenenɩ wi lõ pa billo, pɛw n hana mɛtɛrɛ kpelẽ yemɔɩ, na agɩ lɛ̃ bɔ kẽkẽ gborõbi lenasɔ na agɩ thɩr gbuunəsɔ yʋɔr na agɩ jəədasɔ yʋɔr oti. 13 Sɩ gbasa bil ʋrɛ na eenenɩ wi phã pa bilo kɩrɔ, pɛw n hana mɛtɛrɛ kpelẽ yemɔɩ. 14 Lõfonɔ bil bɩɛlɩ kẽkẽ gborõbi pɛw n hana mɛtɛrɛ makoɲɔ na dakuru, a hanana agɩ thɩr gbuunəsɔ yẽther na agɩ jəədasɔ yẽther oti. 15 Ʋ̃ʋ bil bɩɛlɩ kẽkẽ gborõbi pɛw n hana mɛtɛrɛ makoɲɔ na dakuru a hanana agɩ thɩr gbuunəsɔ yẽther na a gɩ jəədasɔ yẽther oti. 16 Gbasa lõfonʋɔra, pɩɛr lõfonɔ kɩ̃kɩɩn a dã ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ kpelẽ, kɛ wɩ khini na dasɛ khala khala na dasɛ bɔy kpakpakpa na dasɛ birə himə himə na lɛ̃ kẽkẽ wi bɔy, kɛ kẽkẽ lena na ɓolnɩ ɓoldaar bɔɔbɔɔ a na pɛr, gɩ hana agɩ thɩr gbuunəsɔ yenã na agɩ jəədasɔ yenã oti. 17 Thɩr gbuunə ɓibi, kɛ wa kurnənɩ kẽkẽ wa gbasa n hanana agɩ kẽkẽ ju ɓalsɔ na agɩ gãgãsɔɔkɛ wa cʋʋnɩ na dɛ bulo na agɩ jəədasɔɔkɛ wa cʋʋnɩ na ther sɩɛ. 18 Kẽkẽ wa gbasaa gbã biləni n mãkhanɛna ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ tamaa (100), sɩ ɔɔ pɛw n mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã nʋɔ kpalaɲɔ yʋɔr; ɔɔ ƴũu gbã n dã ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yemɔy. Ɔɔ kẽkẽ gborõbisɔ n dɔ lɛ̃ bʋɔ, jəədaasɔ n do ther sɩɛ.
19 Thɔ̃ do thɩ̃be ɓibi, kɛ dɔnɩ mɛr Thãgbaa kẽkẽ wa thɔ̃ dodaa na ɔɔ kpãbisɔ ɓibi na kẽkẽ wa gbasa kpãbii ɓibi, cʋɛ gɩ na ther sɩɛ.
Dɩɩrɛ mɔ̃ wa gbɛbɩnɩ niinikɛ wɩ n pɛnanɩ dɔ carãsɔɔkɛ dɛ̃ɛnɛnɩ dɔ cara dɛ̃ɛ paarra.
20 Fɛr Mʋɩjɩ, sɔ Ɩjɩrayɛl bɩsanana wɩ ha fɩ olɩvɩ nĩ tɛnanɛ, kɛ bʋɔnɔnɩ wɩlwɩlwɩl gɩ do nɔɔ dɔ carãasɔ na n lɩ bɔɔ fɛw. 21 Mɛr Thãgbaa cãa wa bɩnɔ, du vaar kẽkẽ ƴɛbʋrɔ, kɛ phenɩ nɔ bɩɛl ʋlfɛ khɛɛsʋʋkɛ hananɩ nɔ bɩɛl ʋlfɛ thɩmɩɩr, Aarɔ̃ na ɔɔ bikũusɔ na thɩɩn dɔ carã dɛ̃ɛ paarra, gɩ do nɔɔ dɔ carãasɔ na n hɩrɛ mɛr Thãgba Kɔ̃tɩnɩ ƴɛbʋrɔ dʋɔrɔ gɩ dana duuro bɔɔ fɛw. Jɔfʋ gɩ khor Ɩjɩrayɛl bɩsanana na awɩ məl wo məlsɔraakɛ na n kpaanɛnɩ.»