23
1 «Fa n mɩɩ wɩyɩ thɩmɩasɔ a na kpaarna ga. Fa n ɓã kha na tɩɩ puu a do sõso sojɩdaara'. 2 Fa n 'lar tɩɩ jɔra sa kpa awɩdara a cʋʋ puurə'. Fa n 'lar tɩɩ jɔra, kɛ na hananɩnakɛ hʋɛa' sa tu awɩda kɩɩl paar a mɩɩ pɛr war a golõ fɩl sarʋra ga. 3 Fa n tee pɛr bɔdaara kɩɩl paar ɔɔ bɔdaar dora ga.4 Afɩ caana afɩ lãlaardaarɩ na, agɩbo ɔɔ kũkə̃ dɩ bu, kpaa a hanaa. 5 A fɩ yɩ ʋrɛ n laarɛ fɩnɩɩ kũkə̃ dɩ ji na hẽedaar khiro dɩɩ ho fɩ jala sa fagaa, sɩ buloo thaala a ɓa ɔɔ kũkə̃ a ɩɩr.
6 Fa n ɔmɩ bɔdaarɩkɛ hananɩ hʋɛ ɔɔ kɩɩla ga. 7 Hʋnɔnɛ fĩi na sõso thɩmɩa. Fa n kʋ dɩpa 'leedaar dɩ tɩɩ sarʋ ga, gɩdonɩ mɛrɛ, ma n gba tɩɩ puu dɩ do mar tɩɩ sarʋa'. 8 Fa n tee khaar thɩ̃ɛa', gɩdonɩ wɩrɛrakɛ n yɛnɩ cãa cãa sɩ khaar thɩ̃ɛ n yaar wɛr, dɩɩ khokhɩa tɩɩ saraa thɩmɩ.
9 Fa n hʋɔl kpakpala ga; nɩ jɩrɛ gɩrɛ n dʋɔnɩ kpakpal dʋʋr, gɩdonɩ nɩ kɔɔ dor kpakpala Ejipiti dɩɩra a yɩɛ.
Jɔfʋ hɩɩr yɛna na hɩɩr wi thɩmɩɩra
10 Yɛna maadõo bɩnɔ kʋlɛ thɩɩ, a dire thɩ̃ɛ, a gba. 11 Sɩ yɛna makoɲɔ yɩɛra faa thɩɩ a hɩɩr. Thale, bɔdara afɩ toora n yɩ dɩkɔ wa n kho; gɩrɛ sɛnɩ hɔ̃ nʋma dakha n 'lɛ gɩ wa n kho. Dɩ mɛna fa cʋʋ na afɩ dɩvɛ̃ thɩr lɛ na afɩ olɩvɩ thɩr lɛ dakha.
12 Wire maadona dɔ afɩ thɔ̃ fɛw, sɩ wire makoɲɔ wire hanana cʋrɛ hɩɩr wirera, gɩ do nɔɔ afɩ na afɩ kũkə̃ n 'lɛ hɩɩrɛ, gɩ do nɔɔ afɩ dee khɛrɩ bikuun na kpakpal n puno wɩ fe.
13 Na n jɩɛ ɔ gɩrɛra mɩ so narnɩ bɔɔbɔɔ. Na n jɩɛ dʋ bʋrɛ thãgba kpɩɩsɔɔra, na n dorakɛ awɩ i na n the nɩ nʋɔra ga. Na n werakɛ awɩ iə'.
Thãgba fʋɔr fɛtɩ kɔ̃tɩna yẽther
14 Yɩɛr wo yɩɛr cʋɛ fɛtɩ kɔ̃tɩna yẽther a na dʋbana ɩ̃ i. 15 Cʋɛ buruukɛ wa pɛrnɩ tabɩɩraa fɛtɩ wire makoɲɔ, bile kha sɩpora, kɛ dɔnɩ Abɩbɩ sɩpor. Ɔbɔɔlera buruukɛ wa pɛrnɩ tabɩɩra' fa n kho mɔ̃kɛra jɔfʋʋkɛ mɩ kɔɔ ha fɩnɩ sonɩ; gɩdonɩ ɔ sɩporakɛra fɩ kɔɔ the Ejipiti dɩɩra. Dɩ wa n jɩɩl ɩ̃ ƴɛbʋrɔ na ɲɛ̃ biirə'.
16 Agɩpɩ ɔbɔɔkɛ fa gbanɩ caca thɩ̃ɛ thɩɛnaakɛ fa diirni afɩ lɔɔ, cʋɛ lɛ thɩ̃ gba fɛtɩ. Agɩpɩ ɔbɔɔkɛ fa gbanɩ afɩ ɲɛ̃ thɩ̃ lɔɔ a na kɔna, ɔbɔɔkɛ yɩɛr na n fini cʋɛ lɛ thɩ̃ gba pɩɩr fɛtɩ. 17 Yɩɛr wo yɩɛr kona fɛw afɩ cara na kpar a na jɛ balãther mɛr Kɔ̃tɩn, Thãgba Kɔ̃tɩnɩ ƴɛra.
18 Fa n gba tabɩ buru a gbɛbɩna tɔmɩn a jinə mar bonɩɛa'. Fa n thɩɩn ɩ̃ fɛtɩ bonɩ nʋ̃ niin dɩtɩnɔ gɩ dana duuroə'. 19 Gba afɩ caca thɩ̃ pha, kɛ fɩ gbanɩ thɩɩra, a ɛna ɩ̃ cɔ a hana mɛr Thãgba Kɔ̃tɩn afɩ Thãgba. Na n thɩɩ bʋ̃bir na ɔɔ nɩɩ ɩlɩ̃ ɲɔ̃a'.
Fɩl dɩɩrɛ Kanãa hʋ gbaara.
20 Mɛrɛ, mɩ n thʋɔn thɔ̃thɔ̃ thui a kʋʋl fɩ ƴɩɛ a na n bɛr fɩ hʋɛra, a thɔɔ fɩ a dana paarɩkɛra mɩ kɔɔ gbɛbɩ farnɩ. 21 Na dɔ bʋrɛ a na nɩɛnɛɛ nũu. Fa n laanaa gaa dɛ! A mɛ̃ ga a na tu a na faa afɩ puu cʋʋa'; gɩdonɩ ɩ̃ i a n cʋʋna. 22 Sɩ ado fa nɩɩ nũu bɔɔbɔɔ, ado fa hɩɩn gɩrɛ fɛʋʋkɛ mɩ n so farnɩ oti, ma dor afɩ lãlaardaraa lãlaardaar, na afɩ sodaraa sodaar. 23 Ɩ̃ thɔ̃thɔ̃ thui na gbaan fɩ ƴɛkʋʋlɛ a thɔɔ fɩ a jalna Amɔɔr məlsɔɔ pa na Hɛtɩɩ məlsɔ na Perejɩdara na Kanãadaraa pa na Hɩvɩtɩsɔɔ pa na Jebusɩdaraa pa, dɩ ma bũburõ wer ɓibi.
24 Fa n gburõkhu awɩ thãgbasɔɔra yuurəkɛ a fʋɔr wa'. Fa n phɛl awɩ cʋʋ pasɔɔa', sɩ khaarɛ awɩ thãgbasɔ fɛw, a cʋɔrɛna awɩ thɩl boka gbuunəsɔ fɛw. 25 Na fʋɔrɛ mɛr Thãgba Kɔ̃tɩn dɩbara, kɛ dɔnɩ afɩ Thãgba. Dɩ mɛrɛ ma bɔna fɛr na dɩkɔ, na ɲʋɔn, ɩ̃ weena khoo gɩ the afɩ thɩ̃thɩɩn. 26 Afɩ dʋɔ, khɛr bɩ̃ kʋɛrɛ na hala', khɛr na hale dakha a na do kɔ̃bʋa'. Ma faa fɛr fɩ tɩ̃ fa n hi.
27 Ma thɔnanɛ ma kɔ̃tɩ̃ɩ afɩ ƴɛkʋʋlɔ, ɩ̃ cʋʋ caar fɛw wɩrɛ thɩ̃thɩɩn fa n danɩ, wa n fuule, ɩ̃ cʋʋ afɩ lãlaardara fɛw wa n caalɛ afɩ ƴɛra. 28 Ma thɔnanɛ vivirkpora wɩ kʋʋl fɩ ƴɩɛ, wɩ weele Hɩvɩtɩsɔ na Kanãadara na Hɛtɩɩ məlsɔ, wɩ hʋnɔna fɩ. 29 Sɩ ma weele wɩ fɛw yɛ bɩɛla ga, a mɛ̃ ga dɩɩ na kpolole, dɩ hɔ̃ nʋma na ler a na bir na kɛr wa n kɛ̃kɛrɛna fɩ. 30 Ma n wee wer gbegbegbe ga n mɩɛna mɔna fa n lernɩ fa n jɔr fɩ puno fɩ gba dɩɩɩra koo.
31 Ma pɛrɛ afɩ dɩ pɛl laɲɔ̃ sɩɛra, gɩ jal foo gɩ khɩɛr Fɩlɩsɩtɛ̃sɔɔ laɲɔ̃, gɩ bir gɩ gba Sɩnayɩ bə̃ kparaa foo gɩ jal gɩ khɩɛr Efɩratɩ mɩɩr, gɩdonɩ ma tor dɩɩlee too afɩ ɲɔ̃kɔɔ dɩ fa weele wɩ ɓibi afɩ ƴɛbʋrɔ. 32 Fa n ʋlfɛ nɔ bɩɛl ʋlfɛrɛ yuurəkɛ na wɛr dɩ awɩ thãgbasɔ ga. 33 Fa n do wɩ too afɩ dʋɔa', a mɛ̃ ga wa hal fɛr dɩ fa cʋʋ mar sopuu fa n fʋɔr awɩ thãgbasɔ, dɩ ga do farɛ pheru.»