MƲƖJƖ 'LƐR JƆFƲ MƆ̃ A NA CƲƲNƖ THÃGBAA KẼKẼ WA THƖ̃BISƆ.
Ɩjɩrayɛl bɩsana 'laarɛ bɩ̃ bulo khaardaa wɩ cʋɛna Thãgbaa kẽkẽ wa thɩ̃bi.
25
1 Thãgba Kɔ̃tɩn sor Mʋɩjɩra ayɩwɔɔ: 2 «Mɩana Ɩjɩrayɛl bɩsana a sɔ war wɩ te khaardaa a ha mɩ. Nɩ tea khaardaalera tibiləəkɛ 'laanɛ gɩnɩ na ha bʋɔ. 3 Nɩ yɛ gɩrɛ dʋɔnɩ khaardaakɛra na tee warnɩ; gɛr dʋɔn: dɛ, na dɛ bulona, na ther sɛna 4 na kẽkẽ gborõbi sɛna khala khala na dasɛ bɔy kpakpakpa na dasɛ birə himə himə na lɛ̃ kẽkẽ wi bɔy na bʋ suune; 5 na banake lʋʋsɔɔkɛ wɩ khini na dasɩɛ na dofɛ̃a lʋʋsɔ na akasɩa thɩra, 6 na dɔ carã niin na thɩ̃ɛɛkɛ n hʋnanɩ daw, kɛ wa gbɛbɩnanɩ nĩ sãsɩnanɛ na latɩkolookɛ n hʋnanɩ daw, 7 na bokanaakɛ wɩ n wenɩ onɩsɩ, na boka ɓɔ̃ kpɩɩsɔɔkɛ wa bɛɛrnanɩ efoodɩ na kũkũ tʋʋ. 8 Ɩjɩrayɛl bɩsana n dɔ mɛr Thãgbaa wa a ha mɩ, dɩ mɛ̃ ma too awɩ thɩ̃thɩɩn. 9 Dɔ mɛr Thãgbaa kẽkẽ wara gɩ ho kha na ɔɔ khere; a cʋɛna ɔɔ thɩ̃bisɔ fɛw gɩ ho kha na agɩ cʋʋ ƴɛ, mɔ̃kɛra ma nɩna fɩnɩ.Dɩɩrɛ nɔ bɩɛl ʋlfɛ khɛɛsʋ cʋʋrɛra
10 Cʋɛ nɔ bɩɛl ʋlfɛ khɛɛsʋʋ na akasɩa thɩrʋ. Ɔɔ gbã n ha mɛtɛrɛ bɩɛl na dakuru, ɔɔ pɛw n ha mɛtɛrɛ kuruu na gbe, ɔɔ ƴũu gbã n ha mɛtɛrɛ kuruu na gbe. 11 Calaa dɛ kile haar koo bɩnɔ na khiru fɛw, sa pɩɛr gbẽgber nʋɔra na dɛ a fenə. 12 Pheba dɛ ɓɔ̃ɓɔna yenãakɛ na pɛnɩ ɔɔ gãgãsɔ yenana, ɓɔ̃ɓɔna yeɲɔ gɛl bɩɛla, ɓɔ̃ɓɔna yeɲɔ ʋ̃ʋ gɛla. 13 Thela dakha akasɩa thɩr ɓalãɓɔna a cala gɩ dɛ. 14 Tɔrɔ ɓalãɓɔnaalera ɓɔ̃ɓɔnanaakɛ hanɩ nɔ bɩɛl ʋlfɛ khɛɛsʋ gɛlala, gɩ do ʋlfɛ khɛɛsʋ gbadaa. 15 Dɩ ɓalãɓɔnaale na toore le khor ɓɔ̃ɓɔnanaale ga n bir a tiir bã. 16 Dɩ nɔ bɩɛl ʋlfɛ thɩmɩɩrɩkɛ ma ha fɩnɩ, le fa pɛr ʋlfɛ khɛɛsʋʋlee bɩnɔ. 17 Cʋɛ ʋlfɛ khɛɛsʋ thire kɛ dɔnɩ so hɛl paar na dɛ kile haar koo. Ɔɔ gbã n mãkhanɛna ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yeɲɔ na dakuru, ɔɔ pɛw n mãkhana ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl na dakuru. 18 Cʋɛ seribɛ̃b yeɲɔ na dɛ a pɩɛr so hɛl paarɩ khu pasɔɔra yeɲɔ. Cʋɛ wɩ na dɛɛkɛ wɩ benɩ. 19 Seribɛ̃ bɩɛl n hana khu pa bɩɛla, Seribɛ̃ bɩɛl n ha ʋ̃ʋ khu para, khu paar yeɲɔrara. Cʋɛ Seribɛ̃sɔɔra a mana so hɛl paarra. 20 Awɩ gbɛlsɔ n 'laanɛ ƴũu a kɛɛnɛ so hɛl paar; wɩ pɛ kha ƴɩɛ dẽdẽdẽ, sɩ awɩ ƴɛsɔ n gʋɛ ga n hɩɩn so hɛl paar. 21 Gba ʋlfɛ khɛɛsʋ thireelera, kɛ dɔnɩ so hɛl paar a dɛɛnɛ ʋlfɛ khɛɛsʋʋra ƴũu, sɩ nɔ bɩɛl ʋlfɛ thɩmɩɩrɩkɛ ma ha fɩnɩ n ha ʋlfɛ khɛɛsʋʋ bɩnɔ. 22 So hɛl paaraale ƴũu ma n caana fɩ, seribɛ̃ yeɲɔɔlee thɩ̃thɩɩn, kɛ na hanɩ ʋlfɛ khɛɛsʋʋraale ƴũu. Liir ma n mɩɩna fɩ, ɩ̃ ha fɩ ɩ̃ jɔfʋsɔ fɩ ha Ɩjɩrayɛl bɩsana.
Dɩɩrɛ Thãgba buru tabalɩ cʋʋrɛra
23 Cʋɛ tabalɩ na akasɩa thɩrʋ. Ɔɔ gbã n mãkhanɛna ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã yeɲɔ, ɔɔ pɛw n dã ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl, ɔɔ ƴũu gbã n dã ɲɔ̃kpalãbuu a dana thɩ̃thɩ̃ ɲɔ̃bi yʋʋ gbã bɩɛl na dakuru. 24 Calaa dɛ kile haar koo, sa pɩɛr gbɩɛr gɛlɔ na dɛ a fenə. 25 Pɩɛr gbẽgber nʋɔra a fenə gɩ mãkhana ɲɔ̃pɛl haarɩ pɛw. Pɩɛr dakha gbɩɛr nʋɔra a fenə. 26 Cʋɛ dɛ ɓɔ̃ɓɔna yenã a pɩɛr gãgamã yenana gɩ mɩɛ kha na tabalɩ nɛsɔ yenã oti. 27 Ɓɔ̃ɓɔnaale n khonə gbɩɛr dɔdɔdɔ, wɩ toro ɓalãɓɔnaakɛ wa n gbananɩ tabalɩla. 28 Thela akasɩa thɩr ɓalãɓɔna a cala gɩ dɛ gɩ do tabalɩ gbadaa. 29 Cʋɛ ɔɔ thɔ̃ do thɩ̃sɔ: tasasɔ na thɩ̃ ɲɔdaasɔ na gɩrɛ hɔnɩ bʋla minəsɔ na bilẽsesɔ gɩ do dɩvɛ̃ bonɩ jidaa; cʋɛ gɩ na dɛ kile haar koo. 30 Pɩɛr tabalɩlala mɛr Thãgbaa buru thɩɩnanɛ ga n hale ɩ̃ ƴɛbʋrɔ bɔɔ fɛw.
Dɩɩrɛ dɔ carã dɛ̃ɛ pa cʋʋdaara.
31 Cʋɛ dɔ carã dɛ̃ɛ paar na dɛ kile haar koo. Bɩɛ na ɲɛ̃ɛ: ɔɔ nɔ na ɔɔ jẽjẽ na ɔɔ ɓoldasɔɔkɛ na hɔnɩ gborminə na ɓolda ɩkha gɩ ho amãadɩ gbominesɔ gɩ na phɩ̃ɩ. Cʋɛ gɩ, gɩ fʋ kha gɩ do bɩɛl. 32 Dɔ carã dɛ̃ɛ paara n hanana jɛ̃ɛ maadõ ɔɔ jẽjena: jɛ̃ɛ yẽther n cʋra gɛl bɩɛla, jɛ̃ɛ yẽther n cʋr ʋ̃ʋ gɛla. 33 Cʋra jɔ̃ bɩɛla ɓoldaar yẽther, gɩ hona amãadɩ sɩɩr na amãadɩ gbominesɔ na phɩ̃ɩ gɩ ma kha na sɩɩr. Cʋra otirə jɛ̃ɛ maadona fɛʋʋle dɔ carã dɛ̃ɛ paara na hananɩ. 34 Dɔ carã dɛ̃ɛ pa jɩ̃jɩɩna, cʋra ɓoldaar yenã, gɩ ho amãadɩ sɩɩr na amãadɩ gbominesɔ na phɩ̃ɩ, gɩ ma kha na sɩɩr. 35 Pɩɛr ɓolda bɩɛl gɩ ho amãadɩ gbomine dɔ carã dɛ̃ɛ paarɩ caca jɛ̃ɛ yeɲɔɔ lee para tɩɛr jɩ̃jɩɩna, a birə pɩɛr bɩɛl balaɲɔ jɛ̃ɛ yeɲɔɔ lee para tɩɛr, a birə pɩɛr bɩɛl balãther jɛ̃ɛ yeɲɔɔ lee para tɩɛr. Dɩ mɛ̃ fa pɛr jɛ̃ɛ maadõo lee pasɔɔra fɛʋʋle dɔ carã dɛ̃ɛ paarɩle na hananɩ. 36 Ɓoldaarsɔɔle hɔnɩ amãadɩ gbominesɔ jɩ̃jɩɩna na jɛ̃ɛ n fɔ kha a dɔ bɩɛl; ɔɔ biləni n do dɛ kile haar koo, kɛ wɩ benɩ na ɲɛ̃ɛ. 37 Cʋɛ ɔɔ dɔ carãsɔ makoɲɔ dakha a dɛɛnɛ gɩ dɔ carã dɛ̃ɛ paara ƴũu; a thɩnɛ gɩ mɔ̃ ga n caranɩ ɔɔ ƴɛbʋrɔ. 38 Cʋɛ ɔɔ dɔ carã khɩɛrdasɔ na ɔɔ sɔ̃sʋ̃ɔ pɛdasɔ na dɛ kile haar koo. 39 Dɛ kile haar wa gba kilə kpelẽ yʋɔrsɔ a na cʋʋna dɔ carã dɛ̃ɛ paarra na ɔɔ thɩ̃bisɔ fɛw.
40 Mʋɩjɩ, jɩɛ hɩɩn sa cʋɛ gɩ ho kha na kherereekɛra mɩ nɩna fɩnɩ kɩɛr gɔ̃gʋɔna ƴũu oti.»