Dɩɩrɛ Thãgbaa kẽkẽ wa thɩ̃bi cʋʋrɛra.
26
1 «Pɩɛr wɩ le mɛr Thãgbaa kẽkẽ wa na kẽkẽ gborõbe yʋɔr na lɛ̃ bɔy, kɛ ɲaɲaananɩ lɛn kẽkẽ wiikɛ wɩ khini na dasɛna khala khala na dasɛ bɔy kpakpakpa, na dasɛ birə himə himə, wɩ bɛbɩ seribɛ̃sɔ mɔ̃ ɲɛ̃ thɔ̃ jɩna n cʋʋnɩ wɩ pɛr. 2 Kẽkẽ gborõbeelee gbã n mãkhanɛna mɛtɛrɛ yʋɔr yenã, sɩ pɛw n ha mɛtɛrɛ yeɲɔ. Mãkha bɩɛla kẽkẽ gborõbesɔɔle fɛw na hana. 3 Kɔɔ coore kẽkẽ gborõbi yemɔy ɓo a bɛba; agɩpɩ fɩ bir fɩ coor kẽkẽ gborõbi yemɔy gɩrɛ sɛnɩ fɩ bɛbɩ. 4 Caca kẽkẽ gborõbi yemɔy gɩrɛ fa coornɩ a na bɛbɩ, pɩɛr pɛ̃ sɛna khala khala pɩpɩɩdaa nɔra; a birə pɩɛr dakha pɩpɩɩ kẽkẽ gborõbi yemɔy gele sɛnɩ kɛ fa coornɩ a na bɛbɩ, cacadaa nɔra pɛ̃ sɛna khala khala oti. 5 Pɩɛr pɛ̃ɛ kpalaɲɔ yʋɔr caca kẽkẽ gborõbe yemɔɩraale fa coornɩ a na bɛbɩ pɩpɩɩdaa nɔra, a birə pɩɛr pɛ̃ɛ kpalaɲɔ yʋɔr kẽkẽ gborõbi yemɔy gelera sɛnɩ, kɛ fa coornɩ a na bɛbɩ cacadaa nɔra oti. Nʋɔ yeɲɔɔ pɛ̃ɛsɔɔle n telene kha oti dẽdẽ. 6 Cʋɛ fʋdaa kpalaɲɔ yʋɔr na dɛ a fɔna kẽkẽ gborõbeele fa coornɩ yemɔy yemɔy a na bɛbɩ, dɩ mɛ̃ mɛr Thãgbaa kẽkẽ wara na coor kha a na do bɩɛl.7 Lɛ kẽkẽ gborõbi kpɩɩsɔ wo yʋɔr bɩɛl na bʋ suune kɛ wa thini mɛr Thãgbaa kẽkẽ wa thiirə ƴũu. 8 Kẽkẽ gborõbi bɩɛlɩ gbã na har ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã kpelẽ yʋɔr, sɩ pɛw n ha ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yenã. Mãkha bɩɛla gɛr yʋɔr bɩɛlɩle na hana. 9 Kɔɔ coore cacara kẽkẽ gborõbe yemɔy a bɛba, sa birə coore kẽkẽ gborõbe maadõole sɛnɩ a bɛba; maadõdaale n thi kẽkẽ wa ƴɛbʋrɔ. 10 Pɩɛr pɛ̃ɛ kpalaɲɔ yʋɔr caca kẽkẽ gborõbe yemɔɩraale fa coornɩ a na bɛbɩ pɩpɩɩdaa nɔra; a birə pɩɛr pɛ̃ɛ kpalaɲɔ yʋɔr kẽkẽ gborõbi maadõ gelera sɛnɩ, kɛ fa coornɩ a na bɛbɩ cacadaa nɔra. 11 Cʋɛ fʋdaa kpalaɲɔ yʋɔr na ther sɩɛ, gɩ 'loor kha na pɛ̃ɛsɔɔle; gɩ do nɔɔ mɛr Thãgbaa kẽkẽ wa thiirə n coor kha gɩ do bɩɛl. 12 Sɩ kẽkẽ wa thidaalera kɛ dɔnɩ kẽkẽ gborõbe kɛ wa coornɩ, kɛ na kɛanɩ kẽkẽ waara ƴũu, dɔ agɩ pɛʋra dakuru n hale kɛ na dɛbarɔnɩ a na kãasɩ kẽkẽ waa gbana, gɩ do nɔɔ gɩ bel gɩ thi mɛr Thãgbaa kẽkẽ wa sɩkaara. 13 Mɛna gɩ na bil gɩrɛ dʋɔnɩ dagbã paar, gɩrɛ gbaanɛnɩ a dɛbɩrɔ, dakuru na har ʋ̃ʋ bilo, dakuru ʋ̃ʋ bilo; gɩ do nɔɔ gɩ thi mɛr Thãgbaa kẽkẽ wa gɛlʋla bɔɔbɔɔ.
14 Agɩpɩ cʋɛ banake lʋʋsɔɔkɛ wɩ khini na dasɩɛ a dɛba ʋrɛra theni mɛr Thãgbaa kẽkẽ wara sa gba dofɛ̃ lʋʋsɔ a thero ƴũu.
15 Kpaanɛ akasɩa thɩr pɛna gɩ do mɛr Thãgbaa kẽkẽ wa thɩr gbuunə. 16 Thɩr pɛnaale, bɩɛlɩ gbãa n mãkhanɛna mɛtɛrɛ yemɔy, sɩ pɛw n mãkhana mɛtɛrɛ kuru na gbe. 17 Thɩr pɛnaale, dɔ fɛw bɩɛlbɩɛl n hana ɲɩma yeɲɔ yeɲɔ gɩ mãkha wɛrɛ. Dɩ mɛna fa cʋʋna mɛr Thãgbaa kẽkẽ wa thɩr pɛnana fɛw. 18 Kpaanɛ mɛr Thãgba kẽkẽ wa thɩr pɛnana be kpelẽ, gɩ do gɛl bɩɛlɩda, kɛ hanɩ Negɛvɩ bilo, ka wire na n jalnɩ dɩ pɛr ɲɔ̃bɩlã. 19 Pheba dɛ bulo a cʋɛ jəədaa kpalaɲɔ, gɩ do thɩr pɛnaalee jəəda; jəədaa yeɲɔ n do thɩr bɩɛlɩda, ka ɔɔ ɲɩ̃ yeɲɔɔle na lonɩ. 20 Mɛna gɩ dakha na kẽkẽ wa gɛl ʋrɛ hanɩ ka wire na n jalnɩ dɩ pɛr ɲɔ̃bɔɔ; a na hananɛ thɩr pɛna kpelẽ, 21 na agɩ jəədasɔ kpalaɲɔ, kɛ wa cʋʋnanɩ dɛ bulo; jəədaa yeɲɔ n do thɩr bɩɛlɩda, ka ɔɔ ɲɩ̃ yeɲɔɔle na lonɩ. 22 Kẽkẽ wa sɩkaara, ka eenenɩ wi lõ paar, kpaanɛ ɔɔda, thɩr pɛna maadõ. 23 Dɩ kẽkẽ wa sɩkaara, kɛr paar yeɲɔra, kpaanɛ thɩr pɛna yeɲɔ a pɩɛr. 24 Dɔ gɩ ma kha kɩrarɔ gɩ dana ƴũu, ɓɔ̃ɓɔ̃ bɩɛl n fʋ gɩ yʋɔ bɔɔbɔɔ; gɛr yeɲɔɔle fɛw hanɩ kɛr paar yeɲɔra, cʋɛ gɩ ɔmɛna. 25 Gɛr fɛw n gbɛbɩ thale gɩ ha thɩr pɛna makõther na agɩ jəədasɔɔkɛ wa cʋʋnɩ na dɛ bulo; jəədaa yʋɔr maadõ gɩ, yeɲɔ n do thɩr bɩɛlɩda. 26 Thela akasɩa ɓal gbana yemɔy gɩ do mɛr Thãgbaa kẽkẽ wa gɛl bɩɛlɩda; 27 a birə thela ɓal gbana yemɔy wo, gɩ do ʋ̃ʋ gɛl bɩɛlɩda; a thela ɓal gbana yemɔy, gɩ do mɛr Thãgbaa kẽkẽ wa sɩkadaa, ka eenenɩ wi lõ paar. 28 Sɩ ʋrɛ dʋɔnɩ thɩ̃thɩ̃ ɓal gbãakɛ na thʋɔnɩ thɩr pɛnaa bɩnɔ thɩ̃thɩɩn, dɔ a the ʋ̃ʋ khu pa a jal a thʋ ʋ̃ʋ khu pa. 29 Cala thɩr pɛnaale dɛ a calana ɓal gbanaale dɛ, sa cʋɛ ɓɔ̃ɓɔnaakɛ ɓal gbanaale na lononɩ na dɛ.
30 Agɩpɩ fɩ dʋ mɛr Thãgba kẽkẽ wara mɔ̃ kherereekɛ mɩ nɩna fɩnɩ gɔ̃gʋɔna ƴũu hanɩ.
31 Ɲɛ̃ thɔ jɩna n lɛ du vaar kɩ̃kɩɩn na lɛ̃ bɔy, kɛ ɲaɲaananɩ lɛn kẽkẽ wiikɛ wɩ khini na dasɛ khala khala na dasɛ bɔy kpakpakpa na dasɛ birə himə himə, kɛ wa bɛbɩnɩ seribɛ̃sɔ a na maarɔ. 32 Jo gɩ gãgamã yenanaakɛ wa cʋʋnanɩ dɛ, kɛ na hanɩ akasɩa thɩr gbuunə yenanaakɛ wa calnɩ dɛ, a na jəə gɩ jəəda yenanaakɛ wa cʋʋnanɩ dɛ bulo. 33 Jo du vaar kɩ̃kɩɩnɩle fʋdaasɔɔ balɔ. Dɩ le du vaar kẽkẽ biloole fa thɩɩn nɔ bɩɛl ʋlfɛ khɛɛsʋʋkɛ hananɩ ʋlfɛ thɩmɩɩr. Dɩ du vaar kɩ̃kɩɩnɩle na dɔ varʋ a na lee pa phuu kpɩɩ na sãasɩ pa phuu. 34 Gba ʋlfɛ khɛɛsʋ thiri, kɛ dɔnɩ so hɛl paar a dɛɛnɛ nɔ bɩɛl ʋlfɛ khɛɛsʋʋra ƴũu kɛ hananɩ ʋlfɛ thɩmɩɩr, kɛ hanɩ le sãasɩ pa phuurə, 35 a thɩnɛ tabalɩ pa phuurə, du vaar kẽkẽ ƴɛbʋrɔ, kẽkẽ wa ɲɔ̃bɔ bilo, a thɩnɛ dɔ carã dɛ̃ɛ paar tabalɩɩ ƴɛra, kẽkẽ wa ɲɔ̃bɩlã billo.