Thãgba Kɔ̃tɩnɩ nɔ bɩɛl ʋlfɛ na Ɩjɩrayɛl bɩsana
24
1 Thãgba kɔɔ sor Mʋɩjɩra ayɩ: «Fɛrɛ thɛthɛ n jʋnɛ a ɩna kɛ mɛr Thãgba Kɔ̃tɩnɩ pa na Aarɔ̃ na Nadabɩ na Abɩhu na kɔ̃tɩna kpalãther yʋɔr Ɩjɩrayɛl bɩsanaa kɔ̃tɩ̃sɔɔra, a gburõkhune ƴɔɔ. 2 Sɩ fɛr Mʋɩjɩ dɩbara na tɔ a na wɔrɔ̃ mɛr Thãgba Kɔ̃tɩn, wele na n wɔrɔ̃a'; tɩbɩla dakha na n jʋʋn kha gɔ̃gʋɔna na fɛrɛa'.» 3 Dɩ Mʋɩjɩ jaal a mɩɛ tɩbɩla Thãgba Kɔ̃tɩnɩ thɩmɩɩsɔ fɛw na ɔɔ jɔfʋsɔ fɛw oti. Dɩ tɩbɩla fɛw tu nɔ bɩɛl ayɩ: Sa cʋʋrɛ gɩrɛ fɛʋʋkɛra Thãgba Kɔ̃tɩn sonɩ. 4 Dɩ Mʋɩjɩ kherere Thãgba Kɔ̃tɩnɩ thɩmɩsɔɔra fɛw. Agɩpɩ dɩ ɩɩr duuro phiphiphi a mɩ bonɩ ji paar gɔ̃gɔ̃ horo, sa gba boka thelna yʋɔr yeɲɔ mɔna Ɩjɩrayɛl bɩsanaa ca hanɩ yʋɔr yeɲɔ a kpebɩ. 5 Mɔ̃ gɩ pɩnɩ a pɛrɛ Ɩjɩrayɛl daɓolminə dɩ wɩ ji bonɩ thiinə, a kʋʋrna dakha nakena a jinə 'likha bonɩɛsɔ Thãgba Kɔ̃tɩnna. 6 Dɩ Mʋɩjɩ gbaar tɔmɩn kuru a pɛ thɩ̃ pɛdaara, sa gba tɔmɩn kuruukɛ sɛnɩ a cal bonɩ ji paar. 7 Dɩ a gbaar nɔ bɩɛl ʋlfɛ sɛbɛ a so tɩbɩlaa ƴɛra, dɩ wɩ so: «Sa cʋʋrɛ gɩrɛ fɛʋʋkɛ Thãgba Kɔ̃tɩn sonɩ, sa nɩɩrɛ nũu.» 8 Dɩ Mʋɩjɩ gbaar tɔmɩnɩle a jɛbɩ tɩbɩlala sa so war aa: «Nɔ bɩɛl ʋlfɛrɛɛkɛra Thãgba Kɔ̃tɩn ʋlfɛna nɩnɩ mɔ̃ nɩ nɩɛnɩ thɩmɩaakɛra fɛw, ga tɔmɩn gɩ.»9 Gele pɩnɩ Mʋɩjɩ jʋʋnɛ gɔ̃gʋɔna, ɔr na Aarɔ̃ na Nadabɩ na Abɩhu na Ɩjɩrayɛl bɩsanaa kɔ̃tɩ̃sɔ kpalãther yʋɔr. 10 Dɩ wɩ yɩrɛ Ɩjɩrayɛlɩ Thãgbara, dɩ ɔɔ nɛ balɔ ho safɩɩra bokaar kpãkarãa dɩ ga n carbara, a ho mɔ̃ thãgbara ƴũu n hɩrɛnɩ. 11 Ɩjɩrayɛl bɩsanaa tɩɩ cʋnanɛsɔɔle yɩrɛ Thãgba na yire sɩ aa cʋʋ wɩ puurə'. Dɩ mɛ̃ wɩ kho dɩkɔ a yɔna.
Mʋɩjɩɩ cãa kha na Thãgba gɔ̃gʋɔna ƴũu
12 Thãgba Kɔ̃tɩn sor Mʋɩjɩra ayɩ: «Jʋnɛ a ɩna mar kɛ gɔ̃gʋɔna ƴũu a jɩlɛ kɩɛr, ɩ̃ ha fɩ boka thelnanɛsɔ, ka mɩ kherenɩ jɔfʋ thɩmɩa, kɛ fa dɩɩrnɩ Ɩjɩrayɛl bɩsana.» 13 Dɩ Mʋɩjɩ ɩɩrɛ na ɔɔ khukhu Jojue a jʋʋn Thãgbaa gɔ̃gɔna. 14 Sɩ a kɔɔ sor Ɩjɩrayɛl bɩsanaa kɔ̃tɩ̃sɔɔra ayɩ: «Na n pɩɛrɛ sɩ kɩɛr gɩ dana bɔɔkɛ sa birnɩ na ɩ̃. Nɩ yɩrɛ Aarɔ̃ na Uur, wɩ ha kɛ na nɛrɛ; ado tibil hananɛ thɩ̃ɛ a na gʋʋr, ntɛ n jala wɛra.» 15 Dɩ Mʋɩjɩ jʋʋnɛ gɔ̃gʋɔna, dɩ ndɔlɔ̃paar thire gɔ̃gʋɔna. 16 Dɩ Thãgba Kɔ̃tɩnɩ i dʋbɩ dɛɛnɛ Sɩnayɩ gɔ̃gʋɔna, dɩ ndɔlɔ̃paar thiirəə a dana wire maadõ. Wire makoɲɔ wirera Thãgba Kɔ̃tɩn wer Mʋɩjɩ le ndɔlɔ̃pa bɩnɔ. 17 Sɩ Thãgba Kɔ̃tɩnɩ carbaraale ado Ɩjɩrayɛl bɩsana na yɩ gɩ, dɩɩ ho war dɔ kɔ̃tɩ̃ɩ gɩ Sɩnayɩ gɔ̃gʋɔna ƴũu. 18 Dɩ Mʋɩjɩ lʋʋn ndɔlɔ̃pa bɩnɔna a jʋʋn le gɔ̃gɔ̃ yʋɔ. Dɩ a cʋʋrɛ le dɩwɩlʋ na dɩtɩnɛ kpalaɲɔ.